ما هيه الاسباب الهجره من العراق

[احمدمالك]

اخوان فقط موظوع نذكر بيه الماسي للعراقين كل واحد يذكر ماسى واحده فقط مريد انكثر لان كل عراقي عنده اكثر من ماسى علمود نجمع كل اراء العراقين او ماسيهم او نطلع عليه اتكون المشركه كامله اني اعلم ان كل كلمه سوفه تقال فيهذا الموضوع هيه صحيحه غير قابله لنقاش مع الشكر والتقدير للمشاركين

[اياد البدري]

اخوي العزيز شنذكر ماسي اشو خير وبركة لايعدن ولايحصن منين مجيبها سودة مصخمة منين اتحب ابديلك من الكهرباء امن المي امن الخدمات امن الوظعية التعبانة وغيرها وغيرها خليها سكتها 

[Aiham_]

لا تعليق ........... الموضوع ما يرادلة نقاش و لا كتابة 

[عراقي هواي]

والله اخي اسباب الهجرة كثيرة مثل ما كال الاخ اياد بس اني برأيي انه كل انسان ير اها من منظوره الخاص اني عمري 43 سنه مشفت لاحريه ولا راحه ولا امان ولا امل وانت تعرف الانسان من يفقد الامل يعني شنو واذا نريد نحجي فا الحديث ذو شجون تقبل مروري والله يسهل للجميع

[** يدكو **]

والله اخي اسباب الهجرة هوايا واذا اعدها الك مااخلص منا لباجر وابسطها اني رحت قدمت للتعيين كمعيد بجامعه الموصل كوني
من الاوائل كالولي انت من .................... وانت ليا .......................  واكيد فهمتها وبعد وبعد

بس نكول الله كريم وان شاء الله تنفرج وغيمه وتزول

تحياتي وتقبل مروري

[koka75]

اخوية يدكو انت ليش مستحي خو اكتبها علويش خايف كالولك نت بياحزب ومنين وشيعي لو سني ومن هالخريط مالعراقيين الي مراح نخلص منه العمر كله واخي كاتب الموضوع اولا الموضوع حلوو مو محلوو واحنة العراقيين معروفين انه نحب نحجي عالي ديصير بينة لو سكتنة لاكثر من 30 سنة من جان ابو العينتين ابو عداي جنه نخاف نحجي هسة لاوالله نحجي بس شنو الفائدة والله يرحم بلد اسمه العراق ويرحم بشعبه فعمي صاحب الموضوع هذا موضوعك يرادله منتدى كامل نسميه منتدى ماسي العراقيين وداعتك راح يصير منتدى بيه فد مليارصفحة ومتخلص
    اخوووكم ابو محمود

[** يدكو **]

اخي ابو محمود لامستحي ولاخايف بس مااحب اذكر هيجي كلمات بالمنتدى لانها مو بمقامنا لا اني ولا انت ولا اي واحد عراقي

[(بغدادي)]

مشكور اخي العزيز على طرح الموضوع..بس يمكن صار سوء فهم من قبلي للموضوع لان ما اعرف اي ماسي تقصد؟ احنه ايامنه كلهة فرح وسعادة وبكل مرحله عدنه انتصارات وانجازات واعياد وكل دول العالم تغار من عدنه لان احنه حضارتنا بدت قبل خمسطعش ميه سنه واول من ابتكر قنينة الغاز جان عراقي والعالم بسببنا يتنعم بالغاز..الساعة ابتكروهة اجدادي السومريين الف رحمه على روحهم وبسببهة العالم هسة ماشي ويتقدم دقيقة بدقيقة يعني مسوين فضل عليهم احنه والا جان هسة همة متهجولين.. الفرق الوحيد والانجاز اللي ما سويناه انو ما سوينا انزال على القمر بس يقال انو جدي اللي بنه برج بابل لمن صعد عالسطح طخه للكمر وهاي قبل مدري كم تلت الاف سنه..قابل اللي كتب اغنية عيد ونصر اتلاكن بفد ملكه ميفتهم..تالي وياكم..

لا تزعل مني بس موضوعك ينراد بيل كيتس يصممله كومبيوتر ذاكرته بكد سليمه..

بغدادي

[(بغدادي)]

اخ يدكو حضرتك محاضر؟ لعد شلون تغلط هيجي غلطة..بس غلطة الشاطر بالف لان يمكن نسيت بلحظتهة انو كل منطقة الهة خصوصية حضارية واجتماعية تنبع من الصيرورة الاقتصادية والسياسية ضمن المنطلق الجغرافي للزمن المنحل اللي احنه عايشين بيه..يلا بسيطة صار خير..

بغدادي

[** يدكو **]

مافتهمت اخي البغدادي شنو الغلطة واني مو محاضر قدمت بس ماقبلو كالو................

[احمدمالك]

اشكر الاخوان الي مرو ابهذا الموضوع
بس كان الاسبب عرض الموضوع هوه لكشف احوال العراقين والمئاسي الي مرت بيهم من مشاكل اوضلم اوظطهاد
اخوان احنه ان كنه من اي طائفه او اي عرق او قوميه احنه عراقيين الاصل جان الهدف هوه كشف الحقائق لبعض الاخوه
الي مو عراقيين او كل رد من الاخوه هوه تاج عله راسي
انريد يكون نقاش بناء

[Ali from baghdad]

