ܫܘܬܐܣ̈ܐ ܐܘܡܬܢܝ̈ܐ ܘܦܘܠܝܛܝܩܝ̈ܐ ܘܡܥܒܕܢܘܬܝܗܝ ܥܠ ܡܕܝܢܝܘܬܢ
ܓܘ ܕܐܗܐ ܦܣܘܩܐ ܠܐ ܗܡܙܡܢ ܥܠ ܫܘܬܐܣ̈ܐ ܩܢܘܢܝ̈ܐ ܫܘܠܛܢܝ̈ܐ ܐܝܟܼ ܦܪ̈ܠܡܢܐ ܘܡܘܬܒ݂̈ܐ ܥܡܝ̈ܐ ܘܦܘܪ̈ܢܣܝ̈ܐ ܘܩܢܘܢܝ̈ܐ ܡܫܚܠܦ̈ܐ ܐܝܢܝ ܕܦܝܫܐ ܝܠܝܗܝ ܩܝܡ̈ܐ ܡܛܠ ܦܪܢܣܘܬܐ ܕܐܬܪܐ ܘܓܒܢ̈ܐ ܦܪ̈ܝܫܐ ܕܗܢܝܢ̈ܐ ܕܐܬܪܐ ܡܛܠ ܚܡܝܬܐ ܠܙܕܩ̈ܐ ܕܟܢܘܫܝܐ ܘܫܪܪܬܐ ܕܩܢܘܢ̈ܐ ܘܟܠ ܡܐ ܕܝܠܗ ܡܬܕܝܠܢܝܐ ܠܡܛܟܘܣܐ ܠܐܗܐ ܟܢܘܫܝܐ ܓܘ ܚܕ ܢܡܘܣܐ ܓܘܢܝܐ ܩܐ ܟܠܗ ܐܬܪܐ.
ܐܗܐ ܫܪܛܐ ܕܕܟ݂ܪܢ ܒܥܠܠ ܠܐ ܝܠܗ ܠܚܝܡܐ ܘܠܐ ܡܘܕܒ݂ܩܐ ܥܡ ܐܝܟܢܝܘܬܐ ܕܥܡܢ ܕܒܚܝܐ ܝܠܗ ܬܚܘܬ ܪܒܐ ܫܘܠܛܢ̈ܐ ܢܘܟ݂ܪ̈ܝܐ ܥܠ ܡܪܕܘܬܢ ܘܡܕܝܢܝܘܬܢ ܬܫܥܝܬܢܝܬܐ، ܐܝܢܐ ܟܠ ܕܐܟ݂ܝ ܕܝܠܗ̇ ܐܚܢܢ ܐܠܨܝܬܐ ܝܠܗ̇ ܕܗܡܙܡܚ ܘܕܪܫܚ ܥܠ ܕܘܪܐ ܕܓܒ̈ܐ ܘܛܘܟܣ̈ܐ ܦܘܠܝܛܝܩܝ̈ܐ ܘܡܘܬܒ݂̈ܐ ܘܩܢܛܪ̈ܘܢܐ ܐܘܡܬܢܝ̈ܐ ܦܪ̈ܝܫܐ ܕܐܝܬ ܠܗܘܢ ܡܥܒܕܢܘܬܐ ܓܘܪܬܐ ܥܠ ܡܪܕܘܬܢ ܘܡܬܛܘܪܢܘܬܐ ܘܐܡܝܢܘܬܐ ܕܡܕܝܢܝܘܬܢ ܓܘ ܟܠܗ ܟܘܬܫܐ ܟܢܘܫܝܝܐ ܘܦܘܠܝܛܝܩܝܐ ܐܢ ܕܝܠܗ ܐܗܐ ܟܘܬܫܐ ܕܘܟܬܢܝܐ ܐܘ ܬܒ݂ܝܠܝܐ. ܠܐܟ݂ܐ ܒܕ ܡܦܠܚܢ ܠܚܫܚܬܐ ܕܫܘܬܐܣ̈ܐ ܐܘܡܬܢܝ̈ܐ ܘܦܘܠܝܛܝܩܝ̈ܐ ܥܠ ܟܠܝܗܝ ܓܒ̈ܐ ܘܛܘܟܣ̈ܐ ܘܡܘܬܒ݂̈ܐ ܐܘܡܬܢܝ̈ܐ ܐܝܢܝ ܕܒܦܠܚܐ ܝܠܝܗܝ ܡܛܠ ܐܡܝܢܘܬܐ ܕܡܕܝܢܝܘܬܢ ܒܝܢܬ݂ ܡܕܝܢܝܘܬ̈ܐ ܕܦܢܝܬܢ ܘܡܣܬܪܢܬܐ ܠܙܕܩܐ ܕܥܡܢ ܘܚܡܝܬܐ ܕܐܗܐ ܡܕܝܢܝܘܬܐ ܘܡܩܝܡܬܗ̇ ܘܓܪܘܣܬܗ̇ ܕܡܨܝܐ ܗܘܝܐ ܐܡܝܢܬܐ ܒܝܢܬ݂ ܟܠܝܗܝ ܡܕܝܢܝܘܬ̈ܐ ܕܥܠܡܐ ܕܩܐܡ.
