بعد 6 اشهر في امريكا ... نحييكم

[صيدلاني طافر]

السلام عليكم اخواني اعضاء عين كاوة الكرام ... ستة اشهر في بلاد سام كملت الليلة .لمن جنت بعمان دائما جنت اكول ويه نفسي شوكت اوصل لامريكا حتى انقل تجربتي ورائيي لعين كاوه . ومثل مجنت استفاد واتنور من الاخوان اللي سبقونا . كلت انشالله افيد الي يريدون يجون ومكتبت باول ايام وصولي لسببين الاول انه التهيت بالبداية بامور الوصول والايجار والسياقة ووراها راسا سجلت امتحان معادلة صعب جدا بشهر الرابع وداانتظر النتيجة . السبب الثاني ان دائما بالبداية تكون الامور مو واضحة وبعد فترة تكون الامور اوضح . امريكا بلد جميل شعبها هادئ ماله علاقة باحد اغلبهم يضحكون بوجهك بلة سبب او يفتح وياك موضوع مباشرة بدون تكلف . الصراحة مشفت عنصرية من احد ولاحسيت ان موضوع اني عربي او مسلم يفرق عدهم بس طبعا هذا اللي اني شفته مااكدر اعمم بالمطلق. اللغه مهمة رغم انه اعرف هوايه ناس وصلت بدون لغة بس لكت شغل . اللي يميز امريكا العداله . صح ممكن تدفع فواتير هواية وضرائب بس كلها بصورة عادلة ماكو شي قطعي ولا مبلغ ثابت . تدفع على كد الخدمة حتى ابارك السيارة وحتى باجرة استخدام الطريق السريع تاخذ كارت من تدخل ومن تطلع من الطرق يحاسبوك عاللي مشيته . وهذا مثال بسيط . وقيس على هذا الشي كلشي الفلوس اللي تحصلها تساوي بالضبط التعب او القدرة البدنية او العلمية اللي تقدمها فالي يتعب يوصل بالعكس يرحبون بالمنافسة ويحبون الصدق ويتفهمون الاعذار اللي تقدمها بس بنفس الوقت مو زواج وميحبون المنافق والكلاوجي . دائما جنت اسمع اسئلة منو احسن العراق لو امريكا؟ نبقى لو نجي؟ واني هم جنت اسال . وجنت متيقن ان امريكا احسن لحد ماوصلت وعرفت ان الجواب مو بهالسهولة وممكن يرادلك سنين حتى تكدر تجاوبه صح . طبعا لا الامن ولا الخدمات ولا حقوق الانسان والحيوان ولاولا ولا من العدل اتقارنها بالعراق لان الفرق 100 او 200 سنة على اقل تقدير بهالامور. ممكن الفلوس تكون وجه مقارنة قوي وصحيحه مابيت شكد جنت تطلع ابغداد وهنا شكد خصوصا ابداية الطريق . خصوصا ان قيمة فلوسك هناك اكبر من امريكا وفواتير امريكا تكسر ظهر راتبك . بس اني اشوف مشكله امريكا او اي بلد مهجر هو العراق نفسه. .. شكد ماخذ منك؟ شكد عندك بيه اهل؟ شكد اللك بيه اصدقاء؟ انت شكد تشتاقله ؟ عنك القدرة تعوفه؟ تحس نفسك تتمنى ترجع تتمشى ابغداد وتطلع ويه اصدقائك ؟ طبعا  هذا الكلام للي ممتهدد وحياته ممتعرضة للخطر بصورة مباشرة او مفاقد واحد من اهلة او اصدقائة وكاره العراق من ساسه لراسة . لا الكلام بس للي ممتعرضين لهالشي لان امريكا بكد ماهية جنة من الطبيعة . بكد ما مدارسها احسن مكان ممكن يتعلمون بيه اولادك . بكد ما الدولة تعاملك حالك حال المولود بالبلد بمجرد دخولك للبلد . راح تتعود بالاخير . تتعود عالجو الحلو وتنسى العجاج تتعود عالخدمات المتنكطع والتبريد وتنسى الحر والمولدة تتعود عالطبيعة الحلوة والثيل الاخضر والاشجار والسناجب وتنسى الزبل والخرابات . تتعود عالنظام والشارع المرتب وتنسى السيطرات والسايبات . وراح تتذكر بس الاشياء الحلوة بالعراق . تذكر بس الناس التحبهم و المكانات المطاعم . هذا رايي اذا جنت عاطفي وعندك حنيه زايدة وممتهدد راح تتعب مراح تندم ماكو واحد طب لامريكا وندم بالعكس نعمة وفضل من الله بس تتعب وتشتاق وتحن . لازم كلبك يصير حديد وعينك تصير قوية لان اذا متصير هيج تاليتك ترجع للعراق وتخسر بالحالتين فكر واحسب وراها توكل