السلام عليكم
الصراحه بالبدايه ما ردت اكتب لان موضوع مو مال نقاش ، بس من الضوجه والانتظار الواحد يدخل بنقاشات ما الها داعي وهذا احد هذي النقاشات، مو صغرا بالموضوع ، بس لان احد الاخوان كال ان يرادلك موسوعه بس خاطر تكتب مأسي شخص واحد من الي طالبين اللجوء، مو كل الي يدخلون المنتدى، بس ما طول كاعدين وما عدنا شي والجمجه متوقفه عن العمل بسبب الحر ، ف ما كو مانع ان الواحد يجتر الماضي ، علمود يقوي الحافز للهجره و يقوي عزيمه اي شخص يدخل ويقرا هذا الموضوع :
من وين نبدي الحتوته:
1-   فرصه السادس الاعدادي الي هيه فرصه واحده فقط لا غير، اذا زلكت رجلك بيها ، راح مستقبلك كله بالزلك
بينما هناك ، ممكن تجد الف طريقه وحل ، في حاله ان زلكه رجلك ، وممكن ان توصل لكليات القمه (الطب والهندسه) من عاشر محاوله، مو مثل هنانه.. 6 مدرسين خصوصي و مجاميع الصيف الي قبل السادس و مجاميع المراجعه بال 40 يوم ، ووووو ، والله يستر اذا زلكت وطلعت فاول بسؤال واحد فقط .
طيب الي ما عده فلوس الخصوصي شيسوي مثلا؟؟؟؟
2-   قبل الحرب ، الحزب والسؤال الازلي ليش ما تنضم للحزب، والجواب الازلي : مو ابويه مسافر وما راح يرجع الى الشهر الجاي (على اساس ابويه كوفي عنان يوميه مسافر، بس شنو الحجه الي تكولها خاطر يكفون عنك)، طبعا بالكليه صعب اتكول ابويه مسافر ، راسا معاون العميد يكلك قابل انته حدث بعدك تنتظر تسال ابوك، بس ممكن ان تنهزم للسنه الاؤالى والثانيه بس بالثالثه تنصاد حتى لو اتداوم بالحديقه مال الكليه هم يلكفوك.
هناك ماكو هيج خريط ، تعال لفلان حزب
3-   بعد الحرب، طبعا اذا انته مو بحزب معين علمود يسندك، فمن --- راح تحصل تعين ، واذا اتعينت ، فراح تبقى موظف صغير على كد الراتب، والي بدا يشبه ايام قبل، ما يكفي (اخوان ترى اني احجي على موظف خريج كليه راتبه 600 الف بالشهر، عنده خط مولده سحب و نفرات روحه و رجعه شهريا و بنزين للمولده مال البيت خاطر الحجيه تكدر اتقاوم ربيع تموز واب ، و دبه غاز وحده او اثنين شهريا، والحمدلله اخوانا الهنود حلولنا مشكله اللحم و خطيتك برقبه المتسورد مو مهم سواء كان لحم جاموس او بقر او كنغر او حتى تمساح، المهم شويه بروتين وربك ح يسامح على مصدره، و الباقي بدون ما تحس ح يطير اذا بقى شي) وخلوا ببالكم هذا الموظف وهب نفسه لله لان ما عده غير حل ، لان اذا اتزوج راح يصخم وجهه بالعيشه، لان ماعده غير يعيشها على البناء الضوئي، وما اظن اكو بنيه تقبل اتعيش بس على البناء الضوئي، راسا اتكله رجعني يا ابن الحلال لبيت اهلي او تقبل اتصير حرامي خاطر انعيش وعشان المركب تمشي بيه وبيك..
هناك ماكو هيج خريط ، تعال لفلان حزب
4-   بعد الحرب ، سني شيعي، عربي كردي، مسلم مسيحي ، عشيره فلان وعشيره علان ، اتشجع ريال مدريد لو الزوراء، طبعا كل الناس اتكول احنا ما ندري هايه منين اجتي ، والله لا ينطيهم الي جابوها ، وهايه من تبعات الاحتلال، طيب على راسي من فوك كلام الناس، بس غير الفايروس يحتاج فد بيئه غنيه وجاهزه للفايروس خاطر الفايروس يتكاثر وينمو ، ثم همه من وين جابوها اشو هيه اختلافات بيناتكم و استخدموها ، يعني طلع العراق 4wheel drive بس يحتاج الي يدفعه، طبعا الكل راح اتجاوب وتعلق على هذا الحجي ، لا احنا واحنا واحنا ، وهايه اشياء اجتي غريبه علينا وصارلنا مليون سنه متعايشين مع بعض ، طيب لخاطر الله فد واحد يكلي ليش اني من الناس عدي بحدود 10 اصدقاء راحوا بالطائفيه وفد 5 اقرباء وياهم فوك البيع، احد يكلي ويجاوبني جواب شافي مو مال جرايد ولا مال تلفزيون بس شرط ان يكون هذا الواحد مهجر و عده اقل شي 5 مفقودين بين صديق و قريب ، مو كضاها يسمع انو ولد بفلان منطقه مات او ولد بفلان شركه خطفوه.
هناك ماكو هيج خريط ، الا اذا انته اتريد تنضم للعصابات فاكيد راح تتعرض للتصفيات اذا انتميت لعصابه الكف الاسود او البكبك الاصفر ...
5-   هنانه ، الشغل تحصله بمحسوبيه (الواسطه) او الرشوه (هديه يعني حسب المفهوم الجديد) او اذا عندك كفاءات خاصه (اعتذر واكرر اسفي بس كلمه حق لازم تنكال ولو مو شي عام فقط في بعض الحالات – اذا بنيه والمدير شويه مو راحه)، او مثل ما كلنا انو انته تنتمي لفلان حزب ، و مو مهم اذا انته تفتهم وفلته بالرياضيات و الحاسبه و تعرف نظريات وحتى قاري النسبيه ومفكر بيها طول 3 اشهر يله استعوبتها ، لان حتى لو انته اذانك طويله ويا دوب تعرف من وين تشغل ويندوز 95 فاكيد راح تحصل الشغل ...
هناك ، واسطه (عرف يعني) ، رشوه (ما اظن) ، كفاءات خاصه (قليله ونادرا لان ما اتطول اكثر من اسبوع لان مو صعب ذاك الشي عدهم) الا اذا انته تشبه توم كروز او كيم باسنجر، ف ما يبقى عدنا غير مخك ثم مخك ثم مخك ثم مخك ، الي راح تكتشف انو اله استخدامات اخرى غير استخداماته بالدول العربيه والعراق تحديدا...
6-   التهجير ، هنانه ماشي وعلى قدم وساق و ركبه ، وتجاره مربحه والها سوق واعد بالعراق، رجاء الله يخليكم ، لا احد يكول تره هايه ازمه وراحت ، تره حتى الانبياء كالوا انو العراق ارض خراب ودمار ، طبعا اني مو حافظ للكتب السماويه او مرجع للاديان ، بس تره الكتب السماويه و كلام الانبياء عليهم السلام ، اتاكد ان العراق هو ارض الحروب والحرب الي راح اتدور فيما بعد...
يعني بعد اكو شوط جديد، وال 2006 كانت احماء للفريقين..
هناك طبعا ماكو هيج فقرات او اضلع او عظام، (اسف اذا المزحه مو حلوه ، بس هذا للظروره اللفظيه)...
7-    التعليم ، الصحه ، بدون تعليق ، لان المقارنه توجب للاشياء القابله للمقارنه مو للاضداد...
8-   احترام حقوق الانسان ، بامريكا اكو تجاوز ، ماكو داعي انسويها ارض الميعاد ، اكو تجاوز ، بس لما يوصل صوتك ، راح يشعلون ابو ابو ابو الي اتجاوز ، بينما اهنانه راح يضربون ابو ابو ابو الي ما سكت و بلع الاهانه وفكر انو يشتكي ، طبعا تجي وراها حلقه الحبس، والتوريق ، و التوسل ، والواسطات ، واخر حلقه بهذا الفلم الكارتوني هو الفصل العشائري...
هناك ، مثل ما كلنا ، اكو تجاوز ، قابل همه اولاد انبياء، حتى اولاد الانبياء شمروا اخوهم بالبئر، بس يبقى ، المسيء اكو قانون اعلى من الكل، الا اذا اندكيت بسيناتور طاك كلش او بالرئيس وللضروره الصوريه قرورا انو يصفوك بخليج المكسيك، فبوكتها اكو الله ياخذ حقك بيوم القيامه ، بس اذا شرطي او انسان بالشارع ، فاكو محاكم وقانون ياخذلك حقك...
9-   حريه التعبير ، هناك ..عبروا اغاتي وباسمائكم الصريحه ، حتى بايام الحر ممكن اتعبر بغير طريقه ، هنانه ، اذ اتريد اتعبر ، ف يا حبذا لو اتعبر ابيتكم احسن ، لان الحر المفرط راح يخليك تستمر وتنطلق بالتعبير وممكن انو يفسر تعبيرك على انومحاباه لفلان حزب او فلان شخصيه او زمن معين (قبل او بعد الحرب) واحنا طبعا ، وليس بسبب طبيعتنا ، لكن بسبب فرط الحر ،نميل الى الصراخ والتشنج والسب والغلط و التفال في بعض الاحيان ، تمسكا ودفاعا عن تعبيرنا او ارائنا المنزله في اللوح المحفوظ...
10-   البيت ، اذا احد من الاخوان يعرف فد طريقه رياضيه او محاسبيه ذكيه وعبقريه ولم يكتشفها محافظ البنك المركزي لغايه اليوم لشراء بيت باستخدام راتبك فقط دون اللجوء الى الرشوه او السرقه او ارث الاباء والاجداد، فبروح ابوكم دلونا عليها ...
بينما هناك ، ولو بعدني ما واصل ، بس يا ريت اذا واحد من الاخوان يكللنا هل شراء سقف فوق راسك صعب و مستحيل او شبه سهل وممكن بالاعتماد على الراتب فقط وطريقه محاسبيه بسيطه وذكيه ومكتشفه قبل حاولي 100 سنه...
11-   المستقبل النير ، لاحبائنا و فلذات اكبادنا ، ولو اني بعدني ما متزوج والحمدلله ، بس اكيد في يوم من الايام راح اعثر ببنيه واباشر اني ووياها بمشروع انشاء قريه عصريه صغيره مكونه مني ومنها ومن درزن عيال .
ف مثل ما كلنا ، هنانا ، صح اولادنا راح يتعلمون حب البلد والعصفور و النهر ، بس راح يتعلمون وياها اشياء مثل ، سحب، وطنيه، مفخخه، خصوصي، عكربه، برتقاله، حظر تجوال، عبوه، عمبه، صاكه، علسوه ، شبكه ماكو، سيطره، مي الاساله ماكو، خلص مي الكيزر(سخان يعني) ، دعبل...
اضافه الى مصطلحات اخرى بس هذي واجبه تعلمها للطفل كي يشب ويصبح رجلا ، طلقات ، رشاشه ، ابن ال --، الخ الخ
بينما هناك ، فراح يتعلمون غير اشياء، اي نعم بالمدرسه والي ح يشوفه بالمدرسه راح يجي يوم ويسالني بابا ممكن انو بت الجيران اصادقها او ابوسها ، طبعا هنانه راح يبدي التفكير و المراقبه الابويه الشديده والله يستر ...
بس ، تره هنانه هماتين اكو بلاوي دا تصير بالثانويات، واخوكم دا يحجي من اشياء شفتها بعيني ، بحيث من حجي الشباب الي شفته بالشغل اتخيلت نفسي كالطلقه للجنه، لان طلعت هب بياض بينهم كلشي ما مسوي (مقارنه بيهم كلشي ما مسوي)...
 ف ، اهنا وهناك هيه نفس الطاس بس تبقى على المراقبه الابويه..
ونرجع ونكول ، المستقبل النير لاحبائنا هنانه يبدو ك ضوه اقتصادي ابو ال 20 واط، بينما هناك اكو مختلف الاختيارات ، اكو نفس الضوه ابو ال 20 واط واكو ثقب اسود يمتص الضوه واكو هماتين شموس نيره و بروجكترات مثل مال ملعب الشعب ولك عزيزي القاريء حريه الاختيار...
12-   الامل ، الي يموت يوم ولاده الطفل العراقي ، بينما هناك تشوف الامل وانته عمرك 50 سنه ، لان ممكن ان تبدي من جديد بعمر الخمسين..

