تفاصيل سفري من بغداد الى دالاس

[البصراوي المحب]

السلام عليكم اخواني مثل ماوعدتكم اكتب تفاصيل سفري من الف الى الياء
طبعا كان موعد سفري يوم الاثنين 22_10 وانا من محافظه البصره الحمدلله اطلعت من البصره يوم السبت بليل صعدت بالمنشات الحكوميه وصلت لبغداد الاحد الفجر اجرات فندق بالكاظميه ارتاحيت وب11 رحت للمستشفى حته اسوي الفحص ماقبل السفر.المهم ساعه 1 الظهر طبعا كنه مجموعه هوايه وماطولنه بالفحص مجرد اخذنه الحبايه.طبعا بالمستشفى اتعرفنه على بعض واتفقنه نلتقي ثاني يوم بساحه عباس ابن فرناس.
الحمدلله ثاني يوم الصبح رحت لساحه عباس ابن فرناس وصلت ساعه ب8 لكيت ناس جايين قبلي وناس اجت وراي المهم اجمعنه كلنه وبقينه ننتظر ابو المنظمه يجي ينطينه التذاكر والله ساعه ب10 اجه ابو المنظمه وانطانه التذاكر وكال انتظروني بقاعه نينوى.اجرنه سياره الي الكل تعرفها اليوكنات النفر 10 ونطلقنه للمطار طبعا تفتيش دقيق للتذاكر وللجنط كملنه التفتيش ورحنه لقاعه نينوى وصلنه فتشو الجنط ايضا ودخلنه جوه للصاله لزمنه سرى على مكتب الملكيه كملنه شحنه الجنط وصعدنه فوك ننتظر صعود الطائره.تقريبا ساعه بالوحده صعدنه بالطياره بالوحده ونص طارت الطياره الحمدلله.وصلنه لعمان ب3 الا ربع.نزلنه من الطياره وصعدنه بالباص الخاص وصولنه للصاله دخلنه ولكينه ابو المنظمه ينتظرنه كملنه اجارائات انطونه بطاقه واخذو الجوازات وثاني يوم رجعنه البطاقه الخضره اعتقد كان لونها اخضر واخذنه الجوازات.طبعا الي كان عنده طياره بنفس اليوم خذوا لغير مكان ترانزيت والي كان منهم الاخ مراد البغدادي الي كان سفره ترانزيت على فرنسا.والي كان موعد طيراته ثاني يوم بتنه بفندق المطار اعتقد هواي ناس تعرفه اسمه كولدن توليب.ابو المنظمه كال الموعد باجر ساعه 7 الكل تكون موجوده جوه حته ناخذكم للمطار.المهم ثاني يوم ب7 اجمعنه اخذنه الباص واتجهنه للمطار دخلنه وكملنه الاجرائات طبعا الي طيارته على نيويورك اتجه للبوابه المخصصه وكعد ينتظر والي طيراته على شيكاغو همين راح للبوابه المخصصه.
طبعا هنا بدت الكارثه مالتي ساعه ب8 وشويه انا كاعد جان يجي ابو المنظمه صاح بسمي كتله نعم كال تعال معي جيب الكيس مال الاي او ام وجوازك انا همين رحت ويا لمكتب الجوازات اخذو الكيس مالتي وبدو يجيكون صارت اتصالات ومااعرف شنو المهم طلع واحد من المكتب جان يكلي انته احتمال ماتسافر انا هنا صار عندي انهيار كتله ليش شو السبب كال مابعرف بس هاي الشغله من نيويورك مش من عدنه طبعا مااكلكم شنو صار بيه بس الله اليدري.والله شويه وجان اشوفلك ابو المنظمه الشخص الثاني الي كان بالمطار رحت علي ركض كتله استاذ صارت معي هيج شغله والجماعه كالوا ماراح تسافر ممكن اعرف شنو السبب.طبعا اجه وياي لمكتب الجوازات وكال اي نعم هاي دائما تصير عدنه بيصير تشابه اسماء ومافي مشكله عادي بعد 24 ساعه بيجي الكلير الموافقه وبطير على امريكا.المهم خذه الكيس مني وبقيت انتظر الجواب من نيويورك لحد ماطارت طياره نيويوك ماجت الموافقه كال هسه بناخذك للفندق بترتاح وباجر اذا اجت الموافقه راح تسافر او اذا اجت منا لليل راح نحجزلك على فرانك فورت طبعا هذا الحجي يوم الثلاثاء الصبح.المهم رجعت للفندق منهار نفسيا بتت بالفندق ثاني يوم ساعه ب7 ونص الصبح جان يتصل على ابو المنظمه سيد فلان كتله نعم كال الموافقه من نيويورك لهلا مااجت ولازم ترجع على لبغداد كتله اوكي انطيني 10 دقايق وبكون يمك.والله بدلت وكملت اموري ونزلت.صعدت بالباص دخلت للمطار وكلي اجلس هون حته اخذلك تذكره بغداد.كعدت انتظر.والله جان يجي الخبر الصاعق اجه الموظف الثاني جان يكول موافقت جايه البارحه بليل وهسه بلغوني انك لازم تسافر على شيكاغو طبعا هنا انا مااعرف شنو صار بيه راسا طفرت علي وبسته كتله تحجي صدك لو تشاقه كل لا والله هلا اتصلو بيه وبلغوني نحجزلك على شيكاغو الف الحمدلله والشكر.والله حجزولي وكملت الامور رحت اننتظر بالبوابه المخصصه مال طياره شيكاغو بعدين كملنه التفتيش وانتظرنه شويه وصعدنه بالطياره طبعا جانت مجموعه هواي وياي عوائل طبعا بس انا عزابي بيهم.والله طارت الطياره ب11 الا ربع الحمدلله و12 ساعه ونص طيران وصلنه لشيكاغو ب3 وثلث العصر الحمدلله.نزلنه واتجهنه للصاله لكينه جماعه الاي او ام ينتظرونه كملنه الاجرائات همين واستلمنه الجنط.طبعا انا طيارتي كانت ب7 ونص بليل يعني لازم اركض ركاض ياله الحك.والله صدك صارت ركض الشغله صعدت بالمتور ونزلت صعدت بمصعد ونزلت من مصعد بس منين دخلت منين طلعت ماادري جان وياي موظف الاي او ام الحمدلله وصلت للبوابه مال الطياره لكيت الناس واكفه حته نصدت بالطياره طبعا الرحله كانت على شركه امريكان ايرلاينز.والله الحمدلله صعدت بالطياره ورى ساعتين وصلت لمطار دالاس تقريبا ب9 ونص نزلت خذيت الجنطه مالتي طلعت مالكيت ولا واحد من المنظمه.خابرت على كفيلي اجه علي بالسياره وخذاني للشقه مالته.طبعا هوه ويا جماعه بالشقه يعني مقبطه فرحت يم ولد ثنين اصدقائنه كعدت يمهم ابين ماينطوني الشقه والحمدلله مرتاح انا هسه.ثاني يوم الصبح رحت للمنظمه طبعا طلعوا الجماعه مايدرون بيه انا جاي بس يدرون لمن انلغت سفرتي لنيويورك والكيس وركر كام يتعذر.المهم رحت سويت معامله السوشيل سكيورتي وهاي هيه.وانتظر ليوم الاثنين اكمل الاجرائات.
والحمدلله على كل حال.
اخواني بس احب ابلغكم قبل شويه اتصل حجيت ويه الاخ مراد البغدادي وكال سلملي على الاخوان بالمنتدى وخلي يعذروني لان ماعندي انترنت طبعا مراد البغدادي طلع قرايب الكفيل مالتي.وسلام خاص من مراد للاخ توفي وانشاء الله هوه ماناسيكم بس يصير عنده انترنت راح ينزل موضوع سفره.

