المحرر موضوع: محاولة قتلي واغتيالي اليوم ... والله سترني والحمد لله (زيارة 8295 مرات)

DR.ENG · « **في:** 22:53 14/06/2013 »

السلام عليكم شببباب

اني قبل كم يوم نورني احد اصدقائي بوجود هيج منتدى واشتركت بيه وللاسف ملحكت اتشارك وياكم بفعاليه كبيره لاسباب كثيره خاصه ... ويؤسفني انه انقل الكم ما صار ويايه اليوم

قامت احدى القوات الارهابيه بمداهمه بيتي والسبيل منه اعتقد انه يلكوني ولكن الحمد لله البيت كان فارغ بس للاسف كنت جدا قريب يعني بنفس المنطقة وما ادري اصلا حاليا طابين ب بيتي فدا اتمشى بالمنطقة وما اشوف الا سياره بيكم نفارا جايه سريع باتجاهي و واحد ملثم وطالع من السياره وبده يرمي عليه بصراحه اني ابدا متوقعت انه جاي عليه وكل اللي كدرت اسوي انه اركض بشكل عشوائي ومو بخط مستقيم والحمد لله لكيت باب بيت مفتوح لكيت بابه مفتوحه ويصيوحولي تعال طب جوه

وطبيت وطلعو ولد المنطقة ع السياره وراهم ولكن للاسف ملحكو بيهم ... ظليت صافن وراها بدقائق اجاني تلفون من جيراني انه داهمو بيتي وفلشو غراض بيتي جماعه يكولون همه عدهم القاء قبض وجايين بسياره خصوصي ... اني ذبيت التلفون وظليت صافن شنو اسوي ... والله ماكو شي يتحرك بيه بس عيوني تتحرك وحسيت الم بكتفي الايسر مصاير ... لكن الحمد لله حالتي تحسنت وما اشوف اله جيراني الي طبيت ختلت عنده كللي كوم نسوي بلاغ بالشرطة ... وسوينه البلاغ وانطوني ورقة وطلعت ويايه مفرزه سوو كشف ع بيتي ورجعت لهناك واخذو اقوالي واقوال الشهود ... وانطوني ورقة بيه البلاغ مالتي

اني بس احمد ربي واشكره انه ماكو احد كان بالبيت عائلتي سفرتهم لبيت اهل زوجتي خارج بغداد بسبب الاوضاع الامنيه

الحمد لله والشكر على كل حال ... والله ما اعرف المن اسولف غيركم ... ما اعرف المن اشكي والمشتكى لله

شباب اني عندي مقابلة محلفين بعد كم يوم ... تتوقعون انه الورقة مال البلاغ اللي انطونياها الشرطة راح تنفعني وتسرع من سفري لو قدمتها الهم ... لو لا ؟؟

ما اعرف حاليا تفكيري جدا مشتت وما اعرف شنو اكتب

تحياتي لكم يا اعضاء منتدى عين كاوه الطيبين

تحياتي الكم

ابو محمد

حزيران · « **رد #1 في:** 23:06 14/06/2013 »

الف الف الحمد الله على سلامتك اخي...يارب متشوفون شر لا انت ولا اهلك...

اخي انت هسة بامان والحمد لله فهدأ اعصابك وارتاح ...الله الحافظ والستار...

اخي خابر باجر الهجرة وبلغهم باللي صار حتى لو كانوا معطيك موعد محلفين واكيد الورقه اتفيدك ولازم تشرحلهم شنو اللي صار وهسه يسالوك منو تتوقع وليش انت ومنهالحجي.

يارب احفظ العراق والعراقيين بحق محمد وآل محمد...