بس هذا ما يخفي حقيقه مره، وهي تركك لاغلى شي بالعالم ،اغلى من المستقبل ، واغلى من الامان والحريه ، الي غلاهم بمقدار ايمانك ومعتقداتك اذا مو اكثر ... اهلك
وهنانه اتوقف ، لان ماكو هناك شي راح يعوضك عن الي راح تخسره...
وهنانه العراق حقق كول و زرع دمعه جديده بعينك يوم سفرك ويوم استلامك لخبر محزن بعد وصولك لامريكا بيوم او شهر او سنه او 50 سنه.. بس راح يوصلك هذا الخبر...

نرجع لموضعنا...
صدكوني مو مبالغه، بس واقع وحقيقه، لان الانسان العراقي يحتاج عمل جيلين خاطر يبني حياته، بينما هناك ممكن لجيل واحد ان يأمن حياه جيلين من بعده ، والاهم انو يأمنها بالجهد و المثابره والعمل الحلال، بينما هنانه الحلال الوحيد هو الكلمه الموجوده على غلاف الدجاج المجمد...

اخي صاحب الموضوع ، اني اتجاوزت لما كتبت عشرطعش فقره و سطر بينما انته طلبت فقره واحده مختصر ، بس للاسف انو ما لكيت ابره وخيط وكت كتابه الموضوع خاطر اخيط الجرح والنزف الي انته هيجته...
فرجاء ، اذا تحب تطلب شي، اطلب على قدر المستطاع خاطر تجاب، مو تطلب انو نذكر مأساه واحده فقط لاغير...
ولك الاختيار في ابقاء جوابي او حذفه لطوله و افراطي بالكتابه...
وهذا فيض من غيض او غيض من فيض او ما عرف شنو من ما ادري شنو لان نسيته اطلاقا بتاتا البته
تحياتي وتقبلوا فائق اعتذاري للاطاله الي صارت بدون ملح بس لاتزعلون لان جديات الواحد محتاح يفضفض مرات

علي SIV مرحله بحر الظلمات

[Safaa Alkhrkhy]

الـــــــــــــــــــــــــــعـــــــلــــــــــــــــــــــس

[Safaa Alkhrkhy]

عمي علي من بغداد ..........
وفيت وكفيت وكفيت وكفيت
وانا اشاطرك كل حرف كتبته هنا .... وفقراتك العشرطعش هي (غيض من فيض) من مأسينا العراقية!!
الف الف شكر لك علاوي ..

