بين الحب والكبرياء
يحيى العلاق
اتاخرتو علي.. طولتو يمه
قلقتوني شنو الشغله المهمه ؟
مومشكله احجولي اشكَال ماكَال
اشم بثيابكم ريحة مذمه
صرت ماضي ونساني ومااهمه؟
انتهى كلشي ويريد ابريله ذمه؟
آنه اتخوني ذاكرتي مرات
رحمه الولديكم هوه شسمه
حسباله يجيني الخبر وانهار
سبع سنين اظل عايش الصدمه
امشي اعلى البحر اكَضيهه صفنات
احب ضي الكَمر وتحبني نجمه
واشخبط عالرمل وابنيله ثمثال
وظل ابجي وتجي الروجه وتهدمه
ويملون اهلي من الاطباء
يتجهون بيه اعلى الائمه
خطيه هواي يحلم رايح ابعيد
وفرق مابين حلمي وبين حلمه
حلم مره احلمت جني امشي وياه
ابحلم زرت الحلم كَصيت جدمه
ناصبله مشانق حتى بالبال
بس يخطف علي طاريه اعدمه
آني وثم آني وكان من كان
اصبعين اعلى روحي مااقدمه
كَلكم عافني ويرجعلي هيهات
جا شمتاني ميسويله همه
انا البايكَـ ضواه خليه سنه ايغيب.
.وترس ريتي هواه ما حاجه اشمه
السوا سوى غيره هواي عشاكَـ
ينتظروني اأشرلهم لعلمه
بس هو صدكَـ ماكَال مشتاكَـ؟؟
.لايشتاكَـ مو فد؟ هيه قسمه
شبيه اعيوني يمكن لاحهه اتراب
ماباجي عسه ابهل لحظه تعمه
خابرته اشوكت ؟ بالغلط دكَيت
.مرتين وطلع خارج الخدمه
من يمهم فتت اي يعني وشصار
حضرته المنطقه امسجلهه بسمه!؟
كَعدت ابابهم كَلوله غلطان.
وكَع مني دمعه د نكَنت المه
ولو طالع امسلم مااحاجيه
بس ابكَلبي اكَول الله ايسلمه
تتوقعون اريد اتصالح وياه؟
ابشرفكم تالي عمري اكسرلي كلمه ؟
اشايف روحه ..اتنازل واراضيه
اذا راضيته اكَلكم وين اعزمه؟
آنه الخوش زلمه ومااطخ راس
لكن بالعشكَـ موخوش زلمه
