المنتدى الثقافي > زاوية الشعر الشعبي

ياگلب .. كافينـَه

(1/1)

ميسون نعيم الرومي:
ياگلب .. كافينـَه
ميسون نعيم الرومي
شبعونـَه بچي ..
والروح تبقه حنينه
وك غمك يا گلب ..
ليوين عنده رهينه !
***
دومك رچيچ اوتحن ..
ياگلب كافينه
لاتيأس اولا تهده ابد..
بالضيم ساگينه
***
غربه اوبعيد الدرب ..
والشوگ چاوينه
العين تربي اوما تمل ..
 والوكت ناسينه
***
تعبنه هذا الوكت..
 بلوات بالينه
هانت نگول اوننتظر..
والفرج چا وينه ؟
***
مشتاگه روحي تـِـرِف ..
للنخله والتينه
الدجله وعذيبي يهب ..
الدهلته اوطينه
***
للناي واللحن الشجي ..
عاشگ أنه اونينه
الگعداتنه اوطيبة هلي ..
 يا حلم ودينه
***
ياما گعدنه سوه ..
والحان غنينه
الغيبه طالت تره ..
وانصاف ملگينه
***
بطل رفيف او بس بعد ..
 ياگلب تاذينه
راحن اسنين العمر..
 يا روحي ما بينه!!
***
ضعنه ابمتاهات الزمن ..
الزين والعينه
اتطشر عقدنه انفرط ..
يا دنيه لمـّـيـنـَه..
-( بـَغـداد) .. لمـّـيـنـَه
----------------------------------------
22 / نيسان /2021
ســـــــــــــــــتوكهولم

تصفح

[0] فهرس الرسائل