܀ ܫܩܘܼܠܗ̄ܘ̇ܢ ܝܘܼܬܼܪܵܢܵܐ ܡܢ̄ ܙܲܒܘܼܢܘܼܬܼܝܼ ܀
ܐܸܢ ܒܵܥܹܝܬ ܕܗܵܘܹܝܬ ܡܲܪܕܵܐ ܫܲܪܝܼܪܵܐ
ܫܒܼܘܼܩ ܠܲܘܡܵܐ ܘܣܢܲܝܬܼܵـܐ ܡܼܢ ܠܒܘܼܟܼ ܬܒܼܝܼܪܵܐ
ܡܲܪܘܸܚܠܵܗ̇ ܠܢܲܦ̮ܫܘܼܟܼ ܡܢ̄ ܐ̄ܢܵܫܵܐ ܥܲܩܝܼܡܵܐ
ܒܠܲܦܘܼܟܼ ܥܲܫܝܼܢܹ̈ܐ ܒܸـܕ ܗܵܘܹܝܬ ܚܩܝܼܪܵܐ،،،
ܨܲܠܡܸܢ ܒܲܪܩܘܼܒܼܠܘܼܟܼ ܨܲܠܡܵܐ ܒܕܡܵܝܬܼܘܼܟܼ
ܡܲܢܫܝܼ ܠܣܲܢܝܵـܢ̈ܐ ܕܬܵܠܚܝܼ ܠܚܲܝܘܼܬܼܘܼܟܼ
ܠܵܐ ܓܪܘܼܫ ܒܪܸܥܝܵܢܘܼܟܼ ܬܲܚܡܵܢܬܵـܐ ܣـܪܝܼܩܬܵܗ̇
ܥܸܠܕܒܼܵܒܼܘܼܟܼ ܣـܦܵـܪܵܐ ܕܫܵܛܚܸܬ ܥܲܠ ܦܵܬܼܘܼܟܼ،،،
ܘܐܸܢ ܒܵܥܹܝܬ ܕܗܵܘܹܝܬ ܐ̄ܢܵܫܵܐ ܝܲܩܝܪܵܐ
ܫܪܝܼܠܹܗ ܠܸܫܵܢܘܼܟܼ ܒܡܲܡܠܵܐ ܕܙܲܗܪܝܼܪܵܐ
ܐܵܦܸܢ ܕܐܵܢ̈ܝ ܣܲـܟܼܠܹ̈ܐ ܡܲܕܥܸܟܼܝܼ ܫܪܵܓܼܘܼܟܼ
ܡܝܲܬܼܪܸܢܹـܗ ܚܘܼܒܘܼܟܼ ܒܨܸܡܚܵܐ ܢܲܗܝܼܪܵܐ،،،
ܣܵـܟܼ ܠܵܐ ܡܢܵܣـܝܢܸܬ ܕܦܵܝܫܸܬ ܚܲܣܵـܡܵܐ
ܕܚܵܪܙܸܦܸܬ ܠܐ̄ܚܹܪ̈̄ܢܹܐ ܡܢ̄ ܒܲܪܝܼܵܐ ܠܝܲܡܵܐ
ܡܲܢܫܝܼ ܠܟܼܠ ܕܲܥܒܲܪ ܕܫܵܪܸܬܠܹܗ ܩܸܛܪܵܐ
ܘܦܵܬܚܸܬ ܚܲܕ̄ ܬܲܪܥܵܐ ܪܘܝܼܚܵܐ ܒܲܫܠܵܡܵܐ،،،
ܐܝܼܡܵܢ ܕܫܵܘܬܸܦܸܬ ܓܵܘ ܬܵܙܝܼ ܕܡܝܼܬܼܵـܐ
ܡܢ̄ ܟܵܗܢܹ̈ܐ ܘܫܲܡܵܫܹ̈ܐ ܦܵܣܥܸܬ ܒܬܸܫܡܸܫܬܵـܐ
ܒܐܘܼܪܚܵܐ ܕܲܫܒܼܵܩܬܵـܐ ܒܲܫܠܵܡܵܐ ܘܫܲܝܢܵܐ
