وصلنا والحمد لله

[سبع صنايع]

اخوتي احبتي

قبل قليل وصلنا الى دالاس تكساس والحمد لله
استقبلني خالي بالمطار والمنظمة اتاخروا وخالي اخذني وكان مجضرلي حفلة بسيطة وعشة وعافني وراح وهسة اني دا اكتبلكم مقتطفات من الرحلة الصعبة جدا

الرحلة طولت عندي 48 ساعة من البيت للبيت وكانت شاقة جدا جدا
البوري الي انظربناه في عمان كان ممتوقع اذ كان الترانزيت 14 ساعة وكان لازم  نبقى بالمطار وليس الذهاب الى فندق عالية وتخيلوا الحالة ولغوة الاطفال والنومة على الكراسي واخونة بلاك ووتر مشكور اتكفل بترتيب امور الطعام مع المنظمة

بعدين طرنة الى فرانكفورت وبقينة 4 ساعات وتفاجئنا باسعار الطعام والماء الغالية
طرنة الى شيكاغو وطولت الرحلة 8 ساعات ومناك توزعنة الكل على الولايات المقصودة

اني جدا تعبان وراح انام لأن اسد كسر ظهري من الركض وراه بس رغم ذلك هم لكة ناس تحبه ههههههههههههههه

تحياتي الى كل اخوتي وخواتي اللي سافروا وياية واكلهم حمد الله على السلامة والله يسهل امركم


اخوكم ابو اسد

[angie-dawood]

الف الحمداللة على السلامة انشااللة تكون ولاية الخير والرزق وانشااللة تشوفون كل الخير يارب

[ام يلدا]

الله يبشرك بالخير ويفرح قلبك وتستقرون وتبدون لكم حياة سعيدة
بس يا ريت من تكعد بعدين من النوم تسولف لنا من طق طق لسلام عليكم
وشنو صار بالرحلة واشلونه وضعك النفسي اليوم 

-
الله يوفق الجميع
محبة

المخضرمة أم يلدا – مترجمة - عمان الأردن 2005 – في انتظار التجييك الأمني - الأسبوع الأول من السنة الخامسة انتظارا
 

[فحامي]

الحمد لله على السلامة وان شاء الله نسمع عنك اخبار كلهة حلوة
اخوك الفحامي

[ابو لانا]

مبروووووك والف الحمد لله على سلامة وصولكم والله يخليلك اسد والعائلة ان شاء الله الاستقرار وراحة البال

[nana09]

مبروك والف الحمد الله ع السلامة لكل الي وصلوا اليوم
ويلكوم تو اميريكا  مثل مايكول عمك هنا
اشو بلاك ووتر لهسة مامبين لازم ملتهي ب الاكل

[مصطفى السيماتي]

الف الف الف الحمد لله على سلامتكم ... وان شاء الله راح ترتاحون بهاي الولاية


بالتوفيق

[المهاجر 2009]

الف الحمدلله على سلامتكم
الله يكتبلكم الرزق ببلدكم الجديد امين

[starxb]

الف الحمد لله  على سلامت الوصول اخي سبع صنايع تعب الرحله هسه ايزول . اتمنالك حياة جديده خاليه من المتاعب ومليئه بالاءمل والامان والاستقرار لك ولي عائلتك الكريمه .
 

           ابو مريم

[Sasy]

الف الف مبروك اخي العزيز وانشاءالله ترتاح ويوفق ربي انشاءالله ويخليك اسودي

تحياتي
ساسي

[pro77]

سبع صنايععععععععععععع الف مبروكككككككككككككككككككككككككككككككككككككككككك


ابو هدى

[روزماري]

ألف الحمدلله على وصولكم ويارب تلكون كل الراحة والموفقية

روزماري

[suzie83]

الف مبروووك    .. اخوية العزيز تستاهل  كل  خير والله ..ان شاء الله ترتاح بحياتك  الجديدة  ..ويا ريت  من تكعد   وانت  شوية  نشط تكتب لنا  تفاصيل عن الرحلة  واول انطباعاتك عن  الحياة  هناك

[toofy]

