ܚܒ݂ܪܐ ܙܐܦܢܐ
ܐܝܼܬ ܗܘܵܐ ܠܝܼ ܚܲܒ݂ܪܵܐ ܪܵܒܵܐ ܗܲܘܢܵـܢܵܐ
ܒܡܲܠܚܲܡܬܵܐ ܕܚܲܒܪܹ̈ܐ ܩܵܐ ܕܐܵܗܵܐ ܓܵܢܵܐ
ܪܵܫܸܡ ܗܘܵܐ ܨܘܼܪܬܵܐ ܪܵܒܵܐ ܛܝܼܡܵܢܬܵܐ
ܚܸܙܘܵܗ̇ ܓܲܪܫܵܢܵܐ
ܡܸܠܝܹ̈ܐ ܡܚܒ݂ܝܼܫܵܬ݂ܵܐ ܪܵܒܵܐ ܨܵܘܵܢܹ̈ܐ
ܚܸܫܵܐ ܘܟܘܿܦܘܼܬܵܐ
ܘܚܦܵܪܬܵܐ ܕܚܲܕ݇ ܓܘܼܒܵܐ ܒܐܘܼܪܚܵܐ ܕܚܲܒ݂ܪܘܼܬܵܐ.
ܠܲܝܬ ܗܘܵܐ ܚܲܕ݇ ܝܲܘܡܵܐ ܕܠܵܐ ܐ݇ܡܸܪܹܗ ܩܵܬـܝܼ
ܐܲܢ݇ܬ ܝܼܘܸܬ ܚܲܝܝܼ ܘܒܲܗܪܵܐ ܕܐܵܢܝ݇ ܥܲܝܢܝܼ
ܕܐܲܢ݇ܬ ܝ݇ܘܸܬ ܫܲܘܬܵܦܵܐ ܒܕܐܵܗܵܐ ܐܝܼܬܘܼܬܝܼ
ܬܵܐ ܩܲܪܒܸܢ ܟܸܣܠܝܼ ܡܠܝܼܠܵܗ̇ ܥܝܼܩܘܼܬܝܼ
ܡܠܝܼܠܵܗ̇ ܣܢܝܼܩܘܼܬܝܼ
ܡܠܝܼܠܵܗ ܚܹܐܪܘܼܬܝܼ.
ܚܲܒ݂ܪܵܐ ܙܹܐܦܵܢܵܐ ܚܲܒ݂ܪܵܐ ܕܙܥܘܿܪܘܼܬܝܼ
ܟܘܿܠܵܝܗܝ ܚܲܒܪ̈ܵܢܹ̈ܗ ܝܼܗܘܵܘ ܡ̣ܢ ܕܲܗܒ݂ܵܐ
ܙܵܩܸܪ ܗܘܵܐ ܩܵܬـܝܼ ܠܒ݂ܝܼܫܬܵܐ ܡ̣ܢ ܒܲܗܪܵܐ
ܘܙܵܪܸܥ ܗܘܵܐ ܒܐܘܼܪܚܝܼ ܟܲܘܟ݂ܒܹ̈ܐ ܠܲܘܓ̰ܵܢܹ̈ܐ
ܘܒܹܝܬ ܦܲܠܓܵܝܗܝ ܣܲܗܪܵܐ
ܡܲܠܗܹܐ ܗܘܵܐ ܦܘܼܢܕܹܐ ܩܵܕ݇ܡ ܐܲܩܠܹ̈ܐ ܕܝܸܡܝܼ
ܐܲܡܝܼܢ ܒܹܐܡܵܪܵܐ ܒܚܵܡܸܢ ܠܐܝܼܬܘܼܬܵܟ݂ܝ
ܘܟܘܿܠܵܝܗܝ ܐܵܢܝ݇ ܒܢܘܿܢܵܟ݂ܝ ܒܕܲܥܬܝܼܕ ܒܸܫܪܵܪܵܐ.
ܫܸܢܹ̈ܐ ܒܸܥܒܼܵܪܵܐ
ܙܲܒ݂ܢܵܐ ܦܲܪܬܘܼܠܹܐ
ܟܸܬܘܹܐ ܒܸܒܪܵܙܵܐ ܡ̣ܢ ܐܘܼܪܚܵܐ ܕܚܲܒ݂ܪܝܼ
ܒܸܗܘܵܝܵܐ ܩܝܼܢܬܵܐ
ܒܪܵܝܵܐ ܗܲܒܵܒܹ̈ܐ
ܡܛܵܝܵܐ ܠܪܲܘܚܵܢܵܐ
ܦܪܵܩܵܐ ܡܥܲܘܩܵܢܵܐ
ܡܛܵܝܵܐ ܠܪܘܼܡܪܵܡܵܐ
ܕܩܵܐܸܡ ܠܲܘܓ̰ܵܢܵܐ
ܕܩܵܐܸܡ ܦܘܼܪܩܵܢܵܐ.