ابو سارة

[احمدمالك]

لا اخويه انته ما اجاوزة بس احنه ماردنه انتعب الاخوان الاعضاء من الكتابه
لهذا طلبنه سطر واحد لان لو اريد اكثر من سطر جان موسوعه تمليه او ماتخلص المصايب الي بلعراق
حبيت اشكرك على هذا التعب الي مليت الموضوع اني ادري اشكد تعبت لو كل شخص يملي ما عنده
جان اكثر من منتدى بل منتديات ياله اتكفي
اوكلامك تاج عله راسي اخويه مع الشكر والتقدير مرورك

[ابو الحسن]

سبب هجرتي من العراق بوية ماكو  والت ديزني وبركر كنج وبتيزا هوت
هي هم تنزاد الدنيا بلايهم ؟
ابو الحسن

[Robin Hood]

السلام عليكم جميعا
فد سؤال لصاحب الموضوع بلا زحمة عليك (اتخيل والدك كضة عمرة يدافع عن العراق وعن ترابة وعرضة وشرفة وعلى غفلة يجيك واحد جان يفتر بالشوارع مكبسل لو مجرم وانهزم من السجن لو انسان ميملك قطرة غيرة على نفسة وعرضة  ويقتلة ويهددك ويهدد اهلك كلهم شنو راح الي اسوية؟؟؟هل تبقة بهيج بلد رعاع القوم همة الي حكموة من (شيعة و شنة و اكراد) مع احترامي للاشراف من هل اطياف الشمس او من باقة ورد جميلة ) وشكرا

ان مع العسر يسرا

robin - Cairo

[ماجلان]

.

[rafid82]

أهم سبب ذكره أبو الحسن  كلامك ذهب ههههه

[thunderthunder]

اني راح اختصرها واكول لاخويه صاحب الموضوع كل واحد عنده مية سبب للهجره
لكن صعب جدا اي واحد يلكه سبب واحد لعدم الهجره
معادله سهله جدا وميحتاجلها تفكير
تقبل مروري

[alqaragulli]

الكككككككككككككككككككهرباء مه تنكطع

[azal]

Ali from baghdad اخويه كل كلامك صحيح

بس فقره وحده انت متوهم بيها (او لان انت بعدك معايشها(ممزوج))

 ((راسا اتكله رجعني يا ابن الحلال لبيت اهلي او تقبل اتصير حرامي خاطر انعيش وعشان المركب تمشي بيه وبيك.))

غير مقبول منك هذا الكلام بس اريد اسالك اكو أمرءه او بنت مثلة العراقيه تحملت هموم الدنيا
ياخي والله معايشات مثل بقية النساء يعني من تشوف العراقيات وحته العراقين  بالخارج وصارلهم
فد كم سنه طالعين والله عبالك لبنانين من جمالهم ليش لان مرتاحين بعيشتهم
وتجي انت وتتهمها بانو المرأه او الزوجه تشجع زوجها على السرقه لا متوهم حضرتك اصلا توكف وياه بالشده
وتساعده وتسانده معنويه وماديا اذا متمكنه وهذا الشي مو عيب

فياخويه يعني حتى بالمنتدى النساء مضلومات مكافي الجور الي عليهن بالشارع وبالوضيفه وحته بالبيت
بهذا المجتمع الذكوري الي ميعرف بس حق الرجل والمرأه دائما على غلط وهي سبب المشاكل

اني مااريد اصير محاميه عن المرأة لان ادري مهما دافعت املي بجره مكسوره
بس كلمة الحق اريد احجيها لا اكثر ولا اقل

واشكرك.

[kunda]

اني ماراح احجي عن العراق ومأسي العراق بس راح احجي عن حلم يراودني من ايام الطفولة تريدون تضحكون تريدون لا وهو واحد من الاسباب الي دعتني للهجرة عوفك من العراق وسوالفة
وحلمي هو ان احضر فعليا بمباراة كرة القدم لااحد الفرق العملاقة في كرة القدم كبرشلونة او الريال او مانشستر او يوفنتس او جيلسي او حضور اي مباراة لااي فريق متقدم بكرة القدم مثل هذولة النشوفهم بالتلفزيون
واذا بقيت بالعراق بعد مليااااااااار سنة مايتحقق هالحلم
وان شالله همينة بالمرة يجي يوم والتقي بابو الحسن بدزني لاند واعزمة على بركر كنك ههههههه

[Ali from baghdad]

مساء الخير

اتهامي للمراه العراقيه هو اتهام للام والاخت و الزوجه و منبع الحنان وكل شي طيب على وجهه الارض... ف من المستحيل انو اتهمها...
لكن ، الزوجه ايا كان الوضع صعب ، مستحيل تتراجع ، لانها طيبه و من اصل طيب ، وهنا راح نوصل الى مرحله ان صعوبه الوضع ح تكون ظلم لحالها و لوضعها ، الي حد ممكن ان يدفع هوايه اشخاص الى طرق الحياه الحاليه و العصريه من عدم تطبيق حدود الله بالامانه و اتصور ان الملايين من شعبنا اضطر في يوم من الايام الى تقديم الرشوى وللاسف بالمقابل هوايه من الموظفين صاروا يتقبلون الرشوى او الهديه .
قبل ، اني من الناس كنت ما مصدق انو الرشوه ماشيه بصوره جبيره بالدوائر والمؤسسات الى ان اتخرجت واشتغلت وشفت شنو من ظاهره منتشره بكل مكان وبصوره عاديه و كانها شي طبيعي، طبعا الموظف مضطر لان الراتب مراح يكفي ، ولان عنده التزام باحضار متطلبات المعيشه للبيت، وعليه ، ف الزوجها و العائله ما طلبوا بلسانهم ، بس كيانهم ووجودهم هو الي فرض هذا الشي ، لان مثل ما بقيه خلق الله عايشه ، هذا الموظف يريد يعيش ، مو ذنبه انو الوضع خربان، والبلد خربان والعيشه غاليه...
ف يا اختي ، الزوجه بالعكس ، طيبه و ما تقبل الخطا ، وتبقى وتقاوم ويا زوجها ، بس هذا الوجود هو الي ح يخلي لسان الحال ينطق ويكول للناس لو تمشون بطريق الخطا لو كل واحد يمشي بحال سبيله ، لان محال ان تلكين شخص يمتلك صبر ايوب بهذا الزمان ، و علمود ما نكول لو خليت قلبت ، فعددهم قليل ونادري الوجود ويعتبرون اغراب بهذا الوكت ، ومعظمهم مقدم على اللجوء والهجره وينتظر فرج ربك عليه خاطر يطلع ويعتمد على قابلياته ويكضيها بالحلال في بلدان رسميا تعترف انها علمانيه بس علمانيتها اقرب لله من ديننا والتزامنا..

