ياشارعنا القديم
شگد لعبنة بيك وشگد مشينة
وشگد سمع رصيفك سوالفنة او حچينة
جيرة عمر تنگط صبر
كل هذا او بيك مارضينة
....
ياشارعنا تذكرني لو نسيت
تري اني اول مرة بيك هويت
بعدني ذاك اليحب طلعتك
ترى اني بعدني باقي مامشيت
....
دزولي صورتك شفتك كبرت
لمعت عيوني دمع من ذكرت
بعدها الگمرة تزورك بعد ما انطب ؟
وتسولف النجمة وياك شگد ما سهرت ؟
.....
ياشارعنا بعدها الضحكة بيك ؟
بعدها صدى صياحاتنا تمر عليك ؟
اهلك مشوا او عافوك للغربة
او فرغت بيوتك وما ظل واحد امتانيك
.....
بشارعنا قصص واحلام حلوة
بشارعنا حب وعشگ بلوة
بشارعنا چنا او چانوا أهالينا
بشارعنا تغنت شمسنا غنوة
.....
شفتك اليوم بصور چنك علي زعلان
او ملامح الشوگ فضحتني يا ولهان
كوّن الزمن يرجع او يوگف أبنوب
وارجع اسولفلك چان ما چان
.....
مجنون اليگول الشارع مايحس
احنا شارعنا يتنفس نفس
يحب او يغار على السكن بي
اوشارعنا بحبه تارسنة ترس
.....
شارعنا شارع ذكريات
نمنا او صحينا بي امنيات
كبرنا واحنا بعاد متروكين غربة
من غيرك يا شارعنا ألفات مات
فرات يوسپ
