مراسلكم الوهاج من مطار بغداد الدولي اليوم 29/5/2012

[al-whaj]

السلام عليكم اخواتي اخوتي الاعزاء

قبل فترة نشرت عن صديقين الي طلع سفرهم وهما كانوا من اليأسيين الى ابعد الحدود وكلت بوقتها انو هما ماصدكَــوا من اجاهم الاتصال الحارق خارق من المنظمة ابلغهم بالسفر... واحد منهم اليوم كان سفره، المهم بالموضوع اخوكم رافقتهم الى اخر نقطة وهي ختم الجوازات لان مكاني الي اشتغل بيه حالياً أيهلني ادخل للمطار... نحجيلكم القصة من البداية:-

طلعنا كالعادة من الصبح بس مو هواية من الصبح او وكفنا بساحة الي براة عباس ابن فرناس، استقلوبنا الحماميل اخذو الجنط او انطينا الكل واحد 5 الف دينار "هما راح ايحاولون وياكم على 10الف دنيار بس لا تنطوهم وجه وعلى العموم اذا جنطكم مو اهوية متحتاجوهم" ...المهم انتظرنا حوالي بالساعة او نص بهل الاثناء كبت عركة بين الحماميل بالسناسل ؟؟؟؟!!!! صديقي ايباوع عليهم كَـال هاي اخر عركة اشوفه بالعراق ... اعيوني جان ايهل اهلا العيد  هلا هلا حبيبي اجا العنتين ابو الـ IOM التمو الجماعة على الرجال اني كَـلت كبل ليجي ابو المنظمة اهنا اتبين الخربطة مال العراقيين اذا صاروا عليه لما او هوسة ما ايصيرنا جارة ولا طب عرب بس الجماعة كَــالوا بينتهم بصوت عالي اخون بالسرة والله حيل افرحت كلت الجماعة بيهم مجال للاندماج وية المجتمع الامريكي قصدي بالنظام والقانون... المهم جيب جوازك قارن انطيه الفيز او الورقة انطلق الى المطار ... اخذنا الفيز او كَـبل لابو الجمسي النفر 10 الف دينار او تدرك العائلة 4 نفر منهم اطفال ياخذون 3 معاقد يعني 30 الف... ابراها نزالنا يم المطار بس اخوكم غمضت عيني بالطريق للوصول الى صالة المطار او كلت ايباه اشوكت يجي الوكت الي انطلق بيه بنفس الطريق وانديعت الله الي او الكم واتذكرت اهوية اشخاص بالمنتدى مثل دزمند او الن او ام الهنا او ام تنسيم عذاراً للباقين بس هم الي اجوي بالي ذيج الساعة او كلت هم يجي وقت ويمرون بهذا الطريق.
 المهم صديقي ممصدكَـ انو هو راح ايسافر انخبص خبصة اخت الجذب كل دقيقة ينسى فد شي وكَــلي رحم الله والديك انت وياية "اهم شي الرلكس بالموضوع او لا تنخبصون" كلشي مرتب او يصير بهدوء ... اخذنا ولد حمال وية العربانة او اني الي شفتها الواحد ياخوذ ويه حمال من باب المطار الى داخل الصالة اهوية احسن اله هو اينزل الجنط على التفتيش ويدخلها السونار، انت كلشي متسوي ويوصلك للختم ب15 الف دينار  او اكثر بكيفك بس شنو مشتري راح بالك... يم تسليم الجنط وكف نفس الرجال ابو المنظمة الي وزع الفيز او نفس يساعدكم بالجنط او يقارن الجوازات ويرتب الموضوع  انت مثل الملك.... المهم الزبدة
كانوا الي بالساحة حوالي 50 الى 60 شخص حوالي 6 عزاب او الباقي عوائل الغالبية من الـ IOM اكو 2009 او 2010 و الباقي SIV ، واحد لابس فانيلة مكتوب عليها IOM سالته عن السفر كال الامور كلها زين بس ما اكدر احجي تفاصيل كتلها يعني السفر كال اي كلش زين كتل انطي وقت اشوكت ايصير التسريع القوي كال ما اكدر بس افهم الامور فوق العال بالنسبة للسفر وخصوصاً العائلة والي عنده مرض مزمن ... كتلها بس اني كلشي مكمل حالة الملف فعال والامنية انتظر كتلة زينة الامور مالتي لو لا ، كال ما الك علاقة بالحالة اهم شي الامنية و كتله اني مترجم سابقاً كال يمكن اكو تركيز بالامنية على المترجمين SIV يعني تأخير بس اني ما قتنعت بحجيه لان اهوية مترجمين اصدقاء سافروا هاي الفترة

