::::::::السفر من بغداد::::::::: ارجو مساعدتكم

[rmadi]

السلام عليكم اخوان
 الحمد لله مثل ما تعرفون اني استلمت الفيزا.
وراح أسافر انشاء الله وية الي او ام
مثل ماوتعرفون جماعة بغداد يسمحولهم بحقيبة وحدة فقط وزنهار٢٣ كيلو.
بينما الي يسافرون من عمان والقاهرة جنطتين مسموح الهم.
فالمشكلة هية الرحلة من بغداد الى عمان.
على هل اساس اكو صديق الة علاقات بشركات الطيران و المطار كلي اني اصعدلك جنطتين لكل واحد مو بس وحدة ومااللك علاقة لاتشيل هم
سؤالي هو اذا صعدت الجنط من بغداد هل اكو احتمال يصير عائق بعمان ؟ لو خلص مادام صعدت خلص توصل لأميركا يلة نشوفها؟؟؟؟ومحد يعترض؟
اني عندي طفلة وغراضي هواية وما اعرف ارفض هيج عرض وما اخاطر لو اتوكل وأخذ جنطتين لكل شخص ؟

اطلب من اخواني اصحاب الخبرة المساعدة خاصة الي سافروا

مع الشكر

[مايكل اندريه85]

الرفع للمساعدة العاجلة

[ألن في بلاد العجائب]

بس تعبر من بغداد محد يسالك عليها يمعود جنت اعبر شكد زايد من يشوفو فيزة امريكا يغلسون و ميحجون جانوا

[سوسو اسو]

والله اخووويه هيج موضوع ممكن ان نتأكد منه اله اذا اكو شخص مجربه
وهمين تره حسب الي يفتشوون
اذا عديت من بغداد ما اتصور اتعدي من البقيه لان حتضل اسمك جاي من بغداد والجنط تنزل وتتفتش بالترانزيت
كرايبي بوكتها من سافروو نطوهم الجنط بكل مطار يعني مو توصل امريكا ياله تشوفها

فالمجازفه صعبه .. واني هم عندي طفل واعرف معنه الغراض الهوايه
بس ميخالف اعووف غراض واخذ الاموور الاساسيه واقلص منها احسن من ما اجازف
ذاك الوكت وين تودي الجنط الزايده

صفيها وقسمها للغراض امور تتخلص منها وامور تاخذها وامور ثانيه تريدها بس متاخذها هسه
ان شاء الله من ترجع زياره والله يسهل امرك او احد يشحنلكياها


هذا رأيي وتحياتي الك اخويه
توصلون بالسلامه ان شاء الله وسفره سعيده

[rmadi]

شكرًا جزيلا أعزائي على المرور
اشوف اذا اكو احد من المسافرين ينصحونا

[فادي نيويورك]

اخ رمادي السلام عليكم

يمكن كل شخص خمسة وعشرين كيلو ممكن ياخذ ويا

[SNAKE]

اخوية العزيز
دز غراضك بال DHL من بغداد واخلص منة دزلك 10 كيلوات الضروريات واخذ الباقي وياك وانت بكيفك بعد

[rmadi]

ممكن اخوية توضحلي شلون بالDHL
والكلفة شكد؟

[$$$$$]

اخوية العزيز بالصدفه مره جنت بال دي اج ال وسالتهم عن الجنط وكلي الموظف كالاتي: عدهم عرض ملابس فقط جنطه ام ال 10 كيلوات يمكن ب 118 دولار على ما اتذكر اعتقد السعر مناسب للملابس الضرورية والباقي اخذه وياك وتوصل بالسلامه

[ABO SARAH]

نصيحة لله لا تورط روحك وخلي سفرتك تمضي على خير. حاول تاخذ الاهم واترك المهم والله يسهلك وتلاكي غراض احسن.
اتمنالك الموفقية وسلامة الوصول.

