السلام عليكم ورحمه الله وبركاته
شلونكم اخواني واخواتي اعضاء منتديات عنكاوه الاعزاء
اتمنى تكونون كلكم بخير وصحة وسلامة وامنياتي بالسفر القريب للكل
بالبداية احب اعتذر عن تاخري بالكتابه لانه وعدتكم اول ما اوصل راح اكتبلكم بس ان شاء الله لمن تجون لا امريكا راح تعذروني ودكولون اي والله حقه لانه مراح يكونون عدكم وقت لكثرة المواعيد والمقابلات الخ ... ...
المهم ما اريد اطولها عليكم واحجيلكم شصار ويايه من اول مطلعت من بغداد لحد هاي اللحظه
الجزء الاول (من مطار بغداد الى مطار بورتلاند ولاية اوريكن الامريكية ) طبعا اني يوم سفري كان 3/1/2012 من مطار بغداد (مطار النهب والتقفيص) راح تسالوني ليش ؟!
لانه اول ما وصلت ساحة الوفود استقبلوني الحمالين الي كل واحد منهم يريد 10 الاف دينار عراقي علجنطه !!! طبعا اني جنت جايب ويايه 4 جنط وزن كل وحده فوك 26 كيلو وجنطتين هاند باك بس بالاسم بس همه اوزان ثقيلة بصراحة لانه استغليت كل جيب وكل مكان بالجنط طبعا من عدا اللابتوب وجنطة بنتي ال5 كيلو ...يعني تقريبا 50 الف بس جنط من مكان السيارة الي اجيت بيها من البيت لحد سيارة المطار والي هي جي ام سي حديثة والي راح ياخذ منكم 70 الف دينار علمود يوصلكم لصالات لمطار طبعا ها مكتلكم اني فضيتها ويا الربع ب25 الف هسه اشكد صار المجموع ؟ 95 الف هاي بعدني اني مواصل للتفتيش
وره موصلنا لازم ننزل احنه والجنط للتفتيش وطبعا هم حمالين غيرهم كل واحد ياخذ 5 الاف علجنطه وفضت ب20 الف هسه اشكد صار المجموع 115 الف وبعدنا مواصلين للمطار !!
المهم وصلنا للمطار وهم اكو حمالين بس هالمره شويه ارتب المهم جيب الليف ودي الليف هم 20 الف الخ اني صارف ورقه ونص على حماميل وبيبسي وبسكت وما اعرف شنو بصالة الانتظار (قوطية البيبسي ب6000 دينار )
كلت ميخالف بس خلي اخلص
طبعا راح دكولون شنو الوزن اشو اهوايه بس صدكوني اذا جانت رحلتكم مو ترانزيت ومباشر من عمان لشيكاغو او نيو يورك تره بس مره وزن ومتشوفون الجنط الا بمطار امريكا وبمطار بغداد متساهلين يعني اقصد ابو الخطوط مال عمان يتساهل بس بصراحه اني عندي معارف وطلع عندي وزن زياده بكل جنطه 8 كيلوات فوك الوزن المقرر والي هو 23 كيلو ومشت الحمد لله بس انشلع كلبي لحد ما وصلتهم وطبعا اني اشتريت من مطار التقفيص شريط لاصق عريض ب10000 دينار الي هو بره ب750 دينار ومحد يكلبه وضربت الجنط مالتي كلها شريط لاصق هاي تنفعكم بالنقل وتوصل جنطكم سلامات وسووها بلبيت قبل لا تتطلعون للمطار
الي يدخن خلي ياخذ شكد ميريد جكاير مو كلولي بالدورة التثقيفية الك حق تشيل 2 كلوس واني اخذت مارلبورو اسود تره تكدرون تاخذون 20 كلوس ومحد يكلك شنو هذني واخذت ادوية وعطور طبعا راح نجي بعدين على موضوع شتاخذون ومتاخذون بس اهم شي الجكاير للمدخن
المهم وصلنا عمان بعد رحلة دامت ساعة الا 10 دقائق تقريبا وكانت ممتعة ومريحة وبعد وصولنا لمطار عمان استقبلنا موظف الاي او ام ورحب بينا وكان عددنا 3 اني وزوجتي وبنتي عمرها 11 شهر وعائلة مكونة من زوج وزوجته الحامل وطفلين وبنية شابه وحدها وولد هو واخته هاي كل الي طلعو بهذاك اليوم من بغداد وطبعا جانت اكو عائلتين المفروض تجي ويانا وشفناهم بالفحص بس ما اجوي بموعد السفر ومندري شصار وياهم