ܠܐ ܝܠܗ ܚܕ ܡܢܕܝ ܛܫܝܐ ܐܢ ܐܡܪܚ ܕܟܢܘܫܝܐ ܕܠܐ ܡܨܐ ܠܡܛܟܘܣ̈ܐ ܢܦ̮ܫܗ ܓܘ ܫܘܬܐܣ̈ܐ ܐܘܡܬܢܝ̈ܐ ܘܦܘܠܝܛܝܩܝ̈ܐ ܐܝܢܝ ܕܕܒ݂ܩܝ ܒܝܕ ܪ̈ܢܝܐ ܘܚܙܝܬ̈ܐ ܘܐܝܕܝܘܠܘܓ̰ܝ̈ܐ ܡܫܚܠܦ̈ܐ ܕܐܩܢܘܡܝܐ ܘܢܝܫ̈ܐ ܐܘܡܬܢܝ̈ܐ ܘܟܢܘܫܝܝ̈ܐ ܩܪ̈ܝܚܐ ܘܨܦܝ̈ܐ ܟܐ ܦܐܫ ܐܗܐ ܟܢܘܫܝܐ ܫܦܝܠܐ ܘܟܐ ܦܫܪ ܓܘ ܟܢܘܫܝ̈ܐ ܕܒܚܝܐ ܝܠܗ ܘܚܪܕܘܝܐ ܝܠܗ ܥܠܗ ܥܡ ܙܒ݂ܢܐ ܒܥܠܬܐ ܕܠܐ ܡܨܝܬܐ ܕܐܗܐ ܟܢܘܫܝܐ ܠܡܬܘܒ݂̈ܐ ܩܐ ܢܦ̮ܫܗ ܚܕ ܛܟ݂ܣܐ ܟܢܘܫܝܝܐ ܓܡܝܪܐ ܕܟܐ ܚܒ݂ܫ ܐܣܘܪ̈ܐ ܘܣܢܝܩܘܬ̈ܐ ܘܢܝܫ̈ܐ ܡܫܘܬܦ̈ܐ ܒܝܢܝ ܩܢܘܡ̈ܐ ܕܐܗܐ ܟܢܘܫܝܐ. ܐܗܐ ܐܝܟܢܝܘܬܐ ܟܐ ܡܥܒ݂ܕܐ ܦܪܣܬܐ ܕܐܢ̈ܐ ܩܢܘܡ̈ܐ ܓܘ ܚܕ ܡܫܛܚܐ ܐܘ ܡܫܘܚܬܐ ܓܘܪܬܐ ܘܪܘܝܚܬܐ ܘܠܐ ܡܬܘܚܒܬܐ ܘܒܝܢܝ ܟܢܘܫܝ̈ܐ ܕܡܪܕܘܬܝܗܝ ܘܡܕܝܢܝܘܬܝܗܝ ܦܪ̈ܝܫܐ ܡ̣ܢ ܡܕܝܢܝܘܬܗ ܘܐܗܐ ܥܒ݂ܕܐ ܝܠܗ ܗ̇ܘ ܥܒ݂ܕܐ ܪܫܝܐ ܡܥܒܕܢܐ ܡܪܝܡܢܐ ܕܝܠܗ ܗ̇ܘ ܒܫ ܚܝܠܢܐ ܘܩܘܝܐ ܥܠ ܟܢܘܫܝ̈ܐ ܠܐ ܥܒ݂ܘܕ̈ܐ.