 تحياتي لكم جميعا.

[abo shams]

بالتوفيق اخي ..
الله يسهلك ان شاء الله و تستقر بحياتك الجديدة

[Aiham_]

الف مبروك و الله فرحتلك اخوية البصراوي

[dr_toffee]

الف مليون مبروك وان شاء الله نسمع عنك الاخبار الحلوة

[THE SENATOR]

الحمد الله على سلامتك اخويه العزيز ... والله هايه مشكله مال تشابه بالاسماء وشلون ماندري ولازم يرداله حل .

المهم هسه ارتاح وربي يوفقك

[*Ray]

 الحمد لله ع السلامه ومشكور ع التفاصيل وبالتوفيق بحياتك

                                       اختك راي / تركيا

[نيوتن]

الف مبروك والحمد لله على سلامة الوصول                                                                                                                                   نيوتن

[الصابر76]

الحمد لله على السلامه اخي العزيز موفقين ان شاء الله والله كارثه يعني صارلهم سنين او اشهر يجيكون عليك امنيا وبعدين من تريد توصل لازم يسوون عليك كلير والله مشكله عموما الحمد للله الله يبرد كلبك يا خويه ويوفق الجميع

[البلدوزر]

بالتوفيق

[مؤيد العبيدي]

مبروك وحمدلله على سلامتك .