الف الحمد لله على السلامه ... ان شاء الله فاتحة خير الك ولعائلتك ....تمنياتي لك بالتوفيق بحياتك الجديده بس من تكعد نريد منك كل التفاصيل عن الرحلة والولايه
تحياتي toofy

[roea]

مبروك أخوية العزيز
ألف ميروك و شايف كل الخير في بلد الاحلام و مستاهلها
أتمنالك التوفيق و الراحة و الاستقرار السريع

أختك روية  \  عمان

[lisaa]

الحمدالله على السلامة اخوية سبع صنايع انشالله الجميع بخير .بس حبيت تسولفنة بخصوص الحقائب سلمتها بعمان و استلمتها بتكساس لو شلون ؟؟؟  و على نوع التفتيش بالمطارات الي مريت بيها؟


سلامي
Lisaaaaa

[سيزر]

الف مبروك اخونه العزيز ابو أسد ... انشاء الله بداية خير الك ولاهلك وتعيش بخير ورزق وفرح وسعاده ومي وكهرباء وتكييف وكلشي وكلاشي ... تستاهلون كل خير انته وبلاك ووتر الطيب النصوح ... على فكره ... كان وياكم بالرحله صديق اليه اسمه سمير ... خطيه بس لا انضرب بنفس البوري مال 14 ساعه بالمطار... يله كل تعب وراه راحه ما طول اطلعت ووصلت بسلامه .. بس من تفرغ نريد تفاصيللك وملاحظاتك بالرحله الطويله اللي عشتها بــ 48 ساعه ... لكي الكل يستفادون ... مع خالص شكري وتقديري الك ولكل الاعضاء اللي وصلوا بسلامه ..

اخوك ســـــــيزر

[AbU-SaRa]

 الف الحمد الله عالسلامة وانشاء الله تتحقق كل امانيك يا وردة تحياتي للعراقيين الي وياك...بس من تكعد سولفنه تفاصيل أكثر عن الرحلة ...


        أخوك أبو ســــــــــارة

[Iron_man]

مبروك لك اخي سبع .. على سلامة الوصول وانشاء الله تجد الراحة والطمأنينة في حياتك


اخوكم
Iron_man

[NOOR 2]

مبروك لك سلامة الوصول

نتمنى لك النجاح

NOOR 2

[القرش]

                                         السلام عليكم

 مليون مبروك عليكم والف الحمد لله على السلامه اخويه ابو اسد وان شاء الله تشوف كل الخير بحياتك الجديده . وان شاء الله نترقب مواضعيك بعد ان تستقر وترتاح .الف الف الف مبروك .

 ابو انس

[أبــو دجـــلة]

السلام عليكم

أغاتي الكريم .. سبع صنايع

تحياتي .. الحمد لله على سلامة وصولكم , مبروك خبر فرح وسعادة .. خبر حلو
أتمنى لكم الموفقية والنجاح .. واللهم ييسر لكم سبل السعادة والخير والرفاهية
ويعزز ثقتكم ويقوي عزيمتكم بما فيه نجاحكم في الحياة الجديدة .. موفقين
مع تقديري

أخوكم .. أبـــو دجــــلة

**

[البحار68]

مبروك الوصول والحمد لله على سلامتكم وان شاء الله الموفقية والنجاح والاستقرار الدائم
ربي يحفضلك أسد وتشوفه خريج هارفرد

امنياتي الحلوة

[geb]

الحمد لله على السلامة ابو اسد همزين طمنتنة عليكم وهمزين عرفت منك انه وصلتوا لان اخوية هم وياكم على نفس الرحلة الي اسمه بلاك ووتر لان بصراحة ضل بالي عليه كلش لان ما خابرنة المهم بلاك ووتر جان مفيد الكم لان هذا اخوية الطويل بلاك ووتر اعرفة رجال مفيد و يحب يساعد الجميع ...الف الحمد لله على سلامة الوصول

[ضايج]

الحمد لله على السلامة ان شاء الله بالتوفيق
اتمنالك الموفقية بحياتك الجديدة وان شاء الله تشوفون كل الخير
سلامنه الى الاهل كلهم والى اسد خصوصاً
ان شاء الله يوم نكتب قصة وصولنه وكل اعضاء المنتدى

[يوجد امل]

