صرت مثل الثوب القديم
مگصگص او مذبوب ...
ترة الي اتقسمت مو گيعان
المتقسمة گلوب ....
ترى انك صدگ ماتنعاب
لكن القسمك معيوب ...
الليل طول عليك بظلمته
بس عودتنا بفجر بعد كل غروب
صح انطرد بيك صاحب البيت
وبقت بس للغريب الطافح ذنوب
او صح لعبو بيك شرطة او حرامية
والي الينباگ دائما هو المغلوب
شلعو كل النخل وزرعو شوك
او بچو حتى السما بدموع من حالوب
أيجوز انته صرت غير ذاك الوطن
او تغيّر بيك العشگ او ضاع المحبوب
لكن اكيد ترجع وطن معشوگ
او تبقى الغني بكثر ما انته منهوب .
