أحنه.. محنتنه عشكنه
جاسم الولائي
يا عِشِكْ جبّار
جبّار وحزين.. وعشِكْ مِحْنَهْ
أحنه مِحْنَتنه عِشِكنه
لو نِحِبْ هالدِنيا
تِتْفَتَّح مثل وردة وتِحِبْنه
والمواني والمدن.. وبحور هالدِنيا الجِبيرة
تُنْشُر جناح الفَرح إلْنه وتُضُمْنه.
وكَبُل ما نفرح.. يُطُكْ
بينه الحِزِن أنهار
ويبجّي فَرَحْنه
وتِزْغَر وتِزْغَر مدن حُبْنه
وتِضيك وما تِلِمْنه
ليشْ دُونِ البَشَر- بس أحنه
الِذِي بِحُبْنه انْذِبَحنا؟
لو تِحِبِ الناس
هاي الدِنيا تِصْبَح ياسمينْ
والشَمِس تُنْثُر جِدايلْها عَصافير وحَنين.
ولو نِحِبِ أحْنه تِصِير الدِنيا خوفْ
والفَرَح يِصْبَح حزين،
وتِبْخَلِ الدِنيا على حُبْنه الطفلْ
حتى برِصيف.
ليشْ ما نُعْرُف نحبْ إلّه بنَزيفْ؟
لو نِحِبْ حُبْنه دُوار.
اتْدور هاي الدِنيا بينا
جَمْ بَحَر واحْنه نِلِمْ حُبْنه جِزَينه.
شكَدْ حِزِن واشْواقْ ضَيَّعْنه ولِكينه
شكُثُر عَدّينا نَجِمْ
وشْكَدْ نهاراتِ وليالي وانْتِظار؟
إجَّم قِطارْ،
شال من هذا العُمُرْ عُمْرَه الحِلوْ؟
وإجَّم مطارْ،
بِجه مَرّات وضِحك
خو يدري بينه
شْكُثُر ودّعْنه حبيبات وإجينه،
وليشْ هذا الخُوفْ
مَسِّ الرُوح.. دَوّخْها
أبدْ ما تِدري
من فيضِ الحِزنْ فَرحانه
لو من فيضْ فرحتها
حزينه؟
دمشق 1986