وصح المجتمع العراقي و العربي بصوره عامه ذكوري ، بس هذا ما يمنع ان هوايه اشخاص و عوائل تؤمن باهميه وقيمه المرأه الي هي اخت و أم وزوجه وبنت ، والي قبل ما المجتمع يعطيها اهميتها ، رب العالمين والرسول اعطاهم اهميتهن و قيمتهن بان اصطفى بعض النساء وجعلهن خير و اكرم البشر ، ومنهن من نزل بيها سوره بالقران ، ومنهن من اعتبرها الرسول ام ابيها لعظم المراه ...
و اخيرا تقبلوا فائق الاحترام والتقدير لمن اقدامهن تسمو فوق الجنان
  
علي  

[** يدكو **]

علي من العراق اخي العزيز عاشت ايدك على كل كلمه تريكت ومخلصت القرايه يمعود مايحتاج كل الي حجيته وتعبت نفسك هذا
واقع ولو اني بردي للموضوع جاملت بكلامي بس حجيك ذهب وعاشت ايدك

[(بغدادي)]

انا اللي افتهمته من عنوان الموضوع هو ان صاحب الموضوع يبحث عن اسباب الهجرة وليست النتائج او الظواهر الاجتماعية لتلك الاسباب اللي اصلا نريد نعرفهة!!!!
اذا غلطان فصححلي اخ احمد..

اخ علي عاشت ايدك وكلامك حلو..
بغدادي

[احمدمالك]

احب ارد على الاخ البغدادي ردنا الاسباب هيه الجوهر الاساسي للهجر
او ردنا من كل شخص سبسب واحد مختصر
لان اذا واحد راد ينطي الاسباب الي موجوده عنده صدكني يااخي موسوعه من الكلام متكفي
ام عن البغدادي فحشاك من الغلط
مع الشكر والتقدير مرورك

[rafid82]

طيب اخ أحمد  او صاحب الموضوع

ممكن نعرف شنو الاستفاده من وراء هذا الموضوع  لان انت تقول

 (( لان اذا واحد راد ينطي الاسباب الي موجوده عنده صدكني يااخي موسوعه من الكلام متكفي))

وهذا عن كلامك  فمعناه انت تعرف   الاسباب  فما الذي راح يستفاد انت ام نحن ؟؟

[الرسام1973]

الله كريم .....عاش العراق اسلام ومسيح.....عاشت الانسانيه يهود ومسيح واسلام وصابئه وايزيدين وجميع الانسانيه .....


الحب .السلام .المحبه


الرسام ابو علاوى

[alalgawy]

يعني شنو الاسباب برأيك اللي خلتنة نترك العراق

اكو غير طيحان الحظ . والعفو عيشة الحيوانات ارحم من عيشة الوضع الحالي


الصراحة القلب يقطر دما وقيحا من ما ال اليه الوضع في العراق واسلوب الغابة المتبع حاليا في كل مجالات الحياة


مع العلم ان الشعب العراق والله مايستحق اللي صارلة  بس شنكول وشنحجي؟؟


                                   مع تحياتي

[لؤلؤه]

1% من العراقين مثقفين

4% متعلمين

95% اميه لا يعرفون القراءه والكتابه

وانت احكم
لؤلؤه

[احمدمالك]

يا اخ رافدامهم منتهذا الموضوع اولا نذكر الام الماضي والحاضر
او والسبب الرايسي هوه بعض
(((المنتديات العربيه الي تعتبر العراقين خونه خلي من يمرمن على الموضوع يقرون الاسباب العراقين الي خلتهم يعوفون بلدهم ويهاجرون  )))
علمود يكولون نه العراقين كلهم متفقين على الاساب الموجوده
كان هذا السبب الي خلاني اطرح الموضوع يااخي رافد الورده
مع الشكر والتقدير

[احمدمالك]

عذرا اخ رافد على الاخطاء في الكتابه  صدك جاي اكتتب والكهرباء مقطوعه او مولده الشارع عاطله او مولدة البيت كوه تشتغل
صدك كاعد ابغرفه بيه بس المروحه تشتغل لان اذا اشغل اكثر تطفه المولده ونته تعرف شيصير اذا الحراره عاليه اتكوم اتخربط ابكلشي مو بس بلكتابه ابكلشي

[Safaa Alkhrkhy]

انصح الجميع بقراءة المقال في هذا الرابط
http://www.ankawa.com/forum/index.php/topic,376096.0.html

وبعدين راح كلكم تفتهمون ليش انريد نطلع من العراق العظيم!!!!!

ابو سارة

[aboryan]

اخوان لحد لا يزعل مني بس الموضوع شائك جدا و اني حبيت اشرككم رسالة وصلتني هليوم احتمال واصلة للكثير منكم بس اني راح اكتبها وما قاصد بيها احد معين قاصد بيها الشعب العراقي اللي رغم طيبتة اللي نكولها هوة سبب كل المصايب
اليكم القصيدة
شتموني يوم قلت: نحن شعب لايستحي

 

شتموني يوم قلت: نحن شعب لا يستحي
أعتذر واسحب كلامي ، فنحن شعب يستحي أن يستحي
نصنع الطغاة ونركع للجلادين لكن منهم نشتكي
نطيع كل من بحضن الأجنبي يرتمي وبنفط العراق يغتني
نصيح : مغلوبون على أمرنا ونعوي : بأننا شعب "مبتلي"
جبناء منذ أن قطف الحجاج رؤوسنا حتى أزهق أرواحنا المالكي
ركعنا لصدام لكن دعونا الله أن يخلصنا ومنه ننتهي
واليوم كل العراق لعودة " أبو الليثين" يشتهي
نردد بفخر " أرفع رأسك أنت عراقي " بينما يدوس علينا الفارسي
مثل الخرفان ساقونا للإنتخابات ولونوا أصابعنا بالبنفسجي
وماذا كانت النتيجة؟ ....إنتخبنا القواد واللص و"السرسري"
لا تستغربوا ففي بلدنا... الأعمى والبصير يستوي