اختك حزيران

ahmed k falah · « **رد #2 في:** 23:07 14/06/2013 »

اول شي الحمد لله على سلامتك اخي . ثانياُ انت وين في بغداد لو لا . اذا في بغداد حاول تغير مكانك بسرع وقت ممكن . للحفاظ على سلامتك وسلامة عائلتك والاوراق مال البلاغ لازم تقدمها للمحلف وتكلة اني مهدد واذا تكدر اخذ صور للبيت والاظرار الي سوها بالبيت . وياربي الله يستر عليك وعلى الجميع

ابو سماني · « **رد #3 في:** 23:08 14/06/2013 »

حــمد لله على الســــــــــلامــة

أول عــمل تقــوم بيــه أنســى بيــتـك والمــنطـقة

الصور والبلاغ يضمنلك الموافقة ولكــن تسريع الســفر

لا أعــتقد

مكــانك الجــديد لا صــديق ولا قريب أدليه عليه

ابـو ســماني

كوستاف · « **رد #4 في:** 23:13 14/06/2013 »

الحمد لله على سلامتك اخي و اتمنى لك السلامه و الامان

حاول متروح مناطق خطرة ولو هيه بغداد كلهه خطرة بس حاول تجنب المناطق الاخطر في بغداد

و لو اتحاول اتروح لأربيل او لسليمانيه بعد افضل و الورقه الي نطوكياها الشرطه راويهه للمحلفين و رح اتفيدك و طبعا يفضل انه اتخابرهم و اتبلغهم بالموضوع

انشالله السلامه

تحياتي

أبو أياد · « **رد #5 في:** 23:14 14/06/2013 »

الف الحمد لله على سلامتك ربي يحفظك انت وعائلتك من كيد الغادرين .

غير محل سكنك ودز رسالة للمنظمة مرفقة بالاثباتات وانشاء الله عاقتها خير مادام الله سلمك وحفظك

تحياتي

** AL SHAEEA ** · « **رد #6 في:** 23:17 14/06/2013 »

الحمد لله على سلامتك اخي والله يحفظكم من كل مكروه

warda laith · « **رد #7 في:** 23:19 14/06/2013 »

الحمد لله على سلامتكم اخي العزيز ... دفع الله ما كان اعظم ... اخي الغالي حاول تغير مكان سكنك بأقرب وقت ولا تفكر ترجع للبيت ابد ... ومثل ما گالوا الاخوان حاول تتصل بالمنظمة وتشرحلهم وضعيتك والي صار معاك وترسللهم ايميل يتضمن كل الوثائق ومحظر الشرطة وصور البيت وشهادة الجيران ... وأخذ نسخ من هذه الوثائق معك عند مقابلة المحلف واشرحلة الوضعية ... ربي يحفظكم ويخليكم ان شاء الله ..

ترتيل · « **رد #8 في:** 23:41 14/06/2013 »

الف حمد الله على سلامه الله يبعد عنك كل مكروه وسوء وان شالله سفرك باقرب وقت يصير وربي يحفظكم اربي يبعد عنكم كل بلاء امين رب العالمين

لورنس السفاح · « **رد #9 في:** 23:54 14/06/2013 »

الف الحمدلله ع السلامة

احمدمالك · « **رد #10 في:** 00:05 15/06/2013 »

الف الف الف الحمدالله على السلامهانشاء الله ما اشوف مكروه

احمد

DR.ENG · « **رد #11 في:** 00:12 15/06/2013 »

مقتبس من: حزيران في 23:06 14/06/2013

الف الف الحمد الله على سلامتك اخي...يارب متشوفون شر لا انت ولا اهلك...

اخي انت هسة بامان والحمد لله فهدأ اعصابك وارتاح ...الله الحافظ والستار...

اخي خابر باجر الهجرة وبلغهم باللي صار حتى لو كانوا معطيك موعد محلفين واكيد الورقه اتفيدك ولازم تشرحلهم شنو اللي صار وهسه يسالوك منو تتوقع وليش انت ومنهالحجي.

يارب احفظ العراق والعراقيين بحق محمد وآل محمد...