ܫܘܬܐܣ̈ܐ ܐܘܡܬܢܝ̈ܐ ܘܦܘܠܝܛܝܩܝ̈ܐ ܐܝܬ ܠܗܘܢ ܗ̇ܘ ܕܘܪܐ ܓܘܪܐ ܘܪܫܝܐ ܓܘ ܡܛܟܣܢܘܬܐ ܕܟܢܘܫܝܐ ܘܡܦܥܠܬܐ ܕܟܠܝܗܝ ܫܘܬܐܣ̈ܐ ܘܩܢܛܪ̈ܘܢܐ ܟܢܘܫܝܝ̈ܐ ܐ݇ܚܪ̈ܢܐ ܓܘ ܟܢܘܫܝܐ. ܐܢܝ ܝܠܝܗܝ ܡܗܕܝܢ̈ܐ ܘܦܩܘܕ̈ܐ ܐܝܢܝ ܕܡܗܕܝ ܘܦܩܕܝ ܟܠܝܗܝ ܫܘܬܐܣ̈ܐ ܟܢܘܫܝܝ̈ܐ ܠܓܒܐ ܘܨܘܒܐ ܕܢܝܫ̈ܐ ܩܪ̈ܝܚܐ ܕܟܐ ܦܠܚܝ ܠܚܡܝܬܐ ܕܡܕܝܢܝܘܬܐ ܕܟܢܘܫܝܐ ܓܘ ܐܛܪܐ ܐ݇ܢܫܝܐ ܘܡܛܘܪܢܘܬܗ̇ ܠܦܘܬ݂ ܢܩܝܦܘܬ̈ܐ ܙܒ݂ܢܢܝ̈ܐ ܘܝܕܥܬܝ̈ܐ ܕܘܟܬܢܝ̈ܐ ܐܝܢܐ ܕܠܐ ܬܠܩܬܐ ܕܐܘܣܝܗ̇ ܘܦܫܪܬܗ̇ ܓܘ ܡܕܝܢܝܘܬ̈ܐ ܐ݇ܚܪ̈ܢܐ.
ܓܫܩܬܐ ܘܚܝܪܬܐ ܕܫܘܐܣ̈ܐ ܦܘܠܝܛܝܩܝ̈ܐ ܘܐܘܡܬܢܝ̈ܐ ܐܠܝܨ ܕܗܘܐ ܠܗܘܢ ܚܝܪ̈ܝܬܐ ܝܕܥܬܢܝ̈ܐ ܚܒ݂ܝܫܐ ܓܘ ܗܢܝܢ̈ܐ ܕܥܡܢ ܐܬܘܪܝܐ ܘܚܡܝܬܐ ܠܡܕܝܢܝܘܬܗ، ܘܐܗܐ ܚܝܪܬܐ ܐܠܝܨ ܕܗܘܐ ܠܗ̇ ܟܠܝܗܝ ܚܘܫܒܘܢܝ̈ܐ ܕܢܩܝܦܘܬ̈ܐ ܦܘܠܝܛܝܩܝ̈ܐ ܘܟܢܘܫܝܝ̈ܐ ܕܩܐܡ ܘܕܕܥܬܝܕ ܕܦܢܝܬܐ ܘܬܒ݂ܝܠ ܘܡܘܕܝ ܝܠܝܗܝ ܗܢܝܢ̈ܝܗܝ ܘܣܘܟܝܝܗܝ ، ܘܐܠܝܨ ܕܗܘܐ ܠܗܘܢ ܫܘܬܐܣ̈ܢ ܟܢܘܫܝܝ̈ܐ ܘܦܘܠܝܛܝܩܝ̈ܐ ܡܛܝܒ݂ܘܬܐ ܓܡܝܪܬܐ ܠܫܘܚܠܦ̈ܐ ܒܪ̈ܝܐ ܠܦܘܬ݂ ܚܘܫܒܘܢܝܝܗܝ ܘܩܪܝܬܝܗܝ ܠܐܢ̈ܐ ܢܩܝܦܘܬ̈ܐ ܕܚܪܕܘܝܐ ܝܠܝܗܝ ܒܥܡܢ ܐܬܘܪܝܐ ܘܡܫ݇ܟ̰ܚܬܐ ܕܐܘܪ̈ܚܬܐ ܘܫܒ݂ܝܠ̈ܐ ܚܫܝܚ̈ܐ ܘܠܚܝܡ̈ܐ ܡܛܠ ܣܘܡܣܡܐ ܕܫܘܚܠܦ̈ܐ ܡܪ̈ܝܡܢܐ ܐܢ ܓܕܫܠܗܘܢ ܒܐܝܢܝ ܢܩܝܦܘܬܐ ܐܘ ܙܒ݂ܢܐ.