اخي ابو اسد
نشكر الله على  سلامتك
ان شاء الله الموفقية والنجاح
سلام الله معك
اخوك يوجد امل

[show]

الحمد لله على سلامه الوصول اخي ابو اسد
اتمنى لك النجاح و الاستقرار الدائم

بالتوفيق للجميع

[Radio-Amateur]

الحمد لله على سلامة الوصول.. وادعوه  سبحانه وتعالى لك بالتوفيق والسؤدد

[عكعك التطوى]

الحمد لله على سلامتك ابو اسد اتمنالك الخير والتوفيق والنجاح والحياه السعيده انشاءالله

تحياتي وبالتوفيق

[Banah09]

اخونا سبع صنايع
الف الحمد لله على سلامة الوصول، الله يعينك على البهذلة مال المطارات وهذا اللي اني شيله همه بالسفر اتمنه اتسولف النه بعدين من ترتاح شنو اهم الاشياء اللي لازم انحطه ابالنه للاطفال واشلون انساعدهم وانساعد نفسنه على تخطي الرحله والحمد لله على سلامتك مره ثانية


ام ياسر

[ماستر]

الحمد لله على السلامة

[البصير]

الحمد لله على سلامة الووصول

حياة سعيده هانئه مليئه بالأمان و الأستقرار و راحة البال

[good sniper]

الاخ ابو اسد  الحمدلله على سلامتكم اتمنى لكم حياة سعيد وعيش رغيد




ابو فهمي

[john85]

الحمد لله على السلامة اخوية ابو اسد الوردة...يارب ان شاء الله الاستقرار و الموفقية


اخوك ابو داليا

[AbEr SbiL]

ااااااااااالف مبروووك والحمد الله عل السلامه وانشاء الله فاتحت خير عليك يارب

[ShadowMan]

اخوية سبع صنايع

الف الحمد لله على السلامة وان شاء الله الموفقية والحياة السعيدة الهانئة الهادئة.
 

[سبع صنايع]

اخوتي احبتي

اني هسة كعدت من النوم وكان نوم عميق وكنت افز بس من يفصل التبريد عبالي طفت الكهرباء واسد يكللي بابا كوم شخل المولدة ههههههه

اني اشكركم جميعا على التهنئة واتمنالكم كل الخير وتسهيل السفر

احاول اجاوب على اسئلتكم

اخت ليسا الحقائب شحناهه ابغداد واستلمناهه بعمان بس ضاعت جنطة  كبيرة لاحد اخوتنة وكلشي مكدر يسوي لأن كنا رح نطير لالمانيا واستلمناهن بشيكاغو وكلمن شحنهن على ولايته واستلمتهن بدالاس عموما للمتزوج العملية مو سهلة وينرادلهه متابعة دائمة
بالنسبة للتفتيش فكان روتيني ومتكرر بكل المطارات بس كان جدا دقيق بمطار شيكاغو وخاص بالنسبة النة وتنزعون حتى تكرمون الاحذية  بس بدالاس محد كلك وين رايح ولا احد شاف حتى الجواز بالنسبة للفلوس محد يكلك شكد شايل بس يتحسسوهن وبس الاردني اباب الطيارة كال هاي فلوس كتلة اي  ولا اي شخص امريكي سالك شكد شايل

اخوية سيزر اني تعرفت على سمير عن طريق الاخ حداد السيوف لان طلع صديق الطفولة مالتة والاخ سمير ذكي ومتعاون وساعدنة هواية بتصليح حاسباتنة وخطية كان يريد يتصل بامه باي طريقة بس مكدر ورغم انه باربع عيون بس خوش يبصبص ههههههههههه تحياتي اله اذا يقرة كلامي

اخوية ماجلان اني كان المفروض اروح للشقة الجديدة بس المنظمة اتاخرت ومن اجوا كنت صاعد بسيارة خالي اخذنة منهم المفتاح والعنوان وبعد شوية نروح نشوف شنو الفلم وان شاء الله اكدر اتواصل وية اخوتي بعد ما احصل انترنت بالشقة بس هنا خالي ممتزوج وهو بعمري يعني صديقي واصدقائة كلهم فرحانين باسد لان اول مرة يشوفون طفل عراقي لان تقريبا كلهم ممتزوجين وهواية عرضوا المساعدة علية

اخويةgeb

الاخ بلاك ووتر بصحة جيدة بس كان معوز معطر ههههههههه ومثل مكلت كان جدا متعاون حتى ابغداد كان واكف على البوردنغ واخر واحد صعد للطيارة وكان يحاول يتصل بيكم بالمانيا وبشيكاغو بس مكدرنة حتى تليفوني الثريا مشتغل بامريكا

بالنسبة لتفاصيل الرحلة فراح اذكر الشغلات الجديدة

احنة طرنة من بغداد على عالية واباب الكاونتر اردني خبث وياية وكال الة تقرير من الطبابة مال المطار علمود حالة زوجتك الصحية رحت للطبابة الي بالمطار اللي تبعد مسافة ربع ساعة مشي كالوا هاي اله نسائية والنسائية خارج المطار واله تاخذ تكسي هاي كلة والطيارة بعدلهه ساعة والله سهلهه وسخرلنة ابو اسعاف بعشر دولارات ودانة وجابنة ومن رجعنة ملكينة الاردني ومحد اخذ التقرير لعد شكد خبيث

بعمان اذا كان عدكم ترنزيت طويل فكبل روح للمصلى وطكلك نومة لان ماكو مكان تنام والانترنت مفتوح بعمان واسيا سيل وعراقنا يشتغل وخابرنة اهلنة والاكل اسعارة مناسبة ومقاربة اذا مو ارخص من بغداد

بالمانيا كلشي غالي بطل المي بسبع دولارات واتريكت 2 نسكافي و2 كرواسو  ب20 دولار

من شيكاغو لدالاس بالطيارة يقدمولك بس شراب واذا تريد اكل تدفع فلوس وكارد مو كاش

انطباعي الاول امريكا منظمة جدا وحلوة ومجمع خالي طاك والاجار غرفة وصالة 600 دولار بس خل اروح لشقتي وافتهم الفلم

وتدللون

[ayoka]

الف الحمد الله على السلامه ابو اسد الورده

[siv2007]

اكلك هذا انت الكاعد بالطائره يم السايق؟ الحمد لله على سلامة وصولك وان شاء الله بالتوفيق في كل خطوه

[الكاوبوي العراقي]

مبروك لابو اسد والاخ بلاك ووتر سلامة الوصول لاميركا
بالتوفيق

[mohammed2009]

اللللللللللللللللللللف مبــــــــــــــــــــــروك الوصول الى امريكا ... والحمدلله على السلامه اخويه ابو اسد

اتمنالك الاستقرار وراحه البال والحياه السعيده ...

[هنوة]

الحمد لله على السلامة اخوية ابو اسد اتمنالك الموفقية والاستقرار في حياتك الجديدة


ام انس

[ايات]

الف الف مبروك وحمد لله على السلامة وان شاء الله تقق كل امانيك .....اختك ايات

[Wingo]

ألف ألف مبرووك
الله يوفقك لكل خير و إن شاء الله نسمع الأخبار الطيبة منكم بإستمرار

[الشذر]

الف الحمدالله على السلامه والف مبروك وانشاءالله كل الخير امامك


      بلتوفيق

[mr neo]

ااااااااااااالف ااااااااااااااالف مبروووووووووووووووووووووووك اخويه

[hopeforall]

اخي العزيز ابو اسد الحمد لله على السلامة

اتمنالك حياة موفقة وسعيدة واهم شي تجد عمل مناسب بأقرب وقت ان شاء الله

اتمنى متنسانا بكتابة التفاصيل للايام القادمة .واهم شي عن المنظمة والمساعدات وكم مدتها والايجارات بس مو مثل مجمع خالك الطاك ههههههههههه.