ابو سارة

[yasir fakhri]

الاخ العزيز رمادي انت خط رحلتك مباشر بغداد / عمان / اميركا  لو ترانزيت يعني بغداد / عمان / دولة اوربية / اميركا

اذا كان خط الرحلة مباشر يسمحلك بحمل حقيبتي سفر لكل شخص زنة الواحدة 23 كغم  ويمكن جعله 24 كغم او 25 كغم على الاكثر وحسب الموظف الموجود على الوزن بالاضافة الى حقيبة اليد والحاسب المحمول ايضا
واذا كان خط رحلتك غير مباشر اي ترانزيت فيكون عليك اتباع الخيار الثاني
مع انه المفروض بالمنظمة اللي بعمان يبلغوك بهذه المعلومات قبل السفر
تحياتي لك واتمنى لك سلامة الوصول والتوفيق في حياتك الجديدة
ياسر

[ivan ali]

بالخير على استلام الفيزا  عمري اول شي انسى كلام صاحبك مع احترامي له لان اذا صعدلك الجنط بمطار العراق بمطار عمان راح تدفع فلوس وزن الجنطة الثانية وانت راح اكيد تحمله 23 كيلو يعني هواية راح ياخذون منك هاي بعمان وانت اذا طرت من عمان راح ايضا يجرجوك بالمطار الثاني يعني الغي سالفة الجنطة الثانية انت مسموحلة جنطه وحده 23 كيلو وجنطه تحمله بيدك وزنه 5 كيلو وجنطه الابتوب  يعني هذا المسموح لا اكثر وحتى تكون بامان لتخليه 23 بالظبط لان بعمان شوية نحسين  يكولون احنه منثق بوزن العراق ويدورون حجه علينه احنه العراقين ونصيحه لتخلي اي مبلغ او قطع ثمينه بالجنطة وسالفة الفلوس خليه بجيوبك وزعن  وتكدر اجيب اكثر من 10 ومحد راح ياخذ منك ضريبة مثل اغلب الناس تحجي  اذا عرفوا انت جايب اكثر من 10000 بس يسون تقرير لان يردون يعرفون  شكد داخله فلوس بامريكا اسف طولت عليك واني موجود لاي سؤال تحتاجه او باقي الاخوان بالمنتدى

[امين عبد الله]

اخي الكريم

اتفق مع كل اراء الاخوان التي تميل الى اخذ الاهم ثم المهم وان تحاول اخذ وزن اقل من المسموح به بقليل حرصا على راحتك والعائلة خصوصا وان الرحلة ستكون شاقة ومتعبة لطول مدتها. واضافة الى ماتفضل به الاخوان يجب ان تاخذ في عين الاعتبار بان هناك رحلة داخلية بانتظارك من مطار الدخول ( نيويورك او شيكاغو ) الى الولاية التي ستعيش فيها الامر الذي قد يعرضك الى احتمال التفتيش لدى سلطات الكمارك ومن ثم ستقوم باعادة وزن وشحن الجنط في الرحلة الداخلية والتي ستقلك الى ولايتك باذنه تعالى آخذا بعين الاعتبار بان الطيران الداخلي بأخذ الغرامات عن الوزن الزائد. بالباوند وليس بالكيلو ( 1 باوند = 0,45 غرام ). انصحك بالدخول على هذا اللنك كي تاخذ فكرة عن ماهو ضروري وغير ضروري لاخذه

http://www.ankawa.com/forum/index.php/topic,308359.0.html

[الطيار العراقي]

السلام عليكم

اخذ الخبر اليقين مني لان اني شغلي بالمطار

اذا صديقك يكدر يسوي هيجي شي فخلص لا تشيل هم لان انت من راح تسوي بوردنك بمطار بغداد راح تسوي جيك ان على الجنط هناك ومراح تشوفها بعد الا بامريكا وما بيها اي مشكله عليك واني مسؤول عن هذا الكلام

بس المشكلة تبقى وين
1. من راح تستلم جنطك بمطار جي اف كي وتسوي ترانزيت علمود رحلتك لوجهتك الاخيرة هناك راح تسوي جيك ان مرة ثانية على الجنط (فشلون راح ترتبها وياهم؟؟)

2. هواي ناس تدك صدر وبعدين ( والله اليوم فلان موجود , والله هذا صاحبي ما اجى اليوم ) وغيرها من الاعذار والواحد يتورط .

