منتدى الهجرة واللجوء > اجتماعيات (ترحيب، تهاني و تعازي منتدى الهجرة)

تحية واعتذار وعودة للمشاركة

(1/5) > >>

untitled.man:
اخوتي واهلي في منتديات عنكاوة...

تحية طيبة لكل شخص بيكم وانشالله تنحل كل مشاكلكم ويخلص الانتظار ويوصل كل شخص بيكم للشي اللي يتمناه.

احب اول شي اقدم اعتذاري الكم واتمنى تعذروني لان كطعت تقريبا شهرين عن المنتدى بسبب السفر والمكان الجديد والترتيب والتعود على الحياة الجديدة، بس انتوا وكل هاي الفترة ظاليين ببالي وحالف يمين انه بقدر ما اخذت منكم واستفاديت، راح احول وكل جهدي ومن الله التوفيق ان ارد الجميل.

اني حاليا والحمدلله استقريت وتأقلمت ويه الحياة هنا بامريكا وتحديدا دنفر، كولورادو منكول تأقلمت مية مية، بس يعني صارت حياتي طبيعية.

الحمدلله الشقة اللي كاعد بيهه كلش حلوة والمنطقة بعد احلى الشقة غرفتين نوم كبار وهول جبيير وحمام والمطبخ صغير نوعا ما، بيهه بالكون لانه بالطابق الاول والايجار 680 دولار ويه الماء والتراش وتكرمون المجاري.
حاولت كل جهدي اجطل انترنيت من الجوارين بس مع الاسف بدون فائدة، بس حاليا مسوي اشتراك ومرتاح.

داشتغل وللي بباله السؤال، اشتغل ويه نفس الشركة اللي جنت اشتغل بيه بالعراق وهو السبب الاساسي اللي خلاني اجي لدنفر لانه جنت مرتب اموري مناك وقبل السفر ومكاني جان حاضر هنا وبلشت بالدوام ورة اسبوعين من وصولي.

السوشيل والكرين كارد مستلمهن (اني من جماعة الـ SIV) عدا زوجتي وبنتي اللي لحد هسه ماجاي السوشيل مالتهم وما اعرف ليش التأخير وعلما انه كلنه مستلمين الكرين كارد، مساعدات المنظمة قبل يومين استلمت اخر صك واللي هو الصك مال الشهر الرابع واللي هو الاخير، الفود ستامب وبالرغم من شغلي لا يزال مستمر والبارحة نزلوه رصيد بي.

فتحت حساب بالبنك واذا احجيلكم يجوز ما تصدكون بس هذا اللي صار انه فتحته للحساب قبل ما استلم السوشيل وذلك بواسطة الجواز والفيزا وباجي الـ Iraq Wide اللي بعده مو اكسباير... شغلة تدوخ مو؟؟؟!!! بس اكيد جان اكو عوامل لعبت دور بهذا الشي وتجيكم تفاصيلهه.

اول شهر اتبهذلنه بشغلة وحدة واللي هي المسواك لانه نوعا ما بعيد السوبرماركت من شقتنه فجنه نروح ونرجع مشي ومن نتسوك نخلي المسواك بالعربانه مال بنتي ههههههه، بس انصحكم لا تسوهه لانه موحلوه والناس نظرتهم تصير غير شكل، بس هي مرة صارت بيه وتوبت والحمدلله حاليا مشتري سيارة والامور تمام وللي بباله السؤال، اشتريت دودج فان موديل 2000 بـ 19 ورقة وويه التحويل والضريبة صارت 21 ورقة، وهماتين تجيكم النفاصيل انشالله.

المنضمة من اول يوم يدرون بيه عندي شغل فانطوني حرية الاختيار بين برامج المساعدات واللي هنه 2 الماجنكرانت والكيرس ومثل ما شارحين الاخوان قبل على الماج والكيرس نفس الحجي وما يحتاج اعيده، بس اني اختاريت الكيرس لانه بوضعيتي جان احسن والسبب انه مثل ما همه كالوا انه اذا تشتغل او ما تشتغل احنه ننطيك مال 4 اشهر فقط، وفي حالة انه بطلت من الشغل بالاربع اشهر الثانية نبدي ننطيك المساعدات مرة ثانية ولمدة اربعة اشهر وخلاص يخلص الكيرس. بينما الماج كالوا انه اذا اشتغلت ننطيك مال هالشهر والشهر اليجي وبس، فاني حسبته ع السريع وشفت انه الكيرس اصرفلي وبالفعل كان كذلك.