انطانا اوراق نوقع عليها ومن ضمن الاوراق كمبيالة تسديد مبلغ الرحلة بعد وصولنا لا امريكا ب8 شهور او اول متحصل عمل خلال ال8 شهور الاولى
واخذونا لفندق المطار الى هو فندق 4 نجوم او 5 ما اتذكر واسمه كولدن تولب وكان الوقت بال2 الظهر لانه رحلتنا لا امريكا كانت ثاني يوم ساعه بال 9 الصبح
الفندق كان جدا رائع وخدماته ممتازة وارتاحينا بي بس كلش غالي اذا فكرتو تشترون شي منه على حسابكم يعني تره كوب الجاي الي بكد فنجان الكهوه ب6 دولار وانتو تخيلو شنو الاسعار البقيه !! وكان بي وجبتين بوفيه مفتوح عشا وفطور وغادرنا الفندق ساعه بال7 ونص الصبح متوجهين لمطار عمان مره ثانيا وصعدنا طائرة البوينك العملاقة وهنا جانت الرحلة المتعبة والمرهقة والي دامت 14 ساعة بالتمام والكمال 8 ساعات منها فوق المحيط تتضمن الرحلة وجبات اكل مختلفة اتذكر الرئيسية 3 وجبات وما بين الوجبات هم اكو عصير ومقبلات وكرزات وبالنسبة للي عدهم اطفال رضع اكو اسرة خاصة للنوم
والحمد لله وصلنا بسلامة لمطار اوهير العملاق ومن اكول عملاق صدكوني بكل ما تحمل هاي الكلمة من معاني موجودة بهذا المطار
مطار اكثر من رائع وانصحكم متفوتون فرصة حتى تاخذون صور بهذا الصرح المبهر ...استقبلونا موظفين الا اي او ام الحقيقين والي همه عدهم سلطة ملفتة للنظر عكس موظفين الوطن العربي طبعا راح دكولون شلون ؟؟
ها بالمناسبة كان وياهم شخص عراقي حقيقة محفظت اسمه لانه جدا صعب والولد هو ارمني فا اسمه مينحفظ بسهوله بس ولد ينحط علجرح يطيب .....
وره موصلنا صالات الدخول كان اكو كم هائل من المسافرين يعني ما ابالغ اذا كتلكم مئات مئات المسافرين من كل الجنسيات واكفين طوابير علمود اجراءات التفتيش وفحص العين والبصمات الخ ولمن مشينا ويا موظفي الا اي او ام الاصليين واأكد على هاي الجملة كانه احنه وفد دبلماسي والناس كلها تباوع علينا شنو هذوله منين جايين وليش مو ويانا ينتظرون همه محجو هيجي بس ملامحهم توحي هالشكل المهم فتحولنا كاونتر خاص بس النا بصمونا واخذو بصمة العين هم واستلمنا جنطنا الى ودعناها بغداد وجبناها للتفتيش وعبرن بسلامات بدون عراقيل وكلها مطولت الشغلة ساعة واخذنا جوله بالمطار الي كلمة يخبل قليلة بحقه واهنا جانت لحظه الوداع بين العوائل وكلمن اخذ التكت مالته للوجه الاخيرة وطبعا التنقل بالمطار للصالات عن طريق المترو بداخل المطار !!!واحنه كانت طيارتنا ساعة بال8:45 مساءا بتوقيت شيكاغو على خطوط يونايتد الامريكية واهنا الجنط يروحن للوزن مره لخ وطبعا موظفة الا اي او ام حجت ويا الشخص المسوؤل عن الوزن وعبرهم طبيعي يعني عدهم فد سلطة وكلمة تخوف
المهم طرنا وسفرتنا كانت 5 ساعات تقريبا من مطار شيكاغو الى مطار بورتلاند ولاية اوريكن الفاينل دستنيشن مالتي طبعا الدنيا كانت ليل والوقت يرجع بينا كل منتجه للشمال واحنه جدا تعبانين ونمنا اول مصعدنا الطياره ومكعدنا لحد ما وصلنا بسلامة والحمد لله على كلشي
واهنا خلصنا الجزء الاول من رحلتي من مطار بغداد الى مطار بورتلاند