اختك حزيران

الله يسلمك اخي ... اني دزيت هسه الابلاغ للمنظمه وشرحت الهم اللي صار بالضبط واكدت الهم انه راح اكون موجود بموعد مقابلة المحلفين ... اشكرك من كل قلبي ... ربي يوفقك ويخليك

سرب الطيور · « **رد #12 في:** 00:13 15/06/2013 »

الحمد لله على سلامتكم اخوية
ربي يحفظكم ويدفع عنكم البلاء والقضاء ويسهل امركم عن قريب بجاه رب العالمين
اختكم سرب الطيور

ام اديان · « **رد #13 في:** 00:14 15/06/2013 »

الف الحمد لله على السلامة .الله يحفظكم من كل شر

DR.ENG · « **رد #14 في:** 00:29 15/06/2013 »

مقتبس من: ahmed k falah في 23:07 14/06/2013

اول شي الحمد لله على سلامتك اخي . ثانياُ انت وين في بغداد لو لا . اذا في بغداد حاول تغير مكانك بسرع وقت ممكن . للحفاظ على سلامتك وسلامة عائلتك والاوراق مال البلاغ لازم تقدمها للمحلف وتكلة اني مهدد واذا تكدر اخذ صور للبيت والاظرار الي سوها بالبيت . وياربي الله يستر عليك وعلى الجميع

اشكرك على نصيحتك اخي وما اعرف اذا راح اكدر اوصل للبيت واخذ صور للبيت ... الله يعلم بحالي حالياً لحد الان الرجفه بيه والضغط مدينزل ... اشكرك على تنويهي ربي يسلمك ويخليك لاهلك

ابو هفال · « **رد #15 في:** 00:43 15/06/2013 »

الحمدلله على سلامتك
اكيد لازم تقدم هذا ورقة
وتشرح الي صار معاك

الله يكون بعونك

DR.ENG · « **رد #16 في:** 00:52 15/06/2013 »

مقتبس من: ابو سماني في 23:08 14/06/2013

حــمد لله على الســــــــــلامــة

أول عــمل تقــوم بيــه أنســى بيــتـك والمــنطـقة

الصور والبلاغ يضمنلك الموافقة ولكــن تسريع الســفر

مكــانك الجــديد لا صــديق ولا قريب أدليه عليه

لا أعــتقد

ابـو ســماني

تسلملي اخويه ابو سماني ... ربي يسلمك ويخليك وفعلا راح اكعد بمكان محد يدري بيه لحد ما الله يفرجها... ممنون منك وربي يسلمك ويخليك

السامووراااي · « **رد #17 في:** 00:53 15/06/2013 »

الحمد لله على سلامتك وسلامة اهلك حاول تصور البيت وتاخذ نسخة بلاغ الشرطة واذا متكدر تصور البيت خلي اي واحد من جماعتك يصوره ويدزه الك بايميل وخلي بالك شي اول سؤال حيسألوه الك بالمقابلة هو منو تعتقد الجهة الي اعتدت عليك وحاولت قتلك وليش تعتقد انو هيه هاي الجهة ؟؟؟ فكون حذر بالاجابة

تحياتي الك وتقبل مروري البسيط

DR.ENG · « **رد #18 في:** 00:54 15/06/2013 »

مقتبس من: كوستاف في 23:13 14/06/2013

الحمد لله على سلامتك اخي و اتمنى لك السلامه و الامان

حاول متروح مناطق خطرة ولو هيه بغداد كلهه خطرة بس حاول تجنب المناطق الاخطر في بغداد

و لو اتحاول اتروح لأربيل او لسليمانيه بعد افضل و الورقه الي نطوكياها الشرطه راويهه للمحلفين و رح اتفيدك و طبعا يفضل انه اتخابرهم و اتبلغهم بالموضوع

انشالله السلامه

تحياتي

تسلملي اخويه ... وهو هذا اللي راح اسوي حروح يم اقاربي بكردستان ... اشكرك اخي

برنسو · « **رد #19 في:** 00:55 15/06/2013 »

الف الحمد لله على سلامتك ... ربي يحفظك من كل شررر
اخوية العزيز حاول تغير مكان سكنك او التحق بافراد عائلتك واترك بغداد, امّن على نفسك لحد ما الله يفرجهه وتسااافر
وبالنسبة لموضوع المقابلة اكيد يفيدك هذا البلاغ اخذه وياك للمقابلة.
اتمنالك الموفقية والسلامة

تحياتي ..... برنسو

السامووراااي · « **رد #20 في:** 00:56 15/06/2013 »

مو كلنالك لاتكول لاحد وين حتروح راسا كتيتها وكلت كردستان ههههههههههه الحمد لله على سلامتك مرة ثانية والله يحرسك

DR.ENG · « **رد #21 في:** 01:12 15/06/2013 »

تسلمولي جميعا شبااااااااااااااب ... اشكركم من كل قلبي ومساندتكم الله ... هذا دليل على انه فعلا هذا المنتدى منتدى يجمع ناس طيبة انتو قدوتها ...

اشكر الجميع بدون اي استثناء

تحياتي الكم

ابو محمد

kunda · « **رد #22 في:** 01:51 15/06/2013 »

سلامات ... وماعندك الاالعافية دير بالك على نفسك اخي .

عراقي هواي · « **رد #23 في:** 02:08 15/06/2013 »

الله الستار عمي ابو محمد والحمدلله عالسلامه

كما ذكروا الاخوان اهم شيئ تحافظ على سلامتك واذا كدرت تحصل صور للبيت ونسخه من التحقيق حاول تحصل نسخه من التحقيق باي شكل راح يفيدك كثير افضل من البلاغ وانشالله السلامه والستر

thaeer · « **رد #24 في:** 08:51 15/06/2013 »

الف الحمد لله عالسلامه وربي يحفضكم من كل شر ....اخي بالتأكيد يفيدك انه تراسلهم وايضا تحجي كلشي للمحلف ...ويارب يسهل امرك ويحفضكم من كل شر

انستاسيا رومانوف · « **رد #25 في:** 10:12 15/06/2013 »

الف الحمد لله على سلامتكم اخونه ابو محمد الله خير حافظا وهو ارحم الراحمين اذا تكدر اذبح ذبيحة وفرقها لوجه الله عنك وعن اهلك وحسب امكانيتك للفقراء .او ادفع صدقه حتى يذهب الروع منك ويطمئن قلبك بها

والى الله ترجع الامور

Refugee · « **رد #26 في:** 10:29 15/06/2013 »

اخي العزيز الحمد لله على سلامتك والله يحميك ويحفضك من كل شر
هذوله مالهم غير الله سبحانه وتعالى هو الكفيل بيهم وانا لله وانا اليه راجعون
كل اللي ذكروا الاخوة المشاركين الاعزاء صحيح ومهم ان تعمل بيه واهم شي حاول ان تغير مكانك يعني المنطقه واكيد عندك واحد تثق بيه
وتخليه يصورلك كل اللي صار بالبيت لانه يفيدك بالمقابله.
سلامات والف الحمد لله على السلامه مرة اخرى
وانشاء الله السفر القريب

اخوك REFGEE[/glow][/siz[/color]e]

ابن الحله · « **رد #27 في:** 10:42 15/06/2013 »

الف الف الحمد الله على سلامتك اخي...يارب متشوفون شر لا انت ولا اهلك...

سبيس · « **رد #28 في:** 10:48 15/06/2013 »

الله وياك اخويه

الله ما راح يعيفك

ابو الوليد

DR.ENG · « **رد #29 في:** 10:52 15/06/2013 »

تسلمولي شباب ربي يسلمكم

فعلا منتدى يجمع ناس طيبه

تحياتي لكم يا اخواني

تحياتي وشكري واعتزازي للجميع

اخوكم ابو محمد

*Ray · « **رد #30 في:** 10:56 15/06/2013 »

الحمد لله ع سلامتك ربي يحفظك ويسهل امرك

اختك راي / تركيا

Awsaws · « **رد #31 في:** 10:59 15/06/2013 »