الفحص الطبي لحد الان مامسويين، موعدنه 14 و16 بهالشهر، بس مستلمين كارت الميديكيد ومثل ما تعرفون للبالغيين فقط 8 اشهر وللاطفال لحد عمر 21، بس بصراحة هاي الفقرة مال 8 اشهر ماموجودة بالكتلوكات والاوراق اللي تجي وية الكارد، الكل يكول 8 اشهر بس اني ما قريت نص صريح بهذا الخصوص، على كل، الايام الجاية هيه اللي تبين.

الفود ستامب استلمناه بنهاية الثامن و4-9 يله اشتغل واني واصل لهنا يوم 28-7، فيعني تقريبا شهر اني اصرف من فلوسي، بس من اشتغل الفود ستامب خلو رصيد بي من يوم 5-8، ليش من يوم 5-8؟ لانه اليوم اللي المنضمة قدمتلنه على طلب الحصول على الفود ستامب من الهيومن سيرفسس. القصد من هذا الحجي انه اخاف مسؤول الكيس مالتك بالمنضمة يكلك الفود ستامب من اول يوم توصلون فهذا الحجي كلاوت. من اليوم اللي يسلمون الطلب واكيد كل ما يكون اوكت كل ما يكون احسن.

الجو هنا بدنفر روووووووووووووووووعة، مبدئيا لحد هسه، لانه الشته بعده ما جاي، اول شي واهم شي انه ماكو رطوبة، مو مثل نيويورك اللي ظلينه بيهه يوم كوه تتنفس من الرطوبة وطبعا ما اسولف على الملابس وشلون مدبكه، المهم، السترة الخفيفة لازم دائما وياك هنا بالطبه والطلعة لانه يتغير الجو بلحظة وطبعا الشمسية هماتين تكون مرفقه. (شنو DS230 و DS234!!!!!!!!)

سولفت هوايه، بس احب اضيف شغلتين:
الاولى انه وبكل صراحة ما عندي علم بوضعية الشغل بدنفر لانه وصلت كضيتلي اسبوعين افرفر ويه زوجتي وبنتي وحاولت قدر الامكان نروح نشوف معالم المدينة ووراهة كبل بلشت بالشغل. فما صار مجال للتبحوش.

والشغلة الثانية للي يريدون يعرفون المساعدات، راح انطي بفد نبذة سريعة وانشالله الايام الجاي التفاصيل تهري هري.
الـ Welcome والمنضمة تسمي الـ R&P money جان 1276 دولار تقريبا وعندي التفاصيل الكاملة وين راحن هذني الفلوس.
كل شهر صك بـ 570 دولار ولمدة 4 اشهر فقط والسبب انه دا اشتغل.
فود ستامب بقيمة 520 دولار لكل شهر، وحسب كلام الكيس وركر انه يستمر الى ان تلكه شغل. وراهه ما اعرف لحد هسه شيصير لانه اني صارلي شهرين دا اشتغل ولحد البارحة هم عبو الكارد لهذا الشهر، من اكتشف انطيكم خبر.
ما مشمول بالكاش لانه الكاش على البرنامج الثاني.

واخيراا... اكيد اكيد اكيد اي سؤال اني حاضر

تحياتي

shaklawe:
الف الف مبروك اخونا العزيز

اني من شفت اسمك باليست كلت وين هذا الاخ مختفي

و مشكور عل المعلومات
وربنا يوفقك

تحياتي

اخوك شقلاوي منتظر الكوم ابروفل

مهاجرين بلا حدود:
حمد لله على سلامتك اخونا العزيز ((  UNTITLED.MAN )) ,,,الك وحشة
  وبارك الله بيك على سرد هذه المعلومات شبه التفصيلية
  والحمد لله على رجوعك النا سالما غانما والف شكرا على تواصلك ويانا  وتمنياتي لك وللعائلة الكريمة بالصحة والعافية   

اخوك ابو محمد
دمشق لي هساااع

BaghdadGhost:
اخي الرجال الي بليه اسم ,,,,,, حيل صارلي شكد مكايلهه  ;D,,,,,


الف تالاف هلا برجعتك ورد ,,,, نورت المنتدى ,,,, والله البارحه جاي اكلب بصفحات الارشيف مال اس اي في و شفت رد الك ,,,, كلت هذا ابن الحلال وين صار بي الدهر  ???,,,,, الحمد لله على اخبارك الحلوة ,,,,, مبروك الوصول سالم و تحياتي للعائله الكريمه ,,,, تلفوني راح يوصلك عالخاص ,,,,, مشكور على الشرح الوافي لتفاصيل ورد ,,,,,

ننتظر منك كل جديد و مو تكطع ,,,,,

ShadowMan:
الحمد لله على سلامة الوصول اخوية العزيز والحمد لله على رجعتك للمنتدى.......  نورتنا يا غالي

تصفح

[0] فهرس الرسائل

[#] الصفحة التالية

الذهاب الى النسخة الكاملة