سألت الحماميل كتلهم اشكد اكو سفر لجماعة الهجرة كالوا هي الفترة كلشي اهوية ويومية نفس عددكم تقريباً

بالاخير انشاء الله الكل ايسافرون و تصير سوالف
عذراً كوني لم اذكر الاوقات بالتفاصيل وهاي لدواعي امنية من أجل حماية المهاجرين من اي تربص او رصد الهم

[سهم التميمي]

الله  يبشرك   بل   خير اخوية  ويارب نسافر ونخلص

[al-whaj]

الله  يبشرك   بل   خير اخوية  ويارب نسافر ونخلص

اشكرك حبيبي سهم والله فد احساس ايخبل لو بس اتشوف اوجوه الاخوان المسافرين فرح على اشوية قلق، بس هي تجربة لازم اشوفها بعيني يوم للكل انشاء الله

[rmadi]

رحمة الله والديك وشكرا على رفع المعنويات
بس حبيت أسالك تكدر تكلي كل مسافر شكد كم جنطة الة؟ جنطتين لو بس جنطة وحدة ؟
الموضوع حيرني واكو تضارب باجوبة الاخوة لان قسم يكولون من بغداد كل واحد الة جنطة وحدة ام ٢٣ كيلو.
بس الي يسافر من عمان والقاهرة الهم جنطتين
ياريت مشاهدتك ومعلوماتك حول الموضوع

[al-whaj]

رحمة الله والديك وشكرا على رفع المعنويات
بس حبيت أسالك تكدر تكلي كل مسافر شكد كم جنطة الة؟ جنطتين لو بس جنطة وحدة ؟
الموضوع حيرني واكو تضارب باجوبة الاخوة لان قسم يكولون من بغداد كل واحد الة جنطة وحدة ام ٢٣ كيلو.
بس الي يسافر من عمان والقاهرة الهم جنطتين
ياريت مشاهدتك ومعلوماتك حول الموضوع

اني الي اشكر على هذا الكلام الطيب
اخي العزيز
صديقي عائلته اربع نفرات اطفال 6 او 5 سنوات شايلين 5 جنط كل جنطة 20 طبعاً اموزنيها بس الي شفتها عائلة اربع نفرات هم وياهم اطفال والله يمكن 8 جنط كانوا كدمنا حتى الحرس كالو للرجال ليش مجايب الاثاث مال البيت وياك    وكدامنا اخذوا  الجنط منا بحضور الرجال ابو المنظمة وكلشي ما حجو وباه اعتقد جنطيتن كل جنط 20 لكل نفر .

[محارب]

مشكور لنقل الخبر وياربي يوم نفرح بيك

[al-whaj]

رحمة الله والديك وشكرا على رفع المعنويات
بس حبيت أسالك تكدر تكلي كل مسافر شكد كم جنطة الة؟ جنطتين لو بس جنطة وحدة ؟
الموضوع حيرني واكو تضارب باجوبة الاخوة لان قسم يكولون من بغداد كل واحد الة جنطة وحدة ام ٢٣ كيلو.
بس الي يسافر من عمان والقاهرة الهم جنطتين
ياريت مشاهدتك ومعلوماتك حول الموضوع

اني الي اشكر على هذا الكلام الطيب
اخي العزيز
صديقي عائلته اربع نفرات اطفال 6 او 5 سنوات شايلين 5 جنط كل جنطة 20 طبعاً اموزنيها بس الي شفتها عائلة اربع نفرات هم وياهم اطفال والله يمكن 8 جنط كانوا كدمنا حتى الحرس كالو للرجال ليش مجايب الاثاث مال البيت وياك    وكدامنا اخذوا  الجنط منا بحضور الرجال ابو المنظمة وكلشي ما حجو وباه اعتقد جنطيتن كل جنط 20 لكل نفر .

