ܓ. ܓܙܡܬܐ ܠܐܝܬܘܬܐ ܕܥܡܢ ܓܘ ܐܪܥܗ
ܠܐܟ݂ܐ ܒܕ ܝܗܒ݂ܢ ܪܥܝܢܝ ܘܩܪܝܬـܝ ܥܠ ܐܢܝ ܣܘܥܪ̈ܢܐ ܕܟܐ ܥܒ݂ܕܝ ܡܥܒܕܢܘܬ݂ܐ ܚܕܪܫܐ ܐܘ ܠܐ ܚܕܪܫܐ ܥܠ ܓܙܡܬܐ ܠܐܝܬܘܬܐ ܕܥܡܢ ܐܬ݂ܘܪܝܐ ܓܘ ܥܝܪܩ، ܘܡܡܘܕܝ ܝܠܗ̇ ܘܵܠܝܼܬܐ ܕܫܘܠܛܢܐ ܥܝܪܩܝܐ ܦ̮ܕܪܠܝܐ ܘܟܘܪܕܣܬܢܝܐ ܠܥܒ݂ܕܐ ܘܡܘܕܝ ܝܠܗ̇ ܘܵܠܝܬܵܐ ܕܫܘܬܐܣ̈ܢ ܦܘܠܝܛܝܩܝ̈ܐ ܘܥܕܬܢܝ̈ܐ ܘܟܢܘܫܝܝ̈ܐ ܠܥܒ݂ܕܐ ܡܛܠ ܩܠܠܬܐ ܘܡܒܨܪܬܐ ܕܚܪܝܦܘܬܐ ܕܐܢ̈ܐ ܣܘܥܪ̈ܢܐ ܡܪܝܡܢܐ.
ܣܘܥܪ̈ܢܐ ܡܫܚܠܦ̈ܐ ܐܝܢܝ ܕܐܝܬ ܠܗܘܢ ܕܘܪܐ ܡܪܝܡܢܐ ܓܘܪܐ ܥܠ ܫܝܢܐ ܘܚܘܡܣܢܐ ܥܠ ܥܡܢ ܐܬ݂ܘܪܝܐ ܓܘ ܥܝܪܩ ܝܠܝܗܝ ܪܒܐ ܘܦܪ̈ܝܫܐ ܘܥܣܩ̈ܐ، ܐܝܢܐ ܟܠܝܗܝ ܐܝܬ ܠܗܘܢ ܡܥܒܕܢܘܬ݂̈ܐ ܗܫܝ̈ܐ ܐܘ ܠܐ ܗܫܝ̈ܐ ܥܠ ܓܙܡܬܐ ܕܐܝܬܘܬܐ ܕܐܗܐ ܥܡܐ ܫܪܫܝܐ ܐܝܢܝ ܕܥܩܪ̈ܐ ܕܡܕܝܢܝܘܬܗ ܨܠܝܐ ܝܠܝܗܝ ܒܥܘܡܩܐ ܕܬܫܥܝܬܐ ܕܒܝܬܢܗܪ̈ܝܢ ܠܐܗܐ ܥܠܬܐ ܟܠ ܓܙܡܬܐ ܠܐܝܬܘܬܐ ܕܐܗܐ ܥܡܐ ܝܠܗ̇ ܓܙܡܬܐ ܠܫܝܢܐ ܘܚܘܡܣܢܐ ܕܥܝܪܩ.
