تجربة مع معادلة الشهادة الهندسية عن طريق WES باسبوعين

[Black Angel]

السلام عليكم ورحمة اله وبركاته
اخواني حبيت احجيكلم عن تجربة بسيطة وقد تكون مفيدة عند البعض منكم . عندي صديقي خريج كلية الهندسة جامعة بغداد راد يعادل شهادته عن طريق WES طبعا الناس رحبوا وطلبوا منا وثيقة الدرجات بعدها كالولة راح يراسلون الجامعة حتى يتاكدون من المعلومات واكثر من 6 اشهر وماكو اي خبر لذلك طلب مني ان اساعده بالقدر الي اكدر عليه الي سويته اني شنو رحت عليهم للكلية كالولي ماكو هيجي شي وميصير وهاي شنو بصراحة همة معرفوهة شنو ومعرفوا شلون يملووهة اني خليت الشغلة اسبوع ومليت الاستمارة مال WES  بنفسي بقيت بس اسم الشخص الي يوقع والتاريخ مال التوقيع دخلت على معاون العميد استعطفته انه يوقعها ورة ميجيك المعلومات علما الوثيقة اني ماخذها سكنر ورافقه وية المعاملة الرجال تزحزح قلبه وقعها وختمها
اني محضر اموري  جايب ظرف ابيض وكاتب عليه المعلومات المطلوبة حطيبت الاستمارة ونسخة الوثيقة وكتلة دكتور اختملي على الظرف لان اذا مينختم يعتبر غير اصلي هو ختمه واني فرارة لل DHL    ووصلت للولد ورة 12 يوم استلم شهادته من ال WES معادلة كورس كورس
  بالاتجامنت اكون نسخة بيها شرح بسيط للاخوان المهندسين / جامعة بغداد  لذلك اخوان اذا بعدكم هنا او عندكم شخص ممكن يسويهة الكم توفروون وقت بس لازم تبجي  لمعاون العميد ابو الدراسات العليا

تحياتي

[حمودي ابن زيونه]

جاري ايجاد الشخص للمتابعة بس الكل دتسوي عن طريق WES يعني الظاهر احسن من ECE

[Black Angel]

ان شاء الله تلاكي شخص حمودي وتعادلها باسرع وقت

[ابو الحسن]

عاشت ايدك عمي
خير الناس من نفع الناس
وين فنجوزي هو يحب هاي السوالف والمواضيع اشو ماقره بعده؟
ابو الحسن

[Black Angel]

عمي ابو الحسن منور كالعادة شرفتني عمي بمرورك

وان شاء الله يقرووه الاخوة ويستفادون منه

[Lina2010]

اخي الفاضل بلاك انكل....ممكن ان توضيحلي الامور لان بصراحة مافهمت..شي منو العميد اللي رحتله وشنو محضر امورك...ارجو توضيح الامر وممنونة الك لاني اريد ان اعادل شهادتي وشكرا

[Black Angel]

Lina 2010

من تطلبين معادلة شهاتج من WES راح يطلبون منج الوثيقة ام الدرجات وايضا يطلبون من الكلية  REQUIST FOR ACCADMIC RECORDS والي يتضمن الجزء الاول منه معلومات يوضعه الطلب ومن ثم التاريخ والتوقيع الجزء الاثني مختص بالكليه الي تصدق المعلومات الي خلاهة الطلب في الجزء العلوي ومن ثم توقيع العميد او معاون العميد لامور الدرسات العليا وختم الكلية
هاي العملية عادة تتم عن طريق المراسلات وتطول 6 اشهر واحتمال اكثر هاي اذا مضاعت  بالطريق
الشي الي سويته رحت اني للكلية وطلبت منهم ان يملوون REQUIST FOR ACCADMIC صفنوا بوجهي وكالوا ميصير ممنوع
الحقيقة همة مفهموا هذا الشي لذلك اني عديته اسبوع
ومليت الفورم بنفسي ودخلت على معاون العميد شرحتلة الحالة وكتلة المموسة ويس دازهة المعاملة اكثر من 6 اشهر ومحصلت جواب وماكو ضمان راح تحصل فاحتج تشوف المعاملة وتوقعها وتختمها الرجال بعد ان تحركت مشتعره وافق
بس مخلصت السالفة لان هاي العملية لازم تسويهة الكلية مو شخص فاني كنت اعرف الترتيب وجايب وياية ظرف ابيض كاتب المرسل اليه عنوان ويس
وعنوان المرسل الكلية
وخليته بالظرف وخليته يختمه للظرف من الطرفين لان ويس تحتاج يكون ظرف مغلق ومختوم حتى تضمن انه من الكلية مو من الطالب ودزيته بال DHL ورة اسبوعين حصلنه على المعادلة

[حمودي ابن زيونه]

بس ترى يصير ادز الطلب بالابميل او الفاكس حسب مكالوا WES بس عاد تلكي الفهيم بذيج الصفحة

[Black Angel]

حمودي
رغم مفهمت شتقصد بس راح احاول اذا تقصد انه ممكن تسوي معاملتك وي ويس عن طريق النت فاكيد ممكن
تسوي معاملتك اون لاين اما بكردت كارد او عن طريق ترانسفير موني بس لازم ترسللهم الوثيقة الاصليه بالبريد
اذا مدزيتهة راح يطلبون الاصليه وية الريكوست مال الدرجات الي موقعه العميد ومعاون العميد
يعني يريدون تبقه اصليه عندهم اما عن طريقك او عن طريق الكلية بس غالبا انت تنطيهم الافضل
بس مااخفي عليك وحدة مهم من راسلتهم ( بصراحة منت اراسل 3 من ويس سوية ) ههههههههههههههههه
اشوف منو ينطيني وجه واسهل التفاصيل واعتقد اذا الله مكذبني كانت ام سان فرانسيسكو كالت عادي مو مهم اصليه ممكن يصير 2 نسخة ورة مطلعت روحها باكثر من 10 ايميلات

[حمودي ابن زيونه]

اني قصدي انه WES كال الطلب يعني الورقه Request For Academic ممكن ادزه اني ايميل لو فاكس للجامعة لبدء الاجراءات اذا لكيت احد اهناك يتابعها

زين ليش ماتسويلك شركة اتابع هاي الامور خاصه انه نص الشعب العراقي بالخارج ويريد يعادل شهاداته

[Black Angel]