ܚܬܝܬܐ ܝܘܢ ܕܪܒܐ ܡ̣ܢ ܛܢܢ̈ܐ ܕܒܢ̈ܝ ܐܘܡܬܢ ܐܬܘܪܝܬܐ ܒܩܘܪܐ ܝܠܝܗܝ ܠܥܠܬ̈ܐ (ܥܠܠܬ̈ܐ) ܕܟܠܝܬܐ ܘܟܡܫܬܐ ܕܡܕܝܢܝܘܬܢ ܓܘ ܐܬܪܐ ܕܒܝܬܢܗܪ̈ܝܢ؟ ܐܪܐ ܐܢ̈ܐ ܥܠܬ̈ܐ ܝܠܗܘܢ ܡ̣ܢ ܐܝܬܘܬܐ ܕܢܘܩܙ̈ܐ ܕܡܚܝܠܘܬܐ ܓܘ ܡܕܝܢܝܘܬܢ ܬܫܥܝܬܢܝܬܐ، ܘܠܐ ܡܨܝܬܗ̇ ܠܫܘܚܠܦܐ ܘܡܬܛܘܪܢܘܬܐ ܕܐܙܠ݇ܐ ܥܡ ܡܕܝܢܝܘܬ̈ܐ ܐܚܪ̈ܢܐ ܓܘ ܦܢܝܬܐ ܘܬܒ݂ܝܠ؟ ܘܡܘܕܝ ܝܠܗ ܕܘܪܐ ܕܟܢܘܫܝܐ ܘܫܘܬܐܣ̈ܗ ܐܘܡܬܢܝ̈ܐ ܘܦܘܠܝܛܝܩܝ̈ܐ ܡܛܠ ܡܩܝܡܬܐ ܕܐܗܐ ܡܕܝܢܝܘܬܐ ܘܚܡܝܬܗ̇ ܩܐ ܕܡܨܝܐ ܐܙܠ݇ܐ ܠܩ݇ܡܐ ܘܚܝܗ̇ ܥܡ ܟܢܘܫܝ̈ܐ ܐܚܪ̈ܢܐ ܥܠ ܐܣ̈ܐ ܕܡܚܠܦܬܐ ܕܝܘܬܪܐ ܠܐ ܥܠ ܐܣ̈ܐ ܕܫܘܥܒܕܐ ܘܩܒܠܬܐ ܒܬܢܘ̈ܐ ܐܘ ܫܪ̈ܛܐ ܐܝܢܝ ܕܒܕ ܡܥܒ݂ܕܝ ܒܫܘܠܡܐ ܡܫܝܬܐ ܘܦܪܩܬܐ ܕܐܝܬܘܬܐ ܕܡܕܝܢܝܘܬܢ ܘܕܥܬܝܕ ܕܥܡܢ ܐܬܘܪܝܐ ܓܘ ܐܬܪܐ ܕܒܝܬܢܗܪ̈ܝܢ؟
ܠܐ ܝܘܢ ܒܚܫܒ݂ܐ ܕܦܘܢܝܐ ܥܠ ܐܢ̈ܐ ܒܘܩܪ̈ܐ ܝܠܗ ܥܣܩܐ ܘܥܨܝܐ ܩܐ ܟܠ ܒܪܢܫܐ ܐܢ ܕܝܠܗ ܡ̣ܢ ܒܢ̈ܝ ܥܡܢ ܐܘ ܡ̣ܢ ܒܢ̈ܝ ܥܡܡ̈ܐ ܕܒܚܝܐ ܝܘܚ ܥܡܝܗܝ، ܐܢ ܐܝܬ ܠܗܘܢ ܩܠܝܠܐ ܐܘ ܚܕܟ̰ܐ ܝܕܥܬܐ ܘܢܣܝܢܐ ܕܥܡܡ̈ܐ ܐܝܢܝ ܕܡܨܐ ܠܗܘܢ ܠܚܡܘܝܐ ܠܡܕܝܢܝܘܬܝܗܝ ܘܐܡܝܢܘܬܗ̇ ܐܘ ܢܦܠܬܗ̇ ܘܦܪܩܬܗ̇ ܘܐܝܢܝ ܕܠܐ ܦܝܫܠܗ ܩܬܗ̇ ܐܠܐ ܥܩܒ݂ܬ̈ܐ ܓܘ ܒܝܬܥܬܩ̈ܐ ܘܝܘܠܦܢ ܥܩܒ݂ܬ̈ܐ.
