ذب طركاعه // صليوه//‬

[يوسف الموسوي]

ذب طركاعه // صليوه//‬

يا دار العز بيج صليوه (سالفة بيها رباط) ...
يسولف هاي القصة واحد من شيابنه الي همه الخير والبركه
يگول بزمن الخميسنات جان اكو شيخ معروف جان ساكن بقضاء المجر التابع للعمارة وعندة قصر بالعمارة فمن يصير الصيف يجي الشيخ يسكن بقصرة هو العبيد مالتة وتجي زوجتة والوصايف مالتها ووكت العصاري تنفرش الحديقة وتبدي الدلال تفور بالگهوة وتجار العمارة تسير على الشيخ وعلى هاي الحسبة الناس مستمرة
لهناااك صارت ثورة المرحوم عبدالكريم قاسم وراحت الشيوخ القصر انباع ..
ففد يوم من الايام اجة واحد من العبيد مال الشيخ للعمارة شاف القصر مال الشيخ ناس طابة وطالعة وسيارات طابگه اتعجب
لزم واحد من الجيران ونشدة عمي هو هذا موش حوش شيخ فلان كلة اي
گال چا همة الشيوخ رجعو؟؟
گلة عمي يا شيوخ يا طركاعة
هذا البيت انباع خمس مرات اكثر وهسة گاعد بيه واحد يسمونة صليوة يبيع عرگ بي وهاي الوادم تطب تشتري عرك وتطلع
عاد صاحبنة العبد ذب عگاله باب القصر وهوس
يا دار العز بيج صليوه
هسة رباط سالفتنة
هذا العراق الذي انجب العظماء والادباء والكتاب والعلماء الافذاذ وبه خط اول حرف ومهد الحضارات منذ الالاف السنين وارض الانبياء ومدفن الائمة الاطهار صار يتحكم فيه كل من هب ودب
وكل فاسد وسارق
عمي چا ما ينلام من هوسِ
يا دار العز بيك صليوه

[يوسف ابو يوسف]

ههههههههههه على اساس اللي يحكمون العراق اليوم هم من جماعه صليوه مو من جماعه المعممين واهل العكل !!! خوش رباط سالفه عجبني هوايه .
والى المزيد من هجي رباطات قويه .

                                           ظافر شَنو

[يوسف الموسوي]

احبتي بعض المصطلحات الجنوبيه لايعرفها البعض
الطركاعه المصيبه المشكله وذب ادخل نفسه اومجموعته في مصيبه

[يوسف الموسوي]

يوسف ابو يوسف تحياتي القصد من هذه السالفه الحقيقيه ليس ادخال جماعة وابعاد اخرين  وتعرف انا هناانقل ماقراته وسمعته انا لاادافع عن شخص او اتهم احد فلاتدخلنا جماعة فلان وفلان والامثال ورباط سوالفنه تضرب ولا تقاس
كنا متعايشين  كلنا في البصره والناصريه وكل مكان ما كو فرق

[متي اسو]

الاخ يوسف الموسوي

عندما نذكر سالفة يجب ان يكون الرباط دقيقا ... ‏
والان لنسأل انفسنا :‏
هل سبب الطركاعه التي المّت بالعراق كانت بفعل الذين يشربون العرق ؟

ام بفعل " المؤمنين " الحريصين على الصلوات الخمس والذين " يحرّمون " ‏شرب العرق ؟... اولئك الذين يصرخون " الله اكبر" ... و " فَلَمْ تَقْتُلُوهُمْ ‏وَلَٰكِنَّ‎ ‎اللَّهَ‎ ‎قَتَلَهُمْ ۚ وَمَا‎ ‎رَمَيْتَ‎ ‎إِذْ‎ ‎رَمَيْتَ‎ ‎وَلَٰكِنَّ‎ ‎اللَّهَ‎ ‎رَمَىٰ " عند اطلاق 
صواريخ " الرحمة " على بعضهم البعض ؟
الطركاعه وأبطالها نشاهدها واضحة امام اعيننا وضوح الشمس . ‏
متي اسو

[يوسف ابو يوسف]

يوسف ابو يوسف تحياتي القصد من هذه السالفه الحقيقيه ليس ادخال جماعة وابعاد اخرين  وتعرف انا هناانقل ماقراته وسمعته انا لاادافع عن شخص او اتهم احد فلاتدخلنا جماعة فلان وفلان والامثال ورباط سوالفنه تضرب ولا تقاس
كنا متعايشين  كلنا في البصره والناصريه وكل مكان ما كو فرق

سيد يوسف الموسوي سالفتك ما بيها رباط بالعراق العظيم ,سالفتك بيها اهانه وانتقاص من صليوه وجماعته ,وهذا الشئ واضح جداً وياليت يفتهم المسيحيين الباقين بالعراق انه محد يعترف بيهم كبشر ولهم قيمه بدليل صاحب الهوسه ,فهم في النهايه نكسين وكفار حتى لو شعلوا ابهاتهم من اجل عيون العراق ومؤمنين العراق . تريد سالفه بيها رباط من صدك ويا حال العراق الحالي ,اسمع هاي السالفة البيها رباط من صدك :

يكلك اكو محله كل ما يردون اهلها ينامون يصعد ديج واحد من الجيران عالحايط ويظل يصيح كل يوم على هاي الحالة
هذوله اهل المنطقه ضاجوا من هذا الديج و طكت ارواحهم وكالوا لازم نتخلص من هذا الديج ابو خابصها.. فراحوا مجموعه منهم على جيرانهم كالوله اليوم أنريد نعزم روحنا يمك على هذا الديج .. فكللهم صاحب الديج بيكم خير وتدللون وذبحوا الديج وتغدوا .. ليش من رجعوا لبيوتهم يريدون ينامون سمعولك 30 مليون ديج صاعدات على الحيطان وتعوعي !!!!؟
رجعوا سألوا الرجال وكالوله شنو الفلم مو جان عندك بس ديج واحد واليوم ذبحتة؟؟؟ هذوله الديوجه منين اجوي ؟؟؟
جاوبهم مو هذاك الديج جان خانك دياجه كل المنطقه ومايخليهن يعوعن .

وهسه رباط سالفتنا ... لو خليها سكته احسن .

                                              ظافر شَنو

[يوسف الموسوي]

الاخ متي المحترم انا اقصد الطركاعه من استباحو الوطن وذبحوه  ونشاهدهم يسرقون ولاذمه ولاضمير

[يوسف الموسوي]

الاخ يوسف ابو يوسف نعم كان المجرم بقبضته اقام حكمه بالحديد والنار والان صايره هيونطه مثل كلامنا بالجنوب خدعو الناس بالورع الكاذب استباحوا كل شي شكرا