حمودي الوردة

ممكن ان ترسل الريكوست بالايميل شي جدا عادي انت راح تملي الخانات الخاصة بيك وتوقع بس المهم عدهم توقيع وختم الكلية لان الكلية دتصادق على كلامك
بالمناسبة اكو حالة ثانية صارت قبل يويمن نسيت اكولهة الك سووا المعادلة بدون ريكوست بس شنو لازم تبجي بجية حنينة وتكوللهم انه الكلية متنطيني هيجي شي بالمناسبة همة يختلفون من موقع لموقع
اعتقد البنية ام سان فرانسيسكو اذا الله مكذبني جانت حبابة ومتفهمة تكدر تشرحلهة وتكوللهة بالعراق ميعرفون هذا الشي وميقبلون ينطوني بيه ورقة بلكي تحن عليك وتسويهة الك بدون الريكوست

اسويلي شركة اتابع هاي الامور وبعدين مااقبض شي ورة متاضيني انت على والله شنو حقوق الفكر محفوظ واطلع خسارة مثل المؤذن على المنارة
خليني اساعد الولد بالي الله يمكني عليه ومانريد مقابل بس التسهيل من ربك

[ايسراحمد]

السلام عليكم ... شلونك حبي بلاك انجل ممكن تنطينا الموقع الي حملت من عنده الاستمارة او اذا عندك استمارة جديدة حتى يمكن الاستفادة من عدها ...مع الشكر

[habazbooz69]

بارك الله بيك اخ بلاك انجل بس فد سؤال بلا زحمة عليك هاي مؤسسة ويس اللي تعادلك الشهادة تعادل كل انواع الشهايد يعني الكليات الادبي والعلمي لو كليات محددة واذا ممكن تذكرنا اجورهم شكد ؟
واني ممنون لحضرتك

[Black Angel]

حبي ايسر
انت تدلل ومية هلة بيك وهذا الرابط مالت ويس وبالاتاجمنت تلاكي الاستمارة الاولى مال بكالوريس وماجستر بالمناسبة اذا عندك اي سوال عليهة تدلل


http://www.wes.org/index.asp

habazbooz69
حبي اهلا وسهلا بيك wes منظمة تعادل الشهادات وايضا الكورسات الي مجتازهة بنجاح لجميع الاختصتات والسعر حسب نوع المعادلة والغرض منها وهذا الرابط يبين السعر لكل نوع

http://www.wes.org/fees/schedule.asp

وتدللون شباب واني الممنون

[hussein5582]

احنا بس لو يعتمدون الايميلات واليسون ويب سايت رسمي للكليه جان هاي كله الدوخه مصارت ,, المشكله كله يدز المعامله و المشكله الاكبر بالناس الي تستلمه بالعراق وتخليهه عالرف و متعرف شنو القصه
مشكور اخويه

[ســـرى]

كلامك صحيح اخوية بلاك انجل واني سويت نفس الشي والكليات اغلبهم ما يعرفون بهاي الشغلة ولذلك تتأخر المعاملة بس كليات الطب هسه لكفوها وافتهموا الفلم فشوية احسن الامور.

[Black Angel]

حسين حبي هو منو يقرة الايميل ثاني شي همة يردون بالبريد اني علما حصلت كال كلية الهندسة متت
وهسة كلية الهندسة منزلين الموقع الرسمي والسيليباس مالتهم بس شنو على السنة الجديدة يعني الي مخلص قبل الحرب لو رواهة بسنين او 3 ميستفاد منه لان كلشي تغير الوحدات والمفردات

سرى
صحيح قسم من الكليات لكفوهة ويكولون منسويهة الا مخاطبة مباشرة وتفهم عمي خاطبوكم وموصلكم الكتاب صار 6 اشهر بس ماكو فايدة اسمع لو ناديت حيا فيمكن جماعة الطب شوية احسن الله ينطيهم الصحة

[ايسراحمد]

لك والله انته ورده حبي بلاك انجل وكاعد انسوي عليك زحمة .... بس اكو سؤال اني احد الان ما مسافر لان كاعد انتظر الامنية بس تدري الواحد يفكر دائما بالمستقبل ... شنو نصيحتك واني حاليا بالعراق اروح املي هاي الاستمارة من الكلية واحتفظ بيها لو لازم اكو خطوات قبلها لازم اسويها ؟؟؟؟ وما هي هذه الخطوات ؟؟؟ مع الشكر 

[Black Angel]

حبيبي ايسر تسلم عمي الحلو على هذا الكلام الحلو
حبيبي انت بالعراق نصيحتي الك سوي الورقة هسة وخلص منها وخلي وياهة وثيقتك سكنر وحطها بظرف مال الكلية او ظرف عادي وختمه ختم الكلية ودزها بال DHL او FEDEX او غيرها بحيث تكدر تكمل معاملة شهادتك وانت بعدك بالعراق فمن تروح كلشي جاهز الك واي شي تحتاج اني برسم الخدمة

[Abu Ziad]

أخواني الأعزاء .. لدي سؤال بخصوص معادلة ال WES-US .. يحتاج نبعث الجدارية و وثيقة الدرجات فهل يجب أن تكونان مترجمة ؟ ، كما تعلمون فالجدارية لا تترجم بالكلية ، فقط يتم ترجمة وثيقة الدرجات ، فهل يمكن قبولها لديهم (الجدارية) أذا تمت ترجمتها في مكتب خارجي ؟.
مع الشكر الجزيل مقدما
 

[Black Angel]

اخي العزيز
عند معادلة الشهادة من قبل wes تحتاج فقط الوثيقة بالدرجات باللغة الانكليزية بالاضافة الى international transcript of records والي يجب ملئوه من قبل الطالب والكلية علما انه موجود بالاتاجمنت اعلاه ولاتحتاج الى الجداية لعمل ذلك
لمعومات اكثر راجع الرابط اعلاه الخاص بالمنظمة تحب فقرة المستمسكات المطلوبة وفي حالى احتياجك لاي شي اني برسم الخدمة

[ايسراحمد]

حبي الملاك الاسود .... ولو لاح ازعجك شوية بس هل ادز الشهادة ام الدرجات الي اني طلعتها و صدقتها من الخارجية الاصلية لو مستنسخة ملون طبعا مع الريكوست الخاص WES ... مع الشكر

[ســـرى]

من رخصة اخونا الملاك لانه ما موجود هسه اخي ايسر ماكو اي شي اصلي يندز لwes كله نسخ ملونة بس تكون واضحة واللي تحتاجه بالاضافة للفورم هو وثيقتك مترجمة (طبعا نسخة) ونسخة مترجمة من الجدارية.

[ايسراحمد]

شكرا للاخت سرى على التواصل ...

