المحرر موضوع: حكايا العم ((وجدان)) في ديوان الحاج ((مردان)) عد وعد ونشوف ياهو اكثــــــــــــر((فلوس))؟؟؟-ح5  (زيارة 1082 مرات)

0 الأعضاء و 1 ضيف يشاهدون هذا الموضوع.

غير متصل حميـد الحريزي

  • عضو فعال جدا
  • ***
  • مشاركة: 305
    • مشاهدة الملف الشخصي
    • البريد الالكتروني


حكايا العم ((وجدان)) في ديوان  الحاج ((مردان))

عد وعد ونشوف  ياهو اكثــــــــــــر((فلوس))؟؟؟-ح5



 
دخل العم وجدان  الديوان  دون ان يلقي السلام ، وقد كانت  جيوب سترته  ((مگلوبه عله البطانه ))، وهو يردد اغنية
عد وعد ونشوف ياهو اكثر فلوس ..... جيبي فرغ يا((هوش))* ، جيبك ذهب متروس
هذا وقد لاحظ الحضور ان  في يد  العم ((وجدان)) سيكاره  ((مزبن))، مما اثار استغرابهم هذا  الحال كثيرا ، عدم السلام ، والجيوب المقلوبه ، وسيكارة  ال((مزبن))، وجداحه  ام الفتيله،  ومالذي يقصده  ب((هوش))ـ اشارة الى وزير ماليتنا  هوش يار زيباري
ما  ان  اخذ مكانه  من الديوان  ، حتى بادره   الگهوجي   بطاسة ماء ، واردفها  بفنجان قهوة  ........
رد  وجدان على اصباحات الحضور  بصوت  مبحوح ، ومزاج مجروح ، فالتفت اليه  الحاج ((مردان))  متسائلا :-
خويه  وجدان  شنو  القضيه اليوم  اشو لاسلام  ولا كلام  وخلگك ضيج ،  وطابنه  تغني ، وجيوبك  مكلوبه ،  وجگايرك مزبن .......
أي والله   عمي  (وجدان ))  صدگ  انته اليوم حيرتنه  ماتكللنه شنهو السالفه ؟؟؟
 اخرج وجدان  من صدره   دخان لهيب  نار تعتمل   داخل  صدره  الموجوع ، نافثا  نفسا  قويا  من دخان  سيكارة 00المزبن))، تنحح  ثم  قال :-
 عمي  تخلوها  تظل عله هل الحال ، نكول نعمه  ونحمد الله ونشكره ،  خاف اجيكم يوم من الايام عريان ، وادخن  ورگ صفصاف  ،وغني  بطور منكوب
 ((مكرود نايم بالشمس ......ا تحلم بكطان   ضيعت  الدبس))
عمي وجدان  اذكر الله  شنهي القضيه ؟؟
بويه  انتم تدرون  انه  رجال  عطال بطال  من يوم  الذبيت المسحاه  ومات النخل  وصبخت الگاع ...... معتمد  عله  وليدي((سرحان)) الله يچرم  موظف  عند الحكومه ، وعنده مره  وخمس فروخ  دوم فاكين حلوگهم مثل العصافير ...
من يجيب المعاش ، يطي نص منه ايجار  للبيت ،  ونطلعله قوايم الماي والكهرباء  ولا  واللطيفه  يريدون من عدنه  فلوس حراسه .....، ويشتريلي  دواء الضغط  والقرحه  وكطره  لعيوني .... والباجي يطي لمريته يادوب  ساد  عيشتنه وعساكم  ما عشتوه ،  من صار   كيلو البصل   بالف  ونص ، اغله من الموز ..... فكمن نغمس  موز وخبز  والبصل  متفلكح يضحك علينه  ضامينه  خاف يجينه خطار نسويله  ((وشواشه )).
