ابنياتچ انذبحت سنجار
ميسون نعيم الرومي
ابنياتچ انـذبحت سـنجار
لطفال صاروا طشار - ما ضل زلم بالديار
غـَـلـِّـسـَـت كلهه ابلا حس – شنهي الجره اوشنهي الصار
لِعـْلام صامـت چـا ليش ؟ – احزابهـَه ازغـار اكـبار
حكومة لغف يا للعـار
منهو الذي يحمي الدار؟
***
عاشن ظلم شـبعـَـن هم – جرح الغدر ما يـِـنـلـَم
(حديثات) كتلوا خمسين – سـنجار غرگـَت بالدم
عالم سـكت .. ما مهتم - لا خال عـِدْهن لا عـَم
بروحي أنـَـه شبـَّـت نار
منهو الذي يحمي الدار؟
***
من بابل اوسومر وآشور - اعراقنه امشكل ألوان
قوميات بيه او اديان – من قال اوبله .. كلنه اخوان
خـِـوّان كلنه ابهالوطن – نـفرح اونقسـم لحزان
والمثل گال امن ازمان – بما تدين .. يوم اوتندان
ما اعتب .. جاي اسأل آنه اوبس ؟
شنهي الذنب لبسنجار؟
منهو الذي يحمي الدار؟
***
ضاگو ظلم شربوا ذل - والباعكم .. ريته ابسل
ريـت المسَـبـِب ينشـل – حتى الدرب مايندل
سبايه انسبوا وا ويلاه – (وينچ هيئة امم)..وين الكل؟
(لا كردي نصف ..لا سني .. لا شيعي)
لـَحـْكومـَه اولا جـار
منهو الذي يحمي الدار؟
-------------------------------------------
ذبح داعش 50 فتاة أزيدية عراقية مختطفة
يوم 26/2/2019 في منطقة الباغوز الحدودية بين العراق وسوريا
والحكومة العراقية والعام والإعلام في صمت مطبق
---------------------------------------------------------------
ســــــــــــــــــــــتوكهولم
28/ شباط / 2019