[نصبر والله كريم]

 مبروك عليك الوصول للولايات المتحده الامريكيه .. وانشاء الله النجاح والموفقيه بحياتك ... وعاشت ايدك على هذا الموضوع ..

[espero]

الف هلا بيك ياورد
كلام جميل ومنطقي ..عاااشت ايدك
بس ياريت موضوع منفصل ومفصل لمعادلة شهادة الصيدله حتى الاخوان يستفادون من التجربه العملية لحضرتك

[engm]

الف  الف  الف  مبروك وصولك الى اميركا والاستقرار فيها ... كلامك واقعي بس يريح النفس ... تحياتي

[imad_jk]

مراح تندم ماكو واحد طب لامريكا وندم بالعكس نعمة وفضل من الله


كلش عجبتني هاي العبارة مشكور على الموضوع

[ابو الامراء]

الف مبروك عليك وان شاء الله التوفيق بحياتك ويظهر انت بولاية اوريكون

[صبيحه]

الف مبروك وعاشت ايدك على الموضوع تحليل حلو وواقعي بالموفقيه والنجاح

[ZEAD WALED]

الله يوفقك وبارك الله بيك على الموضوع الجميل والطرح المنطقي الواقعي ,,,,,,,,,, بس ماعرفنا حضرتك باي ولاية

[Gamma]

مبروك سلامة الوصول وانشاء تحقق امنياتك بالعمل والاستقرار
تحياتي
Gamma

[laranaem]

حمد لله على السﻻمة وعلى اﻻستقراار ويارب يوفقك بأمتحان المعادلة ويوفق الجميع

[omnora]

اخويه ظافر ان شاء امريكا عليك خير وسلام وامان وان شاء الله تتوفق بمعادلة شهاتك وتنجح وتنجح وتنجح وبامتياز ان شاء الله روح وعيش حياتك ]هناك وما الك لازم باحد بامريكا اني om nora h ادعيلك ياااااااااااااااارب يكفيك شر الناس هناك بامريكا .............

[ريحانة بغداد]

الف مبروك وحمد لله على السلامة ويارب يوفقك بأمتحان المعادلة وتنجح

[صيدلاني طافر]

شكرا اخواني على كلامكم ودعواتكم وانشالله الموفقية للجميع .. بالنسبه الي مدينة فيلادلفيا ولايه بنسلفانيا . ولايه بسيطه مابيها شي مميز غاليه جدا بيها مشاكل فقر وبطاله بس جوها وطبيعتها حلو وموقعها مميز وقريب من نيويورك والساحل وواشنطن بس انشالله ناوي اروح لمشكان لان عندي اقارب واصدقاء هوايه هناك . ومعادلة الصيدلة معادلة صعبة وطويله تبدي بامتحان شامل مراجعه لكل مواد الصيدلة واللي اني امتحنتة ونتيجتة تطلع بعد 6 اسابيع وكان صعب جدا والله اليستر وراها توفل للانكليزي ومطلوب بي درجات عالية وراها امتحان الرخصة واللي تمتحنة حالك حال المتخرج من جامعات امريكا وطبعا قبلها الف ساعة تطبيق بصيدلية واي سوال حاضر

[amireo74]

o

[زورائي بيانكونيري]