ܗܵܘܹܝܬ ܡܲܟܝܼܟܼܵܐ ܒܚܲܕ̄ ܢܲܦ̮ܫܵܐ ܫܠܝܼܬܼܵـܐ،،،
ܘܐܝܼܡܵܢ ܡܢ̄ ܒܹܝܬܼ ܩܲܒܼܪܵܐ ܕܵܥܪܹܝܬ ܥܲܠ ܒܲܝܬܼܵـܐ
ܫܵܡܥܹܝܬ ܠܟܼܠ ܚܲܒܪܵܐ ܕܐܵܬܹܐ ܒܗܲܡܙܲܡܬܵـܐ
ܒܵܪܡܝܼ ܠܪ̈ܥܝܵܢܹܐ ܡܢ̄ ܬܸܓܼܡܹ̈ܐ ܕܠܸܫܵܢܹ̈ܐ
ܐ̄ܚܵܪܵܝܵܐ ܗܲܡܙܸܡ ܒܝܼ ܪܘܼܚܵܐ ܨܦܝܼܬܼܵـܐ،،،
ܦܫܘܼܛ ܐܝܼܕܘܼܟܼ ܒܐܲܡܝܼܢ ܕܗܵܘܝܵܐ ܣܵܢܕܵܢܬܵܗ̇
ܩܵܐ ܣܢܝܼܩܹ̈ܐ ܘܟܦܝܼܢܹ̈ܐ ܒܚܘܼܒܵܐ ܡܥܲܕܼܪܵܢܬܵܗ̇
ܕܢܵܛܸܪܘܼܟܼ ܡܵܪܝܵܐ ܒܪ̈ܲܚܡܹܐ ܘܲܚܢܵܢܵܐ
ܒܥܵܒܼܪܝܼ ܝܵܘܡܵܬܼܘܼܟܼ ܘܚܲܝܘܼܟܼ ܒܡܲܢܬܵܝܬܼܵـܐ،،،
ܡܝܲܩܸܪ ܫܒܼܵܒܼܘܼܬܼܘܼܟܼ ܒܫܘܼܒܼܚܵܐ ܪܵܡܵܢܵܐ
ܠܵܐ ܬܲܠܚܹܝܬ ܠܓܘܼܕܵܐ ܘܗܵܘܹܝܬ ܒܵܢܝܵـܢܵܐ
ܘܐܝܼܡܵܢ ܓܵܘ ܥܲܪܣܵܐ(ܫܘܝܼܬܼܵܐ) ܢܵܦܠܹܝܬ ܒܦܲܪܦܲܠܬܵـܐ
ܫܒܼܵܒܼܘܼܟܼ ܩܲܕ̄ܡ ܪܹܫܘܼܟܼ ܗܵܘܹܐ ܡܐܲܣܝܵـܢܵܐ، (ܣܵܢܕܵܢܵܐ)،،،
ܟܡܵܐ ܕܗܵܘܹܝܬ ܚܩܝܼܪܵܐ ܗܘܝܼ ܦܫܝܼܛܵܐ ܒܪܸܢܝܘܼܟܼ
ܡܲܫܡܥ̄ܝܼ ܠܟܼܠ ܙܥܘܼܪܵܐ ܘܡܲܙܝܸܕ ܝܘܼܠܦܵܢܘܼܟܼ
ܠܵܐ ܫܘܼܒܼܗܵܪܵܢܵܐ ܗܵܘܹܝܬ ܒܸـܪܝܵܡܵܐ
ܡܛܠ ܡܲܒܪܸܟܠܘܼܟܼ ܚܲܝܠܵܐ ܕܒܵـܪܝܵܢܘܼܟܼ،،،
ܐܝܼܡܵܢ ܒܸـܕ ܡܢܵܣܝܸܢ ܚܲܝܠܵܐ ܕܣܵܛܵܢܵܐ
ܒܸܓܪܵܫܵܐ ܐܲܩܠܘܼܟܼ ܠܫܒܼܝܼܠܵܐ ܕܐܲܒܼܕܵܢܵܐ
ܪܚܘܼܩ ܒܝܼ ܦܵܣـܘ̇ܥܬܘܼܟܼ ܡܼܢ ܥܲܡܛܵܢܘܼܬܹܗ
