نـــــــــــــــــــــوروز
عبد الرضا حمد جاسم
يا ورد كَل للورد قدم ورد للورد
لن الورد هم ورد وبنص حديقة ورد
و يحتاج يشتم ورد
يا ورد كَل للورد
ألي يقدم ورد أكيد هوَّ ورد
و الي زرع يوم الورد
أو تعب عليه و جتهد
أكيد يجني ورد
يا ورد كَل للورد أنه أخلي ورد وانت تخلي ورد
ولمن يزيد الورد...الدنيه تصبح ورد
وكلمن يجي من بعد واقترب...ينسه التعب
ولو شاف الورد روحه ترد
لن الورد هوَّ اليخلي المحب....
شما بعد حتماً يرد... مشتاكَ يحضن ورد
يا ورد...ألي حمل لسعات شوك الورد
يفرح ويرتاح... ويسعد وينسعد...لــــو طكَ الورد
الي يحب الورد...لو عنه مجبور أبتعد
ع لبعد.... حبه يتجدد يتقد
يا ورد
عندي قصه ويه الورد
أرد أسولفها بقصد
فد يوم شفت الورد
شايله بـاقة ورد... أو واكَف بنص الورد بالبرد
أرْتبكـت...خفت...وصْفكَت من حيرتي أيد أبأيد
وتاه عني الرشد
وترددت...مكَدرت أحاجي الورد
خافن الي يصد ويرد
للبرد أُميت بس عن بعد
خايف شويه اتقرب... و شاورته متردد
هذا الورد مـا يحملك... يـا برد
بضحكه جاوبني البرد
وعله أيدي...بحنيه وعطف شد
و كَال
ما تعرف أنت الورد !!!
بكل مكان وكل وقت ينزرع....ويْقَّتِحْ وينشـرعطر...
وميهمه حر لو برد
يا ورد
فد يوم شفت الورد
ضايج... منفعل... مْحْتَدْ
وخدوده متغيره...خدٍ يختلف عن خـد
وملتوي راسه للأرض... مرتد
استفسرت ...أنصدمت
عليَّ زعلان الورد
تزعل علينه يا ورد....
زعلك يهد الحيل هد
ما جاوب الله يسَّلمه ....متعصب معاند
و بعد التوسل والأخذ و الرد
كَال...من فعل بعض البشر
بعض الورد راح يعوفنه ويشرد
كَتله كَلي شصار حته منزعج هلكَد
ما أجاوب!!
كَال... أجاوب مـــن بَعَــــــــــــــدْ
تريدني اتوسلك...كَتله... وكَدامك أنحني أو أكَعد
أرجوك سـولف...
اعرف أنت رقيق أشكَد... وما تحمل قهر متأكد
كَال :أنت مُحب و تعرف
ما يحمل أذيه الورد
ولا حمل يوم الأذيه ألأحد
كَتله تتألم أدري ...
و أدري تسامح الغفلان و الغلطان لـو يْكَطَعكْ مَتْعَمِد
كل يوم يتكرر مثل هـالمشهد
انت تحملت من هذا....أكبر...وأكثر وأشد
وبطيبه ومحبه قابلت كلمن قابــــــــــلك بالضـــــــد
وريحتك بخدودك وفرحان... تفّرح مســــتعد
جنك معاند يا ورد... وتريد عني تبتعد... وتروح مَترِدْ
يا ورد
رحمه عله روح ألي زرعك... أبقه...أتحمل...أصمد
بلكي البشر يتعلم الطيبة...وعن القساوة يرتد
و يحترم كلمن مثل حالك... لجل الحياة... كابد أو كد
ومني عهد...وعد
بس لا عليْ تزعل ...
كل وقت....أزرع بنص الورد شتلة ورد
أو لو شح عليها الماي... أسكَيها مـن ماي شريان أو وريد
وأكَعد أراقب عن بعد
بلكن طيور المحبة...تلم البشر وتسعدهم أتغرد
ومثل ما تفرح أفرح....
لو زرع كل واحد
كَدام بيته ورد
و عود يم عود...يصيـر مشتل ورد ممتد
ولو تهب نسمات عـذبه عله الـورد
تنتـشر بالكون ريحة ورد
والناس تفـرح تنسعد...وينطرد كل حقد لو يشـرد
ونصير أخوه... واحد لواحد
بالصدق والحق سند
سـاعتها أنه أعتقـد
التمايز بين واحد أو واحد....يتحدد
بمقدار العمل والجهد والإخلاص والجد
يا ورد...
أنت رافقت البشر مـن يــوم الأول ولليوم... وترافقه للغد
إنْشَرت بين البشر حب وسلام وأمان أو ود
وزلزلت الحزن والظلم والحقد
والورد احسن هديه تتقدم بكل عيد
وبكل وكت من المهد للحد
ياورد...
كل زرع من ينضج أو يمتلي...ينحني
بـس الورد لو نضج يوكَف منتصب.... أموّرد...مْتِقِد
كل زرع لـو فاته الــوكت.... وتغّير... كَالوا تلف...فِسَد
بـس الورد...يكَولون عنه ذبـل...وهـذا بيه معنى وقصد
يعني أنطه عمره....حته لعمر غيره يمد
و لن الورد لا أفْسَدْ و لا يفْسِد و لا يفْسَـد و لا فِسَدْ
يا ورد
عله كلشي أنزرع...كَالوا ينحوي ينحصد
بـس ع الورد كَالوا ينجمع ...
لن الجمع يعني أتواصل و أتحد
وكَالوا عليه شدة ورد...باقة ورد
لن بيه أشكال ألوان لا تنحصي أو تنعـد
يـا ورد
يغسل أذنوبه البشر أو يطّهر...لــو بالماي يتعَّمـد
شلون لو كل البشر...بعطر وجمال الورد لنفوسها أتْعَمِد
