܀ ܪ̈ܚܝܼܩܹܐ ܡܼܢ ܫܪܵܪܵܐ ܀
ܓܵܘ ܕܵܐܗܵܐ ܒܪܝܼܬܼܵـܐ ܒܢܝܼܬܼܵـܐ ܠܚܸܠܡܵܢܹ̈ܐ
ܪ̈ܕܹܐܠܗ̄ܘܼܢ ܥܲܝܢܵܬܼـܝܼ ܒܕܸܡܥܹ̈ܐ ܫܵܚܝܼܢܹ̈ܐ
ܟܡܵܐ ܨܘܼܠܦܹ̈ܐ ܚܙܹܐܠܝܼ ܡܹܠܝܹ̈ܐ ܐܘܼܠܨܵܢܹ̈ܐ
ܡܼܢ ܠܒܵܘܵܬܼܵܐ ܢܒܼܵܥܵܐ ܡܢ̄ ܠܫܵܢܹ̈ܐ،،
ܡܼܢ ܪܵܒܵܐ ܚܕܸܪܝܼ ܕܚܵܙܸܢ ܚܲܒܼܪ̈ܵܢܹܐ
ܒܪܥܵܫܬܵـܐ ܫܲܪܝܼܪܬܵـܐ ܘܠܵܐ ܡܦܲܬܦܹܬܵܢܹ̈ܐ
ܟ̰ܡܹܐܠܗ̄ܘ̇ܢ ܡܢ̄ ܩܲܕ̄ܡ ܥܲܝܢܝܼ ܫܪ̈ܵܓܹܐ ܢܘܼܗܪ̈ܵܢܹܐ
ܒܲܠܚܘܼܕܼܵܝܘܼܬܼܝܼ ܢܦܸܠܠܝܼ ܒܥܲܡܛܵܢܹ̈ܐ،،
ܚܲܕ̄ܟܡܵܐ ܕܲܓܵܠܹ̈ܐ ܘܚܲܕ̄ܟܡܵܐ ܦܲܢܕܵܢܹ̈ܐ
ܡܹܠܝܹ̈ܐ ܡܼܢ ܬܘܼܢܵܐ ܢܘܝܼܠܹ̈ܐ ܒܪܸ̈ܥܝܵܢܹܐ
ܚܪ̈ܝܼܙܹܐ ܫܲܘܦܵܦܹ̈ܐ ܓܵܘ ܥܸܩܪܵܐ ܕܙܲܒܼܢܹ̈ܐ
ܩܸܢܝܹ̈ܐ ܠܐܝܼܩܵܪܵܐ ܡܼܢ ܡܲܫܦܸܪ̈ܵܢܹܐ،،
ܒܡܵܢܝܼ ܡܦܲܪ̈ܦܸܠܵܚ ܐܲܚܢܲܢ ܙܲܒܘܼܢܹ̈ܐ
ܕܫܲܩܠܵܚ̈ ܙܸܕܼܩܲܝܢܝܼ ܡܐܲܝܟܼ ܫܩܵܠܬܵـܐ ܕܐ̄ܚܹܪ̈̄ܢܹܐ
ܕܠܹܐܝ̄ܘܲܚ̈ ܒܸܫܡܵܥܵܐ ܫܒܼܘܼܩ ܡܢ̄ ܗܹܡܸܙܡܵܢ̈ܐ
ܡܼܢ ܐܹܓܲܪ̈ܝܵܬܼܵـܐ ܢܟܼܝܼܠܹ̈ܐ ܕܫܘܼܠܛܵܢܹ̈ܐ،،
ܨܝܼܡܠܲܢ ܒܵܥܘܼܬܼܵܐ ܕܟܼܠܲܝܗ̈ܝ ܕܘܼܟܼܪ̈ܵܢܹܐ
ܨܠܵܘܵܬܲܢ ܪܸ̈ܡܠܗ̄ܘܼܢ ܒܩܵܠ̈ܐ ܚܲܝܠܵܢ̈ܐ
ܗܲܪ ܒܸܣܓܼܵܕܼܵܐ ܝ̄ܘܲܚ̈ ܒܟܼܠܲܝܗ̈ܝ ܕܘܼܟܵܢܹ̈ܐ
ܒܚܲܪܲܝܬܼܵـܐ ܣܵܗܪ̈ܲܢ ܓܢܵܝܵܐ ܒܹܝܠ ܥܢܵܢ̈ܐ،،