هاي غير الهاندباك 5 ك  اربعة

[rmadi]

ممنون ورحمة الله والديك
طبعا خطية يمكن اكو أخوة متوهمين ودياخذون بس جنطة وحدة
من ديخابروهم على السفر تيشتبهون يفتهمون كل واحد الة جنطة وحدة

[al-whaj]

مشكور لنقل الخبر وياربي يوم نفرح بيك

اشكرك اخوية العزيز وللجميع انشاء الله

[ابومريومة]

رحمة الله والديك وشكرا على رفع المعنويات
بس حبيت أسالك تكدر تكلي كل مسافر شكد كم جنطة الة؟ جنطتين لو بس جنطة وحدة ؟
الموضوع حيرني واكو تضارب باجوبة الاخوة لان قسم يكولون من بغداد كل واحد الة جنطة وحدة ام ٢٣ كيلو.
بس الي يسافر من عمان والقاهرة الهم جنطتين
ياريت مشاهدتك ومعلوماتك حول الموضوع

اخي العزيز السلام عليكم
يعتمد الوزن على شركة الطيران
لذا بعض الاخوان تسمع منهم جنطتين + هاندباك والبعض جنطة وهاندباك وهذا كلة تعرفة من يتحددلك موعد السفر وضروري تسأله وتفتهم منه اذا نسة يجيبلك سيرة عن الوزن

تحياتي
ابومريومة البغدادي

[rmadi]

شكرًا عزيزي ابو مريومة
بس ليش اكو حجز للجوء والهجرة على غير الاردنية؟؟؟؟
اني معلوماتي الاي او ام وس اي في من بغداد كلهم حجزهم على الملكية؟؟؟

[al-whaj]

شكرًا عزيزي ابو مريومة
بس ليش اكو حجز للجوء والهجرة على غير الاردنية؟؟؟؟
اني معلوماتي الاي او ام وس اي في من بغداد كلهم حجزهم على الملكية؟؟؟

فعلاً كان الحجر على الاردنية وهذا هو الدارج في عمل المنظمة

[البغدادية2]

انشاالله خير

[securityiom]

راح ابجي من الفرح

[ArUsH]

تسلم ايدك اخي
ويوم الي نباركلك بصدور فيزتك ووصولك بالسلامه

[malak.ali]

عاشت ايدك اخي الغالي
الظاهر جماعة الاس آي في حظهم نايم

ان شاء الله نباركلك بسفرك عن قريب

[الطموح]

رحمة الله والديك وشكرا على رفع المعنويات
بس حبيت أسالك تكدر تكلي كل مسافر شكد كم جنطة الة؟ جنطتين لو بس جنطة وحدة ؟
الموضوع حيرني واكو تضارب باجوبة الاخوة لان قسم يكولون من بغداد كل واحد الة جنطة وحدة ام 23 كيلو.
بس الي يسافر من عمان والقاهرة الهم جنطتين
ياريت مشاهدتك ومعلوماتك حول الموضوع

مساء الخير
ردا لسؤال الاخ رمادي
ملاحظه مهمه جدا وانا مسؤول عن هذه المعلومه
بالنسبه للي عدهم سفر من بغداد مباشره الى عمان امريكا مسموح الهم وزن 46 كيلو توضع في حقيبتين كل واحده 23
اضافه الى هان باك بوزن 7كيلو هذا الوزن مسموح للي عمره من 3سنوات فمافوق والي عمره تحت 3سنوات اله فقط 5كيلو
هذا بخصوص الي سفرهم مباشرتا من بغداد عمان امريكا
بس الي خط رحلتهم بغداد +عمان+المانيا+امريكا مسموح الهم فقط 23 كيلو توضع في حقيبه واحده ذات قياسات
معينه  كما سوف اذكرها
الطول=90سم
العرض=60سم
الارتفاع =25 او 30 سم
اضافه الى حقيبه واحد لكل شخص هان باك بوزن 7كيلو
اضافه الى حقيبه الابتوب غير محسوبه من الوزن
اما بالنسبه الى المسافرين من عمان فايضا ينطبق عليهم نفس الكلام
والاوزان والقياسات حسب خط الرحله اذا كانت الرحله مباشره الى امريكا فمن حقهم وزن 46كيلو لكل شخص
واذا كانت خط رحلتهم المانيا امريكا فمن حقهم فقط 23 كيلو فقط
تقبلو فائق احترامي والف شكر لصاحب الموضوع لنقل الاخبار المفرحه انشاءالله يوم سفرنه جميعا
اخوكم الطموح عمان