نحن شعب لا يستحي
تشتموني لأني قلت : نحن شعب لا يستحي
أين حياؤكم وفي كل يوم تظهر خنساء عراقية؟
اين حياؤكم؟:
يوم نهبوا آثار أجدادكم السومرية والأكدية والبابلية؟
ويوم كانت رؤوس أبنائكم "تطير" على الهوية؟
يوم نحروا السني في الحرية والشيعي في العامرية؟
اين حياؤكم؟:
يوم "لطشت" الحكومة مصرف الزوية؟
لو كنتم تستحون لما أصبح طالباني رئيساً للجمهورية
لو كنتم تستحون لما تمزق البلد بحواجز كونكريتية
لو كنتم تستحون لما ضحكوا عليكم بشعارات الحرية والرفاهية
لو كنتم تستحون لما نحروكم بالطائفية وبالشركات الأمنية
لو كنتم تستحون لما أنتظرتم أن تنطق الخرساء التي تسمونها "مرجعية"
لو كنتم تستحون لما رضيتم بمسلسل حرائق الوزارات و بحكومة السرقات النفطية
لصوص يتصارعون على الكراسي والثمن إراقة الدماء الزكية
اين حياؤكم؟:

800 قتيل وجريج حصاد قصف "الخارجية والمالية"
شعب يموت وحكومته في الخارج تقضي اجازتها السنوية
رئيس حكومة الطائفية ينفي : آني معليه..
وطالباني يفر الى أربيل ويقول : آني شعليه..
وبرلمان "خريطي" يجتمع وفي الختام يقول : آني شبيديه..

نحن شعب لا يستحي

السنا من بايع الحسين ثم خنّاه؟

ألم تكن قلوبنا معه وبسيوفنا ذبحناه؟

ألم نبكي الحسن بعد أن سممناه؟

ألسنا من والى علي وفي صلاته طعناه؟

ألسنا من عاهد عمر ثم غدرناه؟

ألم ندعي حبه، وفي الصلاة لعّناه؟

قسماً نحن شعب لا يستحي

نحن قطاع الطرق وخونة الدار

نهدر دم المسلم ونهجم على الجار

نعتمر عمائم بيضاء وسوداء وما تحتهما عار

والله نحن شعب لا يستحي

نحن جيش القادسية وجيش القدس وجيش ام المعارك وجيش المهدي

ونحن أيضاً أتباع الأعور الدجال

نحن خدم الحسينيات والجوامع والمساجد والكنائس والملاهي والبارات

ونحن أيضاً أتباع الشيطان تحت السروال

نحن شعب لا يستحي

قاتلنا إيران مع صدام

وحاربنا مع إيران ضد صدام

بربكم هل رأيتم كهذا الحجم من الإنفصام

نحن شعب لا يستحي

مبروك.... عراقنا أكبر حديقة حيوان بشرية

حكومتها إيرانية تحكم قطعاناً عراقية

برلمان معاق نصفهم سرسرية

خراف شيعية تقودها مرجعية خرنكعية

وأخرى سنية توجهها هيئة تمضرطية

وحمير كردية تتسلى بها الصهيونية

والله نحن شعب لا يستحي

ننتخب لصوصاً وقوادين وقتلة وسفاحين وندوس على الشرفاء بالقنادر

ننام ونشخر وشرف بناتنا حبيس الزنزانات وفي متناول العساكر

نحن شعب لا يستحي

نبايع الفساد والمفسدين ونبصم على نقاء سريرة المنافقين

ونجاهد في خنادق حزب اللغوة وهيئة علماء المفلسين

نحن شعب لا يستحي

طز ... حتى لو كنا أول شعب علم الإنسانية الحرف

فنحن أيضاً أول شعب ما عاد ورائه وراء وأصبح في آخر الصف

طز ... حتى لو ثرنا في العشرين ضد البريطانية

فنحن أيضاً أنصار الإتفاقية الأمنية

وألف طز .... حتى لو كنا أول من سن القوانين وصان الحرية في بابل

فنحن أيضاً أول شعب ذبح ابنائه على الهوية ورمى جثثهم في المزابل

نحن شعب لا يستحي

نستعجل ظهور المهدي باللواط ونخطف العذارى ونغتال الطبيب والطيار

نحرّم أكل سمك الجري ونقطع رأس من " يثرم الطماطة مع الخيار"

قسماً نحن شعب لا يستحي

نحن نستحق أن يحكمنا أنصاف الرجال ويدوسنا الأمريكي ببسطاله

وأن يلطمنا القاصي والداني بنعاله .... فهذا جزء من جزاء خيانة الأمانة

نحن شعب لا يستحي

لسنا سوى سبايا تتقن البكاء على الكهرباء ونعي انقطاع الماء ولعن السماء والكفر بالأنبياء

محترفون في تفجير قباب الأولياء وشتم الخلفاء وتنصيب الفاسقين في مقام الأمراء

شواربنا للزينة ورجولتنا عورة العورات وأكبر كذبة ما يسمى بالكرامة والكبرياء

ملاحظة:   من يريد أن يرميني بأشنع الأوصاف وأقذر الصفات على ما كتبت فأنا موافق فلن تكون الشتائم أكبر من شتيمة أن تكون عراقي في هذا الزمن وترى بأم عينيك ظلم وطغيان حفنة من اللصوص يقابله صمت شعبي عارم يبعث على التقيؤ والإشمئزاز والقرف.

 

نحن شعب لا يستحي

[Robin Hood]

السلام عليكم
اخوية aboryan عاشت ايدك وفعلا نحن شعب لايستحي وبلد الشقاق والنفاق
اخوية انتة اجيت وجبت وياك كل الاجوبة وكفيييييييييييييييييييييييييييييييييييييييييييييييييييييييت ووفيتتتتتتتتتتتتتتتتتتتتتتتتتتتتتتتتتت
اتوقع بعد محد عندة حجي ورة هل الحجي اهنا فعلا رفعت الاقلام وجفت الصحف وحاشا لكلام رب العالمين من التشبية

وان مع العسر يسرا

robin - cairo

[ابو الحسن]

خوش كلام عمي يصف العراق منذ 1400 سنة لهذا اليوم
والله يا عمي مشكلتنا احنا انه احنا نمبر وان بالبكاء والعويل والشكوى وذكر العيوب والسلبيات وسرد الماضي ولكن فد يوم كعدنا وفكرنا بالحلول لعلاج امراضنا ؟
هي هاي المشكلة
والله كريم
ابو الحسن

[(بغدادي)]

كلام ابو الحسن هو الذي قصدته في حديثي عن الاسباب التي اوصلتنا الى هكذا حال لان تجاربنا تدور في مجملها عن نتائج لاسباب لم يتكلم بها احد الاخوان..ولكن ساحاول ان اورد بعضها عسى "من وجهة نظري" واتمنى ان تكون مهضومة للبعض الذي باعتقدي سوف لن يستسيغها بسهولة:

- تاريخ العراق الحديث منذ تاسيس الملكية لحد الان لم يشهد تاسيس دولة المؤسسات وبقينا ندور في فلك النظام العشائري والقبلي"خلال فترة الحكم الملكي" وبعدها ضمن فلك الحزب القائد والزعيم الواحد وهذا يعني بالضرورة انهيار المؤسسات الحكومية والدولة بانهيار النظام الحاكم كون موظفي الدولة وادارييها هم من نفس الحزب الحاكم على خلاف ما موجود في باقي الدول من عدم تسييس دوائر الدولة ومؤسساتها.