ܐܢ̈ܐ ܣܘܥܪܢܐ ܡܪ̈ܝܡܢܐ ܕܒܐܬܝܐ ܝܠܝܗܝ ܚܕܟܡܐ ܓܗ̈ܐ ܒܫܡܐ ܕܬܘܕܝܬܐ ܘܐܚܪܢܐ ܒܫܡܐ ܕܐܘܡܬܐ ܘܚܐܪܘܬܐ ܠܐ ܝܠܝܗܝ ܒܐܬܝܐ ܐܠܐ ܡ̣ܢ ܓܒ̈ܐ ܛܘܗܡܝ̈ܐ ܫܘܒ݂ܝܢܝ̈ܐ ܘܬܘܕܝܬܢܝ̈ܐ ܣܘܦܢܝ̈ܐ ، ܟܕ ܟܠܝܗܝ ܐܢ̈ܐ ܥܘܫܢ̈ܐ ܡܘܦܠܚܠܗܘ ܢ ܫܒ݂ܝܠ̈ܐ ܦܪ̈ܝܫܐ ܕܪܗܝܒ݂ܘܬ݂ܐ ܘܬܚܘܬ ܪ̈ܘܫܡܐ ܘܥܠܬ݂̈ܐ ܕܡܣܬܪܢܘܬ݂ܐ ܕܐܬ݂ܪܐ ܘܬܘܕܝܬܐ ܕܡܘܥܒ݂ܕܠܗܘܢ ܕܗܘܐ ܫܓܼܘܫܝܐ ܓܘ ܐܬܪܐ ܘܣܗܡܐ ܙܘܕܐ ܕܐܢ̈ܐ ܓܒ̈ܐ ܝܠܝܗܝ ܕܪܗܝܒ݂ܘܬ݂ܐ ܘܦܠܝܛܐ ܝܠܝܗܝ ܡ̣ܢ ܬܘܕܝܬܐ ܘܫܒ݂ܛܐ ܠܐ ܡܨܝ ܚܝܝ ܓܘ ܚܕ ܕܥܬܝܕ ܒܗܪܢܐ ܘܕܝܡܘܩܪܛܝܐ ܘܟܐ ܗܡܢܝ ܐܚܟ̰ܝ ܒܕܥܒ݂ܪ ܚܫܟܢܐ ܕܡܫܠܡܢܘܬܐ ܠܐܗܐ ܥܠܬܐ ܬܠܚܠܗܘܢ ܠܒܢܝܬ ܬܚܬܝܬܐ ܕܐܬܪܐ ܩܐ ܪܒܐ ܫܪ̈ܒܬ݂ܐ ܕܐܬܝ.
ܣܘܥܪ̈ܐ ܗܫܝ̈ܐ ܝܠܝܗܝ ܗ̇ܘ ܐܘܪܓܢܘܢ ܦܪܢܣܝܐ ܓܘ ܥܝܪܩ ܓܘܢܐܝܬ ܟܕ ܗ̇ܘ ܝܠܗ ܡܫܬܐܠܢܐ ܩܕܡܝܐ ܘܚܪܝܐ ܓܘ ܣܘܥܪܢܐ ܕܡܢܬܝܬܐ ܕܬܪܡܝܬܐ ܕܝܡܘܩܪܛܝܬܐ ܘܫܢܝܬܐ ܕܥܝܪܩ ܠܡܫܩܠ̈ܐ ܒܫ ܡܫܘܫܛ̈ܐ ܓܘ ܫܩܠ ܝܗܒ݂ܐ ܘܙܕܩܐ ܕܒܪܢܫܐ ܓܘ ܡܦܠܚܬܗ ܠܙܕܩ̈ܗ ܡܕܝܢܝ̈ܐ ܘܦܘܠܝܛܝܩܝ̈ܐ ܓܘ ܐܬܪܗ.