[alpha]

تفصيل رائع وطرح اروع من شخص متألق,تسلم عزيزي على المعلومات المفيدة ويارب يوم اللي تستلم الفيزة مالتك وتفرحنه وتسولفلنه سفرتك عزيزي..
تحياتي

[الطموح]

شكرا لهذه الكلمات واسعدني مشاركتكم

تفصيل رائع وطرح اروع من شخص متألق,تسلم عزيزي على المعلومات المفيدة ويارب يوم اللي تستلم الفيزة مالتك وتفرحنه وتسولفلنه سفرتك عزيزي..
تحياتي

[روزة اليرموك]

تسلم اخوية العزيز علنقل هاي الاخبار وان شاء الله كلنا انسافر يارب

[غسان العبيدي]

اخوية وهاج عاشت ايدك

بس بشرني انت وهاج مولدة وطني ؟؟؟ ههههههههههههههه 

تحياتي

[dark@ngel]

الله يبشرك بالخير ويم اي صدق نشوف هذا المنظر ونسافر يا رب انشاء الله تفرج على كل الاعضاء ونوصل بخير وسلامه ويوم الي تبشرنا بموعد سفرك

[رافت العراقي]

  مشكور اخويه العزيز ان شاءالله يوم سفرك

 بس سالفة المترجمين والموافقه الامنيه شغله محيره
  يعني اللي اشتغل وياهم المفروض ايمشون شغلته بسرعه مو بالعكس ,,
ا لظاهر ضربونه بوري معدل

 الله كريم

[al-whaj]

اني الي شاكركم على كلامكم واطرائتكم اخواتي واخواني الاعزاء...
والله اليوم كانت تجربة حلوة كنت انتظر هاي الفرصة واعتبرها بروفا قبل السفر، الناس الي كلهم امل اخوتك بالمحنة واكَـفين بالساحة والفرح والامل والقلق مزيج تكَـدر اتميزه بوجه كل واحد منهم، مزيج عجيب من عزاب وعوائلين اهل بغداد ومن محافظاتنا الغالية او الفقير المتعوب والمليان،  مسلمين و مسيحيين... اباوع عليهم اشوف الامل يجدح بوجهم والقلق من القادم والفرح بانجاز مشروع المستقبل، ابوع عليهم اكَـول كم واحد راح ينجح بامريكا منهم... وبهاي التاملات اتعاركو الحماميل بالسناسل خربوا علية الصفنة ... الله كريم يوم للكل

على العموم اني مقدم على برنامج الـIOM مو SIV  لا اني مترجم ما كملت السنة
او وهاج ما مولد لان المولد هسة احسن من الوطني.

ملاحظة/  من يوصل صديقي راح اخذ تفاصيل الرحلة او شنو الي ايفيد الناس اكتب الكم واليه بي خير نحجي الكم .

[*احباب الروح*]

الله يوفقك على هذه الاخبار
وان شاء الله الله يفرح كل المنتظرين .. بالسفر عاجلا غير اجل

[al-whaj]

الله يوفقك على هذه الاخبار
وان شاء الله الله يفرح كل المنتظرين .. بالسفر عاجلا غير اجل

وشكر حار لك يا احباب الروح...انشاء الجميع يرتاحون

[ابو عزوز القيسي]

عاشت ايدك اخي al-whaj ..اني برأي ان المنتدى محتاج هكذا ملعومات ترفع المعنويات شكرا الك اخي العزيز ويارب الموفقية الك ولكل المكرودين الي بالمنتدى كولوا أميـــــــــــــــــــــن

[al-whaj]

عاشت ايدك اخي al-whaj ..اني برأي ان المنتدى محتاج هكذا ملعومات ترفع المعنويات شكرا الك اخي العزيز ويارب الموفقية الك ولكل المكرودين الي بالمنتدى كولوا أميـــــــــــــــــــــن

امين اخوية ابو عزوز او رحمة والديك على هذا الثناء اخي هذا واجبي واجب كل واحد منا الي يشوف شي لو يسمع شي لازم ايفرح بيه اخوته والله تباشير الخير بينت اليوم من سألت الحماميل كالشت افرحت لان هما واكفين قبل الدخول للبناية ويا سبحان الله ايعرفون المهاجر كلتهم اشلون عرفتوا احنا عمن جماعة الهجرة كالوا من الجنط الي ايجيب 5 جنط او يريد ايسافر منو بس المهاجر خوما جماعة دبي... او بعدين كوتله اشلون اعداد السفر هالايام كل اووه اهوية يمكن يوم مثالكم عباله اني هم مسافر ما يدري اني مستوي فد عشر مرات وهنا صدك افرحت كلت يا الله خير كتله اشكد صارله من زاد عدد المسافرين كال هذا الشهر والي قبله بس كال هذا الشهر لا اهوية اكثر.