الف الحمد لله على سلامتك العيار يلي ما يصيب المفروض يقويك يعني المفروض يخليك تاخذ حذرك وتحسب حساب الكل خطوه والله المستعان

كلــــــــــــوري المحبة · « **رد #32 في:** 11:01 15/06/2013 »

الحمد الله على سلامتك اخي انشاء الله متشوف اى شر بحياتك والله نقذك وحماك .... بلدنا صار صعب العيشة بي نخاف من ظلنا مع الاسف والله

alzandawi · « **رد #33 في:** 11:41 15/06/2013 »

الحمد لله على سلامتك اخويه وان شاء الله متشوف شر وحاول تطلع باسرع وقت حتى ترتاح وضغطك ينزل تفرج متبقى هيجي ان شاء الله

عديل الروح · « **رد #34 في:** 12:54 15/06/2013 »

الحمدلله على سلامتك اخي اخذ وياك نسخه من التحقيق واخذ صور للبيت وارسلهن بالايميل قبل لتروح وانطيهن للمحلف وانشاءالله السفر قريب هيج حالات موثقه متتأخر

نمر جريح · « **رد #35 في:** 13:04 15/06/2013 »

أخي العزيز ابو محمد الحمد لله على سلامتك والف رحمه لوالدين اهل البيت الي كالولك تعال ادخل عدنا وبارك الله بالشباب اهل الفزعه والله يحفظك ويحفظ اهلك وكل شريف لا ويكولون ماكو شي بالعراق المن تسافرون اللهم يفرج عنا وعنكم وعن كل من ينتظر السفر هذا والحمد لله رب العالمين والصلاة والسلام على سيدنا محمد وعلى اله وصحبه وسلم / أخوك النمر الجريح ......

firas baghdadi · « **رد #36 في:** 13:18 15/06/2013 »

الف سلامة عليك

استغفر الله.

الله يخليك افلت لتبقى في بغداد . اشتري حياتك حبيبي . ولتحسب اي ماديات مطلوبة. حتى لو تنام بالشارع بكردستان هم اقلها تدري بروحك رح تكعد الصبح حي إلا ما شاء ربي.
استغفر واتوب اليه
اما بخصوص فائدة ابلاغ المنظمة بالتهديد. فا أكلك حبيبي اني هم جاني تهديد جديد و لم ابلغ بصراحة . لأن اعرف رح يخابروني يشوفوني عايش لو لا و يشتغل تحقيق بالتلفون وياية على موضوع التهديد وتفاصيله وهاهية حسب مفتهمت من كثير من الاعضاء .واني روحي طافرة ومابية حيل حتى احجي . بس هاي مشكلتي الشخصية. انت بلغهم طبعأ تفيدك ان شاء الله خصوصأ وانه انت بعدك ممقابل محلفين. اني داحجي عن اللي مقابلين محلفين مثلي.

اسم الله عليك وعلى الجميع يارب. اني من سمعت انه بالامكان لورثة المتوفي المقدم على اللجوء الاستمرار بطلب الجوء. مكمت ادير بال لحياتي. طز
وين متوصل خلتوصل. المهم اني وصيتي لعائلتي اذا متت بالمطالبة بتسفيرهم باسرع وقت والطلب من المنظمة ان تفي بالتزماتها تجاهي.
الله يكون بعونك يارب .
ويارب يحفظ الجميع

espero · « **رد #37 في:** 13:22 15/06/2013 »

الف الحمد لله على سلامتك وفدوه الغراض

اكيد بلاغ الشرطه راح يفيدك
الله يسهل امرك ويحفظك

محمد تميم · « **رد #38 في:** 13:48 15/06/2013 »

اخي العزيز
حمدا لله على سلامتك وانت حسب ماذكرت ان الحادث حصل اليوم واليوم قد قدمت بلاغ للشرطه واليوم خرجت مفرزه للكشف وتكتب لنا اليوم الله يعينك ويقوي معنوياتك وربي يحفظك تحياتي لك