ܙܲܒ݂ܢܵܐ ܒܸܥܒܼܵܪܵܐ
ܚܫܵܒ݂ܬـܝܼ ܚܲܠܡܘܼܢܹܐ
ܐܲܡܝܼܢ ܫܲܪܘܼܪܹܐ ܠܥܒܼܵܕܹܐ ܨܵܘܵܢܹܐ
ܕܦܠܵܛܵܐ ܝܗ݇ܘܵܐ ܡܚܲܒ݂ܪܝܼ ܒܐܵܗ ܙܲܒ݂ܢܵܐ ܘܕܵܪܵܐ.
ܐܵܗܵܐ ܨܲܠܡܲܢܬـܝܼ ܗܘܹܐ ܠܵܗ̇ ܚܲܕ݇ ܫܪܵܪܵܐ
ܗܘܹܐ ܠܵܗ̇ ܬܪܘܿܨܬܵܐ ܒܐܘܼܪܚܵܐ ܕܚܲܒ݂ܪܘܼܬܵܐ
ܟܲܕ ܐܵܢܵܐ ܚܲܒ݂ܪܵܐ ܐܲܡܝܼܢ ܒܸܥܒ݂ܵܕܵܝܼ
ܚܲܒܪܹ̈ܐ ܡܲܪܝܼܪܹ̈ܐ ܪܲܚܡܝܼ ܫܲܕܘܼܪܝܼ
ܒܐܘܼܪܚܝܼ ܒܸܕܪܵܝܵܐ ܩܘܼܠܝܵـܬ݂ܵܐ ܘܟܡܹܐܢܹ̈ܐ
ܐܲܡܝܼܢ ܫܲܕܘܼܪܝܼ ܚܲܒܪܹ̈ܐ ܚܸܫܵܢܹ̈ܐ
ܚܲܒܪܹ̈ܐ ܕܟܘܿܦܘܼܬܵܐ
ܚܲܒܪܹ̈ܐ ܨܵܘܵܢܹ̈ܐ ܒܐܘܼܪܚܵܐ ܕܚܲܒ݂ܪܘܼܬܵܐ
ܘܨܠܵܒ݂ܝܼ ܒܬܲܪܩܲܠܬܵܐ
ܕܨܵܠܸܢ ܠܐܵܢܝ݇ ܥܘܼܡܩܹ̈ܐ ܕܡܸܠܝܹܐ ܝܠܵܝܗܝ ܚܪ̈ܵܒܹܐ
ܕܪܵܝܝܼ ܒܗܲܘܝܵــܬ݂ܵܐ
ܕܪܵܝܝܼ ܒܥܲܘܩܵܢܹ̈ܐ
ܟܲܕ ܦܠܵܛܵܝܗܝ ܬܝܵܡܬܵܐ ܠܟܘܼܠܦܲܬـܝܼ ܙܥܘܿܪܬܵܐ.
ܚܲܒ݂ܪܵܐ ܨܵܘܵܢܵܐ
ܚܲܒ݂ܪܵܐ ܛܵܠܘܿܡܵܐ ܕܠܲܝܬ ܠܹܗ ܟܹܐܢܘܼܬܵܐ
ܐܵܢܵܐ ܫܲܪܝܼܪܵܐ ܩܵܬܘܼܟܼ ܗܲܪ ܗܘܝܼܵܐ
ܟܠ ܙܲܒ݂ܢܵܐ ܘܕܵܪܵܐ
ܠܵܐ ܚܵܫܒܸܬ ܓܵܢܘܼܟܼ ܪܵܒܵܐ ܗܲܘܢܵܢܵܐ
ܕܡܨܹܐܠܘܼܟܼ ܚܲܕ݇ ܙܲܒ݂ܢܵܐ
ܒܐܘܼܚܵܐ ܕܚܲܒ݂ܪܘܼܬܵܐ
ܕܵܪܸܬ ܠܝܼ ܒܐܘܼܚܵܐ ܕܠܲܝܬ ܠܵܗ̇ ܫܘܼܠܵܡܵܐ
ܕܠܲܝܬ ܠܵܗ̇ ܦܘܼܪܩܵܢܵܐ
ܕܦܵܪܩܸܬ ܡܲܪܕܘܼܬܝܼ
ܕܫܵܝܦܸܬ ܬܲܫܥܝܼܬـܝܼ
ܡ̣ܢ ܐܵܗܵܐ ܥܲܠܡܵܐ.