رأيي الشخصي :  خليك بالسليم ورتبها شلون مجان وامشي على التنطيه المنظمة الك

[انيس الجالسين]

انا سفري من بغداد قريبا ان شاء الله
وقد ابلغوني المنظمة بأخذ حقيبة عدد 2  لكل شخص
فما اعرف شلون بلغوك باخذ حقيبة واحدة ؟!!!!!!!!!!!!!!!!!!!!
ثم قد ودعت اهلي سابقاً ومن مطار بغداد ايضا وكل واحد بفترة
والجميع ابلغتهم المنظمة بأخذ 2 حقيبة للشخص
 
شلون وليش ومنوو بلغك بأخذ حقيبة واحدة ؟!!!!!!!!!!!!!!!

على كل حال .. اتأكد من تبليغ المنظمة لك
(واظن انهم يرسلون لك رسالة توضيحية على الموبايل وعاليميل كما فعلوا معي)
وحسب علمي ان الشخص المسافر اي مسافر ولاي دولة من حقه اخذ 2 حقيبة سفر
وبالموفقية 

 

[rmadi]

بشرك الله بالخير
ياريت والله
بس هاي معلومتي اخذتها من الاخوة بالمنتدى وأكيد شفت ردود الاخوة فوك كلها تتفق وية جنطة وحدة.
بس ياريت توضحلي اخوية هل الأهل سافروا بغداد عمان اميركا مباشر؟ لو بغداد عمان فرانكفورت وبعدين اميركا؟

ارجو توضيحك مع شكري الجزيل مقدما

[اسمر زيونة]

 والله يااخوية لو علية ابيعهم كلهم والحاجة بربع وابدي من جديد ...اتوكل على الله واخذ بس شغلات المهمة والمسموح بيها
  تقبل تمنياتي بسلامة الوصول

[ABO GADA]

اخوان  تره  كل  مسافر  اله  جنطتين وزن  كل وحده 25  كيلو  بعدين  الهاند  باك  هم  الكل  واحد  5 كيلو 
حط  باعتبارك  جم  نفر  اتو  واحسب  حساب  الجنط  مالتك  عيني والله  ايسهل  امورك حاول  جهد  الامكان متاخذ  شغلات ملابس  لان امريكة  مليانه محلاىت  ملابس  عدك  مثل التاركت  واكي  مكارت والباي مارت واشكال المولات  كلهه  تتنافس  اتنزل  اسعار  حته  اتجيب  زباين
اخذ  ما خف  حمله وغلا  ثمنه ...بس  كلي  اته وين الفاينل ديسشن  مالتك  الوجهه النهائية  ....مع  تحياتي

[rmadi]

أشكركم على تصحيح معلومتي
اني وجهتي لفرجينيا ابو غادة.
الف شكر

[titan]

اخوان  تره  كل  مسافر  اله  جنطتين وزن  كل وحده 25  كيلو  بعدين  الهاند  باك  هم  الكل  واحد  5 كيلو 
حط  باعتبارك  جم  نفر  اتو  واحسب  حساب  الجنط  مالتك  عيني والله  ايسهل  امورك حاول  جهد  الامكان متاخذ  شغلات ملابس  لان امريكة  مليانه محلاىت  ملابس  عدك  مثل التاركت  واكي  مكارت والباي مارت واشكال المولات  كلهه  تتنافس  اتنزل  اسعار  حته  اتجيب  زباين
اخذ  ما خف  حمله وغلا  ثمنه ...بس  كلي  اته وين الفاينل ديسشن  مالتك  الوجهه النهائية  ....مع  تحياتي

مظبوط اني الولد الي جانو وياية يلسفرة كل واحد جنطتين +الهاند باك

[omarsami]

ابو ايمن الرماحي عضو بلمنتدئ يمكن يفدك بهذا الموضوع

[** AL SHAEEA **]

اخويه توكل على الله وكلها تتعوض

[مروه فائق]

اخوية مكتب دي اج ال مال المنصور يشحن الك 10 كيلوات 117 دولار وخلال 5 ايام توصل مو اسهلك بله رحت لللمطار ومالكيت صاحبك ذبهن غراضك شلون