DR.ENG · « **رد #39 في:** 14:14 15/06/2013 »

ما اعرف الكلمات المناسبه اللي لازم اشكركم بيها واعبرلكم عن امتناني لكم

والله ظليت صافن على كل اللي علقو

صحيح ما تجمعني بيكم عشره ومتعرفوني بس فعلا التمست بيكم الطيبه

حبيت ابلغكم انه اني الان في مكان آمن والحمد لله

ربي يحفظكم ويخليكم لأهلكم ويسهلك امور السفر وتسافرون وتخلصون من هذا البلد اللي صار ميريد ابنائه

للاسف العراق هيج صار

اني راسلت المنظمه وارسلت الهم النسخه من التبليغ اللي اصبحت مصدقه منمحكمة القضاء اللي تابعه لمنطقتنه مع ترتيش القاضي على البلاغ

اشكرك يا ناسي الطيبين واعتقد الفتره الجايه راح تظلون انتو اصدقائي الوحيدين لان قررت اختفي من العالم اللي بالشارع لان غلطة الشاطر بألف

تحياتي لكميا طيبين واصل الطيب

تقبلو امتناني لحضراتكم

اخوكم ابو محمد

الرجل العراقي · « **رد #40 في:** 17:42 15/06/2013 »

اخوية اول شي الحمد لله على سلامتك وثاني شي ديربالك على نفسك حتى اقاربك من اتروحلهم لا اتكول لاي احد بمكانك ولا تطلع منا منا لحد ما تقابل محلف واتصور بعده الافضل تطلع من بغداد نهائيا اخوك الرجل العراقي

DR.ENG · « **رد #41 في:** 17:55 15/06/2013 »

مقتبس من: الرجل العراقي في 17:42 15/06/2013

اخوية اول شي الحمد لله على سلامتك وثاني شي ديربالك على نفسك حتى اقاربك من اتروحلهم لا اتكول لاي احد بمكانك ولا تطلع منا منا لحد ما تقابل محلف واتصور بعده الافضل تطلع من بغداد نهائيا اخوك الرجل العراقي

اشكرك اخي الله يسلمك ويخليك

اشكرك ع النصيحه يا طيب

Sound of Soul · « **رد #42 في:** 17:57 15/06/2013 »

الحمد لله على سلامتكم
بالنسبة للمحلف اي اثبات مادي يدعم قضيتك يكون افضل طبعا
صور محاظر شرطة اي اوراق رسمية تثبت قصتك يعني
بالتوفيق
تحياتي

شايلوك · « **رد #43 في:** 18:10 15/06/2013 »

اخي حمدله على السلامه واهم شي دير بالك من الشرطه تره همه حاميه حراميه وخيرهم ميعرف منو امه منو ابوه

ام راما · « **رد #44 في:** 20:06 15/06/2013 »

الف حمد الله على سلامتك اخويا

واكيد اي اثبات عندك راح يفيدك بمقابلة المحلف

الله يحميك ويحفظك ويفرجها عليك

اختك ام راما
سوريا

الخفاجي · « **رد #45 في:** 22:06 15/06/2013 »

الحمد لله على سلامتك وانتبه بالمستقبل الله يسترك من اولاد الحرام الذين يريدون بالعراق واهله شرا وقنا الله شرهم امين اللهم احفظ العراق وشعبه00اخوك محمد الخفاجي00جرمانا

Nooraldeen Mustfa · « **رد #46 في:** 23:43 15/06/2013 »

الحمد لله على سلامتك اخي العزيز ... سلامتك وسلامة الاهل بالدنيا.
الرجاء ان تغير سكنك فورا وتنتقل الى منطقة اخرى.. احسب حساب بعض الاصدقاء والمعارف ليسوا اهلا للثقة او انهم قد يلحقون بك ضررا من غير قصد... ابتعد عن الجميع وضع ثقتك في قلة قليلة انت محتاج للتواصل معهم ..
بلاغ الشرطة سوق يرفع من احتمالات موافقة المحلف باذن الله.. ويبقى التسريع مثلما قال الاخ الكبير ابو سماني غير قابل للتوقع.
دعائنا الى الله ان يحفظك ويحميك والعائلة الكريمة.