ܩܵܪܒܸܢ ܠܘܵܬܼ ܝܼܫܘ̇ܥ ܡܫܝܼܚܵܐ ܢܘܼܗܪܵܢܵܐ،،،
ܒܪܸܢܝܵܐ ܚܲܟܝܼܡܵܐ ܕܵܒܼـܩܸܬ ܠܚܲܒܼܪ̈ܵܢܹܐ
ܠܵܐ ܡܼܢ ܟܠ ܛܘܼܗܡܵܐ ܚܵܕܪܸܬ ܒܕܘܼܟܵـܢ̈ܐ
ܒܚܲܕ̄ܟܡܵܐ ܥܕܵܢܵܬܼܵـܐ ܘܒܝܼ ܥܲܣـܩܘܼܝܵܬܼܵـܐ
ܩܥ̄ܘ̇ܠܬܵـܐ ܒܢܲܨܒܼܝܼܠܘܼܟܼ ܕܹܐܒܼ̈ܐ ܦܲܢܕܵܢܹ̈ܐ،،،
ܠܵܐ ܫܵܬܹܝܬ ܚܲܡܪܵܐ ܘܡܦܵܠܛܹܝܬ ܚܲܒܪ̈ܵܢܹܐ
ܕܠܵܐ ܓܵܠܹܝܬ ܐ̄ܪ̈ܵܙܹܐ ܒܠܸܒܘܼܟܼ ܥܲܡܪ̈ܵܢܹܐ
ܗܵܘܹܝܬ ܨܵܠܝܼܠܵܐ ܘܠܸܫܵܢܘܼܟܼ ܫܸܠܝܵܐ
ܕܠܵܐ ܦܵܠܛܹܝܬ ܢܚܝܼܦܵܐ ܩܲܕ̄ܡ ܡܲܣܚܸܪ̈ܵܢܹܐ،،،
ܥܲܠ ܝܸܡܵܐ ܘܒܵܒܵܐ ܗܵܘܹܝܬ ܫܲܠܡܵܢܵܐ
ܐܝܼܡܵܢ ܕܦܵܩܕܝܼܠܘܼܟܼ ܟܵܠܹܝܬ ܫܵܡܥܵܢܵܐ
ܠܵܐ ܡܵܪܡܹܝܬ ܩܵܠܘܼܟܼ ܘܫܵܡܛܹܝܬ ܠܬܲܪ̈ܥܵܢܹܐ
ܕܠܵܐ ܦܵܝܫܸܬ ܩܸܪܝܵܐ ܒܪܘܼܢܵܐ ܣܲܛܡܵܢܵܐ،،،
ܠܵܐ ܚܵܕܪܹܝܬ ܒܫܘܼܩܵܐ ܟܲـܕ ܨܲܕܪܘܼܟܼ ܦܬܼܝܼܚܵܐ
ܠܵܐ ܚܵܝܪܹܬ ܠܥܵܠܡܵܐ ܡܐܲܝܟܼ ܕܹܐܒܼܵܐ ܣـܪܝܼܚܵܐ
ܒܬܲܪܩܵܠܬܵـܐ ܕܥܲܝܢܘܼܟܼ ܨܵܠܹܝܬ ܓܵܘ ܬܗܘ̇ܡܵܐ
ܬܵܡܵܐ ܒܦܲـܪܦܣܸـܬ ܡܐܲܝܟܼ ܟܹܐܦܵܐ ܛܘܝܼܚܵܐ،،،
ܐܝܼܡܵܢ ܒܡܲܠܟܘܼܬܼܘܼܟܼ ܗܵܘܹܝܬ ܡܕܲܒܪܵܢܵܐ
ܠܵܐ ܫܵܡܛܹܝܬ ܠܪܹܝܓܘܼܟܼ ܒܚܲܝܠܵܐ ܕܫܘܼܠܛܵܢܵܐ
ܡܛܠ ܗ̇ـܝ ܒـܪܝܼܬܼܵـܐ ܚܵܕܪܵܗ̇ ܒܦܲܪܬܲܠܬܵـܐ
ܘܢܵܦܠܹܝܬ ܥܲܠ ܪܹܫܘܼܟܼ ܒܥܲܦܪܵܐ ܡܛܲܡܪܵܢܵܐ،،،
