السلام عليكم اخواني و اخواتي الاعزاء
اولا ادعولكم ان تطلع فيزكم و تسافرون ..امريكا تستاهل قهر و انتظار ل10 سنوات مو بس 3 و 4
اني صارلي اكثر من 3 سنوات مشترك بالمنتدى بس نسيت الاسم و الباسورد مالتي و هسة فتحت هذا الاشتراك باسم جديد و اسمي القديم جان (كازه) للي يعرفوني ..
اكو هواية مواضيع بالمنتدى عن الجحيم العراق و جنة الامريكا و بالعكس .
بس اعتقد هذا كلام السليم و مختصر عن تجربتي الشخصية بعد مرور شهر من وصولي لولاية فيرمونت ,ولله الحمد و الشكر ..
1-امريكا جنة اذا تحجي انكليزي : مو شرط %100 بس لازم تفتهم الحجي و تفهم المقابل يعني نص و نص اقل شييييي, ليش : علمود الشغل :
اني لغتي كلش زين الحمدلله و زوجتي نص و نص , بعد اسبوع من وصولي لكيت شغل (عن طريق منظمة) بمعمل معجنات كوفي كةب بيكري (دوروا عليهه بلكوكل و شوفوا) .سعر الساعة 12.5 دولار*160 ساعة بلشهر=2000(راتب قانوني وزير عراقي) و زوجتي هم تشتغل وياي بنفس المعمل و الاوقات و الخط الانتاج(لاين) يعني الحمدلله 4000 دولار بلشهر + ضمان صحي +تأمين حياة (التقاعد بالمستقبل) الشركة يدفعلي .اشلون تطلع التاكس و ايجار البيت و مصاريف اخرى يبقى 2500 دولار ..
ايجار البيت 700 ,ماء و كهرباء و انترنيت و موبايل 200 ,تاكس مادري بعد بس اعتقد %6 =يعني 250-300 دولار ..ماعندي سيارة (مصاريفهه و انشورانس) لان المعمل تبعد 2 كم من بيتي نروح بالبيسكلات او مشي .....و خرب بالمساعدات و المنظمات اذا عندي هيج شغل و راتب و صحة من الله.
2- الاكل : يعني معقولة اجوا ناس لمريكا و كاعد يبجي لخبز العراقي و لبن و دولمة و مادري شنو ايكول امريكا جحيم لان اكلة مو مثل عراق ؟يابة هنا اكو كلشييييييييي بس ينرادلك زوجة او طباخ ماهر ,احنه بالشهر الاول اكلنه كباب و تكة و فاصوليا و قوزي و دجاج طبعا الحمد لله كلهه تسويه زوجتي لان فعلا ماكو طبخة و متعرفهها ..قصدي لاذا تجي لمريكا اتبجي علا اكل .
3- الجو :اشلون ماكان الجو احلة من ريحة دم و باروت و مفخخات العراق ,صدك اكو ناس كل شهرين يغير الولاية مرة باردة و مرة حارة ديابة اكعد شبسرعة نسيت العراق ؟ و بعدين يكول امريكا جحيم مابيهه شغل .
4- قنوات العربية و العراقية : اتصوروا اكو ناس ماعدهم شغل عطال و بطال 24 ساعة كاعدين سالفة مالكي و علاوي , قنوات عربية و عراقية ,سنة و شيعة ,اربيل و بغداد , انتخابات و النفط ....اصلا اني ماعندي ستلايت و ميهمني اذا ماشوف قنوات عربية و عراقية لالف سنة (علما شي رخيص و حلو اذا واحد يريده و حقه يتابع اخبار بلده و اهله) بس انت عايش بمريكا دور علة طريق لمستقبلك حبيبي عيش مثل العالم و عوف قهر العراق دكافيييي سياسة و الطائفية .
5- العراقيين في ولايتك :نعمة او نقمة ؟ طبعا نعمة بس ضمن الحدود يعني لاتختلط هواية و لاتهملهم لان نفس السالفة التعبانة السياسة و الطائفية و موضوع الستلايت
عموما هذا مختصر عن تجربتي و الي سمعته من العراقيين ,و جنت اتابعهه بعنكاوة لمدة 3 سنوات ...
بعض المساوئ :
1-الغربة :بدرجة قليله يعني مو تكعد تبجي للصبح , بس تتذكر اهل و اصدقاء ,و لمن تتذكر الوضع و الخدمات و تقارنهه راسا تنسي الغربة و تروح فدوة لمريكا
2-القوانين :شي صعب تجي من العراق ابولحضارات الي مابيهه قانون مع الاسف , و امريكا حتى الهلاو مالتهم بيهه قانون و لازم تيتسم وياها ههههه يعني من اصغر شي حتى اكبرهه قوانين و ماكو مجال لتجاهلها ,ينرادلك وقت حتى تتعود بس مو شي صعب
3- حياة هنا معقدة و بيهه تفاصيل دقيقة و لازم واحد ايدير باله عليهه مثل بنوك و الحسابات و التأمينات و الضمانات و قوانين الحكومة و الشوارع كلشي و كلاشي ...
اسف للاطالة بس حبيت انطيكم نظرة كاملة لتكتملوا عندكم الصورة ...اسف لاغلاط املائية و لغوية لان اني كردي و اخوكم
جميع انواع التعليقات(الزينة و المو زينة) مرحب به , براحتكم شتكتبون الي يعجبه الموضوع و الي ميعجبهه علا راسي و هاهي الديموقراطية الي احنه نحتاجهه كل واحد و راي .
و اي شي تحتاجون اني حاضر .
تحياتي
اخوكم كازه بيسري ,ولاية فيرمونت ,