مع تمنياتي لك بالتوفيق

اخوكم

hopeforall

[blackwater]

بعدين اسولف صاير خروف من التعب ..تحياتي لنونا والكل الاخوان \

باي عفية

[عاشق تراب العراق]

الف مبروك اخونة ابو اسد و بلاك ووتر على سلامة الوصول اللللللللله شكد حلو من نسمع احد الاعضاء وصل بخير و سلامة و تعوض صبرهم خير ,يوم للجميع و اني من ضمنهم طبعا ان شاء الله

[free2ea]

الف مبروك حبيبي والحمد لله على السلامة
وبالتوفيق

[traveler]

مبروك حبيبي سبع صنايع اني هم جاي الدالاس ان شاء الله بس انت وين عايش هسه يعني بيا مدينة فورت وورث لو وين ؟

تحياتي.......traveler

[رامي سلام]

الف الحمدالله علاالسلامه نتمنالك السعاده والتوفيق بحياتك
اخي اني راح اكون جيرانك عن قريب بس اريدك تسئلي خالك او اي عراقي يمك عن مدينة ابلي كتبت موضوع بس ماكو اي عراقي بيه واني خايف مدينه مو زينه وانشالله
تكتب التفاصيل نسمع اخبارك الحلوه تحياتي                                                                                                                                                                                                                                                        

[عراقي بلبنان]

الف مبروك الوصول

[blackwater]

ما ادري شكتب بعد ..بالاول الحمد لله على سلامتي لان وصلت 

طبعا اخوية سبع صنايع ما قصر بالشرح ...وطبعا احلى شي بوري عمان لان ما طرنا على الملكية الاردنية مباشرة لشيكاغو لذلك ما ودونة فندق ضلينا بصالة الترانزيت 14 ساعة هية بس هاي اللي تهد الحيل

يعني اللي يطير دايركت على الملكية احسن بهواي ولو هوة مو بكيف الواحد

المهم ...كعدنا بشقة ويانا رووم مايت room mate زميل وياك بالشقة عبارة عن غرفة نوم مشتركة و هول وهوة مطبخ على صفحه يعني شي مرتب واكيد نضيف ...الحي كلش حلو هاديء جدا جدا جدا جداجدا للصبح

اللي يطير لازم ياخذ وياه عطر بالجنطة المحمولة ..مو معطر ..عطر لان مطار بغداد ما يخلون المعطر يصعد بالجنطة المحمولة ...لان ساعات طويلة بلا دوش شوية زحمة ولو يعني متصير حيل ..بس للضرورة القصوى


الرحلات الدولية ما تكدر تشيل وياك سوائل مثل بطل ماي لو موطة بكلاص ...

اما عن امريكا .....فكل شي مباح بالطيران ...يعني الناس جايبة لفات و ببسي وموطة وشرابت ويدخل للطيارة ...

اما المنظمة والحباشات بعد لحد الان كلشي منعرف ....بس اول ما تدخل مكان سكنك راح تلكة محضريلك هواي حباشات منها

فرشة اسنان ومعجون ...
معجون طماطة.. بطل زيت ..كبس صغير طحين صفر ..كيس شكر ..ملح ...صابون وشامبو وزاهي

بتيتة كيلوين تقريبا وطمامة وخيارتين ...وسيت طبخ طاوة وجداري وكلاصات ...ومواعين وجفجير وجمجة

كلينكس بانواعه ...شربت جليكان 2 ...وحليب جليكان 2 ...فلفل اسود ...تبسي كبير ...

ميز حاسوب صغير ...بردة حمام ...ودجاج افخاذ ...جزر ....بصل .خل...وهواي امور نسيتها ...يعني اللي يجي لا يحير بالاكل اول يومين او ثلاثة ...لان الثلاجة مليانة ....

اني حطيت قطعتين دجاج ..وغركتهم بالخل نصهم ...فورتهم بالخل على نار هادية ...لما سويت اصابع بتيتة ...وخليت زيت وية الدجاج حتة يحمس ...وشوية مي ..وذبيت البتيتة فوكاها وفلفل اسود وملح ..