ܟܡܵܐ ܕܡܵܨܹܝܬ ܡܲܫܬـܝܼ ܘܲܪ̈ܕܹܐ ܕܓܵܘ ܓܢܵܢܹ̈ܐ
ܡܣܵـܩܸܠ ܠܟܼܠ ܕܹܫܬܵـܐ ܒܘܲܪ̈ܕܹܐ ܘܫܘܼܫܲܢܹ̈ܐ
ܓ̰ܗـܝܼ ܓܵܘ ܥܠܲܝܡܘܼܬܼܘܼܟܼ ܕܢܵܝܚܵܐ ܣܲܝܒܘܼܬܼܘܼܟܼ
ܒܝܼ ܫܸܡܘܼܟܼ ܙܲܗܝܵܐ ܚܵܩܪ̈ܝܼ ܚܲܨܕܵܢܹ̈ܐ،،،
ܒܲܝܢܵܬܼ ܚܲܒܼܪ̈ܵܢܘܼܟܼ ܗܵܘܹܝܬ ܛܲܢܵܢܵܐ
ܕܲܪܒܵܐ ܕܓܵܘ ܨܲܕܪ̈ܲܝܗܝ ܡܫܘܼܚܠܹܗ ܒܲܚܢܵܢܵܐ
ܒܕܘܼܪܵܫܵܐ ܚܸܠܝܵܐ ܗܵܘܝܼ ܒܸـܕܟܼܵـܪܵܐ
ܩܵܐ ܫܸܡܘܼܟܼ ܒܪܝܼܟܼܵܐ ܘܐܲܢ̄ܬܢ ܪܘܼܚܩܸܢܵܐ،،،
ܐܸܢ ܐܝܼܬܠܘܼܟܼ ܥܸܠܬܼܵـܐ ܕܒܼܝܼܩܵܐ ܠܚܲܕ̄ ܐ̄ܢܵܫܵܐ
ܠܵܐ ܒܟܢܘܼܫܝܵܐ ܕܣـܡܝܼܟܹ̈ܐ ܦܵܬܼܚܸܬ ܠܕܘܼܪܵܫܵܐ
ܡܛܠ ܗܲܡܙܲܡܬܘܼܟܼ ܠܲܝܬܠܵܗ̇ ܝܘܼܬܼܪܵܢܵܐ
ܘܦܵܝܫܸܬ ܡܘܼܣܠܝܼܵܐ ܘܢܲܦ̮ܫܘܼܟܼ ܒܸܫܓܼܵܫܵܐ،،،
ܐܸܢ ܡܵܪܘܼܟܼ ܡܣܵܦܹܐ ܒܐܝܼܕܼܘܼܟܼ ܕܵܘܸܠܬܼܵـܐ
ܒܠܸܒܵܐ ܬܲܡܝܼܡܵܐ ܢܵܛܪܸܬܠܹܗ ܠܒܲܝܬܼܵـܐ
ܗܵܘܹܝܬ ܫܲܪܝܼܪܵܐ ܘܦܲܠܚܵܐ ܟܲܫܝܼܪܵܐ
ܐܝܼܩܵܪܵܐ ܒܩܵܢܹܝܬ ܡܢ̄ ܐܲܓܼܪܵܐ ܕܗܲܝܡܵܢܬܵـܐ،،،
ܘܐܸܢ ܦܸܫܠܘܼܟܼ ܩܸܪܝܵܐ ܠܒܲܝܬܼܵـܐ ܕܣܵܗܕܘܼܬܼܵܐ
ܝܵܗ̄ܒܹܝܬ ܦܘܼܢܵܝܘܼܟܼ ܒܝܼ ܣܲـܪܲܣܬܘܼܬܼܵܐ
ܡܐܲܝܟܼ ܕܸܠܩܵܐ ܕܡܲܢܗܸܪ ܒܠܸܠܝܵܐ ܚܸܫܟܵܢܵܐ
ܡܦܵܪܸܩ ܠܲܛܠܝܼܡܹ̈ܐ ܡܢ̄ ܪܸܢܝܵܐ ܕܢܟܼܝܼܠܘܼܬܼܵܐ،،،
