زنـّـوبـَـه العـوبـَـه
ميسون نعيم الرومي
زنـّـوبـَـه اويا زنـّـوبـَـه – وين افـوس المنهوبـَه؟
أكوام اشهادات اكوام – حطوهه ابإيـد العوبـَه
زنـوبه خاله اتهدي
كافي اوبسچ گعدي
مـَـتـرين السـانچ .. ردي !
*(انعالات اسلاحچ وابطاله) –لاصوره اولا چرچوبه
وين افـوس المنهوبـَه
نـاويـن اتـردّون النـوبـَه ؟
زنـّـوبـَـه اويا زنـّـوبـَـه
***
ملاّيـَـه اوچـنـتي اتـگـوليـن – رغـفـان الخبـز اتخبـزيـن
حليـب اوروبه اتروبين – اشجابچ للمجلس تحچـيـن ؟
بغداد بنت المنصور
بنت العلم اوبنت النور
بيهه المرأه چن بـنـّـور
ملفـَوفه جيتي اتهـبعيـن – جوعـّـتوْ الشعب الطيبين
ياشعبي ويـن الحوبه ؟
زنـّـوبـَـه اويا زنـّـوبـَـه
وين افـوس المنهوبـَه
***
-(تـتـلمـَّـظ) زنوبه اليوم – بالكرسي تحلم واتدوم
ذليتـوْ الشعب المـَظوم – امحسر دومه اومعـدوم
ياشعبي اصحه اواحذر !
بالإصبع لا تطمغ .. فكـّر!
باعـوْ ارضك والأنهر
جوگة غـربان اوبـوم – نـهـبـوْ ثرواتك بالكوم
زنـّـوبـَـه اويا زنـّـوبـَـه
بالشعب العبتـوْ طوبه
وين افـوس المنهوبـَه
زنـّـوبـَـه اويا زنـّـوبـَـه
----------------------------------------------------------
*(انعالات اسلاحچ وابطاله):- لقد شاهد الجميع الفديوات
التي صورت الشجار في مجلس النواب وهجوم (النايبات) بالأحذية وقناني الماء
------------------------------------------------
ســــــــــــــتوكهولم
شـــــــــــباط / 2017