[Black Angel]

ممنون منج اختي سرى الله يبارك بيج بس عني مطلبوا مني الجدارية بس الفورم والوثيقة الي تكون بالانكليزي اصلا (ملونة)

[Black Angel]

ايسر حبي
بس الفورم حصلت عليه توقيع وختم ؟ وبنهاية الفورم اكو مربع صغير اشر عليه وارفق نسخة ملونة ثانية من وثيقتك الي بالانكليزي
وحطها بظرف مال كلية اذا ماكو ظرف ابيض واختم الاطراف ولاتنسى انت توقع الجزء العلوي

[ســـرى]

اني رادوا مني الجدارية مترجمة.بس مو وية الظرف اللي يندز من الكلية الجدارية دزيتها اني من يمي هنا بامريكا اما الظرف اللي اجه من العراق فمثل ما تفضل بس الوثيقة والفورم.

[ايسراحمد]

السلام عليكم ... شلونكم اخوان طبعا اني اشكركم على مواضيعكم وردودكم ... سؤالي هل ان تعديل الشهادة لاغراض العمل عن طريق WES معمول بيها لو لا ؟؟؟  يعني اكدر راسا اشتغل بيها ؟؟؟؟؟
لو لازم ادخل امتحان FE  او PE يله اصير مهندس معترف بيه ؟؟؟؟
مع الشكر.

[ســـرى]

لا اخوية بالاغلب هي ما تفيدك للشغل هاي تفيدك لاكمال الدراسة ولكن اكو ناس اشتغلوا مهندسين وتبقى عالعلاقات والمكان اللي انت بيه.وهم انتظر رد الاخوة المهندسين على تساؤلك اني هاي معلوماتي.

[Black Angel]

حلبيبي ايسر
اولا انت من تعادل الشهادة لازم تحدد تريد تعادلهة لاغراض العمل او الدراسة او الهجرة او غيرها لان نوع المعادلة راح تفرق
من تعادل شهادتك لاغراض الشغل راح تكون عندك القابلية تكون موهل لاتمتم عملك كمهندس بس غير مرخص لذلك تحتاج  ال PE او FE حتى تكون مهندس مرخص لممارسة العمل في امريكا
غالبا تعادل الشهادة لاغراض الدراسة اما اذا تريد تزاول عملك فالافضل تقدم على ال PE FE

[الحائره]

يا جماعة الخير تره رح اتخبل اشو كل ما افوت موضوع عالدراسة الجامعيه ومعادلة الشهادات ادوخ ارجوكم ساعدوني
اني خريجية كلية انسانيه يعني مو هندسه هل معادلة شهادتي رح تختلف او لا؟
اكو ناس تكول بس ودي الشهادة امم الدرجات مترجمه وبقية الوثائق كلها مترجمه والجداريه وصدقها من الخارجيه وروح عادل شهادتك بالاضافه الى التوفل يعني مكايلين اكو حاجه لل wes وممكن الواحد ياخذ اوراقه بيده لان الاتصال بالجامعه شي صعب واكو بعض الجامعات متريد معادله من الwes
شنو تنصحوني اسوي علما انه اني بمصر حاليا

[ســـرى]

حبي الحائرة المعادلة عن طريق ويس هاي للي يريد يكمل ماستر او للاطباء اللي ورة ما يكملون امتحاناتهم المجلس مال البورد يريده منهم حبيبتي جاوبيني على سؤالي انتي تريدين تكملين ماسر او دكتوراه؟ لو لا؟

[Black Angel]

عيني اختي الحائرة
wes تعادل مختلف التخصصات وفروعها اما بالنسبة للمتطلبات فاعتقد كما هو واضح اعلاه بالموضوع راح تحتاجين توقعين الفورم الخاص بwes ليش تعادلين شهادتج ب wes ? تعادليها لان جميع الكليات والموسسات تتقبل wes بالمعادلة وحتى من تريدين تقدمين للدراسات راح تقوي موقفج وية الجامعة
هل لازم تعادلين شهادتج مع wes ؟ لا مو ضروري تعادلين شهادتج مع wes اذا ردتي اكمال دراسات عليا لان الجامعة قادرة ان تعادل شهادتج بسة راح تخسرين فرصة تعززين موقفج بيهة اما الجامعة بالقبول خصوصا اذا كانت مثل الجامعات العريقة هارفارد كاليفورنيا شيكاغو وغيرهن

[الحائره]

عيني بلاك انجل واختي سرى اشكركم على اجابتكم على سؤالي

اني اريد اكمل ماستر علما اني رح اسكن بولاية اوريجون مدينة بورتلاند واكيد رح ادرس باحد جامعاتها اتمنى منكم تشرحولي بصورة واضحه عن معادلة الشهاده عن طريق wes حته ادرس ماستر علما نه اني بمصر هسه شنو الخطوات اليي اكدر انفذها حاليا قبل وصولي الى الولايات المتحده هل ممكن ادز الفورم مال الwes
لاحد بالعراق لو خاف الجماعه بالعراق ميقبلون يملوه ثانيا اني شون امليها واني ما اعرف بيا جامعه امريكيه رح ادرس شنو تنصحون اسوي
لو من اوصل هيه ترهم واخليها على الله واخذ اوراقي وهي تصفه هناك؟؟
جزيل الشكر

[ســـرى]

حبي اذا ضامنة عندج احد بالعراق ورة ما تسافرين يمشيلج بشغلة الكلية خليها لمن توصلين.

[Black Angel]

الحائرة عيني
اني برايي اذا عندج احد بالعراق افضل ان تخلصين منهة لان يوم بعد يوم دتتعقد هنا بالعراق وبدوا ميقبلون تاخذيهة باليد الا عن طريق البريد وهاي تاكللهة 4 اشهر واكثر مثل الورد هاي اذا مضاعت فسويها وخلصي منها علما انه المعادلة متطلب منج تحديد اي جامعة انتي راح تدرسين بيها او ولاية هية شي عام فتكدرين تسويها وتخلصين منها

[austin]

اخويه بلاك انجل عندي الك فد سؤال ياريت عندك معلومه او تكدر تفيدني وتفيد الي مثلي بعدهم بالعراق برايك اكدر اعادل الشهاده واني بالعراق يعني اذا مسالة معادلة الشهاده تم كلها على النت شنو المانع مع الشكر

[Black Angel]

حبيبي انت
اني همين بعدني بالعراق وعادي تكدر تعادله وانت بالعراق وماكو اي اشكال

[austin]

ممكن اذا ما اسوي زحمة عليك تشرح الطريقة والتكاليف لان هذا الموضوع كلش مهم واحسن ما واحد يروح لهناك ويدورله على واحد يمشيله الشغلة يكملها بنفسه احسن

[Black Angel]

حبيبي اوستن
تدلل بس اقرة الموضوع من بدايته وردرود الاخوة واذا مفهمت شي منه تدلل لان اني شارح فوق العملية فكولي العملية افتهمتها او لا حتى ادزلك الاسعار

[austin]