ܒܟܼܠ ܕܘܼܟܬܼܵـܐ ܗܲܡܙܸܡ ܒܩܲܠܝܼܠ ܚܲܒܪ̈ܵܢܹܐ
ܒܩܵܠܵܐ ܡܲܟܝܼܟܼܵܐ ܠܟܼܠܲܝܗ̈ܝ ܫܵܡܥܵܢܹ̈ܐ
ܠܵܐ ܡܵܪܡܸܬ ܩܵܠܘܼܟܼ ܒܩܵܪܢܵܐ ܘܗܵܘܵܪܹ̈ܐ
ܕܠܵܐ ܦܵܝܫܸܬ ܢܚܝܼܦܵܐ(ܫܬܝܼܩܵܐ) ܒܡܲܡܠܵܐ ܕܡܲܠܦܵܢܹ̈ܐ،،،
ܚܕܘܼܪ ܒܲܥܠܲܝܡܘܼܬܼܘܼܟܼ ܡܢ̄ ܣܵـܒܼܵܐ ܚܲܟܝܼܡܵܐ
ܕܒܵܗܪܸܢ ܠܪܸܥܝܵܢܘܼܟܼ ܒܝܘܼܠܦܵܢܵܐ ܪܫܝܼܡܵܐ
ܕܗܵܘܹܝܬ ܡܲܠܵܠܵܐ ܘܦܲܪܨܘ̇ܦܵܐ ܡܗܝܼܪܵܐ
ܘܡܲܕܪܲܫܬܵـܐ ܠܚܲܒܼܪܵܐ ܕܗܵܘܹܐ ܥܲـܩܝܼܡܵܐ،،،
ܕܠܵܐ ܗܵܘܝܵܐ ܘܕܵܪܫܸܬ ܡܢ̄ ܚܲܕ̄ܟܡܵܐ ܢܲܨܵܝ̈ـܐ
ܕܠܵܐ ܒܵܪܹܐ ܚܒܼܵܛܵܐ ܡܢ̄ ܪܸ̈ܥܝܵܢܹܐ ܚܬܵܝܹ̈ܐ
ܘܐܸܢ ܡܵܨܹܝܬ ܢܝܼܚܵܐ ܒܢܝܼܚܵܐ ܓܵܪܫܸܬܠܵܗ̇
ܓܵܡܝܼܘܼܟܼ ܡܢ̄ ܠܲܦܵܐ ܠܝܲܡܵܐ ܕܣܲܦـܪ̈ܵܝܹܐ،،،
ܢܘܼܪܵܐ ܒܸܠܘܵܚܬܹܗ ܒܠܵܗܵܐ ܪܵܡܵܢܵܐ
ܡܲܪܚܸܩܠܹܗ ܠܕܹܐܒܼܵܐ ܕܟܵܟܵܐ ܫܲܕܠܵܢܵܐ
ܗܵܘܹܝܬ ܡܐܲܝܟܼ ܢܘܼܪܵܐ ܒܸܓܪܵܫܵܐ ܩܘܼܡܬܵـܐ
ܘܡܦܵܪܩܸܬ ܠܲܛܠܝܼܡܵܐ ܡܢ̄ ܐܝܼܕܵܐ ܕܛܲܠܡܵܢܵܐ،،،
ܐܝܼܡܵܢ ܒܸܕ ܫܵܡܥܸܬ ܠܚܲܒܪܵܐ ܨܵܘܵܢܵܐ
ܠܵܐ ܡܣܵـܡܛܹܝܬ ܠܒܘܼܟܼ ܒܟܲـܪܒܵܐ ܡܲܩܕܼܵܢܵܐ
ܡܲܫܠܝܼܠܵܗ̇ ܠܪܘܼܚܘܼܟܼ ܡܨܲܚܨܝܼ ܒܥܸܠܕܝܼܢܘܼܟܼ
ܗܲܝܓܵܗ̇ ܒܸـܕ ܦܵـܪܫܸܬ ܚܲܒܼܪܵܐ ܡܢ̄ ܣܵـܢܝܵـܢܵܐ،،،
ܐܝܼܡܵܢ ܒܸـܕ ܡܵܛܹܝܬ ܠܕܲܪܓܼܵܐ ܥܸܠܠܵܝܵܐ