ܠܐ ܡܛܝܒܘܬ݂ܐ ܕܐܘܪܓܢܘܢ ܦܪܢܣܝܐ ܬܪܝܨܐ ܘܚܫܝܚܐ ܥܡ ܐܣ̈ܐ ܘܦܘܣܩܢ̈ܐ ܕܐܡܘܬ̈ܐ ܡܚܝܕ̈ܐ ܒܕ ܡܥܒ݂ܕ ܫܠܛܢܬܐ ܕܝܗܠ̈ܐ ܕܪ̈ܗܝܒ݂ܝܐ ܕܒܫܩܠܐ ܝܠܝܗܝ ܝܘܬܪܢܐ ܘܐܝܢܝ ܕܝܠܝܗܝ ܗ̇ܘ ܥܒ݂ܘܕܐ ܐܘ ܥܡܠܐ ܕܚܕܪܫܐ ܗܘܝܐ ܝܠܗ ܡܥܒܕܢܐ ܡܪܝܡܢܐ ܠܐܝܬܘܬܐ ܕܥܡܢ ܘܚܪܬܐ ܒܗܘܝܐ ܝܠܗ ܥܡܢ ܐܠܝܨܐ ܠܫܒ݂ܩܬܐ ܕܐܬܪܐ ܘܚܝܬܐ ܓܘ ܓܠܘܬܐ ܕܒܫܒ݂ܩܐ ܝܠܗ ܚܕ ܨܠܦܐ ܥܡܘܩܐ ܠܐܝܬܘܬܗ ܐܘܡܬܢܝܬܐ ܓܘ ܐܬܪܗ ܫܪܫܝܐ.
ܥܘܫܢ̈ܐ ܪ̈ܗܝܒ݂ܝܐ ܕܡܦܠܘܚܐ ܝܠܝܗܝ ܐܢܝ݇ ܫܒ݂ܝܠ̈ܐ ܒܫ ܚܪܒܐ ܕܪ̈ܗܝܒ݂ܝܘܬܐ ܪܒܐ ܝܠܝܗܝ ܐܕܝܘܡ ܘܪܒܐ ܡܢܝܗܝ ܒܟܠܝܐ ܝܠܝܗܝ ܒܬܪ ܣܬܪܐ ܬܘܕܝܬܢܝܐ ܠܦܪܣܐ ܙܕܘܥܬܐ ܒܝܢܬ݂ ܟܠܝܗܝ ܐܡܘܬ̈ܐ ܘܬܘܕܝܬ݂̈ܐ ܥܝܪ̈ܩܝܐ ܘܕܝܠܢܐܝܬ݂ ܥܠ ܐܘܡܬܢ ܐܬ݂ܘܪܝܬܐ.
ܥܘܫܢ̈ܐ ܪ̈ܗܝܒ݂ܝܐ ܕܐܝܬܠܝܗܝ ܬܘܪܣܝܐ ܡ̣ܢ ܝܗܠ̈ܐ ܐܝܢܝ ܕܒܩܢܝܐ ܝܠܝܗܝ ܡ̣ܢ ܐܢ̈ܐ ܣܘܥܪ̈ܢܝܗܝ ܪ̈ܗܝܒ݂ܝܐ ܥܘܬ݂ܪܐ ܘܫܠܛܢܬܐ ܥܠ ܥܡܢ. ܐܢ̈ܐ ܥܘܫܢ̈ܐ ܝܠܝܗܝ ܥܘܫܢ̈ܐ ܕܠܐ ܒܥܝ ܩܐ ܒܪܢܫܐ ܓܘ ܥܝܪܩ ܕܚܝ̈ܐ ܓܘ ܫܝܢܐ ܘܚܘܡܣܢܐ ܘܫܘܘܫܛܐ ܐܝܢܐ ܒܥܝ ܩܐ ܐܬܪܢ ܣܟ݂ܠܘܬ݂ܐ ܘܦܩܝܪܘܬ݂ܐ ܘܬܘܚܪܬܐ ܕܡܨܝ ܡܫܠܛܢܝ ܥܠܗ ܘܫܩܠܬܐ ܕܝܘܬܪܢܐ ܗܘܠܢܝܐ ܡܢܗ.