الله كريم للك

[الفضلي]

اخوي الوهاج مبروك لاصدقائك ويوم الالك وتسافر وترتاح
بس فد استفسار بسيط من فضلك
الحماميل ليش تعاركو ا شنو السبب ..؟

[al-whaj]

اخوي الوهاج مبروك لاصدقائك ويوم الالك وتسافر وترتاح
بس فد استفسار بسيط من فضلك
الحماميل ليش تعاركو ا شنو السبب ..؟

ههههههههههههههه ديتشاقون او وية حمال او اردو ايشدوا بالسناسل على التيغة او جن يخذه منهم وجان كب العركة وصارت هوسة بيناتهم خطية عرك على الفكريات مالتهم.
هية الشغلة بسرعة خلصت بس اني داصنف عليهم

[دزمند]

شكرا عالموضوع اخي العزيز و على الاخبار الحلوة و اشكرك لان تذكرتني الله يسمع منك
تحياتي

[ام تسنيم1]

الله يذكرك بالخير والفرح والسلامه اخونا العزيز  مشكور على امنياتك الطيبه الي وان دلت على شي فتدل على محبتك لااخوتك وخواتكوتمنياتهم الهم بالخير  والله ينطيك على كد نيتك   احنه قابلنه سوه وان شاء الله نسافر سوه وباسرع وقت  اتمنالك كل التوفيق وشكرا للاخبار المبشره بالخير واللي صدك ترفع المفعنويات  وان شاء الله يوصلون بالسلامه كل اللي شفتهم وموفقين باذن الله

[al-whaj]

شكرا عالموضوع اخي العزيز و على الاخبار الحلوة و اشكرك لان تذكرتني الله يسمع منك
تحياتي

بالعكس اخ دزمند انت انسان طيب وتريد اتساعد الناس ولو مرات عصبي بس هاي طبيعة العراق... على  العموم اخوية انت بشرتني انو اني ممكن احصل نتيجة بالايام الجاية لان ملف حالتي اتغير الى فعال والفحص مالتي كان بشهر التاسع الي راح والامنية بالانتظار شتكول اخوية بعدك على كلامك بان انب راح يطلع سفري قريب والامنية خلصانة لو اكو تغيير.
تحياتي ومحبة.

[al-whaj]

الله يذكرك بالخير والفرح والسلامه اخونا العزيز  مشكور على امنياتك الطيبه الي وان دلت على شي فتدل على محبتك لااخوتك وخواتكوتمنياتهم الهم بالخير  والله ينطيك على كد نيتك   احنه قابلنه سوه وان شاء الله نسافر سوه وباسرع وقت  اتمنالك كل التوفيق وشكرا للاخبار المبشره بالخير واللي صدك ترفع المفعنويات  وان شاء الله يوصلون بالسلامه كل اللي شفتهم وموفقين باذن الله

اخت عزيزة ام تنسيم
والله انتي دائماً على بالي شنو اخبارج شنو اخبر الجدول مالتكم، هم عندج اخبار عن الجماعة الي قابلو ويانة هم الج اتصالي بيهم اكو واحد سافر ، الامنية كملت.
تحياتي

[أبوعبدآلله]

أخي العزيز أشكرك وبارك آلله ربي فيك وإن شاءآلله يكون سفرنا جميعا عن قريب إلى أمريكا الطيبة ... آللهم آمين .

[al-whaj]

أخي العزيز أشكرك وبارك آلله ربي فيك وإن شاءآلله يكون سفرنا جميعا عن قريب إلى أمريكا الطيبة ... آللهم آمين .

لك لشكر والتقدير مني اخوية العزيز ابو عبد الله ... الله ايفرج على الجميع