ܠܵܐ ܡܫܲܚܠܸܦ ܟܝܵܢܘܼܟܼ ܡܢ̄ ܚܲܝܹ̈ܐ ܕܫܘܼܪܵܝܵܐ
ܗܵܘܹܝܬ ܝܲܨܝܼܦܵܐ ܘܫܲܦܝܼܪ ܡܕܲܒܪܵܢܵܐ
ܘܠܵܐ ܡܲܢܫܸܬ ܠܚܲܒܼܪܘܼܟܼ ܕܝܼܗ̄ܘܵܐ ܫܘܼܠܚܵܝܵܐ،،،
ܒܚܲܝܹ̈ܐ ܕܲܥܠܲܝܡܘܼܬܼܘܼܟܼ ܗܘܝܼ ܐ̄ܢܵܫܵܐ ܟܹܐܢܵܐ
ܠܵܐ ܡܓܵܢܓܸܣ ܠܒܘܼܟܼ ܡܢ̄ ܚܲܒܼܪܵܐ ܡܸܣܟܹܢܵܐ
ܒܝܵܘܡܵܐ ܕܥܝܼܩܘܼܬܼܘܼܟܼ ܥܕܵܢܵܐ ܕܣܢܝܼܩܘܼܬܼܘܼܟܼ
ܦܵܫܛܸܬܠܹܗ ܐܝܼܕܼܘܼܟܼ ܘܒܵܥܹܝܬ ܥܘܼܕܼܪܵܢܵܐ،،،
ܠܵܐ ܚܵܫܒܸܬ ܒܐܲܡܝܼܢ ܕܝܼܘܸܬ ܚܲܝܠܬܼܵܢܵܐ
ܘܠܵܐ ܡܵܪܡܸܬ ܐܝܼܕܼܘܼܟܼ ܒܝܼ ܦܫܵܛܬܵـܐ ܕܕܪܵܥܢܵܐ
ܡܛܠ ܒܦܲـܪܬܲܠܬܵـܐ ܥܲܠ ܒܸܪܟܘܼܟܼ ܒܵܪܟܸܬ
ܒܚܲܕ̄ ܓܘܼܫܡܵܐ ܕܚܲܝܠܵܐ ܠܓܲܪܡܘܼܟܼ ܫܲܡܛܵܢܵܐ،،،
ܐܸܢ ܚܙܹܐܠܘܼܟܼ ܟܸܢܫܵܐ ܒܓܸܚܟܵܐ ܪܵܡܵܢܵܐ
ܒܚܲܕ̄ܟܡܵܐ ܕܘܼܪ̈ܵܫܹܐ ܣـܪ̈ܝܼܩܹܐ ܡܢ̄ ܣܘܼܥܪܵܢܵܐ
ܠܵܐ ܡܲܟܠܸܬ ܐܲܩܠܘܼܟܼ ܬܲܡܸܡܠܹܐ ܫܒܼܝܼܠܘܼܟܼ
ܕܠܵܐ ܕܵܥـܪܹܬ ܢܚܝܼܦܵܐ ܒܝܼ ܡܲܣܚܪܵܢܵܐ،،،
ܒܚܲܒܪܵܐ ܐ̄ܚܲܪܵܝܵܐ ܚܵܬܡܸܢ ܠܚܲܒܪ̈ܵܢܝܼ
ܡܼܢ ܡܲܬܠܝܼ ܪ̈ܫܝܼܡܹ̈ܐ ܒܗܲܘܢܝܼ ܘܪܸܥܝܵܢܝܼ
ܐܝܼܬܠܝܼ ܚܲܕ̄ ܣܲـܒܼܪܵܐ ܪܲܒܵܐ ܡܢ̄ ܫܵܡܥܵܢܝܼ
ܕܩܵܒܠܝܼ ܐܝܼܩܵܪܝܼ ܘܗܵܘܝܼ ܡܥܲܕܼܪܵܢܝܼ،،،
ܥܲܒܼܕܝܼܫܘ̇ܥ ܣܲܗ̄ܕܐ ܝܘܼܚܲܢܐ
ܟܗ ـ ܙ ـ ܐ̄ܨ̈ܨܕ
ܬܪܹܝܢ̄ܒܼܫܲܒܵܐ