لما فار و مص المي وصار تبسي ابو البتيتة اللي تلزك بالجعبية والدجاج اللازك بالتبسي وجيب خاشوكة وحك واكل ..خهخخخخخخخخخخخخ

باي

[ayoka]

حبيبي بلاك وتر الحمد الله على سلامه الوصول واتنمنالك الحياه المستقره

[حداد السيوف]

مبروووووووووووووووووووووككككككككك

وأخيرا وصل الاسد ابو الاسود --------  سبع صنايع

لك عمي والله هسه امريكا حلت وصارت احلى

هلا بالبطل --- هلا بالغالي -- هلا بأعزر الناس ابو اسد يا أسد

اتمنيت انت بكونيتكت لتشوف جان شون كلبتهه كلب

والله ضحكتني عل سمير --- سمير خوش ولد ومن اهل الله  ويحب الخير للناس كلهه

ان شاء اسمع صوتك ولاتنسى تخابرني واذا ضيعت الرقم كولي اخوك الصغير

حداد السيوف

[ام تبارك]

الف الحمد لله على السلامة يا ورد وميحتاج توصفلنة التعب لان اني لحد الان تعبانة من السفر ههههههه اما الجهال بالرحلة ف يخلون الواحد يفقد اعصابة 

انشالله الكل يوصل ويستقر ويرتاح ياربي اختكم ام تبارك
ويسكنسون - ميلووكي

[احلى بابليه]

الف حمد الله على السلامه اخونه سبع صنايع وان شاءالله ترتاح وتلكي كل الخير بوجهك
و حمدالله على سلامة اخونا بلاك وتر وعاشت ايدك على طريقة عمل تبسي الدجاج الي مبين كلش طيب هههههههههههههههههههههههههههه وهمزين منسيت تحط الفلفل الاسود 

[سبع صنايع]

اخوتي احبتي


مشاعركم طيبة وتخجل الواحد

اني اشكركم اخوتي ايوكا siv2007 الكابوي العراقي محمد 2009 ونغو   الشذر   مستر نيو  هوبفورال  عاشق تراب العراق فري عراقي بلبنان

خواتي العزيزات ام انس ايات ام تبارك احلى بابلية الله يبارك بيكم وشكرا على الكلمات الجميلة وان شاء الله راحة البال


الاخ المناضل ترافلر  اني هسة كاعد بمنطقة كلش حلوة وراقية اسمهه ارفنغ ورح افتح موضوع بعد شوية حول ظروف سكني بهاي المنطقة

اخوية رامي اليوم اسألك خالي حول المنطقة وتدلل

اخوية بلاك ووتر

الف حمد الله على السلامة وان شاء الله راح التعب بعد الشاور هههههههه 
وعاشت ايدك على التبسي الطيب

اخوية وصديقي حداد السيوف

الله يبارك بيك ومشكور على كلامك الطيب يا طيب
اتمنى سمير يكون وصل لان اعتقد هو على ولايتك
حاول اتدزلي رقمك لان مدري وين صار

تحياتي

[mongoose]

 الحمدلله على سلامتك اخونا سبع
وبلاك وتر الله يسهل عليكم بيتكم الجديد  ويرزقكم ويوفقكم
اني يوم 4-8 راح اطير الى هيوستن تكساس
بس راح ابات بالفندق مال مطار عالية   هههههههههههههه
 واخذ انواع المعطرات بالطيارة
الحمدلله على سلامتكم

[سبع صنايع]

اخوية المنكوووس
الله يبارك بيك وسفرة سعيدة مقدما

الحمدلله على سلامتك اخونا سبع
وبلاك وتر الله يسهل عليكم بيتكم الجديد  ويرزقكم ويوفقكم
اني يوم 4-8 راح اطير الى هيوستن تكساس
بس راح ابات بالفندق مال مطار عالية   هههههههههههههه
 واخذ انواع المعطرات بالطيارة
الحمدلله على سلامتكم

[lionofiraq]

الف الحمد لله على سلامتك اخوية العزيز و ان شاء الله اتشوف الخير بدربك و ميخالف التعب انت بعدك شاب و الله ينطيك الصحة و اتشوف مستقبلك هنالك و تكترث للمصاعب لأن دائما الظروف الصعبة تصنع الرجال و تقبل مرور اخوك طيف السعد

[vincenzo]