[assaad2011]

الف مبروك  على سلامة الوصول  والحمد لله على سلامتك
اتمنى لكم طيب الاقامة والتوفيق  بحياتكم الجديدة

[القبطان ايوب]

                                         الحمد لله على السلامة ربي يوفقك ويسترها وياك


                              اخوك ابو علي

[(Isabella)]

الف الحمد لله على سلامتك ومبرووك وربي يكتبلك الحياه السعيده والموفقيه ان شاء الله

[ابو سماني]

الف مــــــــبروك وبالتوفيق
وشكرا على التوضيح والتفاصيل

[جنكو فيس]

اخوية قبل كل شي الحمد للله على السلامة و ان شاء الله الاستقرار القريب. ممكن اتوضحلنة : انت اي او ام  او اس اي في .. و اذا اي او ام شنو تفاصيل الكيس مالتك

[Abdullah2006]

الف مبروك بحياتك الجديده وتستاهل كل خير

[بتر فلاي2]

الحمد لله على السلامة وبالتوفيق ان شاء الله بحياتك الجديدة

[Mohammed altaee]

مبرووووك عليك والحمد الله على سلامتك وهاي أحلى عيدية بوصولك لأمريكا وعيد أضحى مبارك وكل عام وانته بألف خير وتمنياتي لك بالتوفيق في حياتك الجديدة

تحياتي

[ابو مرتضى]

الحمد لله على سلامتك

والله يوفق

[OK H.K]

الف مبروك اخونا البصراوي المحب شايف كل الخير ربي يسهل امرك

وحبيت اسالك اذا ممكن تنطينا عدد تقريبي للأشخاص الي سافروا وياك من مطار بغداد

محبتي

[البصراوي المحب]

شكرا لكل الاخوه والخوات على التهاني الجميله وانشاء الله تسافرون وتستقرون امين يارب.

انا اي او ام وهاي تفاصيل ملفي

رقم الملف  IZ-115

تقديم شهر 2 سنه 2010

مقابله اولى وثانيه شهر 3 سنه 2011

فحص طبي شهر 4 سنه 2011

موافقه المحلف شهر 5 سنه 2011
اعاده الفحص الطبي شهر8 سنه 2012
اكنمال الامنيه شهر 9 سنه 2012
السفر 22_10 سنه 2012

 تحياتي.

[البصراوي المحب]

اخويه والله العدد التقريبي كان ابين عزابيه وعوائل اكثر من 50 شخص.

 تحياتي.

[um shaheen]

الف الحمد لله على سلامتك والحمد لله والشكر وصلت سالم والله ذاك اليوم هبطتنه كلنه الله يساعدك زين تحملتها
تحياتي
اختك ام شاهين من سوريا

[برنسيسة]

الحمد لله على سلامتك المهم وصلت وهاي هيه بعد محد يكدر يرجعك
بالتوفيق انشالله

[راهب الحب]

اخي العزيز البصراوي المُحب ::
الف الحمدلله على سلامة وصولك والف مبرووووووك ويا رب تستقر وترتاح بعد كل هالإنتظار الطويــــل ...




                                     أخـوكـُم / وسـام بهنـام داؤد الخابــوري
                                             لاس فيغـاس / نيفــادا

[مروان الشويلي]

حبيبي
 الف الف الف مبروووك سلامة الوووصول ويارب الموفقية بحياتك الجديدة

[انته بروحي صدكني]

بالتوفيق الك ولجميع الاعضاء الي سافروا والي راح يسافرون

[tofy]

حمدلله على سلاامة اخوية البصرراوي انشالله اتشووف كل الخيرر بحياتك الجديدة .

الله يسلمة ويخلي وصلي سلااامي اله للاخ مراد البغدادي .

تحيااتي

[iron man]

الف الحمدلله على السلامه...والله جنت شايل همك بمحنتك ...الله كان بعونك على الموقف الي مريت بيه..هاي بس علمود يكولولك امريكا مو بالساهل الواحد يدخلها...تحياتي الك ويارب بعد متشوف عكوسيات وطريقك كله اخضر بمريكا بالتوفيق صديقي

[برنسو]

اجه الموظف الثاني جان يكول موافقت جايه البارحه بليل وهسه بلغوني انك لازم تسافر على شيكاغو طبعا هنا انا مااعرف شنو صار بيه راسا طفرت علي وبسته كتله تحجي صدك لو تشاقه كل لا والله هلا اتصلو بيه وبلغوني نحجزلك على شيكاغو

والله هذا الموظف يستاهل 1000 بووووووسة ...