ܣܘܥܪܢܐ ܕܚܕܟܡܐ ܝܗܠ̈ܐ ܕܒܥܒ݂ܕܐ ܝܠܝܗܝ ܪܗܝܒ݂ܘܬ݂ܐ ܒܫܡܐ ܕܬܘܕܝܬܐ ܠܐ ܝܠܝܗܝ ܐܠܐ ܝܗܠ̈ܐ ܕܒܥܝ ܡܕܥܪܬܐ ܕܥܡܢ ܘܥܡܡ̈ܐ ܐܚܪ̈ܢܐ ܠܕܪ̈ܐ ܕܩܕ݇ܡ ܬܫܥܝܬܐ ܐ݇ܢܫܝܬܐ ܘܐܓܪܬܝܗܝ ܒܪܡܙܐ ܝܠܗ̇ ܒܟܠ ܩܪܝܚܘܬܐ ܠܐ ܡܨܝܬܝܗܝ ܠܫܘܚܠܦܐ ܘܫܘܘܫܛܐ ܩܐ ܕܐܗܐ ܥܠܬܐ ܡܦܠܘܚܐ ܝܠܝܗܝ ܐܢܝ݇ ܐܘܪ̈ܚܬܐ ܒܫ ܓܥܝܨ̈ܐ ܕܪܗܝܒ݂ܘܬ݂ܐ ܒܡܦܠܚܬܝܗܝ ܠܦܪ̈ܨܘܦܐ ܡܚܝܠ̈ܐ ܘܡܥܘܟ݂̈ܐ ܡܛܠ ܪܦܝܬܝܗܝ ܓܘ ܬܥܒܕܝܬ݂̈ܐ ܕܡܘܬ݂ܢܦ̮ܫܐ ܒܕܘܟܢ̈ܐ ܬܘܕܬܢܝ̈ܐ ܘܟܘܢܫ̈ܐ ܒܪ̈ܢܫܝܐ ܘܕܠܐ ܦܘܪܫܘܢܝܐ.
ܬܟ݂ܝܠܘܬܐ ܕܥܘܫܢ̈ܐ ܪ̈ܗܝܒ݂ܝܐ ܥܠ ܙܥܘܦܘܬܐ ܘܩܛܠܐ ܕܠܐ ܦܘܪܫܘܢܝܐ ܓܠܘܝܐ ܝܠܗ ܣܟ݂ܠܘܬܝܗܝ ܠܪܢܝܐ ܕܫܩܝܠܐ ܝܠܝܗܝ ܥܠ ܢܦ̮ܫܝܗܝ، ܘܒܗ̇ܝ ܥܕܢܐ ܓܠܘܝܐ ܝܠܗ ܠܡܚܝܠܘܬܐ ܕܥܘܫܢ̈ܐ ܡܣܡܟ݂ܢܝܗܝ ܘܡܥܕܪ̈ܢܐ ܠܦܠܚܢܝܗܝ ܕܪܩܘܒ݂ܠ ܒܢ̈ܝ ܥܡܐ ܥܝܪܩܝܐ ܙܟܝܐ.
ܥܘܫܢ̈ܐ ܦܘܠܝܛܝܩܝ̈ܐ ܣܡܘܟ݂̈ܐ ܕܐܗܐ ܪܗܝܒ݂ܝܘܬܐ ܒܝܕܥܐ ܝܠܝܗܝ ܕܐܢܝ ܫܘܬܦ̈ܐ ܝܠܝܗܝ ܓܘ ܓܘܢܚܝܗܝ ܘܥܡ ܐܢܝ ܕܒܟܠܝܐ ܝܠܝܗܝ ܒܬܪܝܗܝ ܒܕ ܦܝܫܝ ܟܬܝܒ݂̈ܐ ܓܘ ܣܓܠܐ ܕܚܝܒ݂̈ܐ ܕܐ݇ܢܫܘܬܐ ܐܝܟܼ ܗܝܬܠܪ، ܡܘܣܝܠܝܢܝ، ܣܬܐܠܝܢ، ܐܝܕܝ ܐܡܝܢ ܘܨܕܐܡ ܘܐܚܪ̈ܢܐ ܡ̣ܢ ܐܡܙܪ̈ܐ ܕܩܪܒ݂ܐ، ܘܠܐ ܗܘܐ ܗ̇ܘ ܝܘܡܐ ܕܕܝܢܬܝܗܝ ܪܚܩܐ ܕܗܘܐ ܠܗ ܟܠܗ ܥܡܐ ܥܝܪܩܝܐ ܡܘܕܥܢܘܬܐ ܠܓܘܢܚ̈ܐ ܕܥܒ݂ܝܕ̈ܐ ܝܠܝܗܝ ܠܒܢܘܢ̈ܗ ܙܟܝ̈ܐ.
