المنتدى الثقافي > زاوية الشعر الشعبي

مـَگــْــــــــــــرودْ

(1/1)

ميسون نعيم الرومي:
مـَگــْــــــــــــرودْ
ميسون نعيم الرومي
 
مـَگـرود يـاويـلي الـبـَلـَدْ .... مـن الـمـَهـَدْ حـتـى الـلـِحـدْ
 
الشـَـعـَبْ مـَلْ امـنْ الـدَيـْنْ
زيـن افـْتـَحْ ابـْعـيــنـَكْ زيـن
الـبـوگْ مــَيـقـّرَه الـديـنْ
فـَدْ يـوم ْوانـسـَوي الـجـَردْ.... مـِنْ الـمـَهـَدْ حـتى الـلـِحـدْ
 -----------------------------
قصتنه صارت بالوصف
ما تنتهي او نندف ندف
كلنه انتخبنه ابلاعرف
هنيال سكان البلد ..... من المهد حتى اللحد
--------------------------------
البوگ اشكال الوان
ضاع الوصف والعنوان
كرخ او رصافه او ميدان
گرة اعيونك يابلد .... من المهد حتى اللحد
------------------------------
اخضر اويابس گرطوه
حتى النفط هم شربوه
والوطن نصه باعوه
لاعظم خلو لاجلد .... من المهد حتى اللحد
---------------------------------
واحدنه نايم بالعسل
يعتقد بس هوه الأصل
دكتور مختص بالجهل
مسحاه وامضيعه الربد .... من المهد حتى اللحد
---------------------------------
نايبنه بس يعرف بلي
يچذب او من يحچي صلي
الوطن بيهم مبتلي
منجل او مايعرف حصد.... من المهد حتى اللحد
----------------------------------
من يوم عشنه ابهلوطن
واحدنه بالهم ممتحن
چم دوب نسكت ع المحن
محنتنه معگودة عگد.... من المهد حتى اللحد
---------------------------------
هذي الحكومه امزيفه
توعد او ماكو كل وفه
هذا الجره او هذا الصـُفـَه
حصتنه بس حزن اودرد.... من المهد حتى اللحد
---------------------------------
بالصيف ضيعنه اللبن
غربه اونعيش ابهلوطن
لاجئ عراقينه اويون
شايل اچوالاته او شرد.... من المهد حتى اللحد
 ------------------------------------
واحـدْ أَحـَدْ الله الصَمـَد
أُمـيـّه ماعـِدنـــَه بـَعــَدْ
لـَطـامَه عـِدْ ابـْلا عـَدَد
كـُفـْرَوْ ابسومر وابأكد .... من المهد حتى اللحد
 
ستوكهولم
نيسان / 2013
 

عيني بعين الله:
تمام تشخيص واقعي

احسنت

تحياتي

ابو محمد

تصفح

[0] فهرس الرسائل

الذهاب الى النسخة الكاملة