ܐܠܨܝܬܐ ܝܠܗ̇ ܐܝܟܼ ܕܒܚܙܝܐ ܝܘܢ ܕܡܢܗܪܚ ܟܡܐ ܕܡܬܡܨܝܢܬܐ ܝܠܗ̇ ܠܡܥܒܕܢܘܬܐ ܕܫܘܬܐܣ̈ܐ ܐܘܡܬܢܝ̈ܐ ܘܦܘܠܝܛܝܩܝ̈ܐ ܥܠ ܡܬܛܘܪܢܘܬܐ ܕܡܕܝܢܝܘܬܢ ܘܐܡܝܢܘܬܗ̇ ܓܘ ܐܬܪܐ ܕܒܝܬܢܗܪ̈ܝܢ، ܘܡܨܚ ܠܓܕܡܐ ܠܐܢ̈ܐ ܥܠܬ̈ܐ ܘܕܠܐ ܓܫܩܬܐ ܠܐܪ̈ܝܟ݂ܘܬܗ̇ ܒܙܒ݂ܢܐ ܕܩܐܡ ܐܝܟܼ ܕܒܐܬܝܐ ܝܠܝܗܝ:
ܐ. ܠܐ ܡܨܝܬܐ ܕܦܩܘܕܘܬ̈ܢ ܫܒ݂ܛܝ̈ܐ ܓܘ ܕܪ̈ܐ ܕܕܥܒ݂ܪ ܠܡܬܐܘܝܘܬܐ ܫܪܝܪܬܐ ܘܒܢܝܬܐ ܕܚܕܐ ܦܩܘܕܘܬܐ ܡܚܘܝܕܬܐ ܩܐ ܟܠܝܗܝ ܒܢ̈ܝ ܥܡܢ ܕܟܠܝܗܝ ܥܕܬܘܬ̈ܐ ܘܒܫܡܐ ܕܥܡܐ ܐܬܘܪܝܐ ܪܚܩܐ ܡ̣ܢ ܡܥܒܕܢܘܬ̈ܐ ܬܘܕܝܬܢܝ̈ܐ ܘܫܒ݂ܛܝ̈ܐ ܩܐ ܕܗܘܝ ܗܘܘ ܩܒܝܠ̈ܐ ܒܟܠܝܗܝ ܛܝܘܦ̈ܐ ܘܓܘܢ̈ܐ ܕܥܡܢ ܘܥܕܬ̈ܗ ܘܬܚܘܬ ܚܕܐ ܡܛܠܬܐ ܘܚܕܐ ܦܩܘܕܘܬܐ ܥܫܝܢܬܐ ܘܥܒ݂ܘܕܬܐ.