ܐܚܢܢ ܝܕܥܚ ܪܒܐ ܨܦܝܝ ܠܥܠܬ݂̈ܐ ܕܙܝܕܬܐ ܕܪܗܝܒ݂ܝܘܬܐ ܓܘ ܐܬܪܢ ܝܠܗ̇ ܠܝܬܝܘܬܐ ܕܡܨܝܬܐ ܕܥܡܐ ܥܝܪܩܝܐ ܠܒܢܝܐ ܐܬܪܐ ܡܕܝܢܝܐ ܕܐܝܬ ܠܗ ܟܠܝܗܝ ܬܢܘ̈ܐ ܕܚܝܘܬܐ ܛܒ݂ܬܐ ܩܐ ܒܪܢܫܐ. ܘܩܐ ܕܡܨܚ ܠܪܚܫܐ ܠܩܕܡܐ ܥܠ ܐܘܪܚܐ ܬܪܝܨܬܐ ܠܒܢܝܐ ܟܢܘܫܝܐ ܕܪܝܐ، ܐܠܝܨ̈ܐ ܝܘܚ ܕܚܙܚ ܚܕܐ ܫܪܝܬܐ ܠܟܠ ܚܕ ܩܬ݂ܪܐ ܓܘ ܟܢܘܫܝܢ ܘܒܫܪܪܐ ܐܗܐ ܝܠܗ̇ ܡܫܬܐܠܢܘܬܐ ܕܦܘܠܝܛܝܩܝ̈ܐ ܘܡܨܝܬ̈ܐ ܕܦܘܪܢܣܝܗܝ ܬܪܝܨܐ ܘܩܐ ܕܡܨܝ ܐܢܝ ܠܒܢܝܐ ܐܬܪܐ ܕܪܝܐ ܕܐܝܬ ܓܘܗ ܫܝܢܐ ܘܚܘܡܣܢܐ ܘܵܠܝܬܝܗܝ ܝܠܗ̇:
܀ ܗܘܐ ܦܘܠܝܛܝܩܝ ܓܘܝܐ ܕܫܘܠܛܢܐ ܦܘܠܝܛܝܩܝ ܟܐܢܐ ܠܐ ܗܘܐ ܓܢܝܐ ܠܓܢ݇ܒܐ ܦܘܠܝܛܝܩܝܐ ܐܘ ܬܘܕܝܬܢܝܐ ܐܘ ܫܒ݂ܛܝܐ ܘܐܗܐ ܠܐ ܦܐܫ ܫܘܪܪܐ ܐܢ ܠܐ ܛܠܒܠܗ ܥܝܪܩ ܥܘܕܪܢܐ ܕܐܡܘܬ̈ܐ ܡܚܝܕ̈ܐ ܓܘ ܫܘܐܠܐ ܕܦܠܓܼܬܐ ܕܫܘܠܛܢܐ ܢܡܘܣܝܐ ܘܡܫܡܠܢܝܐ ܘܒܝܬ݂ ܕܝܢܐ ܫܪܝܐ ܘܥܠ ܒܝܬܘܬܐ ܕܪܘܟܒ݂ܐ ܟܢܘܫܝܝܐ ܕܥܝܪܩ.
܀ ܗܘܐ ܦܠܚܢܐ ܕܓܒ̈ܐ ܠܒܘܬ݂ ܩܢܘܢܐ ܕܚܐܪܘܬܐ ܕܪܢܝܐ ܘܡܡܠܐ ܐܝܢܝ ܕܟܐ ܦܐܫ ܫܩܝܠܐ ܚܝܠܗ ܡ̣ܢ ܐܫܛܪ̈ܐ ܕܐܡܘܬ̈ܐ ܡܚܝܕ̈ܐ ܘܦܘܣܩܢ̈ܗ ܓܘ ܐܛܪܐ ܕܫܝܢܐ ܐܬܪܝܐ ܕܥܝܪܩ.