كل هذا وﮔلنه  ميخالف  .. اشو  هذا السمونه  (( هوش))   كام كل شهر ياخذله كمشه من المعاش ... أي أي  هو   هوش  يار ... أي  ولكم  هذا  يار((جار))   عله  المعاش  كلش  مره ضريبه  ومره  حشد  ومره  اعمار الانبار  ومره  تكالب  اجتماعي  ، أي  هيه هاي  تكافل  اجتماعي ، وكام مايسد نص  مصروفنه  .... والولد  محتار شيسوي ؟؟؟
وهل تشوفون  آنه مسوي  تقشف  للكشر ،  ولاني   جنت  اعرف هذا الراح ايصير بينه  من وره  امريكا  وربعه  الحراميه  اهل العمايم والافنديه ،  جنت ضاملي شده من جكاير المزبن ،  وحافظ  هاي الجداحه ام الفتيله  عله  النفط ..
فنب (( ﮁبير )) الشرطي مخاطبا  وجدان :-
عمي  مو  سعر النفط  نزل  والحكومه  ماعده  فلوس ومصاريف حرب جا من يجيب الحكومه فلوس ؟؟؟
عمي  المحتاز فلوس يمد ايده للجيب  المترو س مو ايمد ايده للجيب الفارغ ها  وحده
الثانيه مو يبوگ فلوس الشعب  ويصيح  الخزينه  فارغه
والثالثه  الحكومه تملك ((200))  مﮔوار  أي  أي هو هذا  مليار دولار  حسب مايگولون صدگانهم الامريكان، وهي اكيد من فلوس الشعب الملهوفه   فليش  ما يطون منه يردون  الجيب  ((عبيس)) المابيه  ((200)) فلس ....
والله يابه قريت واحد من  فروخ المسؤولين مشتريله  قصر بلنده   ب((275))  مليون   شيسمونه  العورو   ايه   هو هذا  اليورو   والله ياعمي   هذا اني لاشايفه  ولا عرفه .....
لا وموبس هاي  يعتبون عله الفقره التگول ((باسم الدين باگونه الحراميه))
جا عمي هذا التسونه  شيسمونه  صلاة تراويح .... انفخت كروشكم  وردت خدودكم ، وصارت  عدكم  املاك  بلنده ،  وامريكا ، وباريس ومدري وين  شنهو من بيع السبح  لو  من الحملداريه ؟؟؟
هساه عرفنه شركانكم  مثل ما اسمونهم انتم ((اهل السنه)) كانزين  من زمن النظام السابق ، والكردي اقطاعي  من الله خلگه، بس انتم حفاي  من  اﮁتكم المليارات ؟؟؟
لا ودور كلساه  وطلعنه   هذا  ال((هوش)) ابو لغود  ووﮔال  ((السنه عصيبه  والحكومه ما عده  فلوس  ولازم  تدور موارد  غير النفط  حتى  تسد المصاريف ))....
عمي يا مصاريف   معاش عبيس  ((150)) الف دينار يو معاش  ريسكم الحاضر والغايب ((83)) مليون دينار ؟؟؟
ابو لغود  من كون ماكو فلوس اشو  سويتوا  مؤتمر  اسلامي  للﮔامه بعشر مليارات ؟؟؟ 
وانته رايح تداوه  بلنده !!!
ها  شتگول  بهل الحجي   ي ((يجبير ))؟؟؟
والله عمي  اني  شگول  بعد ، واحنه  ينطبق  علينه  المثل الگال :-
((رادله گرون  گصو اذانه)) و ((ردنه الزود  ردينه  بنگيصه))
وما كو غير نغني سوه :-
(( عد  وعد ونشوف  ياهو اكثر ((فلوس))
 تطون الشعب كراث  ولكم  لحم محموس ))
گوم عمي  گوم خل  نشبع  گهوه  لاباچر ما  نحصل حتى ماي  نشرب
لابو بريمر .....لابو الدمغ  راطيه  أي والله  دمغ للفقره  الماعدهم  تدبره  اللي يمشون  وره  هل  ((المقربازيه ))
حميد الحريــــــــــــزي