منتدى الهجرة واللجوء > اجتماعيات (ترحيب، تهاني و تعازي منتدى الهجرة)

وصولي لامريكا قبل شهر من الان .. IZ-137

(1/9) > >>

ابن الصويرة:
السلام عليكم اخواني واخواتي بهذا المنتدى الرائع
الاخوة القدامى يتذكروني ويعرفوني لكن للاخوة الجدد اني تقديم 2012 وكيس نمبر IZ-137
بداية كلامي حتى ما اخذ من وقتكم موضوعي مابيه تفاصيل مهمة لكن لسببين نزلت هالموضوع .. الاول والاهم هو اني عاجز عن شكر الاخ الغالي دبس وراشي لوقوفه ومساعدتي بيوم سفري .. حقيقة هالانسان حسيته اكثر من اخ وكانما نعرف بعض صار سنين ولو هبطني بمقلب قبل سفري بيوم وجان شكل عندي سكر بس على راسي ابو عبد الله واضل ممنونلك كل عمري وما اكول غير ربي يبارك بيك ويحفظك ويمن عليك وعلى اهلك بكل خير وصحة وعافية يا ابن الاصول.
السبب الثاني لطرحي هالموضوع هو بعض الاخوة يتخيل اليسافر متقصد يهجر هالمنتدى وميكتب شصار وياه وشحصل لذلك احب اكول نيابه عن اخواني السافرو ومانزلو مواضيع ترة السبب اما ماعنده نت مثل حالتي بعد شهر يلا سحبت نت او لسبب اهم وهو اللاجئ الجديد يكون مخبوص وكلشي ميعرف يسوي باول ايامه هنا بامريكا فلا تتوقعون العراقي اول ميخلي رجله بمطار امريكي صار خبير بالهجرة .. اني ولحد الان احتاج كفيلي بكل صغيرة وجبيرة ورغم جنت متوقع انكليزيتي تساعدني لكن للاسف بس موظفين المنظمة الاستقبلتني يفهموني شاحجي اما باقي الناس فكلامهم سريع ويبلعون حروف والاخوة المترجمين يفهمون شاقصد للعلم اني شغلي مع الامريكان كان من خلال مترجم او بالمراسلة الالكترونية لذلك تعلم اللغه الانكليزية مو كافي الاهم هو اتدرب سمعك لتفهم شنو الكلمة الديحجوها وهالشي يساعدكم بيه الاستماع للافلام المترجمة او الاغاني المترجمة ومقارنتها بشنو مكتوب بالترجمة ..

السفر
من بغداد الى عمان كانت الطيران ساعة 9 مساء وبقينه بالمطار لحد ساعة 2 بالليل يلا كملو اجراءات حجز الفندق وطبعا لان انت عراقي فالاردنيين ما احجيلكم شلون فرحانيين بينه وبس يريدون يساعدونه وفهمكم كفايه .. ثاني يوم الصبح طلعنه من الفندق الى المطار وكان طيراني مباشر لشيكاغو واقلعت  الطيارة ساعة 11 صباحا ووصلت الساعة 3 العصر الى شيكاغو بعد 12 ساعة طيران متواصلة متعبه ومهلكه جدااا .. بعد وصولنه لشيكاغو استقبلونه موظفي IOM وقسمونه مجاميع كل حسب مدينته طبعا اني مدينتي مولين يعني بنفس ولاية الينوي التابعه الها مدينة شيكاغو فبقيت من ساعة 3 الى الساعة 8 بالمطار لحد وقت رحلتي لمولين والطيران الداخلي طيارات حجم صغير وما اتذكر شي من الرحلة مجرد الاقلاع والهبوط لان جنت نايم نوم اشبه بالغيبوبة .. طبعا وصلت لمدينتي ليلا والمطار مابيه بشر والصدمة جان الجو لان رطوبة مو طبيعية.

السكن
اني سنكل لذلك حاجزيلي شقة صغيرة لوحدي وحسب طلبي ببناية اشبه بالموتيل اليطلع بالافلام واكرر موتيل مو هوتيل خمس نجوم لالالا فد شي بسيط وبيه اثاث مجرد سرير وكرسيين وميزين خشب والايجار 500$.

المساعدات
اييييييييي هسه انلاصت .. كلشي مفتهمت منهم غير ورة يومين رحت سجلوني عالسوشيال نمبر والتاخر 25 يوم يلا وصلني وبعدها انطوني 200$ دولار صك مصروف جيب لاول شهر وبعدها سجلوني عالماجك كرانت وهم استلمت صك بنفس قيمة الاول كمصروف شهر ثاني وطبعا الايجار والماء والكهرباء مدفوعة للاربع الاشهر الجاية وتتمدد شهرين بعد وراها حير بنفسك ... طبعا اني طلبت بايسكل من المنظمة وجابولي واحد اخذت المنطقه حاصل فاصل اكتشفتها واندليتها وخلصت وقت بدل ممكابل الحيطان والحمد لله مدينتي مدينة اشباح مابيها بشر واذا اكو فهم سود ومن النوع الحباب اليشتغلون مو عصابات ومشاكل بس مابيها روح يعني اذا اروح للبارك اكعد بس السناجب صافنه بوجهي هذا منين وشعنده هنا... طبعا بالصك الثاني اخذوني للبنك وسويت حساب واودعت بيه 200$ الثانية ومنتظر 10 ايام يدزولي ديبت كارد اكدر استخدم هالفلوس بمشترياتي .. طبعا الفلوس داصرفهن عالاكل لان بعد شهر وشوية لازلت بدون فود ستامب يعني صرفت الفلوس عالاكل وهن ممخصصات لهالشي...
 
