جير و بسامير
رحيم العراقي
ما مشتاكَـ لا والله .. ولا حاسبكم احباب
بس حملي كسر ظهري..وإلتـّجيت عالباب..
إنفتح باب الجرح والحوش..وباب أسراري من صدري
إعصار وجرف كل عمري
وإنفـتحـت بروحـي أبواب وأبواب..
أول ما دست كاشيه مكسوره
لمن جِـنـّّـه نزحف جانت إتطكَـْـطكَـَ
إيه ياحوشنه الضـّـيكَـ
يامن جان كل الكون ..
طبـّكَـناه بلف ياعلي.. و كل كاشية من فد لون
لسه بحوشنه يم قاطع الدوره ..على البسمار
أوراق الكهرباء والماي والحـّراس والتليفون
وبالرازونه..كل ما ناكل تباوينه بزون..
لسّـه بحوشنه إمصـّلى عتيكَـ وباريه وماعون فافون
وطيارة ورق مكَطوعه وجعاب
ودعابل ملحه وإبطالة سفن آب..
أنا الناسي الطفوله وسافر وشاب
ورجع للبيت ..نفسه البيت.. شنهو إستجد بي ..؟
..بس عش الغراب..
حتى الصور عالحيطان ماحفظت ملامحهه ..
إنمحت.. ذابت ..وغابت ضمن من غاب..
لكَيت بحوشنه إمرايه على الكاشي
شفت بيهه وجه محتار.. ما مفهوم ..
لا راجع ولا ماشي..
شفت عيون تعبانه وتجاعيد وسمار وشيب وتراب
نفخت إبحسره..كل قوتي..
بس ماراح منها..غير التراب..
..بعد بـيَّ محبه ..ومامش احباب
بعد بـيَّّ لعب..و صحابي متغربين..
لو أموات..والباقين شِيّـاب..
جنـّّـه اطفال متعلكَين بالبسمارعلى حيطان غرفتنه..
بصـوَرنه وإحنه طلاب..
بالمدرسه..من أربعطعش مادون
إبكَــهوه بشـارع السـعـدون
وإحنه شـــــــباب
صورنه الحمره ..وإحنه أوجوه ممنوعه
وصورنه الخاكي ...وإحنه جنود
مشروره ملابسنه على الأسلاك والرايات مرفوعه
صورنه الزركَـه وإحنه أشجار مكَــطوعه
ونأّدي التحيه إلمنجل الحطاب
وعمرنه إيدور بينه ..إيدور دولاب
لو ذل وحرب ..
لو مدري شيسّـمونه ..لو إرهاب..
..ياحـوش الطفـوله الماعرفناهه
ولا شاهد علينه إيكَول عشناهه
الشمس حركَت سطحنه و..جير..
من مرزيبنه المشروم ينزل جير
ودم متخـّـثر بريش العصافير
على شِبّـاك غرفتنه و ستايرنه
المخـتنكَه بجكَـــــــــــــــــايرنه..وينزل جير
بأثر إيدي على الشباك من جنت إنتظر..و ارسم مشاوير..
بتاريخ إمتحان الهندسة والجبر مـكـتوب بطباشير
على الجغرافيه...من صفحه عشرين
إلصفحه إثمانيه وعشرين.. تحضير..
وعلى آخر شهر تموز عام ثمانيه وستين
من جابت الفاره بجيس الطحين
وطفت نار المواكَد والكوانين
وإهتزت وطاحت صور لينين
وكل إعكَال..كل شارب..لكَف طين..
ينزل جير...على بصمات ورديه
بكَــــشر زهدي وجنحان الصراصير
.. لا لوحه ولا منظر طـــــبيعي ولا تصـاوير
بحيطــــان الغـــــرف.. جـــــــير وبسامير...
رحيم العراقي
الباخرة مردف
البصرة _ دبي