ܒ. ܒܪܩܝܡܘܬܐ ܠܐ ܬܩܝܠܬܐ ܘܗܘܢܢܬܐ ܕܫܒ݂ܛ̈ܐ ܥܡ ܐܬܪ̈ܘܬܐ ܕܒܪ̈ܝܐ ܕܬܚܘܡ̈ܐ ܕܟܐ ܚܝܝ ܗܘܘ ܘܫܟܢܝ ܗܘܘ ܓܘܗ̇، ܥܡ ܝܕܥܬܐ ܕܐܢܝ ܠܝܬ ܗܘܐ ܠܗܘܢ ܡܨܝܬܐ ܒܪܢܫܝܬܐ ܐܘ ܡܛܟܣܢܝܬܐ ܐܘ ܓܝܣܝܬܐ ܒܫܘܝܐ ܛܠܝܒܐ ܒܦܘܚܡܐ ܕܥܡܡ̈ܐ ܘܫܒ݂ܛ̈ܐ ܠܐ ܐܬܘܪ̈ܝܐ.
ܠܝܬܝܘܬܐ ܕܛܘܟܣ̈ܐ ܦܘܠܝܛܝܩܝ̈ܐ ܩܝܡ̈ܐ ܥܠ ܐܣ̈ܐ ܛܘܟܣܝ̈ܐ ܕܪ̈ܝܐ ܕܡܨܝ ܗܘܘ ܠܚܕܘܬܐ ܢܦ̮ܫܝܗܝ ܘܠܡܬܛܘܪܢܘܬܐ ܛܘܟܣܝܗܝ ܘܬܠܡܕܬܐ ܕܫܪ̈ܒܢ ܥܠ ܪܘܚܐ ܕܠܒ݂ܝܒ݂ܘܬܐ ܘܡܣܬܪܢܘܬܐ ܕܙܕܩܗ ܘܚܝܘܬܐ ܚܐܪܬܐ ܥܠ ܐܪܥܗ ܘܐܬܪܗ ܒܝܬܢܗܪ̈ܝܢ.
ܓ. ܝܬܝܪܘܬܐ ܕܛܘܟܣ̈ܢ ܦܘܠܝܛܝܩܝ̈ܐ ܫܘܬܐܣ̈ܐ ܝܠܝܗܝ ܥܠ ܐܣ̈ܐ ܢܒ݂ܗܝ̈ܐ ܘܪ̈ܓܼܫܬܢܝ̈ܐ ܐܘ ܒܝܬܝ̈ܐ ܠܐ ܥܠ ܐܣ̈ܐ ܕܝܕܥܬܐ ܘܝܘܠܦܢܐ ܠܐܗܐ ܥܠܬܐ ܒܚܙܝܐ ܝܘܚ ܕܐܢ̈ܐ ܫܘܬܐܣ̈ܐ ܡ̣ܢ ܓܒܐ ܕܓܪܘܣܝ ܘܚܠܢܝ ܘܚܝܕܝ ܒܦܨܪܐ ܝܠܗ̇ ܘܒܦܪܩܐ ܡܥܒܕܢܘܬܝܗܝ ܘܐܘܝܘܬܐ ܕܟܢܫܢ ܥܡܝܗܝ ܘܒܗ̇ـܝ ܚܪܬܐ ܦܪܩܬܝܗܝ ܡ̣ܢ ܦܠܚܢܐ ܘܬܫܡܫܬܐ ܕܢܝܫܐ ܩܢܛܪܘܢܝܐ ܕܥܡܢ ܐܬܘܪܝܐ ܠܐܗܐ ܥܠܬܐ ܫܘܬܐܣ̈ܢ ܙܒ݂ܢܢܝ̈ܐ ܝܠܝܗܝ ܠܐ ܐܡܝܢܝ̈ܐ.
ܕ. ܫܦܠܬܐ ܕܛܘܟܣ̈ܢ ܦܘܠܝܛܝܩܝ̈ܐ ܘܐܘܡܬܢܝ̈ܐ ܠܒܪܝܬܐ ܕܚܕܐ ܡܛܠܬܐ ܐܘܡܬܢܝܬܐ ܬܒ݂ܝܠܝܬܐ ܕܐܝܬ ܠܗ̇ ܢܝܫܐ ܩܪܝܚܐ ܘܚܘܪܙܐ ܕܦܘܠܚܢܐ ܡܘܕܒ݂ܩܐ ܘܠܚܝܡܐ ܥܡ ܙܒ݂ܢܐ ܕܗܘܝܐ ܡܬܡܨܝܢܬܐ ܠܫܘܬܘܦ̈ܐ ܓܘܗ ܟܠܝܗ ܓܒܢ̈ܐ ܕܥܡܢ ܡܛܠ ܫܪܪܬܐ ܕܚܘܪܙܐ ܕܐܗܐ ܡܛܠܬܐ ܘܟܠ ܚܕ ܐܝܟܼ ܕܛܠܒܐ ܝܠܗ̇ ܕܘܟܗ ܘܕܝܠܢܝܘܬܐ ܕܦܠܚܢܗ ܓܘ ܟܢܫܢ ܘܩܐ ܝܘܬܪܢܐ ܕܐܝܬܘܬܐ ܕܥܡܢ ܓܘ ܒܝܬܢܗܪܝܢ.