الجزء الثاني ( لحظة الوصول حتى يومنا هذا ) بعد ما وصلنا مطار بورتلاند والحلو بمطارات امريكا واحد احلى من الثاني استقبلني كفيلي الشامل والي هو خال زوجتي واخو يعني خال زوجتي الثاني سبق واني حجيتلكم عن هذا الشي وكملنا اجراءات الدخول من تواقيع واستلام الجنط رحنا بالسيارة لبيتهم وبعد ما ارتاحينا واتصلنا با اهلنا بالعراق حتى نطمئنهم علينا وتعشينا اخذونا للشقة مالتنا الي كانت بمقاطعة بيفرتون بحي اسمة سيدر هيلز اذا اريد اشبه الكم بصورة اقرب شلون عرصات الهندية وتتمشون مسافة 100 متر تتطلعون للسوك هيجي شي منطقة راقية جدا نسبة الجريمة بيها تكاد تكون معدومة والولاية بحد ذاتها نسبة البيض بيها 95 % ومتعصبة للبيض ونسبة السود بيها اقل من 2 بالمية والباقي مكسيكان ودول شرق اسيا وعرب
الشقة كانت بمجمع سكني على شكل شقق سكنية كل 4 شقق يحويها مبنى وبي مسبح 10 امتار وعمق تدريجي من نصف متر الى 4 امتار بعرض 8 امتار وطبعا بصفنا هم مجمع الخ ... خال زوجتي الثاني ساكن بالشقق الي مقابل شقتي يبعد عن 20 متر او اكثر بشويه واكو 3 عوائل عراقية هم حوالينا
الشقة جديدة ومن اكول جديده يعني كلشي بيها new هي غرفة وحده وصالة نظام امريكي المطبخ مفتوح على الصالة بس مرتفع عنها والصالة بيها من الجهتين درج يصعد للمطبخ يتوسط الشقة على شكل بار و بي ثلاجة جديدة كلش جبيرة وطباخ 4 عيون كهربائي وبي فرن هم جديدة وغسالة صحون جديدة ومايكرويف جديد وكاونترات خشب بني غامق ومفروشة كاربت ممتاز وجديدة وحمام متكامل نظام فندقي وبيها مخزنين وبيها نظام تدفئة مركزية طبعا كهربائي وبيها اركيندشن عدد1بالصالة وغرفة النوم الي تحتوي كنتور بي 2 باب سلايد بداخل الحايط ارتفاعه 2 متر وعرضه 3 امتار والعمق 75 سم وكلش كافي وجبير واهم شي هي طابق ارضي وهاي اساسيات الشقة اما باقي الاثاث فطبعا كفيلي ماثثها الي بلكامل
ايجارها بالشهر 650 دولار تشمل المي والكاربج اما الكهرباء اكيد اني ادفعها والي هي جدا غالية بهاي الولاية اما غير كلشي رخيص وارخص حتى من العراق
طبعا يومين ارتاحيت من تعب السفر ومشاكله والهوم سك صعد عندي بعدين بلشو العراقيين يزوروني والحمد لله كدرت اطلع منها با اسرع وقت لهاي المحنه وكانو الي اكثر من الاخوة واهنا اكو شخص عراقي من موالد 1954 يشتغل مترجم بشركة يتبنى الشخص الوافد ويكمل كل اجراءاته ويدلي الطريق الصح وشنو الي يريحه وشنو الي يضره بدون ميدفع ولا سنت الشركه هي الي تدفعله والي بدورها تاخذها من الحكومة الفدرالية
وره 4 ايام اخذني للمنظمة مالتي والي هي الكاثوليك والي اعتقد برائي احسن منظمة موجودة بهذه الولاية لانه سمعت من عراقيين الفروقات الي بينها وبين المنظمات الثانية مثل السورس واللوثرن الخ ...الكيس منجر مالتي روسية عمرها 73 سنة مراح ندخل بتفاصيل المقابلة بس راح احجيلكم شنو مخصصاتي بهذه الولاية حصرا