- توسع رقعة المجتمع العشائري على حساب المجتمع المدني المتحضر وسيطرة حكم العشيرة والمحسوبية على سلطة الدستور.
-  ازدواجية الشخصية العراقية ففي الظاهر تبدو كشخصية متحضرة ولكن هنك بدوي صغير يثور حال استفزازه ولو باقل قدر لا يستحق الاستفزاز لتظهر شخصية لاتمت باي صلة لاي معاني التحضر وقيم المدينة.
- مع الاسف ظهور دعاوي وفتاوي دينية اثرت بشكل سلبي وتركت شرخ في مصداقية الشخصية العراقية..وساتحدث بشكل اكثر وضحا واقصد بها فتوى السيد محسن الحكيم ونصها "الشيوعية كفر والحاد" وذهب ضحيتها الاف الشباب المثقف والواعي والذي تم تصفيته من قبل البعث القائد ليتراجع السيد عن فتواه بعد ان اهدر دماء الاف الشباب العراقي و هم من ابناء هذا الوطن ولا يزال لحد الان طبقة مستفيدة من هذه الفتوى لتجيرها لحسابات سياسية مع ان هذه الجهات بعيدة كل البعد عن الخط الوطني العراقي.

- مع الاسف وهذا رايي الشخصي فان الشخصية العراقية تابعة لدول المحيط الجغرافي وليست ذات تبعية وطنية وهذا ما توضح جليا في فترة سقوط النظام وتحول المثل العراقي الى "اني والغريب على ابن عمي واني  وابن عمي على خوية"
- عدم اهليه جميع الانظمة السياسية التي حكمت العراق لحكمه ولم تقوم هذه الانظمة ببناء نظام اجتماعي متمدن ذو سمات حضارية مدنية واضحة وظل المجتمع العراقي اسير التوجهات القومية والاقليمية المحيطة به بسبب عدم وجود نهج اجتماعي واضح واصبحت كل رقعة جغرافية في العراق محكومة بنظام اجتماعي متعارف عليه من قبل كل منطقة دون تدخل للدولة.

هذه احد الاسباب وليس جميعها اما النتائج فافضل من وصفها هو الاخ aboryan واحب اضيف نقطة اكتبها بالعراقي الجلفي:

- العراقي الذي يتكلم عن الكرامة والعزة والنخوة عليه اي يحاسب نفسه من تم تهجير العراقيين بحجة التبيعة الافغانية والايرانية وغيرها وسلبوهم بيوتهم ومصالحهم وشمروهم على الحدود دون ذنب والغالبية كانت مهاجرة من تلك البلدان من قبل 300 سنة لاسباب اقتصادية او دينية بس بينه خير من نجي لامريكا او اوروبا نفتح حلكنا بكد الحوت من ناخذ الجنسية وما صارلنا خمس سنين ونريد بس واحد يفتح حلكه حتى نكله ترى جنسيتي امريكية ودير بالك تحجي واللي صارلهم 300 سنة وعراقيين وشاربين من مي دجلة والفرات وجوارين عمر اكثر من 30 سنة صفكنا للقائد البطل لمن سلبهم عمرهم ومستقبلهم..وهذا غيض من فيض

تحياتي

بغدادي

[zozk]

السلام عليكم
اخواني الكلام في هذا الموضوع يقود الى متاهة صعب الخروج منها
لكن ممكن ان نستنتج ان الوضع الحالي للعراق يعود بالسبب الاساس الى تباين الفكر العراقسي بشكل جدا كبير ؟؟؟؟ منو افتهم ؟؟ خلي اشرحلكم بالجلفي
اخواني بالعراق اكو الانسان المثقف بدرجة جدا كبيرة و بالمقابل اكو الانسان المثقف بدرجة صفر يعني بروفيسور يتكلم مع احد ابطال القوات الامنية في السيطرات بالظبط راح اتكون مكالمة بلغتين مختلفة و واحد ما راح يفهم الثاني
اجي على ملاحظة جدا مهمة .. ركز على كلامي
معظم الي حاليا  في امريكا و مهاجرين جدد من العراق يلاحظ انو وضعة تعبان جدا في امريكا اذا ما قارنة بالعراق يعني معظم المهاجرين كانو من اصحاب الملايين في العراق و الان هو ايدور على شغل كاشير في اي محل بسيط و يعتبر نفسة محظوظ في حال حصل هذة الشغلة  ولكن هو مرتاح بالرغم من كل هذا !!!! واحد نسئل نفسة ليش
هسة اني اكلك ليش و بكل بساطة هذا الانسان كان يعاني من حالة اغتراب مجتمعي يعني عايش بالعراق لكن العراق مو المجتمع الي يكدر يندمج بي
وووووووو كثير من الامور لكن هذة ابسطهة
تقبلوا تحياتي
 

[احمدمالك]

عاشت ايدك على القصيده الكن هناك بعض الجاوزات بنسبه 2 %
او نسيت بعض التدخلات من قبل النظام السعودي العربي
وبعض الجهات التتي تريد ان ترمي العراق بحضن الجامعه العربيه يعني القومجيه العربيه
فيا اخي ارجو ان تضيف المعلومه من التدخل العربي السعودي وبعض الانضمه العربيه الىى القصيده
بدون ترك اي جه من الي ادخلو بلعراق اوخلوه شعبه شعب مايستحي يا اخي كون منصف
مع الشكر

[ديفيد بغداد]

العيب ليش بالعراق و انما بالعراقين  مثل ماكولون جوهرة بيد فحام  بس  اكول حرامات  بس اريد اعرف لو هذا العراق بيد اليابانين مثلا اشجان سوة اشو بلدهم مابي حتى مكان للزراعة كامو ازرعون مدرجات على الجبال و نحن بس فرحانين نحسب هذا الشهر صدرنة نفط ب 4 مليارات  ماشاللة مثل بيت الشر الي اكول
                لا بأس بالقوم من طول و من غلظ     اجسام البغال و عقول العصافيري