اخي العزيز بلاك انجل اني قريت مشاركاتك وكل الردود والي افتهمته انه اكدر اسحب الفورم الي انته منزلها واملي الجزء الخاص بيه وروح للجامعه وخلي معاون العميد يكملها ويختمها وارلفق وياها الوثيقة ام الدرجات وبعد ان يختم معاون العميد على الضرف ارسلها للمنضمة ويس على العنوان الي هما ذاكرينه بس الي ما افتهمته همه منضمة ويس شمدريهم شنو السالفه خوما هيج بدون مقدمات والشغلة الثانية الفلوس شوكت يريدوها
مع الشكر زجزاك الله خير الجزاء

[Black Angel]

حبيبي انت
انت افتهمت الجزء الثاني وهو الاصعب الجزء الاسهل والاول ان ترسل وثيقتك ملونة ل wes وتطلب منهم معادلة شهادتك كوس باي كورس اذا كانت لاغراض اكمال الدراسة وراهة راح يراسلووك وينطوك كيس نمبر ويكولوك لازم نراسل الجامعة مالتك انت اعرض عليهم كوللهم اكدر اساعد بهذا الشي من يكولوك اي دز الظرف حبي
وكل عام وانت بالفخ خير وصحة وسلامة

[ايسراحمد]

السلام عليكم ... حبي بلاك انجل ...ولو نسوي عليك زحمة ممكن تكتبلنا صيغة الطلب بالانكليزي والعنوان الي لاح اندزه اله  ...مع الشكر والتقدير ...

[Black Angel]

حبيبي ايسر
كل عام وانت بخير يارب وتحقيق امانيك
العنوان موجود بنهاية الفورم تعتمد انت شلون تريد ترسله مستعجل لو عادي
اكو EXPRESS واكو POST
بالنسبة للطلب ماكو كليشة معينة بس ارسللهم ايميل بالبداية ابدي تعرف عن نفسك ابتداء بالاسم وخلي يكون مثل الجواز والوثيقة تولدك بلدك اسم جامعتك اسم القسم مالتك تخصصك العام او الدقيق اذا وجد وتكوللهم انه انت تريد تعادل شهادتك كورس باي كورس فشنو الاشياء الي يحتاجوهة منك وشكد تكلف وخلال شكد ممكن ان تتوقع المعادلة

وكالعادة اذا احتاجيت شي اني موجود عام خاص تدلل

[Captain]

عاشت ايدك اخ بلاك انجل وانشاء الله نلكة فد واحد يفهم هاي الشغلة

اخوكم
كابتن

[Black Angel]

كابتن حبي انت تدلل
واذا وكف عليك اي شي بيهة لاتردد تراسلني وان شاء الله مااقصر وياك

[لورنس السفاح]

أخوية بلاك انكَل
بالبداية أشكرك واشكر الأخت سرى ع معلوماتكم وردودكم القيمة في الموضوع
بعد قراءة الموضوع وردود الإخوة الأعضاء ,, عندي بعض الأسئلة أكون ممنون اذا جاوبتني عليها


1)الطريقة اللي صادقت بيها الفورم مال صديقك اعتمدت ع الجانب الإنساني لمعاون العميد وهنانه راح يكون التساؤل المطروح ,, ماذا بشأن خريجي بقية الكليات ؟؟ اكيد مو الكل راح يلكون نفس المعاون  متفهم ويسهل الامور ؟؟ اللي اريد اكوله ماكو طريقة أدارية يصادقون بيها الفورم للكل وبأي كلية بدون عوامل تسهيل الأمر او مزاجية العميد او المعاون ؟؟

2)المعروف عن دوائرنا تموت ع شغلة كتابنا وكتابكم ,, قصدي ممكن يستقبلون الفورم بدون كتاب رسمي موجه الهم من WES حتى همه همين من يصادقون الفورم هم يدزونه بكتاب من الكلية ؟؟

3)اللي افتهمته من الموضوع وردود الأخوان انه هذا الفورم مطلوب للي يريد يعادل شهادته لاغراض الدراسات العليا (الماستر) ,, هل الفورم مطلوب للي يريد يعادل شهادته لاغراض العمل ؟ واذا الجواب كلا شنو المطلوب منه بالتحديد من الWES حتى يعادلون شهادته لاغراض العمل  ؟؟

4)شهادة الاعدادية ماشفت الها أي دخل بالموضوع ,, شنو الفايدة منها اذن للي عنده شهادة بكالوريوس بالدرجات ومصدقة من الخارجية ؟؟

5)هذا السؤال هو تقريبا موجه لجماعة التعديل حتى لأغراض الدراسة ,, يعني همه ليش دا يتعبون الناس بهذه المتطلبات ؟ خايفين من التزوير ؟؟ اشوفها مالها داعي من وجهة نضري لان بالمنطق اكو شخص مزور بكالوريوس طبية او هندسة ويجي يقدم ع ماستر بامريكا ؟ خوب انتوا انطوه الفرصة عود والله اذا نجح وبزوده الف عافيه عليه الماستر القصد مستحيييييييل المزور هيج شهادة يجي ويخطي هيج خطوة ويريد يعادل شهادته المزورة بامريكا وفوكاها ياخذ ماستر مناك

مع جزيل الشكر والتقدير

[Black Angel]

حبيبي لورنس انت تدلل نجي على التساؤلات مالتك :


1)الطريقة اللي صادقت بيها الفورم مال صديقك اعتمدت ع الجانب الإنساني لمعاون العميد وهنانه راح يكون التساؤل المطروح ,, ماذا بشأن خريجي بقية الكليات ؟؟ اكيد مو الكل راح يلكون نفس المعاون  متفهم ويسهل الامور ؟؟ اللي اريد اكوله ماكو طريقة أدارية يصادقون بيها الفورم للكل وبأي كلية بدون عوامل تسهيل الأمر او مزاجية العميد او المعاون ؟؟

لورنس حبي لمعلوماتك معاون العميد الي صادقت يمه جدا حازم بس المشكلة شنو انه المنظمة ترسل الاوراق عن طريق البريد بس انت تعرف المسالة تطول 6 اشهر ومرات اكثر هاي اذا مضاعت لذلك الافضل انت تروح للعميد او معاون العميد وتفهمه انه المنظمة دزت الاوراق صار اكثر من ستة اشهر بدون فائدة والي تريده هو مجرد توقيع وختم على الاوراق الي همة راح يتاكدون منها بالاضافة الى التاكد من الوثيقة مالتك اني متاكد راح تلاكي واحد على الاقل متفهم اما العميد او معاون العميد بس الافضل الك انت تترس الفورم لان اغلبهم ميعرفون شلون يملوه فحتى تجنبهم الاحراج والامتناع انه يسويهة الك امليهة انت واشرحلهم الفورم وان شاء الله ربك يسهل اما اذا في اسوا الاحوال لازم تنتظر 6-8 اشهر الى ان توصل للكلية بس شغلة جدا مملة  وطويلة علما اكو صديق سواهة بدون مرجع للكلية بس بعد معاناة مع ال wes وايميلات طويلة والقرار الك

