F-16 فضيحة جديدة للحكومة طائرات

[IRAQI HAWK]

حبيب العربنجي

هالمرة شنو راح تگول وزارة الدفاع العراقية عن البوگ والقشمرة !!

الخبر عن (سي إن إن CNN)..يگول إن العراق راح يشتري طائرات F-16  من أميركا، وعدد الطيارات في الصفقة هو (18) طيارة رقماً.. وكتابة ثمنطعش طيارة...وكلفة الصفقة هي ثلاثة مليارت دولار أمريكي !

يعني كلفة الطيارة الوحدة هي 166 مليون دولار..فقط لا غير

بس دقيقة يمعودين...لأن سعر هذه الطيارة في كل الصفقات الامريكية السابقة لغير دول ما تجاوز في أسوأ الصفقات فساداً ورشوة أكثر من خمسة وخمسين مليون دولار...يعني بالصفقة العراقية أكو أكثر من مائة مليون دولار فساد ورشوة...بجيب منوووووووووو!

وبعدين لويش هاي الصفقة !! أشو إحنا دولة ديمقراطية ما عدنا أعداء ...إلى درجة ضايجين من السلام وفاتحين بلدنا ساحة مجانية للحروب بين الأعداء وإحنا نتفرج على أفلام الأكشن بين إيران وأميركا وتركيا والسعودية وسوريا وحتى بين باكستان والهند وسيلفا كير وعمر البشير...وبعدين إحنا عدنا جيش آل ممة كفو يقاتل بالچفچير ...والچفچير لو يذبح روحه ما يوصل سعره إلى 150 مليون دولار للچفچير الواحد...إلا إذا الچفچير عنده  يدتين بدال يدة وحدة.

أشو إحنا أمورنا عدلة وي الجارة المسالمة إيران المقدسة (صلوات يا أمة الخميني)..يضربونا ونگول ضرب الحبيب مثل شرب الزبيب...وتركيا دا تاكل وتشرب من نفس المائدة وي كاكاوات الشمال وماكو خوف...وسوريا غرگانة بمشاكلها...والأردن همين...والسعودية هسة هي مشغولة بالملك إللي راح يجي بعد عبدالله... والكويت مشغولة وي النائب وليد الطبطبائي إللي كل أشوية طلع بلنتيقة وأسقط الحكومة الكويتية....بس يجوز تصير إلنا عدواة وي دولة جنوب السودان خاصة بعد ما أعترف  شمال العراق بجنوب السودان  بس الخارجية العراقية لحد هسة ما طلعت بيان الإعتراف بالجنرال  سيلفا كير أبو الشفقة رئيساً لدولة جنوب السودان.

 
وإذا وزير المالية العراقي دا يگول أن الاموال إللي راحت على مشاريع الكهرباء في العراق  من 2003 ولحد هسة تكفي لشراء كل عائلة عراقية شقة فخمة بأوروبا (الظاهر الوزير يعرف سعر الشقق الفخمة بأوروبا)...وإللي هي 30 مليار دولار أمريكي...فأعتقد أن صفقة طيارات F-16  تكفي بناء وتأهيل بلديات العراق بلكن اشوية توگف على حيلها وتشتري سيارات زبالة وتخلص الناس من الغارات المعادية لحلف الذبان والبگ والحرمس.

يمعودين إحنا محتاجين نبني دولة...خلونا نبني دولة...مدارس...نشرع قوانين تمنع عمل الأطفال تحت 16 سنة...نبني مسارح وسينمات...متنزهات ومساحات خضراء مو نروح نجيب طيارات...وبعدين 18 طيارة منو راح يطير بيها...طيارين أكراد لو السنة لو الشيعة لو المسيح مثل منير روفا لو شلون...لو يجوز ننطي لكل محافظة طيارة بحسب المحاصصة ويطيروها فوق أجواء أقليم المحافظة ويمنع منعا بتاً أن تطير في الأجواء الإقليمية لباقي المحافظات ؟

وخلونا نتعلم ونشوف باقي العالم شلون عدهم أفكار...مشروع هاي-لاين بنيويورك...عبارة عن سچة قديمة بطول كيلومترين بنص نيويورك يعني تماما مثل ما چانت سچة قطار الصرافية بنص بغداد...سكان نيويورك إللي يحبون مدينتهم سووا جمعية حماية هاي السچة لأن تمثل تاريخ لمدينتهم وگدروا يحصلون على تخصيصات مالية من عمدة نيويورك للإستفادة من هاي السچة بمشروع جمالي يخدم جمالية مدينة نيويورك.

أعلنوا عن مسابقة وشاركت كبرى مكاتب الهندسة العالمية حتى العبقرية زهاء حديد...والمشروع فاز به مكتب هندسي لأن قدم فكرة مبتكرة وهسة هاي السچة هي أجمل متنزه بنص نيويورك...متنزه عالي مثل جسر معلق بأرتفاع ثمانية أمتار على طول كيلومترين وأماكن گعدات وسوالف مباشرة على النهر...ولو إحنا عدنا أوادم...وأرجو الأنتباه إلى كلمة أوادم مثل سكان نيويورك ونحب بغداد ونحب مدننا حالنا حال سكان نيويورك...إشگد مشاريع مثل مشروع (هاي لاين) چنا نگدر نسوي وخلوا ببالكم إن كلفة مشروع هاي لاين ما تجاوزت سعر طيارة وحدة من طيارات الصفقة العراقية الاميركية لطائرات F-16..هسة نريد وزير المالية يحچي مو يحچي من تضيع الفلوس ويصير براسنا فهمان بالإقتصاد على طريقة إكسر وإجبر إعتمادا على خبرته في طب العظام !وشجاب الدفرة عالتفلة ؟؟  ما تدري شنو الموضوع في العراق الغشيم.

إحنا عدو لكل شي جميل بمدننا وببلدنا...ما حد گلبه محروگ عالبلد...الكل دا يشوفوها فرصة للبوگ ما تتكرر...بوگوا ببركات الائمة والصالحين ودعوات الامهات...بوگوا يحبكم الله ويحببكم في خلقه...بوگوا ..بس خلونا بالتاتا وياكم...لان هاي الفرصة ما حد سواها إلكم غيرنا...بغشمتنا وغبائنا.ولا زم تاخذونا وياكم..لو إحنا مو أغبياء چنتوا ما تگعدون  بهالمكاتب وتبوگون هالبوگات...يعني رد الجميل إلنا ما بيه شي...ذكرونا ببوگة وحدة والله وياكم....آآآآآآآآآآآآآآآآآآآآآآآآآآآآآآآآخ خ خ خ عالغباء.....يقتل بالحسرة.

ويا ستار من الصفقات الجاية....ومو بعيدة نسمع أن العراق راح يوقع على شراء خمسين فرن صمون حجري من ألمانيا بسعر خمسين مليار دولار...علما أن العراق هو الوحيد إللي يتعامل ويعرف تكنولوجيا الصمون الحجري...لا ألمانيا ولا التكنولوجيا اليابانية تگدر تنتج صمونة وحدة بحسب المواصفات العراقية....وألف عافية.

وبعدين...منو راح يوقع صفقة الطيارة إذا ما عدنا وزير دفاع...أويلي إذا يروح أبو جاسم العسكري ويوقع الصفقة....لأن هذا ما يعرف شنو F-16 وشنو M-16، وأخاف الفلوس كلها تروح ويجيب إلنا بنادق M-16 بسبب خطأ مطبعي في الصفقة...وبدال ما يكتبون F-16، صار M-16..وماكو واحد ما يغلط....خاصة إذا الشعب غشيم وضارب دالغة.