الحمد لله على سلامة الوصلوا
والله اخوان اعزاء ويستاهلون كل خير
بس شنو هالمعاناة
يكلك 48 ساعة بلا كهرباء
من ضمنهه 14 ساعة بالمطار (سوده عليه) يهفون لان الكهرباء كل يومين تجيلهه 5 دقايق والحرارة 55 مئوي والعواصف الترابية تلعب بيهم لعب وماكو اكل غير فلافل بالذبان المملح 
والله يا جماعة السفر مزعج
واحسن شي واحد يضل ببغداد ويشبع نوم على السبلت
دكولوا يا الله شنو معانات
اشو هي عمان عبالك مصيف بكردستان جوهه يخبل
والمطارات كلهه تبريد
بلاك ووتر هاية مالة هادئه هادئه....للصبح خلتني اقلق عليك
يعني شلون جارعهه بلا موسيقى المولدات ؟؟؟ 
وبلكي تفاصيل اكثر على سكن العزاب واني ادري بيك متقصر

[شقندح]

الحمدلله على السلامة اخونا العزيز
اني وعائلتي وصلنا بسلامة للسكن بفلوريدا بس ابني حمودي لهسة يتحلف بابنك اسد هههههههههههههههه
ان شاء الله تكون بداية خير لكل العراقيين يا رب

تحياتي شقندح

[سبع صنايع]

ابو حمودي

حمد الله على السلامة وان شاء تكون مرتاح

سلام خاص من ام اسد لام حمودي وابقة تواصل ويانة

[blackwater]

احبابي سكن العزاب

شقة بيهة غرفة نوم شيرنك ..يعني وياك واحد ..وحمام لطيف و هول كبير نسبيا ومطبخ

كلشي مدفوع الثمن بس الكهرباء عليك ...مبرد و مدفيء

اني حاليا كاعد وية ولد حباب اسمه محمد ....ومسواك كل اسبوع بلاش المنظمة لو تنطيك فلوس لو همة يرحون وياك

لحد ما يكمل الشهر حتة يطلع الفود ستامب ,,,طبعا الفود ستامب كارد مثل الفيزا بيه فلوس تشتري بيه بس اكل ...

وبعدين المنظمة تاخذك تسوي السوشال سكيورتي مالتك ...

يعني ماكو شي جديد مثل ما ذكرو الاخوة ....ماكو شي جديد شفتة عن الشرح اللي قريتة مسبقا

بس النسوان والحتيت بتكساس ..خلي يولن ..ما اسولف تعال وشوف


بالمناسبة اكثر مدينة بيها شغل هية تكساس

يعني الناس كاعد يجون لهنا حتة يشتغلون والله اعلم

اراكم في الحلقة القادمة

باي

[الكاوبوي العراقي]

بلاك ووتر
الله يساعدك على الحاتات
لايدوخنك يمعود
ديربالك على نفسك
هههههههه

[ayoka]

حبيبي بلاك وتتر تحياتي
وما اوصيك اخويه بالحتيت هله هله بيهم .  تحياتي

[fady azir]

  السلام عليكم  خويه سبع صنايع انشالله البخت مضايع

      الف الف مبروك على سلامة الوصول تمنياتنا لك الموفقيه في امريكا



                  اخوك فادي العراقي

[سبع صنايع]

والله ضحكتني اخوية بلاك ووتر بشغلة الحتيت

هنا بامريكا اذا واحد باوع على وحدة فكول هذا عراقي هههههههه

تصور خالي وجماعتة صارلهم 20 سنة ومن يسوقون بس شوف هاي وشوف ذيج بس اكيد بمرور الايام نتعود

اخوتي المهنئين بارك الله بيكم وان شاء الله يصيبكم اللي صابنة وتوصلون بخير وسلامة

[vincenzo]

خلي يصدرولنه حتيت ونصدرلهم "مجاهدين"

[ok_ok755]

مبروك اخي وحمد الله على السلامه وانشاء الله الجميع يسافرون ويوصلون بالسلامه

[أبن خير]

سبع صنايع والأخ بلاك ووتر ..

ألف مبروك وصولكم بالسلامة .. تمنياتنا لكم بجميل الأقامة في أرض السعد أمريكا
وتحقيق ماتصبون أليه .. دعواتنا لكم بالصحة والسلامة .. ديربالكم من الحاتات
تحياتنا

أبن خير

[سبع صنايع]

اخوتي فنشنزو ابن خير واوكي اوكي

الف شكر على المشاعر الطيبة وان شاء اموركم تتسهل وتجون لامريكا