ِوتدفع المقسوم للمرحوم
هذا امتحان يا عطشان
توفيق سعيد هذا استحقاقك..رتّب أوراقك وخليها بحافظة زرقاء بلون البحر والسماء،وراجع حساباتك مع مديرك المالي..السابق والحالي واللي جرالك واللي جرالي ، وعيد النظر بما حصل وازرع بأرضك العطر والريحان والأمل لا تزرع الثوم والبصل ..أما الجروح النازفة من أعماقك لونت بالدم أوراقك ، وانت بطريقك للشفاء يا مجنون بهذا المساء ..لا تستاء..
كيف يتغلب الشر على الخير ويموت في عشه الطير..ليش نحمل تبعات أخطائنا للغير، ونضحك على أنفوسنا ونضيع ما بنيناه بفلوسنا ..ليش لمن يبتسم الحظ للإنسان ينسى البر والإحسان، وينسى يصون نفسه واللسان. ولما يشوف إلي يريده واللي يحبه ويفيده ويضمه بصدره ويعليّ من قدره..يدوس العشرة مثل المهرة لما تدير ظهرها لفارسها توقع والباقي ترفسها..
راح تتاح إلك فرصة استغلها يا بطران وحق نعمة النسيان . وقد يدّخل القدر ويأخذك الى آفاق جديدة،ويجوز تصير رئيس تحرير مجلة أو جريدة،وتطل على حياة رائعة وسهلة، بس أعطيني مهلة..وإذا ازدادت بيك الحماسة وتريد العودة الى مقاعد الدراسة ،بدل عملك ولا تحتار بس أأمر وأنت اختار وأنت تدري إن الدنيا اليوم تمشي بعكس التيار ولاتاخذ قراراتك بسرعة هذه الأيام وفسر بالصح الأحلام مو الأوهام .وقول ليش ما نعيش بجدية ويكون إلنا هوية ووطن يحمينا من الهموم والمحن ..ونعيش زين،ونعطي لروحنا حلة جديدة فرحانة وسعيدة،ونطورها ..ونقدرها،ونفرح بيها وبمستقبلها وبحاضرها وبماضيها ،وما نرجع نعيش مع القمامة ونقول لأهلنا الطيبين مع السلامة ..هذا شي جداً صعب ما يتقبله صدر رحب يا محب..
راح تواجه مواليدك أزمة مهنية،فتأكد قبل كل شي ان تجدد الهوية ولطفا لاتبحث عن هدية، وتدفع المقسوم للمرحوم..حتى ترجع لعملك وبنجاح ،لاتخلط بين الحجر والتفاح..وحتى تكون في بر الامان اصدق مع روحك يا إنسان ..
قد تتأثر بالخسوف الحاصل في برج العذراء في الشتاء وتصير حليف لبرج الجوزاء ولآدم ..ولحواء..ستكلف في مهمة غريبة عجيبة..وراح تساعدك إحدى النساء حتى تجفف دموعك من البكاء.
وإحنا نقول ان العالم يسير بخير يامن تبحث عن لاشئ عند الغير ..ولما تشوف الواقع المريح ..ونقول العكس صحيح مو..يا واسع يا جنه يا فسيح..هو الأنسان يتعب روحه بأيده ..ويبحث عن ملاذ ويقول يا ريت عندي قطعة من الفولاذ حتى أعيش بسلام واكدر ارتاح وأنام ..واخلي روحي بعيد من جديد..
ويأتي اليوم اللي تسألني شلون أصير من فقير الى أمير وأنا صغير ..يا كبير ،وهذه حالة من الأحوال ..وهذا امتحان يا عطشان يا ريان أمامك خيارات صعبة وأنت بالنهاية جننت البرج المجنون يا ملعون وتصورت نفسك تنين ..مع الأسف يا مسكين...