2)المعروف عن دوائرنا تموت ع شغلة كتابنا وكتابكم ,, قصدي ممكن يستقبلون الفورم بدون كتاب رسمي موجه الهم من WES حتى همه همين من يصادقون الفورم هم يدزونه بكتاب من الكلية ؟؟

wes راح تخاطبهم تكوللهم انه يحتاجون هاي المعلومات الكلية مو بالضرورة ترسللهم كتاب لان همة ميحتاجون الكتاب من الكلية يحتاجون الفورم فقط وهذا اسهل للكلية طبعا

3)اللي افتهمته من الموضوع وردود الأخوان انه هذا الفورم مطلوب للي يريد يعادل شهادته لاغراض الدراسات العليا (الماستر) ,, هل الفورم مطلوب للي يريد يعادل شهادته لاغراض العمل ؟ واذا الجواب كلا شنو المطلوب منه بالتحديد من الWES حتى يعادلون شهادته لاغراض العمل  ؟؟

ممكن انت تعادل شهادتك للدراسة لاكمال الماستر كورس باي كورس بس تكدر تعادلهة لاغراض العمل بنفس الفورم بس مو كورس باي كورستكدر تسويهة عام بس اذا تريد تزاول مهنتك كمهندس مرخص لازم يكون عندك ال PF  FE حتى تكون مرخص حكوميا وهاي عبارة عن امتحانات

4)شهادة الاعدادية ماشفت الها أي دخل بالموضوع ,, شنو الفايدة منها اذن للي عنده شهادة بكالوريوس بالدرجات ومصدقة من الخارجية ؟؟

شهادة الاعدادية متفيدك بالمعادلة بس ممكن تفيدك لاحقا بالكلية

5)هذا السؤال هو تقريبا موجه لجماعة التعديل حتى لأغراض الدراسة ,, يعني همه ليش دا يتعبون الناس بهذه المتطلبات ؟ خايفين من التزوير ؟؟ اشوفها مالها داعي من وجهة نضري لان بالمنطق اكو شخص مزور بكالوريوس طبية او هندسة ويجي يقدم ع ماستر بامريكا ؟ خوب انتوا انطوه الفرصة عود والله اذا نجح وبزوده الف عافيه عليه الماستر القصد مستحيييييييل المزور هيج شهادة يجي ويخطي هيج خطوة ويريد يعادل شهادته المزورة بامريكا وفوكاها ياخذ ماستر مناك

حبي هاي اجراءات متبعة من قبل ال wes ولذلك هي تعتبر من ارقى المنظمات وتعرف همة عدهم وجهة نظرهم حتى وان كانت غير منطقية بالنسبة النا

وهم تدلل

[لورنس السفاح]

حبيبي بلاك انكل
تسلملي ع الجواب الشافي
بارك الله بيك اخوية

[Black Angel]

حبيبي لورنس انت تدلل يابة

[ايسراحمد]

السلام عليكم ...شلونك اخوية بلاك انجل ...ولو اني لاح ادوخك ويايه بس اتحملني شوية ...فدوة
اني سويت تسجيل (Apply) على النت وبعد ان اكملت كل الاشياء المطلوبة ما عدا طريقة الدفع فأني اختريت الطريقة الثانية لان تدري احنه ما عدنه كردت كارد المهم وصلني الايميل المرفق.

السؤال : هسه اني شلاح اسوي انتظر لو شنو  ... ادز الاوراق بالبريد ما عدا الفورمة (الخاصة) لان هم المفروض يعلموني بانه قد تم ارسال الفورمة للجامعة (هذا حسب ما قراته من خلال ردودك) زين شلون لاح ادفع الفلوس..مع كامل حبي وتقديري

[Black Angel]

هلو حبي ايسر الصاعق

اسف تاخرت عليك كنت ملتهي ابوك السيارة الفيراري بالدردشة
حبيبي انت تامر لاتسوي زحمة ولاشي

حبي المتعارف عليه ترسل الوثيقة مالتك فقط بدون اشي اخر ووراهة ح همة يبلغوك بانه يحتاجون (الفورم ) من الكلية وانت  كوللهم عندي شخص يكدر يراجعهم حتى يخلي الكلية ترسل المستمسكات
بس حسب الاتاجمنت مرايدين منك شي رايدين الكلية ترسللهم مباشرة فانت شسوي دزلهم ايميل كوللهم الموقع مالكم يكول لازم ارسل الوثيقة مالتي ( هل الارسال بالايميل فقط يكفي ) ؟بينما الايميل يكول متحتاجون مني شي تحتاجون فقط من الكلية فرجاءا وضوحولي الامر
اني عن نفسي الولد دفع لان عنده كردت كارد انت تحب تحول الفوس عن طريق كردت كارد اذا عندك واذا ماعندك سوي تحويل من  البنك 
 you may pay by personal check, money order/bank draft, or bank transfer


وتدلل عمي الصاعق 

[austin]

السلام عليكم
اخويه بلاك انجل هل من الضروري بالبدايه اسوي اكاونت على منضمة ويس حتى اكدر اراسلهم لو شنو الطريقة مع الشكر

[Black Angel]

حبيبي اوستن

الاكاونت يفيدك شلون تتعامل وية ال ويس لان همة يراسلوك عليه وتكدر عليه تشوف الوضعية مال الكيس مالتك

[h80]

السلام عليكم شباب :

شلون صحتكم واحوالكم ان شاء الله كلكم مرتاحين ,

اني كلش ممنون منكم كلكم شباب , اني اليوم دا اكتب اول مقاله الي بهذا المنتدى الي اكثر من رائع ,

شباب ما اريد اطول عليم لان اذا ردت اشكر جهودكم مجتمعه فالحديث راح ايطول,

صاحب الموضوع انته تاج عله الراس وما اعرف منوين ابوسك ,

اوكي هسه انكول الي ان شاء الله مريت بي اليوم,

اني اليوم جنت بجامعه بغداد كليه العلوم اوكي شباب ,

طبعا وره ما نزلت الفورما الي صابحنا دلانا عليها وترست الحقول الي لازم اترسها بنفسي ,


رحت للتسجيل وقابلت معاون العميد بالممر لان هو جان عنده شغل هوايه وما اعرف وين جان رايح ,

اني جنت كلش مستعجل لان عندي شغل ولازم اخلص الموضوع اليوم , فراسا وكفته وكتله عندي شي كلش بسيط وهو ان اريد توقيع من حضرتك عله هاي الفورما مالمعادله دراسه وراويته الشهاده الاصليه , اني جنت ماخذها ويايه,

