نـَـفس المرگه او نـَـفس الديـچ

[ميسون نعيم الرومي]

نـَـفس المرگه او نـَـفس الديـچ
ميسون نعيم الرّومي
 
صارت هاذي تشبه ذيچ – نفس المرگه او نفس الديچ
تنزلْ طيّارَه او بالكيفْ
من بيروت الحَدْ تلكيفْ
يُعدَمْ ليخالفْ بالسيفْ
بغداد الحاكمْ يسبيچْ - صارت هذي تشبه ذيچ
*********
چنّه ابواحد جَتنَه ألوف
گلب ْايسوف او عين اتشوفْ
جرح ايخَزن جَرح انروف
يادنيه بَسچْ واشبيچْ - نفس المرگه او نفس الديچ
*********
كتْبوْ تاريخْك بالدَمْ
الياخذ أمَكْ صايرْ عَمْ
لمْلومْ ابغداد التَمْ
لچتافْ إيفَرچْ تَفريچْ - صارت هاذي تشبه ذيچ
*********
بوگْ اونَهبْ سَلبْ انشوفْ
مو بالخفيه عَ المَكشوفْ
ابْگوَّة عينْ او ماكو خوفْ
بغداد منهو اليحميچْ - نفس المرگه او نفس الديچ
*********
بالسوگْ انْباعَتْ أصواتْ
بَـطانـيـَـه لو بَـنـكـاتْ
هَلهولـَه عَلـْگـَـوْ راياتْ
جولـَه اوصولـَه بَسْ اصْريچْ* - صارت هاذي تشبه ذيچ
*********
نايبْنَه اسم الله  اسم الله
مَحْروسْ امحَصَنْ بالله
مَعْـلولْ .. النايبْ علـَّه
شَعْبچْ يا علـَّه ايرَبيچْ - نفس المرگه او نفس الديچ
*********
مُرْ إجرَعْنَه يا زَمانْ
يذبَحْ يظلمْ ماكو أمانْ
قانون أحوال النسوانْ
*يا أم گـَـبـْعـَه ..الرَبـچْ نشكيـچْ - صارت هاذي تشبه ذيچ
*********
قصَتْـنـَه صارَتْ بالوَصفْ
ما ضَلْ نَفطْ كلـَّه انكرَفْ
كـلنَه انتخَبْنَه ابلا عرفْ
هالفكرْ .. يا يـُمَّه رچيچْ - نفس المرگه او نفس الديچ
*********
من يومْ عشْنَه ابهالوَطَنْ
واحدنَه بالهَـمْ ممتحـنْ
چَمْ دوبْ نسكتْ عَ المحَنْ
دايرْ واندورْ اوبيچْ - صارت هاذي تشبه ذيچ
*********
هذي الحكومَه امزَيفَه
توعدْ اوماكو كلْ وفَه
ذاك الجرَه اوهذا الصفَه
ماكو قفلْ لاكو اسويچْ - نفس المرگه او نفس الديچ
*********
نيسان / 2014
 
*اصريچ :- الصوت النشاز

*ام گبعة:- نائبة في البرلمان العراقي خرجت في (بي بي سي) العربية وهي تدافع عن تشريع يرا د تعميمه وهو السماح بزواج الفتيات بسن التاسعة وتقول انه من التشريعات الالهية وتتحدث بثقة مابعدها ثقة عن استعداد الاطفال البيلوجي والنفسي للزواج في هذه السن.
 

 
 

[Odisho Youkhanna]

بالسوگْ انْباعَتْ أصواتْ
بَـطانـيـَـه لو بَـنـكـاتْ
هَلهولـَه عَلـْگـَـوْ راياتْ
جولـَه اوصولـَه بَسْ اصْريچْ* - صارت هاذي تشبه ذيچ
*********
نايبْنَه اسم الله  اسم الله
مَحْروسْ امحَصَنْ بالله
مَعْـلولْ .. النايبْ علـَّه
شَعْبچْ يا علـَّه ايرَبيچْ - نفس المرگه او نفس الديچ
*********
مُرْ إجرَعْنَه يا زَمانْ
يذبَحْ يظلمْ ماكو أمانْ
قانون أحوال النسوانْ
*يا أم گـَـبـْعـَه ..الرَبـچْ نشكيـچْ - صارت هاذي تشبه ذيچ
*********

[قيصر شهباز]

الاخت ميسون الرومي المحترمة،

احييك على ترجمة امكانية افكارك الرائعة من خلال شعرك العراقي الشعبي ذو المستوى الرفيع، كلما امر واقرأ كتاباتك اشعر بانني على اطلاع بإمرأة عالية المرتب، إن القانون الجعفري المجحف بحق الطفولة البريئة لبنات عوائلنا العراقية وبعض فقراته الدنيئة وبالتأكيد يجلب الاشمئزاز الى النفس الانسانية في عصرنا المتقدم.

لا يسعني الا تقديم تمنياتي الخالصة لحضرتك وبمديد العمر،

قيصر

[sargon hozaya]

كلمات رائعة .. مع الاسف هذا هو واقعنا الحالي

[جورج العراقي]

بوگْ اونَهبْ سَلبْ انشوفْ
مو بالخفيه عَ المَكشوفْ
ابْگوَّة عينْ او ماكو خوفْ
بغداد منهو اليحميچْ - نفس المرگه او نفس الديچ



للأسف الشديد يسنون بعض القوانين المجحفة بحق بناتنا ونساءنا ويلقون اللوم على التشريعات الإلهية..
تحياتي