نور الدين

DR.ENG · « **رد #47 في:** 00:04 16/06/2013 »

مقتبس من: Nooraldeen Mustfa في 23:43 15/06/2013

الحمد لله على سلامتك اخي العزيز ... سلامتك وسلامة الاهل بالدنيا.
الرجاء ان تغير سكنك فورا وتنتقل الى منطقة اخرى.. احسب حساب بعض الاصدقاء والمعارف ليسوا اهلا للثقة او انهم قد يلحقون بك ضررا من غير قصد... ابتعد عن الجميع وضع ثقتك في قلة قليلة انت محتاج للتواصل معهم ..
بلاغ الشرطة سوق يرفع من احتمالات موافقة المحلف باذن الله.. ويبقى التسريع مثلما قال الاخ الكبير ابو سماني غير قابل للتوقع.
دعائنا الى الله ان يحفظك ويحميك والعائلة الكريمة.

نور الدين

تسلملي اخويه نور الدين ... الله يسلمك ويخليك ... وفعلا الاخوان هنا ما قصرو ويايه ونوروني على الطريق الصحيح ربي يبارك بيك وبيهم

تحياتي للجميع

ابو محمد

sparky · « **رد #48 في:** 08:55 16/06/2013 »

الحمد لله على السلامه ولاتنسى صلاة الحمد والثناء لله على سلامتكم
تقريك للحادث سيصب في مصلحة قضيتك والله اعلم

Baghdad Engineer · « **رد #49 في:** 13:12 16/06/2013 »

الحمد لله عالسلامه يستر عليك و على عائلتك و على كل امه محمد.

ماكو امان بعد بالعراق

كاكاشي · « **رد #50 في:** 13:24 16/06/2013 »

الحمد لله على سلامتك اخويه العزيز , اني برأيي والورقه مال الشرطه تفيدك بشكل مو طبيعي لذالك ان شاء الله رح ايسرعون معاملتك

كاكاشي

DR.ENG · « **رد #51 في:** 13:44 16/06/2013 »

مقتبس من: كاكاشي في 13:24 16/06/2013

الحمد لله على سلامتك اخويه العزيز , اني برأيي والورقه مال الشرطه تفيدك بشكل مو طبيعي لذالك ان شاء الله رح ايسرعون معاملتك

كاكاشي

الله يسلمك ويخليك اخي والله يبشرك بالخير وهذا اللي اتمناه لان الله يعلم بحالتي

شكري وامتناني لجميع الاخوان اللي تركو تعليقات بدن استثناء

تحياتي لكم

اخوكم ابو محمد

علي عامر · « **رد #52 في:** 17:20 16/06/2013 »

اخوية الحمد لله على سلامتك ودير بالك على نفسك وهذا حاليا اهم شي والباقي كله فدوة الك

صقر 11 · « **رد #53 في:** 23:23 16/06/2013 »

الحمد لله على سلامتك اخوية ابو محمد هو الاجرام بدمهم و هيجي بشر ما يستحقون الحياة الحمد لله على سلامتك ونصيحة اخوية لتوصل للمنطقة وانساها وكول حسبي الله ونعم الوكيل

DR.ENG · « **رد #54 في:** 01:43 17/06/2013 »

ربي يسلمكم ويخليكم يا طيبين ... والحسبي الله ونعم الوكيل ما وكفت اكولها لحد هايه اللحظه

تحياتي لكم

اخوكم

ابو محمد

الأخبار:

المحرر موضوع: محاولة قتلي واغتيالي اليوم ... والله سترني والحمد لله (زيارة 8295 مرات)