الجواب جان كلش بسيط كلي تدلل ماكو مشكله بس لازم هاي الفورمه تتمله من العميد نفسه , واحنه انوقعها

اوكي كلت ماكو اي مشكله , طلعت من التسجيل وكلت خالاقابل العميد , واني بطريقي كلت خالامر للقسم مالتي واشوف وين العميد وشلون اقابله ,

فحجيت ويه رئيس قسم الحاسبات هناك , شرحتله الموضوع وكتله ايكولون اله العميد ,

اخذ الفورمه مني وقراها زين وكلي , ماكو اي مشكله بيها , اني راح املي الجزء الثاني منها  واوقعها واختمها بختم القسم مالتنه ,

وبعدين خليته بظرف ويه نسخه من الوثيقه الاصليه  وخليت القسم هم يختم عليها

وهاي هي , الحمد لله والشكر الموضوع مطول اكثر من ساعتين ,

بفضل الله سبحانه وتعالى وجهود صاحب الموضوع اني كدرت اوصل لهلنتيجه

اني كلش ممنون منكم شباب وان شاء الله التوفيق للجميع

سلام

[Black Angel]

حبيبي h80

الله يسلمك ويبارك بيك ياوردة هذا بس من ذوقك واخلاقك
الحمد لله والشكر الي تجربتي كدرت تفيدك وان شاء الله تفيد اخوة اكثر
حبيبي الغالي نسيت اهنيك بكتابة اول موضوع الك اهلا وسهلا بيك بالمنتدى وان شاء الله راح تشوف هواية من الاخوة الاعضاء افضل مني بالمساعدة وطرقها

[Black Angel]

h80 حبي

نسيت اسالك انت تعرف وراهة شسوي مو صحيح لو تحتاج مساعدة ؟

[mohannad ahmed]

شباب هاي الفورمة ةين الكيها بلكت واحد يدزلنة موقعها هسه اذا متصير زحمة

[Black Angel]

السلام عليكم mohannad ahmed

الفورم وكل الامور الي تحتاجها تلاكيها على العنوان www.wes.org
اسم الفورم Request For Academic Records

اذا احتاجيت اي شي برسم الخدمة

[hdhdhd]

حبي Black Angle
اني قؤيت كل الموضوع
يبقه عندي سؤال شلون
ارسل الفلوس او اي طريقه يعني صك تحويل . كردت كارت


مننون اخويه على التوضيحات

[Black Angel]

hdhdhd

اخوية العزيز هذا نفس سؤال ايسر وتكدر تدفع بعدة طرق شوفهة من ضمنها الكردت كارد

If you cannot pay by credit card, you may pay by personal check, money order/bank draft, or bank transfer. Please make checks payable to World Education Services. When you get to this part of the application, just select pay by check/money order

[الذكي]

اخواني الاعزاء اغلب الولايات متقبل الشخص يمتحن fe او pe اذا كانت الشهادة مالتة معادلة عن طريق wes لانه عدهم كونيكشن وية احدى الشركات للمعادلة وهية ncees.org وتروح علة خانة credential evaluations وهمة يتصلون بالجامعة والجامعة تدزلهم الاوراق والوثائق واذا عندك عرف بالجامعة تتسهل الامور هواية اما بالنسبة ل wes فهي لاغراض الدراسة فقظ.
ملاحضة مهمة للاشخاص العايشين بولاية كاليفورنيا او ينوون السفر الها قانون ولاية كاليفورنيا يكول يمكن للشخص انه يمتحن fe او pe بدون معادلة الشهادة بس لو نجحت بالامتحان لازم تبقة محصور بكاليفورنيا تشتغل وميصير تروح لاي ولاية اخرى هذا الكلام متاكد منة اني كنت اكدر اروح لكاليفورنيا وامتحن الامتحان قبل ثلاث سنين بس كاليفورنيا مينعاش بيها غالية ومشاكل هواية
مع تحياتي

[hdhdhd]

حبي Black Angle
ممنون اللك حياتي على الاجابه
بس عندي سؤال شلون اسوي ACCOUNT على الويس وشلون اراسلهم

ممنون اللك

تحياتي الخاصه

[Black Angel]

اخي العزيز

ادخل على الموقع مالتهم وادخل NEW ACCOUNT واذا تحب تتصل بيهم روح على ال CONTACT US

[Sama83]

رفع لاهمية الموضوع وحاجة كثير من الاعضاء الى معلومات وتفاصيل بهذا الخصوص

اخي المحترم بلاك انجل

الشكر الجزيل لما قدمته من معلومات قيمة في هذا الموضوع لكني لاحظت ان التفاصيل مبعثرة في الردود لذا اسمح لي ان اتوجه لك برجاء اخوي ان تكمل جميلك وان تقوم بفهرسة المعلومات والتفاصيل على شكل خطوات متسلسلة (اذا كان ذلك ممكنا )  ابتداء من الدخول الى موقع wes وحتى اتمام اخر الاجراءات المطلوبة وبهذا سنجنبك كثرة الاسئلة العشوائية التي ربما تسبب التشتت اضافة الى ان هناك عدد كبير من الاعضاء ممن اهتموا بالموضوع ويودون القيام بمعادلة الشهادة من بغداد حسب ما لاحظت من الرسائل الشخصية
ارجو ان يحصل رجائي على اهتمامك وذلك  للفائدة العامة

جزيل الشكر لما بذلته من جهد واضح في هذا الموضوع المهم وامنياتي بالتوفيق المستمر وجزاك الله كل خير

سما

[Black Angel]

السلام عليكم ورحمة الله وبركاته

راح احاول اسلسل الخطوات :

1- المنظمة المسؤولة عن المعادلة هي wes موقعها www.wes.org وتعتبر من اكبر المنظمات في امريكا واكثرها ثقة واعتمادا
2- الدخول الى موقع المنظمة وعمل اكاونت جديد يشمل المعلومات الخاصة بالمتقدم
3-ارسال نسخة من وثيقة التخرج بالدرجات الى المنظمة من اجل الحصول على رفرينس نمبر
4- تحديد نوع المعادلة من اجل اكمال الدراسة العمل الهجرة وفي حالة اكمال الدراسة الافضل ديوكمنت باي دويكمنت (document by document)
5-الوثائق المطلوبة هي وثيقة التخرج مصدقة من الخارجية ( نسخة ملونة) وطلب المعادلة يتم الحصول عليه من الموقع
6- طلب المعادلة مقسم قسمين العلوي يخص الطالب والجزء السفلي يخص الكلية ( يفضل جلب المعلومات من الكلية او القسم وطباعة المعلومات في الطلب وبعد الانتهاء اخذها للكلية من اجل توقيع الشخص المختص والختم ) وفي الجزء العلوي من الطلب يوجد ررفرينس نمبر يجب وضع الرفرينس نمبر الخاص بك
7- وضع الطلب الموقع والمختوم وكذلك النسخة الملونة  الوثيقة في ظرف ابيض وختم الظرف من الجهتين كما يوضع عنوان جامعتك في خانة المرسل وعنوان ويس في خانة المرسل اليه
8- يجب البدء باكمال الابلكيشن اون لاين والتي تشمل معلومات عن الشهادة ومكان التخرج ومكان ايصال وثيقة المعادلة وطرق الدفع اما كردت كارد او تحويل وغيرها
9- بعد اكمال الدفع والابلكيشن يتم ارسال الظرف عن طريق ال dhl او ال fedex بعدها سيتم اعلامكم بوصول الوثيقة وفي حال حاجتهم ال اي شي سيتم الاتصال بكم بعدها تبدا اجرارات المعادلة وفي حال اكمالها سيتم ابلاغكم بايميل

تحياتي

[Sama83]

شكرا اخوية المحترم بلاك انجل وصدقا مجهود وتعاون تشكر عليه واعتقد هسة الصورة صارت اوضح الي وللاعظاء اللي يحتاجون هاي المعلومات وبما انه اللي بعدهم ممسافرين قليل يدخلون لمواضيع الحياة العامة باميركا فاسمحلي انقل هاي المعلومات للهجرة واللاجئين حتى كل اللي يحتاجوه وبعدهم ببغداد يطلعون عليه وشكرا مرة ثانية الله يسهل امرك امين ربي

[Black Angel]

الشكر لله عيني

ان شاء الله هاي الخطوات تفيد الاعضاء والي عنده اي سوال اني برسم الخدمة

[شاطئ دجله]

مرحبه اخويه بلاك انجل اريد اسألك يعني اذا ماكو احد ببغداد يتابع موضوع معادله الشهاده يعني الشغله تموت من توصل الجامعه؟

[Black Angel]

وعليكم السلام ورحمة الله وبركاته

اهلا وسهلا بيك دائما بصراحة نعم اخوية تموت لان صديقي دز المعاملة و6 اشهر وماكو رد فالافضل شخص يتابعها ببغداد حتى تخلص بسرعة ومتطول اكثر يوم 1 فقط بالكلية

[علي الخزعلي]

الاخ العزيز بلاك انجل اني موجود حاليا في بغداد وقرات مساهماتك القيمة الي سوف تجزى خي
 بس حاولت ادخل على الموقع واسوي حساب ملكيت لان من املي الحساب اتفاجاء بالريفرينس نمبر افيدونا ماجورين
را عليها ان شاء الله

[dhiya2007]

السلام عليكم ورحمه الله وبركاته
شكرا جزيلا على الموضوع المفيد
عندي سوال ارجو منكم الاجابه
لدي شهاده ماجستير من جامعه بغداد وانا خريج بكلوريوس من جامعه اخرى فهل يجب ان اقوم بمعادله الشهادتيين يعني يجب ان تقوم كلتا الجامعتيين بملأ هذه الاستماره ام يكفي ان تقوم جامعه بغداد بذلك والوثائق من الجامعه الاخرى فقط ولكم الشكر الجزيل

[Danoosha]

اخي العزيز Black Angel
شكرا على الموضوع المفيد بس اكو استشارة
اني خريجة هندسة جامعة بغداد قسم مساحة اذا اعادل شهادتي فهل رح تفيدني؟
وهل يوجد اختصاص مساحة بامريكا لو انلغى؟

شتنصحني ؟
شكرا وتحياتي

[austin]

السلام عليكم
اذا مليت الاستماره وخليتها بضرف وانختم على الضرف من الجامعة شنو العنوان الي اخليه على الضرف يعني عنوان جامعتي لو عنوان ال wes

[Black Angel]

السلام عليكم ورحمة الله وبركاته


بالبداية احب ان اعتذر عن الرد المتاخر بسبب عدم تواجدي على النت

علي الخزعلي
اخي العزيز من تملي الابلكيشن اون لاين وتدفع الرسوم راح يوصلك على ايميلك رقم الرفرينس نمبر الي تخليه بالاستمارة

hiya200

اخي العزيز تكمل معاملتك مال البكالوريوس من الجامعة الاولى والماجستير من الجامعة الثانية وترفقهم سوية بنفس الظرف وترسلهم سوية والمبلغ يكون 1 فقط للشهادتين

Danoosha

اخي العزيز هذا السوال تكدر تقرة الويب سايد مالتهم وتشوف فائدة المعادلة وقيمتها بالنسبة الك لانها تختلف من شخص لاخر اما بالنسبة للاختصاص فهي معادلة للشهادة ومااعتقد اكو اختصاص بالعراق مموجود بامريكا

austin

اخوية على الجهة اليسرى العليا تخلي عنوان جامعتك وبوسط الظرف تخلي عنوان wes

اكرر اسفي مرة 2 على التاخير واي شي اخر اني برسم الخدمة

[austin]

مشكور اخوية العزيز على الرد بس اريد اسوي زحمه عليك شويه لان اني ما عندي خبره بالمراسلت سؤالي هوه اكو فد مواصفات خاصة بالضرف الي اخلي بيه الاستمارة وهل اذا كانت ااستمارة مطبوعة احسن وشدز ويه الاستماره عدا التاييد والشهاده الي بيها الدرجات

[Black Angel]

اخوية العزيز

الظرف مابيه مميزات معينة غير يكون ابيض ونظيف وطبعا الاستمارة اذا مطبوعة تكون افضل وتبين رسمية اكثر وتتجنب اي خطا او لبس بالسبيلينغ وترفق معاه وثيقة باللغة الانكليزية تحتوي درجاتك وباللغة الانكليزية تكون موثقة من الجامعة والخارجية بالاضافة الى الاستمارة واذا عندك جدارية بالانكليزي يكون افضل

[علاء99]

السلام عليكم شباب
انه مخلص معهد نفط ميكانيك وارغب باكمال الدراسة بنفسة الاختصاص للبكلوريوس  بعد الوصول انشالله فهذا كلامكم هم يشملني وشنو المطلوب هسه من يمي وشكد تكلف المعادلة والدراسة وزبن شنو بالضبط فائدة دراستي للمعهد بالعراق يعني راح يحسبولي سنوات الدراسة او المواد لو شنو حتى ارتب وضعي بالكي تفهموني شنو القصة حبايب
ابو علاء

[Black Angel]

وعليكم السلام ورحمة الله وبركاته

اخي العزيز اكيد من الممكن معادلة شهادتك عن طريق ويس لانه wes تعادل حتى جميع الشهادات الاكاديمية فاكيد يشملك اما بالنسبة للمطلوب وتكلفة الدراسة فحاول اخي تقرة الموضوع من البداية راح تتوضحلك هواية امور ووراها اذا عندك اي سؤال احنا برسم الخدمة