انا اشوف اهم سبب لسؤ احوال العراق قلة تاثير  الطبقة المثقفة و الواعية الي تصرف و تختار  و تعمل على اساس  علمي موضوعي مالة علاقة باي جوانب طبقيا او طائفيا مع  احترام  للاشخاص الي اسميهم الاستاذ على الوردي انصاف المثقفين الي  مثل ماكول المصلاوي  (من برة نقشي نقشي و من جوة خرق محشي  )  يعني الثقافة عندة بس حجي و لبس مو تصرف و لا حسن اختيار و بعد عن  الانحياز الاثني او الديني او المذهبي او العشائري  الحقيقة اخوان انو نحن  شعب  متقلب كل يوم براي  و طبيعة مجتمعنة قاسي مثلا شوفو الثورات بالمطقة مثل مصر لو ايران انتة النظام الملك  نفو و انتة الموضوع نحن لا  صار سحل بالشوارع للعائلة المالكة اللة يرحمهم اجمعين      واتمنى من الاخوان الاطلاع على كتاب لمحات اجتماعية من تاريخ اعراق و راح  يعرف اهواية امور بالمناسبة موجود هو على النيت تكدرون اتنزلو بسهولة  و عسى اللة  يخلص هذا البلد و اسهلة على اهلة و انور  قلوبهم بالمحبة

[ابو الحسن]

عمي العيب بينا بوية ومو بالعراق كوطن وارض
فارض العراق كلها خير وبركة
انه مرات اتشاقه ويا اهلنا واكولهم
لو يطلعون كل العراقيين من العراق
ويجيبون شاب من المانيا وحديثة من اوكرانيا
ويتزوجون ويخلفون عراق جديد
فتشوف العراقيين كلهم شقر  وخشومهم حلوة على امهم ومرتيبن ومتكنين وياكلون بتيتة على ابوهم
ترهم مو ؟
ابو الحسن

[حامد شاكر]

السلام عليكم
سببين رئيسيين هما
1- ساد الظلم        2- ضاع العدل  
و لابد للعدل  ان يسود ولابد لليل ان ينجلي بظلامه وظلمه عن العراق

[aboryan]

الاخ احمد مالك العزيز اني ما ذكرت الدول العربية لان مو اني كاتب القصيدة مثل ما كلت هي رسالة وصلتني
بس احب ايضا اشاركك بقصيدة كتبتها من جنت بالسجن باليونان بسبب خريط العراقيين

تكول القصيدة واني ما اتذكرها كلها لان اني هسة بامريكا و الدفتر مالتي بالعراق بس انشاء الله من يوصلني اسويلكم فد موضوع اسمة ادب المهجر العراقي
تكول القصيدة

تباهينا و كلنا هذا العراق حليو
ما درينا الحسد كاتل اخوتة
تباهينا وكلنا الشمس منة تغار
و جلابة تزامط من كثر زودة
ثاري الجلاب اندارت على الويلاد
و الحلو نابت بالظهر خنجر اخوتة
عجيبة يا زمن دولابك شكد يندار
و غريبة ابن الحراير مديوس بيته
و مضايف بلدنا الجانت مضرب الامثال
صارت مصالخ للزلم و البلد هيتة
حتة الله الجان يحرس هلوطن هجروه
و صار الله يخاف اليوم يسكن بيوته

بس اعذروني على السطرين الاخيرة بس حبيت اكتبلكم اياها مثل ما كانت قبل 3 سنوات تمثل احاسيس مسجون و طافر من بلد جان يعتبرة في يوم اعز البلدان و اكثرها كرامة
يا اخوان لو نظل نبجي دم طول العمر فما راح يرتاح كلبنا

[(بغدادي)]

الطبقة المثقفة تم تشريدها وملاحقتها وتصفيتها وتعددت الاسباب والموت واحد..العراق ينجب الشعراء والمثقفين ويصدرهم الى الخارج..مو غريبة نهائيا ان يدفن اعلام الادب العراقي خارج العراق من الجواهري للسياب للبياتي والملائكة وحتى تشكيليينا من فائق حسن لزياد طارق ومنقذ سعيد وخضر جرجيس ومئات غيرهم ولدوا ليموتوا خارج العراق..يا هالوطن ما شفت راحة..

شجاك اتسودنت يا وطن شنهي شبيك..
بيك الهمة كلهة وشعبك يعاني..
الطايح منذبح والواكف هم مذبوح..ما تعرف المجني عليه من الجاني..
منصوبة الجوادر ما رضت تنشال..كلما ينشال جادر ينصب ثاني
ودفانة شكثر ما كاموا ايلحكون..وحتى العدل يصرخ وين دفاني..
ومراجيح المدينة ماكو يمهة اطفال..واطفالك خطية لعيدك اتاني
كسروا باب كلبي لعيدك متانين وطلبوا هدومهم الواحد من الثاني..

ودوور السنة وراس السنة مكطوع وما ينولد عيسى ومريم اتاني
وعيدك لابس اسود يمشي وي عاشور ايد بايد واحد كاظ الثاني
بنص خارطة كلبي انته لك عنوان..بخارطتك ادور ماكو عنواني
اذن واجب علينا انغير الاسماء اتصير انته المواطن والوطن اني

وينشدوني عليك شلونه وضعه وياك؟ واكلهم مو طبيعي هواي داراني
وتطردني من ادكك بابك واكل للناس طار من الفرح لمن تلكاني
شطبتني من سجلك واكل للناس شطبني من سجله لكلبه وداني
وكالوا شلع كلبك..كالوا باكك عمرك..كالوا عدم اهلك..
كتلهم شكوا بيه اشصار اذا محبوبي شاقاني..

بغدادي

[aboryan]

عاشت ايدك اخ بغدادي والله اني صارلي 3 سنوات وية موقع عين كاوة قريت بيه هواية مواضيع بس هذا الموضوع بالذات غير شكل غير شكل
الموشوع مفتوح لمشاعر كل عراقي مخلص
اكتبو و خللي دموعكم تنهمل ترة ماكو مثل الدموع تغسل الذنوب و الهموم

[غــريـبــه!!!]

بالنسبه اليه اخوان اريد اركض على كاع خضره واشم هواا نقي واروح للبحر واتمتع بحريه واشتغل واحس بقيمتي كانسان واظمن مستقبل لاطفالي من ناحيه طبيه ودراسيه وحريه واحضر مباره كره القدم لنهائي كاس العالم مثل مكال احد الاخوان واريد اهلي من يطلعون ميظل بالي عليهم هاا والله صار انفجار والزم التليفون وخابرهم واحد واحد الله يستر عليهم وعلى الجميع واريد اهتم  بنفسي مو تشوف الواحد بالعراق عمره وصل لل30 تكول شايب يمشي هناك بس يدك علمود يوكل اطفاله ومن هذا العمر خلص عمره.وكل هذي الاشساء ممتوفره بلدنا العظيم
وفوك القهر يجيك الجاهل اللي ممخلص ابتدائيه وميعرف يقره ولا يكتب الوصخ يوزعلك غاز وصاير ابو منيه عليك وهو اكبر حرامي وصار شخصيه براسنه يابه شنو منتمي لكذا حزب ولازمله سلاح