الف مبرووووك اخوية البصراوي المحب ... والله فرحتنه بوصولك واتمنالك الموفقية بحياتك الجديدة وكل عام وانت بألف خيررررر



تحياتي .... برنسو

[غــريـبــه!!!]

الف مبروك اخي ويارب تبدي حياة سعيده

[Nawfal_Alfadly]

الف مبروك والحمد لله على سلامة الوصول احلى عيديه هاي يوم السفر لجميع الاخوان يارب اتمنالك الموفقية بحياتك الجديده يارب

[teeba]

 الحمد لله على سلامه الوصول ويارب تستقر نتمنالك الموفقيه والسعاده انشاء الله
اخوك طيبه سوريا

[ورد الشام]

الف مبروك اخوية والحمدلله على سلامة الوصول وبالموفقية ان شاء الله

[good55]

الحمد لله اخي الكريم سلامة الوصول وان شاء الله المستقبل المشرق

[القطيفيه]

الف مليون تريليون مبروك ع سلامتك

كل شي اتوقع منهم

سهله ابو الشباب وبالتوفيق]

[البغداديهooo]

الف مبروك اخويه البصراوي وان شاءالله التوفيق والسعاده وتحقيق الاماني يارب

[شايلوك]

مبروك السفر بس هاي القصه لو تريد اتجيبله مخرج مال افلام رعب لو افلام هنديه ميدبره بهل التفاصيل اللي صارت بيك

[Gray wolf]

الف الف مبروك والحمد لله على سلامتك ونتمنى لك حياة جديدة ممتعة

[امير البغدادي]

الف الف مبروك وبالتوفيق يارب

[the dreamer]

يالله يا رحمان يا رحيم , الحمد لله والشكر أخي العزيز البصراوي المحب ,
وبشر الصابرين , أنشاء الله الأستقرار في حياتك الجديدة اخي

ولاتنسى بأن تصلي صلاة الشكر لله سبحانه وتعالى لتيسير أمرك

تحياتي
THE DREAMER

[alzandawi]

الحمد لله على سلامتك اخويه العزيز وصارت سوالف وان شاء الله الخير كدامك

[البصراوي المحب]

تسلمون اخواني واخواتي الطيبين على التهاني الحلوه والكلمات الجميله

واتمنالكم السفر والخير انشاء الله

واتمنى من الجميع انو مايضيع هيج فرصه حلوه بالسفر لمريكا تعالوا شوفو الناس شلون عايشه والطبيعه والاجواء والقانون بصراحه كلشي حلو هنا.

 تحياتي لكم جميعا.

[ابو اوريغون]

مبروك وبالخير عليك اخي البصراوي ولو هبطت معنوياتنه من بلغوك بالعودة للعراق وانت بعمان ولكن الحمد لله على سلامة الوصول واكيد تعرف اني ليش ركزت على هاي الفقرة لان صار عندي عقدة من المطارات والتاجيل فيها الله يستر الجميع ولا يراويها الاحد والكل توصل بخير وسلامة وبدون اي عوائق او مشاكل في المطارات تحياتي


اخوك ابو اوريغون

[ابو علاوي]

السلام عليكم وكل عام ونتة بالف خير وحمد الله على السلامة وانشاء الحياة الجديدة اتكون على خير انا المصيبة مالتي 27_5_2012 وفي اخر يوم لغو سفري من واشنطن وليومك ماكو لاح ولا خبر والله كريم همزين انتة وصلت والحمد الله تحياتي

[عمدة فرجينيا]

عالخير والف مبروك والحمد لله على سلامة الوصول اخوية بصراوي والحمد لله عدت سلامات هالعراقيل الي مريت بيهة والله لايكتبهة لاحد
موفق ان شاء الله بالحياة الجديدة

[Hero 007]

مرحبا اخي كيفك
ااااااااالف ااااااااااالف مبروك و الحمد لله عل السلامة و ان شاء الله دوم التوفيق


عيني بس ردت اسفسر عن سفرك

انت مسجل عل الاي او ام و سافرت من العراق

بس قانون اللجوء يكول انه اللاجي ميصير لاجئ الا اذا طلع من بلده

يعني انت قدمت لجوء من داخل العراق ؟؟؟؟

و اذا قدمت من خارج العراق (الاردن مثلا ) ... اني اللي اعرفه انه اللاجي ورة متقبله المنظمة كلاجيء ميصير يرجع لبلده لانه اذا رجع لبلده معناها هو يكدر يعيش ببلده و ممحتاج للجوء و بهيج حالة يصير ما عنده حجة للجوء ؟؟؟؟

تحياتي للجميع