فركيات شعر شعبي للفنان الشاعر لطيف بولا

[go iraq2006]

شعر شعبي
موّال وأبوذيات
لطيف بولا
1- إش سوّى بي الزمان ولا زال
يا اللّي سكنت روحي ولا زال
كَلب اللي عشك شخصك ولا زَلّ
انت الخنت واقطعت بيّ
* * * * * * * *
2- ما أقدر على هجرة ولو راد
حنّة ينضح العسل والأوراد
وصلة شافي للجروح ولو رَد
أنا بالبيد حبّة حابة حيّة
* * * * * * * *
3- يا اللي سلبت عكَلي مني ونوماي
على خدك يزهي التفاح ونوماي
جميل وقيس من كَبلي ونّو مَيّ
انتِ وبثينة وليلى العامرية
* * * * * * * *
4- أنا بلبل بحبك يشدو وينحب
جمالك شرك وعذاب وينحب
همت واسأل خيالك وين حَب
ثاري شامة على وجهك بليّه
* * * * * * * *
5- عيونك تصيب الكَلب بسهام
يا اللي أبد ما شفت بهواك بس هَم
أنا طير المهاجر، بالفضا بس هام
أشوفك وأنا تايه بـ بريّه
* * * * * * * *
6- همّك عمق جروحي والنادي
وأظل أبكي ويّا الوتر والنادي
بعيد وما تسمع عذاب وناي
حبك قصة وصارت منسية
* * * * * * * *
7- ما أظن حبك يصل للكَلب بأسلاك
وأنا حاضر أموّت الروح بس لاك
وإن جان تلعب على الحبلين بسلاك
اليحب من صدق ما يهاب المنيه
* * * * * * * *
8- العين شافتك والكَلب حال لك
ما تسمع دكَته يا ترف حالك
يا سالب الروح والعكَل مالك
ناس تقتل وناس للحب ضحيّه
* * * * * * * *
9- بطيب خاطر سلمت قلبي بيدك
همت جاتلني العطش بـ بيدك
سهم عيونك وحدر الحنج به دك
شامه واللمى على الشفايف رضاب
* * * * * * * *
10- حط ماصولتك بحلكَك وموصل
بغداد ما تلفيك بعد وموصل
الحب سلك الروح بينّا وموصل
انقطع وما أدري إش صار بيّ
* * * * * * * *

11- لحظك سهم سهم وسيف ماض
وأنا بحبك على الموت ماض
أدري العمر بهواك ماضي
تشبث بالأمل وانقطع بيّ
* * * * * * * *
12- بالحلم زاهي الترف مرة جاني
تخضعت وكَتلة لبيك من رجاني
مرّة أشوفك ملاك ومرة جانِ
ومرّة طبيب شافي ومرّة كَصاب
* * * * * * * *
مع تحيات
الفنان الشاعر
لطيف بولا
http://alqushnaya1945.jeeran.com/