ميروك عليك بلد الحريه اخي العزيز .. اوصيك ما تطلع منه الا وانت معلم اولادك هناك .. خلي يكون عدنا جيل متعلم تعليم راقي .. الله يرزقك كل خير

[topra]

مبروك عليك اخ صيدلاني طافر......بس ممكن نعرف المساعدات الي استلمتهه؟
مع جزيل الشكر مقدما

[OK H.K]

اخي العزيز الصيدلاني المحترم

اتمنالك كل الموفقية والنجاح وان شاء الله ما يضيع لك تعب

بس ممكن حضرتك تنطينا تفاصيل اكثر عن معادلة بكلوريوس الصيدلة في الولايات المتحدة؟؟
كم ستيب؟؟ شنو اسماء الامتحانات؟؟ شنو الكتب اسماء الكتب المطلوبة ؟؟؟

الف شكر وان شاء الله ربي يسهل امرك...وترفع راسنا

محبتي

[عراقي مغترب]

دعواتى للك. بالنجاح والموفقية بحياتك.  ويارب يسهللك طريقك.

تحياتى للك من تركيا

[المحيط الهادي]

حياة سعيدة هانئة موفقيييييييييين

[المهندس الزورائي]

تسلم وتعيش ع الموضوع والكلام العفوي الجميل ..  بقدر ما كلامك مؤثر ومهم للي بالعراق لان اطرقت للي يفتقده العراقيين بالعراق من امان ونظام ونظافة وخدمات وووووو الخ لكن اللي عايش خارج العراق مثلا بالامارات ماراح يفكر بهذي النقاط وانما يفكر بالدراسة وتطوير نفسه مثل ما حضرتك سويت وطبعا يا زين ما عملت . خالص الامنيات بالموفقية وننتظر بشارة النجاح ومعادلة الشهادة باذن الله

[كلــــــــــــوري المحبة]

ربي يقدملك الى بي الخير
بالنسبة الى انى شفتها صعبه يمكن لان بالبداية وبمرور الايام الواحد يتأقلم بوضعها

[Aiham_]

I AGREE 

[Lady Fatal]

مرحبا صيدلاني

حلو الموضوع وصدكَ الأمور متكون واضحة تماماً بالبداية بس بكل الأحول آني شفت فرق السماء عن الأرض بين اي بلد عربي واميركا وبس الواحد يحصل شغل ويكَدر يأمن حياته بعد ميهتم لشي لأنو الحياة هنا هي اللي تتسمى حياة..

عجبتني هم ملاحظتك على انو اغلب الناس يبتسمون بدون ميعرفوك وهذا شي لاحظته من اول ما اجيت.. اغلب الناس لمن تجي عينك بعينهم بالصدفة يبتسمون بصدق ويتمنون يوم سعيد او ليلة سعيدة او يسلمون بكل لطف هاي عدا عن كل طرق تعاملهم الراقي بشكل عام

واللي يظل باله بمكان ثاني مينجح بحياته، رح يظل دائماً مشغول بذاك المكان الثاني وميركز بحاضره ومستقبله ويخسر المشيتين..


آني متأكدة بهذا الـ attitude والجد رح ترتاح هناك اكثر واكثر.. واتمنالك كل التووفيق بحياتك

[smart81]

عاشت ايدك ربي يوفقك بحياتك الجديدة ..

[احلى دلوعه]

كلامك صحيح 100%
ربي يوفقك وتحقق كل اللي تتمناه

[صهوبي]

الحمد الله على سلامتك اخويه صيدلاني..والله كلامك صحيح100% وان شالله ترتاح وتنجح في حياتك ...تحياتي

[احمدمالك]

حمدلله على السلامه ان شاء الله حياة سعيده في بالد العم سام
او حلوه المقارنه كلام اكثر من رائع بس كانت الطله علينه اجمل


احمد نيومكسيكو

[iraqforme]

عاشت ايدك ياصيدلاني وعلى كولت اخوانه العرب (( كلك ذوق )) كلام منطقي جدا وجميل ومفيد وياريت تبقى تتواصل ويانه
تحياتي