الكتابة الرصينة وثقافة الشَتيمة
ܟܬܵܒܼܬܐ ܪܲܨܝܼܢܬܵܗ̇ ܘܡܲܪܕܘܼܬܼܐ ܕܨܵܥܲܪܬܐ
ܡܠܘ̇ܐܵܐ ܦܪܝܼܣܐ ܓܵܘ ܒܹܝܬܼ ܗܲܘܦܐ ܕܥܲܢܟܵܘܐ
ܒܝܲܕ ܣܲܦܪܐ ܡܗܝܼܪܐ؛ ܪܵܒܝܼ ܚܲܕ̄ܒܼܫܵܒܐ ܣܘܼܠܵܩܐ
ܬܲܪܓܵܡܬܐ ؛ ܥܲܒܼܕܝܫܘ̇ܥ ܣܵܗ̄ܕܐ ܝܘܼܚܲܢܐ
ܩܵܪܘܼܝܐ ܘܬܲܒܥܵܢܐ ܫܲܪܝܼܪܐ ܕܒܸܩܪܵܝܐ ܝ̄ܠܹܗ ܠܲܟܬܝܼܒܼܵܬܐ ܕܲܦܝܵܫܐ ܝ̄ܠܲܝܗܝ̈ ܦܪ̈ܝܼܣܹܐ ܓܵܘ ܒܹܝܬܼ ܗܲܘܦܐ ܕܥܲܢܟܵܘܐ ܝܲܕܝܼܕܐ ܘܒܹܝܬܼ ܗܲܘܦ̈ܐ ܐ̄ܚܹܪ̈ܢܹܐ ܐܲܠܟܸܬܪ̈ܘ̇ܢܵܝܹܐ ܕܝܼܠܵܢܵܝ̈ܐ ܒܒܢܲܝ̈ ܐܘܼܡܬܲܢ ܡܢ ܟܠܲܝܗܝ̈ ܓܲܘܢ̈ܐ ܒܟܠܲܝܗܝ̈ ܫܘܼܡܵܗ̈ܐ ܫܲܦܝܼܪ̈ܐ ܡܢ ܟܲܠܕܵܝܐ ܣܘܼܪܝܵܝܐ ܐܵܬܘܼܪܵܝܐ ܒܐܸܛܪܐ ܕܲܡܠܘ̇ܐܹ̈ܐ ܘܲܥܒܲܪ̈ܝܵܬܼܐ ܘܥܘܼܩܵܒ̈ܐ ܘܦܘܼܢܵܝ̈ܐ، ܠܡܸܢܕܝܼ ܕܒܸܚܕܵܪܵܐ ܝ̄ܠܹܗ ܡܢ ܕܘܼܪ̈ܵܫܹܐ ܡܣܲܝܡܵܢ̈ܐ ܘܲܡܪ̈ܝܼܡܵܢܹܐ، ܕܝܼܠܵܢܵܐܝܼܬܼ ܠܟܠ ܡܵܐ ܕܝܼܣܝܼܪܐ ܝ̄ܠܹܗ ܒܬܲܫܥܝܼܬܲܢ ܘܝܵܪܬܘܼܬܲܢ ܘܫܘܼܡܵܗܲܝ̈ܢ ܐܘܼܡܬܵܢܵܝ̈ܐ ܘܬܲܘܕܝܼܵܬܲܢ ܡܡܲܠܠܘܼܬܼܵܢܵܝ̈ܐ(ܠܵܐܗܘ̇ܬܵܝ̈ܐ) ܥܹܕܬܵܢܵܝ̈ܐ، ܒܸܕ ܚܵܙܹܐ ܠܣܲܓܝܼܐ̈ܐ ܡܢ ܪܸ̈ܡܙܹܐ ܕ(ܡܲܪܕܘܼܬܼܐ ܕܨܵܥܲܪܬܐ) ܡܢܲܝܗܝ̈ ܒܫܲܦܝܼܪ ܕܘܼܒܵܪ̈ܐ ܘܡܢܲܝܗܝ̈ ܕܠܹܐ ܝ̄ܢܐ ܒܫܲܦܝܼܪ ܕܘܼܒܵܪ̈ܐ، ܘܒܸܕ ܡܵܛܝܼ ܒܚܲܕ̄ܟܡܐ ܥܕܵܢܵܬܼܐ ܠܘܵܬܼ ܚܲܕ̄ܟܡܐ ܡܢ ܐܵܚܘܼܢܘܵܬܲܢ ܟܲܬܵܒܼ̈ܐ ܥܲܡ ܦܵܫܵܡܬܐ ܓܘܼܒܼܪܬܵܗ̇ ܘܕܝܼܠܵܢܵܐܝܼܬܼ ܟܲܬܵܒܼ̈ܐ ܕܒܸܟܬܵܒܼܵܐ ܝ̄ܠܲܝܗܝ̈ ܒܫܸܡܵܢ̈ܐ ܥܲܡܛܵܢ̈ܐ ܟܲܕ ܒܸܡܛܵܝܐ ܝ̄ܠܲܝܗܝ̈ ܠܫܲܘܝܘܼܬܼܐ ܕܨܵܥܲܪܬܐ ܓܠܝܼܬܼܵܗ̇ ܒܡܲܦܠܵܚܬܐ ܕܚܲܫܚܵܬܼܐ ܕܠܹܐ ܝܢܐ ܚܫܝܼܚ̈ܐ ܘܠܐ ܠܚܝܼܡ̈ܐ ܒܝܼ ܟܬܵܒܼܬܐ ܒܫܲܦܝܼܪ ܕܘܼܒܵܪ̈ܐ، ܘܒܗܵـܝ ܥܸܕܵܢܐ ܠܐ ܝ̄ܢܐ ܠܚܝܼܡ̈ܐ ܥܲܡ ܐܝܼܩܵܪܐ ܕܟܲܬܵܒܼܐ ܘܩܲܢܝܵܐ ܕܒܸܣܪܵܛܐ ܝ̄ܠܹܗ ܒܝܹܗ ܠܲܟܬܝܼܒܼܵܬܹ̈ܗ ܕܣܵܝܸܡ ܐܝܼܩܵܪܐ ܠܩܲܢܝܹܗ ܘܪܸܢܝܹܗ ܘܘܵܠܹܐ ܕܗܵܘܹܐ ܦܲܪܨܘ̇ܦܐ ܡܘܼܪܕܢܐ ܒܫܲܦܝܼܪ ܕܘܼܒܵܪ̈ܐ ܩܲܕ̄ܡ ܕܗܵܘܹܐ ܟܵܬܼܘܼܒܼܐ ܡܗܝܼܪܐ ܘܟܲܫܝܼܪܐ، ܡܛܠ ܡܗܝܼܪܘܼܬܼܐ ܒܲܚܒܼܘܼܫܝܐ ܕܲܛܠܵܩܬܐ ܕܲܪܨܝܼܢܘܼܬܼܵܗ̇( ܐܲܠܪܲܨܵܢܐ) ܘܝܼܩܵܪܐ ܠܝܵܬܼܐ ܘܩܐ ܐ̄ܢܵܫ̈ܐ ܐ̄ܚܹܪ̈ܢܹܐ ܠܲܝܬܠܵܗ̇ ܫܲܘܝܘܼܬܼܐ ܒܚܘܼܫܒܘ̇ܢܝܐ ܕܫܲܦܝܼܪ ܕܘܼܒܵܪܹ̈ܐ، ܐܵܗܐ ܫܪܵܪܐ ܦܝܼܫܠܹܗ ܓܘܼܫܡܸܢܐ ܦܲܪܨܘ̇ܦܵܐܝܼܬ ܒܓܲܫܡܵܢܬܐ ܒܐܝܼܕܐ ܟܲܕ ܩܘܸܠܝܼ ܡܢܹܗ ܒܪܵܒܐ ܡܢ ܟܬܝܼܒܼܵܬܐ ܕܦܝܼܫܠܗ̄ܘ̇ܢ ܦܪ̈ܝܼܣܹܐ ܥܲܠ ܦܲܬܘܵܬܵܐ ܕܐܵܗܐ ܗܲܘܦܐ ܐܵܘ ܫܲܘܦܐ ܝܲܕܝܼܕܐ، ܗܲܘܦܐ ܕܡܲܡܬܘܼܠܹܐ ܝ̄ܠܹܗ ܒܫܲܪܝܼܪܘܼܬܐ ܡܲܡܬܵܠܬܐ ܛܵܒܼܬܵܗ̇ ܩܐ ܐܘܼܡܬܲܢ ܘܐܲܬܪܲܢ ܒܐܸܛܪܐ ܕܫܵܘܬܵܦܬܐ ܕܣܲܓܝܼܐ̈ܐ ܡܢ ܟܲܬܵܒܹ̈ܐ ܘܡܘܼܪ̈ܕܢܹܐ ܘܪܵܢܘܼܝܹܐ ܝܼܕܝܼܥ̈ܐ ܘܲܡܗܝܼܪ̈ܐ ܡܢ ܟܘܼܢܵܝ̈ܐ ܕܒܢܲܝ̈ ܥܲܡܡܲܢ ܥܝܼܪܵܐܩܵܝܐ ܓܵܘܵܝ̈ܐ ܘܒܲܪ̈ܵܝܹܐ، ܐܵܗܐ ܓܲܘܢܐ ܫܲܦܝܼܪܐ ܕܠܲܝܬ ܒܕܘܼܡܝܹܗ ܓܵܘ ܗܲܘܦ̈ܐ ܐܲܠܟܬܪ̈ܘ̇ܢܵܝܹܐ ܐ̄ܚܹܪ̈̄ܢܹܐ، ܘܐܵܗܐ ܝܼܠܹܗ ܐܝܼܩܵܪܐ ܩܐ ܟܠܲܢ ܟܲܕ ܒܹܐ̄ܡܵܪܐ ܝܘܲܚ̈ ܘܵܠܹܐ ܝ̄ܠܵܗ̇ ܥܲܠܠܲܢ ܟܠܲܢ ܐܲܚܢܲܢ ܟܲܬܵܒܹ̈ܐ ܕܕܵܒܼܩܵܚ̈ ܒܐܸܣ̈ܐ ܘܫܲܦܝܼܪ ܕܘܼܒܵܪ̈ܐ ܘܪܹܝܙܐ ܕܲܟܬܵܒܼܬܐ ܪܲܨܝܼܢܬܵܗ̇ ܘܪ̈ܲܚܩܹܝܚ ܡܢ ܫܒܼܝܼܠܐ ܕܡܲܪܕܘܼܬܼܐ ܕܨܵܥܲܪܬܐ ܠܡܲܚܙܵܝܬܐ ܕܪܸ̈ܢܝܵܢ ܘܪ̈ܥܝܵܢܲܢ، ܘܕܝܼܠܵܢܵܐܝܼܬܼ ܡܢ ܡܵܪ̈ܵܘܵܬܐ ܕܲܟܬܝܼܒܼܵܬܼܐ ܣܲܪ̈ܝܹܐ ܕܟܲܬܼܒܼܝܼ ܒܥܲܡܛܵܢܘܼܬܐ ܕܠܸܠܝܐ ܡܢ ܚܲܕ̄ܟܡܐ ܟܲܬܵܒܹ̈ܐ ܕܝܼܸܠܲܝܗܝ̈ ܡܟܘܼܣܝ̈ܐ ܠܦܵܬܲܝܗܝ̈ ܒܓ̮ܘܼܠܐ ܐ̄ܟܘܼܡܐ ܡܢ ܡܲܠܵܠ̈ܐ ܕܫܲܠܝܼܛ̈ܐ ܒܩܲܪ̈ܢܹܐ ܘܫܝܼܦܘ̇ܪ̈ܐ ܕܲܛܘܼܟܵܣ̈ܐ ܦܘ̇ܠܝܼܛܝܵܩܵܝ̈ܐ ܡܫܲܚܠܦ̈ܐ ܕܦܲܠܛܝܼ ܒܚܲܕ̄ܟܡܐ ܥܕܵܢܵܬܐ ܠܐܲܟܼܐ ܘܬܵܡܐ، ܘܘܵܠܹܐ ܕܚܵܙܹܝܚ̈ ܚܲܕ̄ ܫܒܼܝܼܠܐ ܠܲܫܝܵܦܬܐ ܡܐܲܝܟܼ ܕܵܐܢܝܼ ܟܬܝܼܒܼܵܬܼܐ ܕܡܲܣܠܘܼܝܹܐ ܝ̄ܠܲܝܗܝ̈ ܠܡܲܪ̈ܕܘܼܬܲܢ ܐܘܼܡܬܵܢܲܝܬܵܗ̇ ܘܐܲܬܪܵܝܬܵܗ̇ ܘܢܵܫܲܝܬܵܗ̇ ܘܡܲܪܕܘܼܬܐ ܕܲܩܒܵܠܬܐ ܠܐܸܚܕܵܕܹܐ ܘܲܡܝܵܩܲܪܬܐ ܕܪ̈ܥܝܵܢܹܐ ܐ̄ܚܹܪ̈ܢܹܐ ܘܚܲܝܘܼܬܐ ܒܲܫܠܵܡܐ ܥܲܡ ܐܸܚܕܵܕ̈ܐ ܘܲܡܚܵܡܲܝܬܐ ܠܲܟܬܵܒܼܬܐ ܒܲܛܒܼܝܼܒܼܘܼܬܐ ܕܫܘܼܡܵܗܐ ܠܡܲܩܪܲܒܼܬܐ ܕܬܫܡܫܬܐ ܩܐ ܡܲܪܕܘܼܬܼܐ ܐܘܼܡܬܵܢܲܝܬܵܗ̇ ܐܲܬܪܵܝܬܵܗ̇ ܩܐ ܟܠܲܝܗܝ̈ ܓܲܘܢ̈ܐ، ܐܵܗܐ ܫܒܼܝܼܠܐ ܕܩܵܡ ܙܵܥܸܦܠܝܼ ܠܲܟܬܵܒܼܬܐ ܕܐܵܗܐ ܡܠܘ̇ܐܵܐ ܬܚܘܼܬ ܐܵܗܐ ܟܘܼܢܵܝܐ ܕܡܲܒܝܘܼܢܹܐ ܝ̄ܠܹܗ ܢܘܼܟܼܪܵܝܐ ܡܢ ܚܲܕ̄ ܓܹܢ̄ܒܐ ܩܐ ܚܲܕ̄ܟܡܐ، ܐܝܼܢܐ ܡܢ ܓܹܢ̄ܒܐ ܕܲܚܙܵܝܬܲܢ ܘܪܸܥܝܵܢܲܢ ܟܹܐܢ̈ܐ ܡܲܚܙܘܼܝܹܐ ܝ̄ܠܹܗ ܠܲܫܪܵܪܐ ܠܡܸܢܕܝܼ ܕܒܸܒܪܵܝܐ ܝܼܠܹܗ ܥܒܼܵܕܵܢܵܐܝܼܬܼ ܒܨܘܼܪܬܐ ܡܲܪܥܸܫܵܢܬܵܗ̇ ܠܲܦܠܵܚܬܐ ܘܲܦܣܵܥܬܐ ܒܲܫܒܼܷܝܼܠܐ ܕܡܲܪܕܘܼܬܼܐ ܕܨܵܥܲܪܬܐ ܘܡܲܣܠܵܝܬܐ، ܘܡܸܢܕܝܼ ܕܣܲܙܓܪ̈ܵܚ ܥܲܠܠܹܗ ܟܠܲܢ ܐܲܚܢܲܢ ܟܲܠܕܵܝ̈ܐ ܘܣܘܼܪ̈ܝܵܝܹܐ ܘܐܵܬܘܼܪ̈ܝܹܐ ܒܪܹܫܘܼܬܐ ܐܵܘ ܒܨܘܼܪܬܐ ܐܸܕܝܘ̇ܡ ܝܵܘܡܐ ܡܛܠ ܝܼܘܲܚ̈ ܟܠܲܢ ܒܢܲܝ̈ ܚܲܕ̄ ܥܲܡܐ ܘܚܲܕ̄ ܐܘܼܡܬܐ ܕܝܼܬܠܲܢ ܡܕܝܼܠܵܢܵܝܘܼܬܐ ܐܘܼܡܬܵܢܲܝܬܐ ܡܐܲܝܟܼ ܐܸܡܘܵܬܐ ܐ̄ܚܹܪ̈ܢܹܐ ܕܝܼܠܲܝܗܝ̈ ܫܵܘܬܵܦ̈ܐ ܥܲܡܲܢ ܓܵܘ ܐܲܬܪܐ، ܘܕܲܠܝܼܠܘܼܬܼܐ ܠܐܵܗܐ ܡܸܢܕܝܼ ܟܹܐ ܡܟܲܦܫܝܼܠܲܢ ܣܲܓܝܼܐ̈ܐ ܡܢ ܫܵܘܬܵܦܝܵܬܐ ܡܐܲܝܟܼ ܕܝܼܠܲܝܗܝ̈ ܫܵܘܬܵܦ̈ܐ ܐ̄ܚܹܪ̈ܢܹܐ، ܡܐܲܝܟܼ ܝܼܣܘܼܪܐ ܕܚܲܕ̄ ܠܫܵܢܐ ܒܚܲܕ̄ ܐܲܒܓܵܕܘܼܬܼܐ ܘܝܼܣܘܼܪܐ ܕܡܲܪܕܘܼܬܐ ܐܘܼܡܬܵܢܲܝܬܐ ܡܫܵܘܬܵܦܬܵܗ̇ ܘܝܲܪܬܘܼܬܐ ܕܬܲܫܥܝܼܬܵܢܲܝܬܐ ܚܘܼܝܵܕܬܐ ܒܝܼܪܝܼܚܘܼܬܐ ܡܢ ܬܲܫܥܝܬܐ ܕܲܡܕܝܼܢܵܝܘܼܬܼܐ ܕܣܘܼܡܲܪ ܘܐܲܟܵܕ، ܐܲܟܵܕ ܣܲܪܓܘܼܢ ܐܲܟܵܕܵܝܐ ܥܒܲܪ ܡܕܝܼܢܵܝܘܼܬܼܐ ܕܒܵܒܹܠ ܓܲܢ̄ܒܵܪܬܵܗ̇ ܒܵܒܹܠ ܕܚܲܡܘ̇ܪܵܒܝܼ ܘܢܲܒܘ̇ܚܲܕܼܢܸܨܵܪ ܚܘܼܬܵܡܐ ܒܲܡܕܝܼܢܵܝܘܼܬܐ ܕܐܵܬܘܼܪ ܘܢܝܼܢܘܹܐ ܕܲܥܒܸܕܠܗ̄ܘ̇ܢ ܬܸܕܡܘܼܪܬܐ ܓܵܘ ܬܹܒܹܝܠ ܒܕܵܪܲܢ ܚܲܕ̄ܬܐ ܒܝܵܪܬܘܼܬܼܐ ܕܐܘܼܡܵܢܘܼܬܼܐ ܘܡܲܥܡܵܪܬܐ ܘܲܡܕܝܼܢܵܝܘܼܬܼܐ ܒܚܘܼܬܵܡܐ ܒܲܡܕܝܼܢܵܝܘܼܬܐ ܕܥܹܕܬܐ ܕܡܲܕܢܚܐ ܡܫܝܼܚܵܝܬܵܗ̇ ܩܲܕ̄ܡ ܕܲܡܦܲܠܓܼܝܼ ܗ̄ܘܵܐܠܵܗ̇ ܢܘܼܟܼܪ̈ܝܹܐ ܐܵܢ̈ܝܼ ܕܐ̄ܬܹܐܠܗ̄ܘ̇ܢ ܡܢ ܒܵܬܪ ܝܲܡܵܬܼܐ ܡܢ ܬܹܒܹܝܠ ܐ̄ܚܹܪ̄ܬܐ، ܘܝܼܣܘ̇ܪܐ ܕܚܲܕ̄ ܐܲܪܥܐ ܘܕܲܥܬܝܼܕ ܡܫܵܘܬܦܐ ܒܚܲܪܵܝܘܼܬܐ ܝܼܣܘܼܪܐ ܕܚܲܕ̄ ܬܲܘܕܝܼܬܐ، ܘܗܲܠ ܙܲܒܼܢܐ ܒܩܘܼܪܒܐ ܪܵܒܐ ܝܼܣܘܼܪܐ ܕܚܲܕ̄ ܥܹܕܬܐ ܒܚܲܕ̄ ܬܲܘܕܝܼܬܐ ܥܹܕܬܐ ܕܡܲܕܢܚܐ ܩܵܬܼܘܼܠܝܼܩܵܝܬܵܗ̇ ܫܠܝܼܚܵܝܬܵܗ̇ ܚܘܼܝܸܕܬܐ، ܟܲܕ ܒܸܓܒܼܵܪܐ ܝܘܲܚ̈ ܒܙܘܼܘܵܓܼܐ ܥܲܡܚܕܵܕ̈ܐ ܕܠܲܝܬ ܥܲܣܩܵܘܵܬܼܐ ܘܦܘܼܪ̈ܫܘܼܢܝܹܐ ܒܲܝܢܵܬܲܢ ܕܡܲܥܝܸܩܝܼ ܠܗܵܘ ܙܘܼܘܵܓܼܐ ܘܲܓܡܝܼܪܘܼܬܼܐ ܒܲܝܢܵܬܼ ܒܢܘܼܢ̈ܐ ܕܚܲܕ̄ ܐܡܘܼܬܐ، ܘܗܲܪ ܒܗܵـܝ ܥܕܵܢܐ ܐܝܼܬܼ ܬܵܡܐ ܒܲܝܢܵܬܲܢ ܥܲܣܩܵܘܵܬܼܐ ܕܝܼܠܲܝܗܝ̈ ܡܢ ܡܬܵܪܲܨܬܐ ܕܢܘܼܟܼܪ̈ܝܹܐ ܡܐܲܝܟܼ ܬܲܘܕܝܼܬܐ ܥܹܕܬܵܢܲܝܬܵܗ̇ ܡܡܲܠܠܘܼܬܼܵܢܲܝܬܵܗ̇ (ܠܵܐܗܘܼܬܝܼܵܐ) ، ܘܡܵܐ ܕܲܦܠܝܼܛܠܹܐ ܒܲܝܢܵܬܲܢ ܒܚܲܪܵܝܘܼܬܐ ܡܢ ܥܲܣܩܵܘܵܬܼܐ ܚܕܲܪ ܫܸܡܵܐ ܐܘܼܡܬܵܢܵܝܐ ܡܚܘܼܝܸܕܐ ܩܐ ܟܠܲܝܗܝ̈ ܟܘܼܝܵܢܲܢ ܐܵܦܸܢ ܕܝܼܠܲܝܗܝ̈ ܐܵܢ̈ܝܼ ܫܘܼܡܵܗ̈ܐ ܕܝܼܘܲܚ̈ ܡܫܘܼܡܗܹ̈ܐ ܒܝܼܵܝܗܝ̈ ܐܸܕܝܘ̇ܡ ܝܵܘܡܐ ܕܝܼܠܲܝܗܝ̈ ܓܵܘ ܡܲܫ̈ܛܵܚܵܢ ܦܘܼܠܝܼܛܝܼܩܵܝ̈ܐ ܒܩܵܐܹܡ ܫܸܡܵܢ̈ܐ ܬܲܫܥܝܼܬܵܢܵܝ̈ܐ ܝܼܕܝܼܥ̈ܐ ܒܫܸܪ̈ܫܲܝܗܝ ܘܫܲܦܝܼܪ̈ܐ ܘܝܼܬܠܲܢ ܐܝܼܩܵܪܐ ܒܝܼܝܵܗܝ̈، ܘܐ̄ܬܹܐܠܹܗ ܕܟܼܵܪ̈ܲܝܗܝ ܒܝܵܪܬܘܼܬܲܢ ܬܲܫܥܝܼܬܵܢܲܝܬܵܗ̇ ܡܢ ܐܲܠܦܵܝ̈ܐ ܕܫܸܢ̈ܐ ܥܲܠ ܐܲܪܥܐ ܕܒܹܝܬܼ ܢܲܗܪ̈ܝܢ ܡܩܘܼܕܲܫܬܵܗ̇، ܘܟܠܲܝܗܝ̈ ܫܒܼܝܼܩܠܗ̄ܘ̇ܢ ܚܵܬܼܡܐ ܕܨܸܒܼܥܵܬܼܐ(ܒܲܨܲܡܵܐܬ) ܓܘܼܒܼܪܹ̈ܐ ܥܲܠ ܝܲܪܬܘܼܬܲܢ ܬܲܫܥܝܼܬܵܢܲܝܬܵܗ̇ ܥܲܬܝܼܩܬܵܗ̇ ܘܚܲܕ̄ܬܵܗ̇ ܘܕܵܪܲܝܬܵܗ̇، ܘܥܲܠ ܕܐܵܗܐ ܡܸܢܕܝܼ ܡܐ ܕܝܼܬܼ ܒܲܝܢܵܬܲܢ ܡܢ ܚܘܼܠܵܦ̈ܐ ܒܝܼ ܚܙܲܝܵܬܼܐ ܘܪ̈ܢܝܹܐ ܘܚܘܼܡܣܵܢ̈ܐ ܘܪܸ̈ܥܝܵܢܹܐ ܚܕܵܪ ܣܲܗܡ̈ܐ ܙܥܘܼܪ̈ܐ ܝܼܕܝܼܥ̈ܐ ܒܐܲܪ̈ܝܼܚܵܬܲܝܗܝ ܡܢ ܝܵܪܬܘܼܬܲܢ ܘܬܲܫܥܝܼܬܲܢ ܘܡܲܪ̈ܕܘܼܬܲܢ ܢܲܗܪܹ̈ܝܢܲܝܬܵܗ̇ ܘܲܡܫܝܼܚܵܝܘܼܬܲܢ ܡܲܕܼܢܚܵܝܬܵܗ̇ ܦܝܼܫܠܗ̄ܘ̇ܢ ܦܪ̈ܝܼܣܹܐ ܘܡܘܼܬܒܹ̈ܐ ܥܲܠܠܲܢ ܒܡܲܥܸܒܕܵܢܘܼܬܼܐ ܕܐܲܝܟܸܢܘܵܬܼܐ ܡܲܦܫܸܡܵܢ̈ܐ ܡܢ ܒܵܬܪ ܥܒܲܪܬܐ ܕܢܘܼܟܼܪ̈ܝܹܐ ܒܨܸܒܘܵܬܲܢ ܥܸܕܬܵܢܵܝ̈ܐ ܒܢܝܼܫܐ ܕܦܘܼܠܵܓܼܐ ܘܲܪܕܘܼܦܝܐ ܠܙܲܒܛܵܢܬܐ ܥܲܠ ܗܲܝܡܵܢܘܼܬܲܢ ܡܫܝܼܚܵܝܬܵܗ̇ ܡܲܕܢܚܵܝܬܵܗ̇ ܝܼܠܹܗ ܐܲܚܟ̮ܝܼ ܚܘܼܠܵܦܐ ܙܥܘܼܪܐ ܘܠܐ ܝ̄ܠܹܗ ܥܸܠܕܒܼܵܒܼܘܼܬܼܐ ܘܲܩܪܵܒܼܵܐ ܐܲܡܝܼܢܵܝܐ، ܒܣܘܼܟܵܠܐ ܡܵܐ ܐܝܼܬܼ ܒܲܝܢܵܬܲܢ ܐܸܕܝܘ̇ܡ ܝܵܘܡܐ ܡܢ ܥܸܠܠܵܬܼܐ ܕܟܲܪܒܐ ܘܦܘܼܪܫܘܼܢܝܐ ܝܼܠܲܝܗܝ̈ ܚܘܼܠܵܦ̈ܐ ܓܵܘ ܚܙܲܝܵܬܼܐ ܘܪܸܢܝܐ ܘܪܸܥܝܵܢܐ ܘܚܘܼܡܣܵܢ̈ܐ ܘܠܐ ܝ̄ܠܲܝܗܝ̈ ܥܸܠܕܒܼܵܒܼܘܼܬܼܐ ܬܲܫܥܝܼܬܵܢܲܝܬܵܗ̇ ܡܐܲܝܟܼ ܕܒܸܚܫܵܒܼܐ ܝ̄ܠܲܝܗܝ̈ ܚܲܕ̃ܟܡܐ ܡܢ ܛܘ̇ܗܡܵܢܵܝ̈ܐ ܢܟܼܝܼܠ̈ܐ ܠܬܲܘܕܝܼܬܼܐ ܕܡܡܲܠܠܘܼܬܼܵܢܲܝܬܵܗ̇ ܘܲܠܫܘܼܡܵܗܐ ܐܘܼܡܬܵܢܵܝܐ ܡܢ ܟܠܲܝܗܝ̈ ܟܘܼܝܵܢ̈ܐ ܕܠܲܝܬ ܫܪܲܝܬܐ ܘܠܐ ܦܘܼܣܩܵܢܐ ܐ̄ܚܹܪ̄ܢܐ ܩܵܬܲܝܗܝ̈ ܠܲܦܠܵܛܬܐ ܡܢܲܝܗܝ̈ ܒܲܫܠܵܡܐ، ܒܫܲܪܝܼܪܘܼܬܼܐ ܡܸܢܕܝܼ ܕܥܲܒܼܕܸܝܚ̈ ܚܘܼܠܵܦܐ ܥܲܠܠܹܗ ܐܸܕܝܘ̇ܡ ܝܵܘܡܐ ܡܵܨܹܝܚ̈ ܣܲܙܓܪ̈ܚ ܥܲܠܠܹܗ ܩܘܼܕܡܹܐ ܐܹܢ ܐܝܼܬܠܲܢ ܐܸܢܝܵܬܹ̈ܐ ܨܸܦܝ̈ܐ ܘܫܲܪܝܼܪ̈ܐ، ܘܐܸܢ ܩܪܹܐܠܲܢ ܠܬܲܫܥܝܼܬܐ ܒܲܡܕܲܪܟܵܢܘܼܬܐ ܘܗܲܘܢܐ ܦܬܼܝܼܚܐ ܘܲܡܦܲܚܠܵܢܐ ܪܸܚܩܐ ܡܢ ܛܘ̇ܗܡܵܝܘܼܬܼܐ ܘܲܢܟܼܝܼܠܘܼܬܼܐ ܡܛܠ ܐܝܼܬܠܲܢ ܡܕܲܪܟܵܢܘܼܬܼܐ ܘܲܪܥܵܫܬܐ ܕܲܬܒܼܝܼܥܹܐ ܝ̄ܘܲܚ̈ ܠܚܲܕ̄ ܐܘܼܡܬܐ، ܘܡܵܐ ܕܲܡܟܵܦܸܫܠܲܢ ܡܢ ܫܵܘܬܵܦܝܵܬܼܐ ܒܠܸܫܵܢܐ ܕܵܪܵܝܐ ܝܼܠܲܝܗܝ̈ ܒܸܫ ܣܲܓܝܼܐ̈ܐ ܡܢ ܡܸܢܕܝܼ ܕܫܵܒܸܩܠܲܢ ܥܲܠ ܚܘܼܠܵܦܐ ܐܲܡܝܼܢܵܝܐ، ܐܝܼܢܐ ܒܟܠܲܝܗܝ̈ ܐܲܝܟܸܢܘܵܬܐ ܠܐ ܫܲܒܼܩܹܝܚ̈ ܠܨܸܒܘܵܬܼܐ ܕܡܲܪ̈ܚܫܝܼܠܲܢ ܘܦܵܣܥܝܼ ܒܝܼܵܢ ܕܡܵܛܝܼ ܥܲܣܩܵܘܵܬܼܐ ܒܲܝܢܵܬܲܢ ܒܪܸ̈ܥܝܵܢܹܐ ܘܪ̈ܢܝܹܐ ܘܚܘܼܡܣܵܢ̈ܐ ܠܫܲܘܝܘܼܬܼܐ ܕܥܸܠܕܒܼܵܒܼܘܼܬܼܐ ܘܲܩܪܵܒܼܵܐ، ܐܵܦ ܒܲܝܢܵܬܼ ܗܲܕܵܡ̈ܐ ܕܝܼܬܠܗ̄ܘ̇ܢ ܛܘ̇ܗܡܵܢܵܝܘܼܬܼܐ ܘܲܢܟܼܝܼܠܘܼܬܼܐ ܒܸܫ ܣܲܓܝܼ ܠܲܡܕܝܼܠܵܢܘܵܬܲܝܗܝ̈ ܬܲܘܕܝܼܬܵܢܵܝ̈ܐ ܘܲܡܡܲܠܠܘܼܬܼܵܢܵܝ̈ܐ ܘܫܸܡܵܢܲܝܗܝ̈ ܐܘܼܡܬܵܢܵܝ̈ܐ، ܘܐܵܗܐ ܣܲܒܼܪܐ ܝܼܠܹܗ ܒܵܥܘܼܬܲܢ ܡܢ ܟܠܲܝܗܝ̈ ܟܲܬܵܒܼܵܢ ܘܡܘܼܪ̈ܕܢܲܢ ܫܲܦܝܼܪ̈ܐ ܕܦܲܪ̈ܩܹܝܚ ܡܢ ܛܠܲܩܬܐ ܘܲܦܫܵܪܬܐ ܕܡܸܬܼܓܵܘܣܵܢܘܼܬܼܐ ܕܡܵܛܹܝܚ̈ ܠܝܲܡܵܬܼܐ ܠܒܲܪܝܼܐ ܕܫܲܝܢܵܝܘܼܬܼܐ ܓܵܘ ܐܲܪܥܐ ܕܐܵܒܼܵܗܵܬܲܢ ܒܹܝܬܼ ܢܲܗܪܹ̈ܝܢ،، ܠܐ ܝ̄ܠܵܗ̇ ܐܲܢܸܢܩܵܝܘܼܬܼܐ ܐܸܕܝܘ̇ܡ ܝܵܘܡܐ ܒܐܲܢܲܝ̈ ܐܲܝܟܸܢܘܵܬܼܐ ܕܲܪܕܘܼܦܝܐ ܕܐܲܡܪܹ̈ܝܚ ܡܵܐ ܒܸܕ ܡܫܲܡܗܵܚ̈ ܠܓܵܐܢܲܢ ܐܘܼܡܬܵܢܵܐܝܼܬܼ ܟܲܠܕܵܝ̈ܐ ܣܘܼܪ̈ܝܵܝܹܐ ܐܵܬܘܼܪ̈ܵܝܹܐ،؟ ܐܝܼܢܐ ܨܒܘܼܬܐ ܒܸܫ ܐܲܢܸܢܩܵܝܬܐ ܝܼܠܵܗ̇ ܕܗܵܘܹܐܠܲܢ ܪܥܵܫܬܐ ܟܠܲܢ ܕܝܼܘܲܚ̈ ܒܢܘܼܢ̈ܐ ܕܚܲܕ̃ ܐܘܼܡܬܐ ܘܟܠ ܡܵܐ ܕܗܵܘܝܐ ܡܫܲܡܗܘܼܬܼܐ ܡܢ ܐܲܢ̈ܝܼ ܡܫܲܡܗܘܼܝܵܬܹ̈ܐ ܬܲܫܥܝܼܬܵܢܵܝ̈ܐ ܫܲܦܝܼܪ̈ܐ، ܘܗܵܘܹܐ ܡܲܡܠܵܢ ܒܚܲܕ̃ ܠܸܫܵܢܐ ܘܡܲܦܠܚܹܝܚ̈ ܗܲܪ ܗܵـܝ ܐܲܒܓܵܕܘܼܬܼܐ ܒܝܼ ܟܬܵܒܼܬܐ ܕܠܸܫܵܢܲܢ، ܘܝܲܬܝܼܪ ܐܝܼܬܠܲܢ ܚܲܕ̃ ܝܵܪܬܘܼܬܐ ܘܡܲܪܕܘܼܬܼܐ ܘܲܥܒܼܵܕܹ̈ܐ ܢܲܗܪܹ̈ܝܢܵܝܹܐ ܕܝܼܠܲܝܗܝ̈ ܝܵܪܬܘܼܬܲܢ ܘܝܘܼܬܼܪ̈ܵܢܐ ܩܵܬܲܢ ܡܢ ܙܲܒܼܢ̈ܐ ܕܵܪ̈ܵܝܹܐ ܕܐܸܡܦܪܵܛܘ̇ܪܘܼܬܲܢ ܥܲܬܝܼܩܬܵܗ̇ ܕܫܘܼܬܼܐܸܣܠܵܗ̇ ܠܲܡܕܝܼܢܵܝܘܼܬܼܐ ܐ̄ܢܵܫܲܝܬܵܗ̇ ܩܲܕ̃ܡܵܝܬܵܗ̇ ܒܬܲܫܥܝܼܬܼܐ، ܟܲܕ ܫܒܼܝܼܩܠܵܗ̇ ܚܵܬܼܡܐ ܕܨܸܒܼܥܵܬܼܵܗ̇ ܓܘܼܒܼܪ̈ܐ ܥܲܠ ܝܵܪܬܘܼܬܼܐ ܐ̄ܢܵܫܲܝܬܵܗ̇ ܬܹܒܹܝܠܲܝܬܵܗ̇ ܬܚܘܼܬ ܟܠ ܫܘܼܡܵܗܐ ܕܗܵܘܹܐ ܟܲܠܕܵܝܐ ܣܘܼܪܝܵܝܐ ܐܵܬܘܼܪܵܝܐ ܩܲܕ̄ܡ ܡܫܝܼܚܵܝܘܼܬܼܐ، ܐܝܼܢܐ ܒܵܬܪ ܡܫܝܼܚܵܝܘܼܬܼܐ ܝܵܪܬܘܼܬܲܢ ܡܲܕܸܢܚܵܝܬܵܗ̇ ܕܥܹܕܬܲܢ ܡܲܕܢܚܵܝܬܵܗ̇ ܕܦܝܼܫܠܵܗ̇ ܦܪܝܼܣܬܐ ܒܠܸܫܵܢܐ ܐ̄ܣܘܼܪܝܵܝܐ ܡܢ ܝܲܡܐ ܕܨܝܼܢ ܡܲܕܢܚܵܝܐ ܘܗܲܠ ܝܲܡܵܬܼܐ ܕܝܲܡܐ ܚܘܵܪܐ ܡܸܨܥܵܝܐ ܒܡܲܥܸܪܒܼܐ ܐܵܦ ܗܵـܝ ܝܵܪܬܘܼܬܼܐ ܐܝܼܬܼ ܗ̃ܘܵܐܠܵܗ̇ ܡܲܥܸܒܕܵܢܘܼܬܼܐ ܘܲܨܒܘܼܬܼܐ ܓܲܢ̃ܒܵܪܬܵܗ̇ ܒܚܲܝܘܼܬܼܐ ܕܒܲܪܢܵܫܘܼܬܼܐ ܟܠܵܢܵܐܝܼܬܼ ܡܢ ܝܵܪܬܘܼܬܲܢ ܩܲܕ̃ܡ ܡܫܝܼܚܵܝܘܼܬܼܐ، ܡܲܠܝܵܢܬܐ ܝܠܵܗ̇ ܐܸܕܝܘ̇ܡ ܝܵܘܡܐ ܐܵܚܘܼܢܘܵܬܐ ܡܚܲܠܦ̈ܐ ܒܪ̈ܢܝܹܐ ܘܲܚܙܵܝܵܬܼܐ ܘܪܸ̈ܥܝܵܢܹܐ ܘܚܘܼܡܣܵܢ̈ܐ ܕܝܼܘܲܚ̈ ܝܵܪ̈ܘܼܬܹܐ ܢܵܡܘ̇ܣܵܝ̈ܐ ܠܝܵܪܬܘܼܬܼܐ ܘܬܲܫܥܝܼܬܼܐ ܕܐܵܒܼܵܗܵܬܲܢ ܓܲܢ̄ܒܵܪ̈ܐ ܟܡܐ ܕܝܼܠܲܝܗܝ̈ ܡܚܲܠܦ̈ܐ ܬܲܘܕܝܼܵܬܲܢ ܡܡܲܠܠܘܼܬܼܵܢܵܝ̈ܐ ܘܫܘܼܡܵܗܲܝܢ ܐܘܼܡܬܵܢܵܝ̈ܐ ܡܛܠ ܐܵܢ̈ܝܼ ܬܲܘܕܝܼܵܬܼܐ ܘܫܘܼܡܵܗ̈ܐ ܒܪܹ̈ܐ ܠܗ̄ܘ̇ܢ ܡܼܢ ܡܲܪܒܥܐ ܕܗܵـܝ ܝܵܪܬܘܼܬܼܐ ܓܲܢ̄ܒܵܪܬܵܗ̇ ܘܬܲܫܥܝܼܬܼܐ ܕܐܘܼܡܬܲܢ ܚܩܝܼܪܬܵܗ̇، ܘܡܸܢܕܝܼ ܕܲܦܝܵܫܐ ܝ̄ܠܹܗ ܟܬܝܼܒܼܐ ܡܢ ܟܲܬܼܵܒܼ̈ܐ ܠܐܲܟܼܐ ܘܬܵܡܐ ܡܢ ܒܢܲܝ̈ ܟܘܼܝܵܢ̈ܐ ܕܐܘܼܡܬܲܢ ܐܵܘ ܡܢ ܢܘܼܟܼܪ̈ܵܝܹܐ ܒܲܙܥܵܦܝܵܬܼܐ ܕܚܲܣܵܡܘܼܬܼܐ ܘܲܣܢܵܝܬܐ ܘܛܘ̇ܗܡܵܝܘܼܬܼܐ ܬܲܘܕܝܼܬܵܢܲܝܬܵܗ̇ ܘܐܘܼܡܬܵܢܲܝܬܵܗ̇ ܘܲܡܕܝܼܠܵܢܘܵܬܼܐ ܐ̃ܚܹܪ̈̃ܢܹܐ ܡܐܲܝܟܼ ܫܲܠܸܡܘܵܬܼܐ (ܘܸܠܵܐܵܬ) ܦܘܼܠܝܼܛܝܼܩܵܝ̈ܐ ܕܓܲܒ̈ܐ ܕܝܲܬܼܪܘܼܢܹܐ ܝ̄ܠܹܗ ܡܸܢܝܵܢܲܝܗܝ̈ ܝܵܘܡܐ ܒܵܬܪ ܝܵܘܡܐ ܒܲܫܪܵܪܐ ܐܵܗܐ ܥܒܼܵܕܐ ܠܐ ܝ̄ܠܹܗ ܫܒܼܘܼܩ ܡܢ ܥܲܡܲܠܝܼܬܐ ܕܕܪܵܝܬܐ ܕܙܲܝܬܐ ܥܲܠ ܢܘܼܪܐ ܠܝܲܬܝܼܪܘܼܬܼܐ ܕܠܵܗܐ ܕܢܘܼܪܐ ܕܡܵܩܸܕܼ ܩܐ ܟܠܲܝܗܝ̈ ܕܠܐ ܦܘܼܪܫܘܼܢܝܐ، ܘܐܵܗܐ ܥܲܡܲܠܝܼܬܐ ܠܹܐ ܚܲܨܕܵܚ̈ ܡܸܢܵܗ̇ ܫܒܼܘܼܩ ܝܲܬܝܼܪ ܡܢ ܦܘܼܪܫܘܼܢܝܐ ܘܦܘܼܠܵܓܼܐ ܘܲܪܕܘܼܦܝܐ ܘܡܲܪܘܵܚܬܐ ܠܗܲܘܬܼܐ ܕܚܘܼܠܵܦ̈ܐ ܒܪܸ̈ܥܝܵܢܹܐ ܘܪ̈ܢܝܹܐ ܘܚܘܼܡܣܵܢ̈ܐ ܚܕܵܪ ܣܵܗܡ̈ܐ ܬܪܲܝܵܢܹܐ ܘܒܵܬܪ ܗܵܕܹܝܟܼ ܡܫܵܢܲܝܬܵܝܗܝ̈ ܠܚܘܼܠܵܦ̈ܐ ܘܥܸܠܕܒܼܵܒܼܘܼܬܼܐ ܬܲܫܥܝܼܬܵܢܲܝܬܵܗ̇ ܕܡܵܘܕܝܼ ܠܲܛܠܵܩܬܲܢ ܘܚܘܼܣܪ̈ܵܢܲܢ ܠܙܸܕܩܵܢ ܐܘܼܡܬܵܢܵܝ̈ܐ ܢܵܡܘ̇ܣܵܝ̈ܐ ܘܙܲܒܛܵܢܬܐ ܠܐܝܼܬܘܼܬܐ ܐܘܼܡܬܵܢܲܝܬܵܗ̇ ܕܐܘܼܡܬܲܢ ܓܵܘ ܐܲܪܥܐ ܕܐܲܬܪܐ ܕܒܵܒܵܘܵܬܐ ܘܣܵܒܼ̈ܐ ܐܲܪܥܐ ܕܒܹܝܬܼ ܢܲܗܪ̈ܝܢ ܐܲܪܥܐ ܕܲܡܕܝܼܢܘܵܬܼܐ ܡܫܲܡܗܹ̈ܐ، ܠܦܘ̇ܬܼ ܐܵܗܐ ܥܸܠܬܼܐ ܘܒܝܼ ܚܘܼܒܐ ܨܸܦܝܐ ܒܸܩܪܵܝܐ ܝ̄ܘܲܚ̈ ܩܐ ܐܵܚܘܼܢܘܵܬܲܢ ܟܲܬܵܒܹ̈ܐ ܡܝܲܩܪ̈ܐ ܡܢ ܟܠܲܝܗܝ̈ ܟܘܼܝܵܢ̈ܐ ܕܐܘܼܡܬܲܢ ܓܵܘܵܝ̈ܐ ܘܒܲܪ̈ܵܝܹܐ ܕܒܸܟܬܵܒܼܐ ܝ̄ܢܐ ܓܵܘ ܕܐܵܗܐ ܗܲܘܦܐ ܝܲܕܝܼܕܐ ܘܗܲܘܦ̈ܐ ܦܪ̈ܝܼܫܹܐ ܕܐܘܼܡܬܲܢ ܕܪܲܚܩܝܼ ܡܼܢ ܟܬܵܒܼܬܐ ܒܲܫܒܼܝܼܠܐ ܕܒܸܪܕܼܵܝܐ ܝ̄ܠܹܗ ܒܚܘܼܬܵܡܐ ܓܵܘ ܪܕܵܝܬܐ ܕܡܲܪܕܘܼܬܼܐ ܕܨܵܥܲܪܬܐ ܕܪܵܕܝܐ(ܐܲܠܡܘܼܗܲܕܼܲܒܐ) ܘܲܒܗܸܦܟܐ، ܫܒܼܝܼܠܐ ܕܲܫܡܵܛܬܐ ܘܲܨܦܵܚܬܐ ܕܘܼܒܵܢܬܵܗ̇ ܒܡܲܦܠܵܚܬܐ ܕܚܲܫܚܵܬܼܐ ܡܘܼܣܠܝܼ̈ܐ ܕܠܐ ܝܠܲܝܗܝ̈ ܚܫܝܼܚ̈ܐ ܒܐܘܼܡܵܢܘܼܬܐ(ܡܸܗܢܵܐ) ܕܲܟܬܵܒܼܬܐ ܪܲܨܝܼܢܬܵܗ̇ ܘܪܵܕܝܐ ܘܠܹܐ ܚܲܫܚܝܼ ܒܫܲܪܝܼܪܘܼܬܼܐ ܕܐܹܓܵܪܬܐ ܕܩܲܢܝܐ ܟܡܐ ܕܗܵܘܝܼ ܡܚܲܠܦ̈ܐ ܒܡܸܢܝܵܢ̈ܐ ܕܪ̈ܥܝܵܢܹܐ ܘܪ̈ܢܝܹܐ ܘܚܘܼܡܣܵܢ̈ܐ ܚܕܵܪ ܟܠ ܡܠܘ̇ܐܵܐ ܘܡܐ ܕܗܵܘܹܐ، ܘܲܦܣܵܥܬܐ ܠܓܹܢ̄ܒܐ ܕܲܫܒܼܝܼܠܐ ܕܒܘܼܚܵܢܐ ܒܲܢܝܵܢܐ ܘܕܘܼܪܵܫܐ ܕܐܲܚܵܝܘܼܬܼܐ ܡܣܵܝܡܵܢܐ ܘܲܩܪܵܒܼܐ ܕܥܸܠܬܼܐ ܒܥܸܠܬܼܐ ܘܲܒܡܲܕܵܥܬܼܵܐ ܫܲܪܝܼܪܬܵܗ̇ ܠܲܡܛܵܝܬܐ ܠܐܲܝܟܸܢܵܝܘܼܬܼܐ ܫܲܦܝܼܪܬܵܗ̇ ܡܢ ܩܲܪܒܵܢܬܐ ܘܒܵܪܡܵܝܬܐ ܒܫܵܘܬܵܦܬܐ ܥܲܡܚܕܵܕܹ̈ܐ، ܥܲܡ ܠܚܝܼܡܘܼܬܼܐ ܕܪ̈ܥܝܵܢܹܐ ܘܚܘܼܡܣܵܢ̈ܐ ܠܟܠ ܡܠܘ̇ܐܵܐ ܕܗܵܘܹܝܚ̈ ܡܚܲܠܦ̈ܐ ܥܲܠܠܹܗ ܘܗܵܘܹܐ ܝܼܣܝܼܪܐ ܒܝܲܪܬܘܼܬܲܢ ܘܬܲܫܥܝܼܬܲܢ ܘܬܲܘܕܝܵܬܲܢ ܡܡܲܠܠܘܼܬܼܵܢܵܝ̈ܐ ܥܹܕܬܵܢܵܝ̈ܐ ܡܝܲܩܪ̈ܐ ܒܢܝܼܫܐ ܕܡܲܥܝܵܩܬܐ ܘܡܲܒܨܵܪܬܐ ܠܡܲܫܛܵܚ̈ܐ ܕܚܘܼܠܵܦ̈ܐ ܘܡܲܪܘܵܚܬܐ ܠܡܲܫܛܵܚ̈ܐ ܡܫܵܘܬܦ̈ܐ ܒܲܝܢܵܬܲܢ، ܘܦܲܠܚܵܚ̈ ܠܫܲܬܼܐܵܣܬܐ ܕܡܲܪܕܘܼܬܼܐ ܕܲܡܝܲܩܵܪܬܐ ܘܲܩܒܵܠܬܐ ܠܪܸܥܝܵܢܐ ܐ̄ܚܹܪ̄ܢܐ ܒܲܓܡܝܼܪܘܼܬܼܐ ܕܚܘܼܡܣܵܢܹ̈ܗ ܘܲܡܕܝܼܠܵܢܘܵܬܹܗ ܕܠܐ ܡܲܣܠܵܝܬܐ، ܘܩܲܕ̃ܡ ܟܠ ܚܲܒܪܐ ܘܟܠ ܦܸܬܼܓܵܡܐ ܘܟܠ ܡܲܡܠܐ ܥܲܡܚܕܵܕܹ̈ܐ ܘܐܝܼܡܵܢ ܕܟܲܬܒܼܵܚ̈ ܠܝܵܪܬܘܼܬܲܢ ܘܡܲܪܕܘܼܬܲܢ ܘܬܲܫܥܝܼܬܲܢ ܘܵܠܹܐ ܕܕܵܟܼܪ̈ܚ ܕܐܲܚܢܲܢ ܟܠܲܢ ܒܟܠܲܝܗܝ̈ ܟܘܼܝܵܢܲܢ ܘܬܲܘܕܝܼܵܬܲܢ ܥܹܕܬܵܢܵܝ̈ܐ ܡܫܲܚܠܦ̈ܐ ܘܲܒܟܠܲܝܗܝ̈ ܡܫܲܡܗܘܼܝܵܬܲܢ ܐܘܼܡܬܵܢܵܝ̈ܐ ܝܼܘܲܚ̈ ܒܢܘܼܢ̈ܐ ܕܲܚܕܐ ܐܘܼܡܬܐ ܒܬܲܫܥܝܼܬܼܐ ܘܐܲܪܥܐ ܒܕܲܥܒܲܪ ܘܩܵܐܹܡ، ܘܝܼܘܲܚ̈ ܒܢܘܼܢ̈ܐ ܕܲܚܕܐ ܥܹܕܬܐ ܘܝܵܪ̈ܘܼܬܹܐ ܕܥܹܕܬܐ ܕܡܲܕܢܚܐ ܓܲܢ̄ܒܵܪܬܐ ܘܡܲܡܠܲܢ ܝܼܠܹܗ ܚܲܕ̄ ܡܲܡܠܐ ܕܟܹܐ ܥܲܒܼܕܹܝܚ ܒܝܹܗ ܟܠܲܝܗܝ̈ ܛܲܟܼܣ̈ܐ ܥܹܕܬܵܢܸܝ̈ܐ ܡܢ ܩܲܕܝܡܘܼܬܼ ܝܵܘܡܵܬܼܐ ܘܗܲܠ ܐܸܕܝܘ̇ܡ ܝܵܘܡܐ ܟܡܐ ܕܗܵܘܝܼ ܡܫܲܡܗܘܼܝܵܬܲܢ ܡܫܘܼܚܠܦ̈ܐ ܐܸܕܝܘ̇ܡ ܝܵܘܡܐ، ܘܲܫܒܘܼܩ ܕܵܟܼܪ̈ܵܚ ܐܲܡܝܼܢܵܐܝܼܬܼ ܠܨܸܒܘܵܬܼܐ ܕܝܼܠܲܝܗܝ̈ ܡܟܵܦܘܼܫܲܢ ܒܫܵܘܬܵܦܝܵܬܼܐ ܐܘܼܡܬܵܢܵܝ̈ܐ ܘܬܲܘܕܝܼܬܵܢܵܝ̈ܐ ܒܸܫ ܣܲܓܝܼܐ̈ܐ ܝܼܠܲܝܗܝ̈ ܡܢ ܨܸܒܘܵܬܼܐ ܕܦܲܪ̈ܫܝܼܠܲܢ، ܘܫܒܘܼܩ ܗܵܘܹܝܚ̈ ܐܲܡܝܼܢܵܐܝܼܬܼ ܪܸܚܩܐ ܡܢ ܣܸܪܛܐ ܕܲܡܫܵܢܹܐ ܠܚܘܼܠܵܦ̈ܐ ܦܫܝܼܛ̈ܐ ܕܝܼܠܲܝܗܝ̈ ܒܲܝܢܵܬܲܢ ܒܪ̈ܥܝܵܢܹܐ ܘܪ̈ܢܝܹܐ ܘܚܘܼܡܣܵܢ̈ܐ ܥܲܠ ܥܸܠܕܒܼܵܒܼܘܼܬܼܐ ܐܘܼܡܬܵܢܲܝܬܵܗ̇ ܘܬܲܘܕܝܼܬܵܢܲܝܬܵܗ̇ ܒܐܲܡܝܼܢܵܝܘܼܬܼܐ ܒܥܸܠܬܼܐ ܕܲܣܢܝܼܕܹܐ ܝ̄ܘܲܚ̈ ܠܡܲܪܕܘܼܬܼܐ ܕܨܵܥܲܪܬܐ ܘܡܲܣܠܵܝܬܐ ܓܵܘ ܟܬܝܼܒܼܵܬܲܢ ܘܕܘܼܪܵܫܲܢ ܘܥܘܼܩܵܒܲܢ ܘܲܥܒܲܪ̈ܝܵܬܲܢ ܘܦܘܼܢܵܝ̈ܐ ܕܲܪ̈ܩܘܼܒܼܠܵܝܹܐ ܕܠܲܝܬܠܗ̄ܘ̇ܢ ܟܲܝܠܐ ܘܕܝܼܠܲܝܗܝ̈ ܣܢܝܼܩ̈ܐ ܠܐܸܣ̈ܐ ܦܫܝܼܛ̈ܐ ܠܐܝܼܩܵܪܐ ܕܲܟܬܝܼܒܼܵܬܼܐ ܪ̈ܲܨܝܼܢܹܐ، ܡܛܠ ܐܵܗܐ ܨܒܘܼܬܼܐ ܙܝܵܢܐ ܝܼܠܹܗ ܒܸܫ ܣܲܓܝܼ ܩܐ ܟܠܲܢ ،،
ܬܲܪܓܵܡܬܐ ؛ ܥܲܒܼܕܝܼܫܘ̇ܥ ܣܵܗ̄ܕܐ ܝܘܼܚܲܢܐ