ܦܵܚܸܠܝܼ ܡܵܪܝܼ ܡܢ̄ ܪܘܼܫܥܵܐ ܕܚܲܒܪ̈ܵܢܹܐ
ܢܲܦ̮ܫܝܼ ܣܡܝܼܛܬܵـܐ ܝ̄ܠܵܗ̇ ܒܪܵܒܵܐ ܐܵܬܘ̇ܢ̈ܐ
ܚܕܼܝܼܪܵܐ ܝ̄ܘܸܢ ܓܘܼܡܪܵܐ ܒܐܝܼܕܼܵܐ ܕܡܲܩܕܼܵܢܹ̈ܐ
ܘܪܘܼܚܝܼ ܦܪܝܼܫܬܵـܐ ܝ̄ܠܵܗ̇ ܡܢ̄ ܦܲܓܼܪܝܼ ܕܥܲܦܪ̈ܵܢܹܐ،،
ܐܸܕܝܘܼܡ ܓܵܘ ܬܹܒܹܝܠ ܦܠܸܛܠܗ̄ܘܼܢ ܦܘܼܩܕܵܢܹ̈ܐ
ܠܚܲܨܵܐ ܕܒܲܪܢܵܫܵܐ ܚܲܪ̈ܘܼܦܹܐ ܡܫܝܼܢܹ̈ܐ
ܒܕܘܼܡܵܪܵܐ ܪܲܒܵܐ ܦܪ̈ܝܼܣܹܐ ܣܲܢܝܵܢ̈ܐ
ܒܟܼܠ ܪܦܵܦܵܐ ܢܣܵܪܵܐ ܐ̄ܚܘܼܢܵܐ ܠܐܵܚܘܼܢܹܗ،،
ܫܒܼܝܼܠܵܐ ܕܢܵܫܘܼܬܼܵܐ ܢܟܼܝܼܠܵܐ ܡܼܢ ܟܝܵܢܹܗ
ܒܚܲܩܠܵܬܲܢ ܒܕܼܝܼܪܹ̈ܐ ܒܸܕܼܪܹ̈ܐ ܣܲܡܵܢܹ̈ܐ
ܒܸܙܪ̈ܵܥܵܐ ܝ̄ܘ̄ܚ ܘܲܪ̈ܕܹܐ ܩܛܵܦܵܐ ܙܝܼܘܵܢܹ̈ܐ
ܒܸܚܨܵܕܹܐܝ̄ܘ̄ܚ̈ ܩܕܼܵܠ̈ܐ ܒܡܲܓܠܹ̈ܐ ܦܲܪ̈ܡܵܢܹܐ،،
ܟܡܵܐ ܫܓܼܘܼܫܝ̈ܐ ܐ̄ܬܹܐܠܗ̄ܘ̇ܢ ܘܒܪܹ̈ܐܠܗ̄ܘܼܢ ܒܘܼܪ̈ܵܢܹܐ
ܚܒܼܝܼܛܠܗ̄ܘ̇ܢ ܝܲܡܵܬܼܵـܐ ܫܓܸܫܠܗ̄ܘ̇ܢ ܛܘܼܪ̈ܵܢܹܐ
ܡܼܢ ܪܘܼܡܬܵـܐ ܠܥܲܦܪܵܐ ܬܠܸܚܠܗ̄ܘ̇ܢ ܒܸܢܝܵܢ̈ܐ
ܒܫܲܘܝܘܼܬܼܵܐ ܕܐܲܪܥܵܐ ܟܠ ܫܠܲܕܹܐ ܛܚܝܼܢ̈ܐ،،
ܟܡܵܐ ܕܒܸܡܚܵܝܵܐ ܝ̄ܢܵܐ ܦܲܘܚܹ̈ܐ ܘܪ̈ܲܘܕܵܢܹܐ
ܗܲܪ ܠܹܐܝ̄ܢܵܐ ܪܥܵܫܵܐ ܓܒܼܝܼܠܹ̈ܐ ܥܲܦܪ̈ܵܢܹܐ
ܦܣܵܥܵܐ ܒܫܘܼܒܼܗܵܪܵܐ ܣܸܡܝܹ̈ܐ ܒܪܸ̈ܥܝܵܢܹܐ
ܪ̈ܚܝܼܩܹܐ ܡܼܢ ܫܪܵܪܵܐ ܒܚܘܼܬܵܡܵܐ ܕܙܲܒܼܢܹ̈ܐ،،
ܥܲܒܼܕܝܼܫܘ̇ܥ ܣܵܗ̄ܕܐ ܝܘܼܚܲܢܐ