[Spidermanciv]

السلام على الجميع، وشكرا على الموضوع، وسؤالي للـ دكتور ماجد، بخصوص كيفية التحضير لإمتحان الـ FE يعني خاصة بالنسبة لي آني مهندس بناء وإنشاءات خريج 1998، هل تنصح حضرتك بـ مصدر معين (FE Manuals)، أو كتاب معين  بحيث واحد يشتريه أو شوف شلون يدبره أو أكو مواقع مجانية حسب معلوماتك لمراجعة اسئلة الإمتحانات السابقة او المماثلة؟ لو الأفضل واحد يدخل دورة للتحضير على الـ FE؟

مع فائق الشكر والإحترام

[ahmed gray]

حبيبي لورنس انت تدلل نجي على التساؤلات مالتك :


1)الطريقة اللي صادقت بيها الفورم مال صديقك اعتمدت ع الجانب الإنساني لمعاون العميد وهنانه راح يكون التساؤل المطروح ,, ماذا بشأن خريجي بقية الكليات ؟؟ اكيد مو الكل راح يلكون نفس المعاون  متفهم ويسهل الامور ؟؟ اللي اريد اكوله ماكو طريقة أدارية يصادقون بيها الفورم للكل وبأي كلية بدون عوامل تسهيل الأمر او مزاجية العميد او المعاون ؟؟

لورنس حبي لمعلوماتك معاون العميد الي صادقت يمه جدا حازم بس المشكلة شنو انه المنظمة ترسل الاوراق عن طريق البريد بس انت تعرف المسالة تطول 6 اشهر ومرات اكثر هاي اذا مضاعت لذلك الافضل انت تروح للعميد او معاون العميد وتفهمه انه المنظمة دزت الاوراق صار اكثر من ستة اشهر بدون فائدة والي تريده هو مجرد توقيع وختم على الاوراق الي همة راح يتاكدون منها بالاضافة الى التاكد من الوثيقة مالتك اني متاكد راح تلاكي واحد على الاقل متفهم اما العميد او معاون العميد بس الافضل الك انت تترس الفورم لان اغلبهم ميعرفون شلون يملوه فحتى تجنبهم الاحراج والامتناع انه يسويهة الك امليهة انت واشرحلهم الفورم وان شاء الله ربك يسهل اما اذا في اسوا الاحوال لازم تنتظر 6-8 اشهر الى ان توصل للكلية بس شغلة جدا مملة  وطويلة علما اكو صديق سواهة بدون مرجع للكلية بس بعد معاناة مع ال wes وايميلات طويلة والقرار الك

2)المعروف عن دوائرنا تموت ع شغلة كتابنا وكتابكم ,, قصدي ممكن يستقبلون الفورم بدون كتاب رسمي موجه الهم من WES حتى همه همين من يصادقون الفورم هم يدزونه بكتاب من الكلية ؟؟

wes راح تخاطبهم تكوللهم انه يحتاجون هاي المعلومات الكلية مو بالضرورة ترسللهم كتاب لان همة ميحتاجون الكتاب من الكلية يحتاجون الفورم فقط وهذا اسهل للكلية طبعا

3)اللي افتهمته من الموضوع وردود الأخوان انه هذا الفورم مطلوب للي يريد يعادل شهادته لاغراض الدراسات العليا (الماستر) ,, هل الفورم مطلوب للي يريد يعادل شهادته لاغراض العمل ؟ واذا الجواب كلا شنو المطلوب منه بالتحديد من الWES حتى يعادلون شهادته لاغراض العمل  ؟؟

ممكن انت تعادل شهادتك للدراسة لاكمال الماستر كورس باي كورس بس تكدر تعادلهة لاغراض العمل بنفس الفورم بس مو كورس باي كورستكدر تسويهة عام بس اذا تريد تزاول مهنتك كمهندس مرخص لازم يكون عندك ال PF  FE حتى تكون مرخص حكوميا وهاي عبارة عن امتحانات

4)شهادة الاعدادية ماشفت الها أي دخل بالموضوع ,, شنو الفايدة منها اذن للي عنده شهادة بكالوريوس بالدرجات ومصدقة من الخارجية ؟؟

شهادة الاعدادية متفيدك بالمعادلة بس ممكن تفيدك لاحقا بالكلية

5)هذا السؤال هو تقريبا موجه لجماعة التعديل حتى لأغراض الدراسة ,, يعني همه ليش دا يتعبون الناس بهذه المتطلبات ؟ خايفين من التزوير ؟؟ اشوفها مالها داعي من وجهة نضري لان بالمنطق اكو شخص مزور بكالوريوس طبية او هندسة ويجي يقدم ع ماستر بامريكا ؟ خوب انتوا انطوه الفرصة عود والله اذا نجح وبزوده الف عافيه عليه الماستر القصد مستحيييييييل المزور هيج شهادة يجي ويخطي هيج خطوة ويريد يعادل شهادته المزورة بامريكا وفوكاها ياخذ ماستر مناك

حبي هاي اجراءات متبعة من قبل ال wes ولذلك هي تعتبر من ارقى المنظمات وتعرف همة عدهم وجهة نظرهم حتى وان كانت غير منطقية بالنسبة النا

وهم تدلل

Black Angel  اخي العزيز انا خريج الجامعة التكنولوجية 2003 قسم كهروميكانيك -فرع ميكانيك وانا حاليا في مصر واريد ان اعادل شهادتي وانا عندي سفر عن قريب الى ولايه مينيسوتا ان شاء الله ولي دكتور صديق لي في القسم بمنصب مقرر القسم كيف يمكن ان يقدم لي المساعده
اذا امكن من حضرتك ترسلي على الخاص لكي افهم المطلوب مني ان اعمله .{وتقبل فائق احترامي وتقديري }


المهندس /اخمد الربيعي

[Black Angel]

السلام عليكم ورحمة الله

اخوية احمد بالنسبة للمعادلة عندك خيارين :
الاول : تعادل شهادتك بالطريقة العادية المذكورة بالموضوع اعلاه بغض النظر انت في اي مكان بالعالم وطيعة تخصصك
الثاني : ترسل شهادتك والسيليبس الخاص بدراستك الى صديقك حتى يعرضها على القسم المتخصص من اجل معادلتها

الفرق بين الاول والثاني هو انه في الخيار الاول يمكن استعمال المعادلة لاغلب ان لم تكن لجميع الجامعات الامريكية وجامعات كندا اما في الخيار الاني فانه يستعمل فقط للجامعة الي يعمل بها صديقك

تحياتي