܀ ܠܐ ܫܩܠܐ ܥܝܪܩ ܠܓܢܗ̇ ܚܕ ܓܘܢܐ ܬܘܕܝܬܢܝܐ ܐܘ ܫܘܛܝܐ ܐܝܢܐ ܗܘܐ ܓܘܢܗ̇ ܟܢܘܫܝܝܐ ܡܕܝܢܝܐ ܘܫܩܠ ܥܡ ܟܠ ܒܪܢܫܐ ܠܦܘܬ݂ ܝܗܒ݂ܠܬܗ ܘܡܨܝܬܗ ܘܡܝܩܪܬܐ ܕܟܠܝܗܝ ܙܕܩ̈ܗ ܡܕܝܢܝ̈ܐ ܘܚܐܪܘܬܐ ܕܪܢܝܐ ܘܪܥܝܢܐ ܘܗܝܡܢܘܬܐ ܘܕܠܐ ܦܘܪܫܘܢܝܐ ܒܝܢܬ݂ ܦܪ̈ܨܘܦܐ ܘܗܘܝܐ ܣܦܩܘܬ݂ܐ ܥܩܪܐ ܕܦܠܚܢܐ ܠܐ ܓܒܝܘܬܐ ܘܫܒ݂ܛܝܘܬܐ ܐܘ ܐ݇ܚܝܢܘܬܐ ܘܩܘܪܒܝܘܬܐ.
܀ ܦܘܠܝܛܝܩܝ ܒܪܝܐ ܗܘܐ ܬܩܝܠܐ ܘܓܫܩ ܒܕܪܓܼܐ ܩܕܡܝܐ ܗܢܝܢܐ ܐܘ ܝܘܬܪܢܐ ܐܬܪܝܐ ܘܕܗܘܐ ܐܗܐ ܝܘܬܪܢܐ ܐܬܪܝܐ ܒܢܝܐ ܥܠ ܝܘܬܪ̈ܢܐ ܡܫܘܬܦܐ ܘܡܝܩܪܬܐ ܡܫܬܘܦܬܐ ܥܡ ܟܠܝܗܝ ܐܬܪ̈ܘܬܐ. ܘܠܐ ܗܘܐ ܐܗܐ ܝܘܬܪܢܐ ܡܫܘܬܦܐ ܒܢܝܐ ܥܠ ܦܘܠܝܛܝܩܝ ܕܬܘܕܝܬܐ ܐܘ ܫܒ݂ܛܐ ܐܘ ܕܚܕܐ ܩܘܒܘܚܬܐ ܐܘ ܚܕܐ ܟܢܘܫܬܐ.
܀ ܝܗܒ݂ܠܬܐ ܕܐܠܨܝܘܬܐ ܩܐ ܬܘܪ̈ܨܐ ܟܢܘܫܝܝ̈ܐ ܘܡܠܝܬܐ ܠܣܢܝܩܘܬ̈ܐ ܕܟܢܘܫܝܐ ܐܝܟܼ ܫܘܠܐ، ܒܛܝܠܘܬ݂ܐ، ܡܫܘܬܒ݂ܘܬ݂ܐ ، ܝܘܠܦܢܐ ܘܨܚܘܬܐ ܘܐܚܪ̈ܢܐ ܡܢ ܓܢ݇ܒܢ̈ܐ ܕܠܝܬ ܠܗܘܢ ܐܣܘܪܐ ܒܛܟ݂ܣܐ ܟܢܘܫܝܝܐ ܓܡܝܪܐ ܕܟܐ ܢܛܪ ܠܙܕܩ̈ܐ ܕܟܠܝܗܝ ܦܪ̈ܨܘܦܗ ܕܠܐ ܦܘܪܫܘܢܝܐ.