الدراسة
اخذوني لتقييم مستواي باللغه الانكليزية بس طلع عدهم عطله وتاجل الموضوع.وطبعا اني موقع ببرنامج الماجك كرانت لازم احضر دروس لغه انكليزية يعني الموضوع مو اختياري.

الصحة
بعد 20 يوم طلعلي المديكير واخذتني المنظمة لاجراء اول الفحوصات الطبية وجان ضغط وعذرا ادرار وخروج وبعد يومين رحت اخذت اربع لقاحات بكل ايد اثنين ووراها اخذو مني كم عينة دم اعتقد 5 نماذج او اكثر ما اتذكر التهيت صافن بالمدهورة التحجي وياي حتى لو مصفر دمي ومشتعل يمي كلوب هم ما ادري... طبعا اني عندي مشكله فقرات بالدسك بظهري بعد حادث وحاليا كوة امشي ولابس حزام بس شكد محجيت للدكتور وللمنظمة ما اشوف منهم اهتمام وكل ما اسال يكولون حاجزينلك وهاي شهر وشوية وكلشي ماكو.

الخلاصة
اعرف طولت وماكو شي مفيد ضفته ومنكم متشوق حتى يعرف امريكا تسوة لو لا .. اني ماعندي جواب لهالشي ابدا وشكد متقلل احلامك هم راح تنصدم لان امريكا مو جنة يعني طبيعة حلوة بس شي مجهول اني ممكن هسه اكول لحد يجي ويجوز مجرد احصل شغل او علاج لحالتي تتغير نظرتي .. فاذا تعتبروني محلف راح تحجولي بصيغه متهددين وحياتنه بخطر واذا نحجي اخويات بلا هالنبرة فهي مغامرة ممكن تنجح وممكن تفشل وهالشي يعود لاصرارك وطموحك لكن اهم شي التوكل على الله وتحمل صدمة الايام الاولى ولتسمع اغاني وطنية وتحن لبلدك وتبجي لان بس اتذكر كتلت نفسك وانتظرت سنين يلا وصلت هنا واحمد ربك وصلت معزز مكرم مو مثل الاخوان بالبحر وتهريب وكوم فلوس يدفعون يلا يوصل لاوربا وهم يضل عايش بمخيمات .. عموما اني عن نفسي مراح ارجع وان شاء الله اطلع نفسي من جو المساعدات والكآبة بمجرد احصل شغل يتناسب مع حالتي الصحية.
اني اسف اذا اسلوبي يكون محبط للامال او ميكون موضوعي مابيه شي جديد  بس هذا الواقع واني لازلت ببداية الطريق واحاول اتعلم ولازلت اراجع الارشيف بهالمنتدى الرائع حتى اعرف وضعي شنو وشاكدر اسوي وشنو الالي وشنو العليا
اتمنالكم كل الخير والموفقية وربي يحفظ الجميع ويحقق احلامكم

اخوكم المهندس احمد

مهاجر الجنوب:
الحمد لله على سلامتك اخوي بالنسبة الكلامك صحيح وإني بس أخلص دراسه ارجع تحياتي

predator:
الحمد لله على سلامتك ,

شوية لازم تصبر بالبداية,كل الي اعرفهم اول مراحو شوية ضاجو,بس بعدين عاشو حياتهم ,شغل وسيارة وفلوس واستقرار,

اكيد بالبداية واحد يستوحش,حتى من واحد يشتغل بشركة جديدة هم ينرادلة وقت حتى يتأقلم,او ينتقل من منطقة لمنطقة او حتى من غرفة لغرفة,
كيفما ينتقل من قارة لقارة

اسعد العراقي:
بالتوفيق انشاء الله

AbooReem:
السلام عليكم  اخي العزيز ابن الصويرة...
بالبداية الحمدلله على سلامة وصولك وربي يفتحها بوجهك  ويوفقك ...
اخي العزيز البداية دائما صعبة في كل شئ اعتقد لو كان احد مشاركك بالسكن كان الامور تصير احسن ،اني اتذكر ابن عمي ببداية وصوله لامريكا  كللي لاتجي احسن لكن الان وبعد سنتين يكول اني بس راحة بالي تسوى الدنيا ..انشالله الظروف تمشي عدلة وياك وتتخطى ازمة البداية باقرب وقت وتقبل تحياتي...
 ابو ريم

تصفح

[0] فهرس الرسائل

[#] الصفحة التالية

الذهاب الى النسخة الكاملة