الولكم مالتي كان 1125 لكل شخص بينا يعني مجموع 3 اشخاص 3375 دولار الحقيقة اني مردتهم وكتلها اريدهم للايجار كالت هاي فلوسك شلون تريد تتعامل بيها انت حر فسوتلي 4 شيكات على 600 دولار وشيك 400 دولار ديبوزت يعني تامينات للشقة انطيها لمسوؤلة السكن لمن اترك الشقة وبدون اي اضرار ترجعلي اما اذا تضررت فا ال400 راح تغطي الاضرار وانطتني البقية هاي بالنسبة للولكم وفهمتني علمود الفود ستامب والكاش اسستانت فا اني الي 506 كاش و548 فود ستامب هاي معليها بالولكم واستلمها من دائرة الهجرة الي هي ال DHS لمدة ثمان شهور واذا ملكيت شغل اتحول مباشرة على برنامج الولفر لانه عندي طفل وتبقى نفس المخصصات موجودة طول العمر واكرر طول العمر بس اني الحمد لله اختصاصي بسرعة الكه شغل بي وفعلا اتصلو بيه دائرة التوظيف بس اعتذرت وكان السبب ما عندي سيارة وما عندي خبرة بالطرق فكالو اوكي انت راح تبلش ويانا دورات عن اللغة والوظيف وشلون تسوي الاوبلكيشن الخاص باي شغلة الخ فكتلهم اوك وبلشت قبل يومين وياهم والحمد لله المهم
وره مطلعنا من المنظمة رحت قدمت على السوشيال سكيورتي وطبعا احنه الثلاثة حاضرين اني وزوجتي وبنتي وبحضور المترجم الي احيانا احتاجه وخاصة بالمواضيع الطبية لانه الحمد لله انكليزيتي زينة بس تبقى مصطلحات احتاج مساعدته بيها
وبعد مخلصنا سويت حساب بالبنك واختاريت US Bank وسيت الي دبت كارت وانطوني واحد استخدمه لحد ميجيني الاصلي بالبريد بعد 5 ايام وخليت بي 400 دولار تجنبا للمسائلة الخ وفعلا وصلني الاصلي بعد 5 ايام بالضبط
واشتريت خط تلفون ويا جهاز سامسونك تاج سكرين وكيبورد سحب الجهاز با اربعين دولار
والاشتراك ادفع اول شهر 35 وثاني شهر 21 دولار ويا شركة كريكت الرسائل والاتصال مفتوح بداخل امريكا بس بدون انترنت بعد ما اني وديتلهم اثبات انه اني ما عندي عمل وسوولي تخفيض على هل اساس وبعدين احجيلكم شنو بقية التفاصيل
وثاني يوم سويت اشتراك خط انترنت ويا شركة كومكاست والي تعتبر من اقوى الشركات اهنا 35 ميكا داون لود و5 اب لود ( خط متحلم بي طول عمرك) وويا جهاز تي في بوكس بي قنوات شوتايم لمدة 3 شهور مجانا للقنوات اما اشتراك الانترنت ب40 دولار بالشهر وايجار الاجهزة 7 دولار يعني 47 دولار كل هاي الهوسة والنصب مجاني !!!!
والحمد لله بعد يومين طلعو كملو كلشي الي وتعدلت الامور خلال اسبوع واستلمت السوشيال سكيورتي با اول اسبوع وكان فد شي قياسي ومصايرة وهذا كله بفضل رب العالمين ودعاء الوالد والوالدة بالعراق
وخلصت كل الفحوصات الطبية مالتي ومال عائلتي وهسه راح نبلش بالاسنان والعيون
والمنظمة خصصت الي سايق يوديني ويجيبني للاماكن الي عندي بيها مواعيد سواء بالكلنك(المسوؤلة عني طبيا) او بالايركو والايركو اهنا هي دائرة التوظيف وتعلم الانكليزي
وهاي شرحها يطول والنا لقاء ثاني نكمل بي بقية التفاصيل
امنياتي للجميع بالسفر القريب والعاجل
واتمنى تجون لهاي الولاية وتشوفوها طبعا الطبيعة خلابة وكانه قطعة من جنه واول ايام مطر متواصل وثلوج وهسه الجو صافي وشمس ويخبل
احسن من حر العراق والعجاج الي يجي بالشتا
ولاية مريحة وخدماتها ممتازة والتنقل بيها سلس وكلشي متوفر ورخيصة وبيها معالم سياحية اهوايه وما بيها جريمة وما بيها سود وبيها جالية عراقية لا باس بيها بس الي ميحب المطر والجو المغيم راح يتكأب بس هو هذا واقع الولايات الشمالية
اني طولت وياكم بالحديث وكان ودي احجيلكم اكثر تفاصيل بس حتى ننطي الموضوع حيز للنقاش راح اتركه الكم ومنتظر ردودكم وتعليقاتكم
واشوفكم بخير
تحياتي للجميع
اخوكم
رائد / ولاية اوريكون / مدينة بيفرتون 