܀ ܡܫܬܐܠܢܘܬܐ ܕܫܘܠܛܢܐ ܝܠܗ̇ ܦܪܥܬܐ ܕܛܪ̈ܝܕܐ ܘ ܡܫܚܛ̈ܐ ܡ̣ܢ ܡܘܨܠ ܘܡܕܝܢܬ̈ܐ ܐ݇ܚܪ̈ܢܐ ܡ̣ܢ ܒܢ̈ܝ ܐܘܡܬܢ ܠܐܩܠܝܡܐ ܕܟܘܪܕܣܬܢ ܘܡܫܟܢܬܝܗܝ ܘܡܫܟ̰ܚܬܐ ܦܘܪ̈ܣܐ ܕܫܘܠܢ̈ܐ ܩܬܝܗܝ ܕܡܨܝ ܚܝܝ ܓܘ ܫܝܢܐ ܘܚܘܡܣܢܐ ܓܘ ܐܬܪ̈ܝܗܝ.
܀ ܘܠܝܬܐ ܕܫܘܠܛܢܐ ܥܝܪܩܝܐ ܦ̮ܕܪܠܝܐ ܘܩܠܝܡܐ ܕܟܘܪܕܣܬܢ ܘܩܝܘܡ̈ܐ ܕܒܢ̈ܝ ܐܘܡܬܢ ܓܘ ܦܪܠܡܢ ܕܫܘܠܛܢܐ ܦ̮ܝܕܪܠܝܐ ܘܕܩܠܝܡܐ ܕܟܘܪܕܣܬܢ ܒܫܬܐܣܬܐ ܕܚܕܐ ܣܝܥܐ ܥܪܨܝܬܐ ܡܛܠ ܫܪܝܬܐ ܕܟܠܝܗܝ ܥܣܩܘܝܬ̈ܐ ܕܚܝܘܬܐ ܕܛܪ̈ܝܕܐ ܘܡܫܚܛ̈ܐ ܠܣܘܪܝܐ، ܐܘܪܕܢ، ܬܘܪܟܝܐ ܘܐܝܪܢ ܘܥܕܪܢܬܝܗܝ ܡܛܠ ܕܥܪܬܝܗܝ ܠܐܬܪܝܗܝ ܘܡܫܟܢܬܝܗܝ ܓܘ ܦܢܝܬ݂̈ܐ ܕܐܝܬ ܫܝܢܐ ܒܝܢܬ ܐ݇ܚܝܢܝܗܝ ܘܡܦܪܝܬܐ ܕܟܠܝܗܝ ܣܢܝܩܘܬ݂̈ܐ ܕܚܕ ܒܪܢܫܐ ܕܡܨܐ ܚܝ̈ܐ ܒܫܝܢܐ ܘܫܠܡܐ ܘܚܐܪܘܬܐ.
܀ ܦܠܚܬܐ ܥܠ ܣܝܡܬܐ ܕܩܢܘܢ̈ܐ ܕܡܕܥܪܬܐ ܕܡܫܚܛ̈ܐ ܡ̣ܢ ܫܢ݇ܬܐ 1931 ܒܥܠܬܐ ܕܓܕܫ̈ܐ ܡܫܚܠܦ̈ܐ ܥܠ ܒܢ̈ܝ ܐܘܡܬܢ ܘܦܪܥܬܐ ܠܟܠ ܚܘܣܪܢܐ ܡ̣ܢ ܡܘܠܟܢ̈ܐ ܘܒܬ̈ܐ ܘܡܫܟܢܬܝܗܝ ܓܘ ܦܢܝܬܝܗܝ ܘܡܦܪܝܬܐ ܕܟܠܝܗܝ ܣܢܝܩܘܬ̈ܐ ܕܚܝܘܬܐ ܐܝܟܼ ܫܘܠܢ̈ܐ، ܡܕܪ̈ܫܝܬܐ..ܘܫܪ.