ܗ. ܠܝܬܝܘܬܐ ܕܛܘܟܣ̈ܐ ܦܘܠܝܛܝܩܝ̈ܐ ܩܘܡܝ̈ܐ ܕܒ݂ܚܢܦ̮ܫܝ̈ܐ ܐܝܟܼ ܟܠܝܗܝ ܥܡܡ̈ܐ ܐ݇ܚܪ̈ܢܐ ܡܛܠ ܕܝܢܬܐ ܘܡܪܚܩܬܐ ܘܣܪ̈ܒ݂ܢܐ ܘܚܪ̈ܝܒ݂ܐ ܘܥܬ݂ܝܬ݂̈ܐ ܐܘ ܢܟ݂ܝܠ̈ܐ ܕܐܘܡܬܢ، ܘܐܦܢ ܕܐܝܬ ܗܘܝܐ ܚܕܟܡܐ ܡܢܣܝܢܘܬ̈ܐ ܦܫܝܛܐ ܒܕܥܒ݂ܪ، ܐܝܢܐ ܦܘܠܚܢܝܗܝ ܝܗܘܐ ܓܘ ܬܚܘܒܐ ܚܝܪܬܢܝܐ ܐܘ ܬܐܘܪܝܝܐ، ܘܠܐ ܡܨܐ ܠܗܘܢ ܡ̣ܢ ܠܪܚܫܐ ܠܩܕ݇ܡܐ ܒܥܠܬܐ ܕܠܐ ܗܝܡܢܘܬܐ ܕܦܩܘܕܘܝܬܝܗܝ ܒܢܝܫ̈ܐ ܕܛܘܟܣܐ ܘܠܝܬܝܘܬܐ ܕܚܘܪܙܐ ܣܘܥܪܢܝܐ ܓܘ ܛܘܟܣܝܗܝ.
ܩܪܝܢܐ ܡܘܚܒܐ ܩܘܝܡܐ ܕܟܠ ܐܘܡܬܐ ܟܠܝܐ ܝܠܗ ܟܡܐ ܗ̇ـܝ ܐܘܡܬܐ ܝܠܗ̇ ܡܛܘܟܣܬܐ ܘܟܡܐ ܝܠܗ̇ ܚܠܝܨܬܐ ܠܢܝܫܗ̇، ܟܡܐ ܒܡܨܝܐ ܝܠܗ̇ ܠܦܪܡܘܝܐ ܡܬܛܘܪܢܘܬܐ ܕܒܪܢܫܘܬܐ ܥܠ ܕܐܗܐ ܓܠܘܠܘܬܐ، ܟܡܐ ܝܠܗ̇ ܐܗܐ ܐܘܡܬܐ ܐ݇ܣܝܪܬܐ ܒܚܕܕܐ ܒܫܒ݂ܝܠ̈ܐ ܗܘܠܢܝ̈ܐ ܘܪ̈ܘܚܢܝܐ ܘܡܪܕܘܬܐ ܡܫܘܬܦܬܐ ܘܠܫܢܐ ܦܫܝܛܐ ܕܦܪܡܝܬܐ ܠܚܕܕܐ ܘܚܪܬܐ ܐܩܢܘܡܝܐ ܚܝܠܢܐ ܡܛܠ ܚܡܝܬܐ ܠܐܪܥܐ ܕܓܘܗ ܢܒ݂ܥܬܐ ܝܠܗ̇ ܬܫܥܝܬܐ، ܡܪܕܘܬܐ ܘܡܕܝܢܝܘܬܐ ܕܥܡܐ.
