سؤال حول الماجستير في الهندسه من غير GRE test

[National]

السلام عليكم
الاخوات والاخوه الاعزاء عندي سؤال بخصوص التقديم على الماجستير في الهندسه من غير GRE test
اني انشاء الله اول ما اوصل اريد اعادل شهاتي كورس باي كورس وطبعا اخذت وياي السيليباس وتزكيه من ثلاثة اساتذه درسوني في كلية الهندسه الكهرباء وكلهم بدرجة بروف بس اني احاول ان اجد كليه جامعه تقبلني اكمل ماجستير بدون امتحان ال جي ار اي اللي تكلمنه عنه هوايه سابقا فرجاء اذا اكو واحد يعرف اكو هيجي كليه جامعه معترف بيهه اكدر اكمل الماجستير بيهه دون ال جي ار اي طبعا اني مو خايف من هذا الامتحان اني اصلا هسه كاعد اقرأ بكتاب بارونز وكتاب كابلان هذين الكتابين المهمين بالنسبه لهذا الامتحان اني مشكلتي اريد احصل هاي الشهاده بأسرع وقت ممكن وتقبلو تحياتي

[basharcom]

وعليكم السلام
حبيت افيدك ولو بقليل اكو جامعات(ويمكن هذا ينطبق على كل الجامعات) اذا جبتلهم تزكية من موقع العمل اللي كنت تعمل بيه بالعراق  او بغير مكان ورهمتلهم خوش cv يتساهلون بدرجة gre ويغضون بعض النظر عن الدرجة بالامتحان واكيد تترجم هالتزكية وال cv

[National]

أخي العزيز بشار اشكرك على هذه المعلومه بس ممكن اتوضحلنه اكثر يعني اكو علاقه بين العمل وشهادات الخبره في الشركات والامتحان لأن اني اول مره اسمع هذا الحجي  بس ارجع واكول ماكو جامعه تنطي ماجستير دون ال GRE test?
ولك اجمل الامنيات

[basharcom]

تدلل عيوني
 اي اكو علاقة
همة ليش يسوون الامتحان ؟؟ديتاكدون انو انت تكدر تدرس الماجستير  فمن تجيبلهم شهادة عمل هاية هم دليل عندك خبرة بالهندسة وانك جاهز اكثر من اللي ماعندة خبرة للماجستير
اني اتفق وياك مااتصور اكو جامعة  تنطيك ماجستير بدون gre بس اللي سامعة انو اكو جامعات تخليك تدرس ماجستير بدون هالشهادة اذا كنت جاهز من ناحية اللغة بس لازم تاخذ الgre قبل لاتخلص الماجستير يعني مينطوك شهادة بدون متنجح بهذا الامتحان

[basharcom]

 يعني اول وتالي لازم بالبداية تراجع الجامعة اللي انت تريد تدرس بيهة من خلال عنواينهم وتسألهم وهمة رح ينطوك اقصر الطرق الممكنة بجامعتهم دتحصل على الماستر

[ســـرى]

اخي العزيز national اني لحد الان ما شفت بالجامعات اللي دورت بيها جامعة ماكو من متطلباتها GRE وللعلم هذا مطلوب منك ومن اللي متخرج من جامعة امريكية ايضا يعني مو بس الاوفرسيز OVERSEAS وبعد اللي يجون على اساس انهم انترناشينال ستيودينتس يريدون منهم تويفل او ايلتس زائدا الجي ار اي في بعض الجامعات وبسكور معين يعني مو اي واحد فقط ناجح بالامتحان.تحياتي.

صوت معنا للاستفتاء بنعم او كلا
http://www.ankawa.com/forum/index.php/topic,411306.0.html

[National]

الأخ العزيز بشار الاخت العزيزه سرى اني جدا ممنون الكم بس ممكن اتكولولي الجداريه مطلوبه لأن مطلعتهه بس اني كلشي امحضر حتى شهادة الاعداديه   واشكد يحتاجلي افلوس وياي ومامدى امكانية الحصول على قرض من الفينينشال ايد  وتقبلو تحياتي 

[ســـرى]

ما اعرف بالنسبة للهندسة بس يطلبوها اغلب الجامعات والافضل تطلعها وتترجمها ووتصدقها ومن تروح تصدق لازم تاخذ النسخة العربي طبعا وياك لان يريدون يشوفون الاصلية على فرض انه اذا مصدقها قبل ما تترجمها اما اذا اصلا ما مطلعها طلعها هسه يادوب تلحك وتوديها ترجمة وتصديق وتجيبها وياك.

[vincenzo]

زميلي العزيز ناشونال (ولو هسه انت بامريكا بس بلكي تشوف ردي لان ما جنت منتبه لسؤالك بوقتهه)
اتمنى انك طلعت الجداريات قبل لا تسافر لان بعض جهات المعادلة تلح عليهه
بالنسبة للجي ار اي
فدائما تذكر انه انت دارس باصعب اختصاص موجود حاليا بكل الكليات (وما تلكه احد ينطيك هيجي رأي بموضوعية لان اخوك دارس كم سنة طب وماجستير هندسة هم الكترون) فلا تخاف من الجي ار اي وانت بعد شفت الكتب والنماذج وياهه
صدكني ما يباوعون غير بس بدرجة الرياضيات بالنسبة لاختصاصنه واحنا ملوك الرياضيات نسبة لمستوى اسألة الجي ار اي
فتوكل وامتحن جي ار اي واثولهم بفد درجة خنفشارية واقرى بالكتابين شكد ما تكدر عاللغة لانهه مو لغة عادية وانما بيهه مصطلحات فلسفية وتاريخية وسياسية وبكل انواع العلوم وهمه يدرون بيك مو ملم بكل هالاختصاصات بس يريدون يشوفون مستواك بكل هالعلوم ويدورون نوابغ كلش

[ميريام المهاجره]

 
السلام عليكم
موضوع الماستر يشغل ابنتي مهندسة انتاج ومعادن فرع انتاج وبالنسبة لي يشغلني كيفية معادلة شهادتي الجامعية بكالوريوس تربية انكليزي/ جامعة بغداد علما بأن لي ولدين في السويد وعادلو شهاداتهم بعد مرور أكثر من سنتين على وصولهم بدون امتحان فقط كانوا يداومون مدرسة لغة واشتغلو لفترة واذا تريدون اسألهم كيف قدموا اوراقهم ولاي جهة حتى تم الأعتراف بشاداتهم علما الكبير بكالوريوس موسيقى /كلية الفنون الجميلة والثاني مهندس مواد/الجامعة التكنولوجيةويرجى ممن له المام  بالGRE test يوضح لناهويةهذا الأمتحان وشكرا

[ســـرى]

اختي المهاجرة اكو موضوع لاحد الاخوة شاركنا بيه بوقتها كلنا وتوضحت صورة الامتحان.مختصر مفيد هو للي يريد يقدم ماجستير باختصاص معين بس جماعة ادارة الاعمال والمحاسبة يمتحنون غير امتحان اسمه GMAT ولمعرفة المزيد عن الGRE شوفي الموقع التالي


http://www.greguide.com/



وهذا موقع الETS وبيه الGRE والتويفل وغيره وكيفية حساب سكور الامتحان والحجز على يوم للامتحان

http://www.ets.org/gre