ܙܸܡܪܵܐ ܕܪܵܘܹܐ ܝ݂ܠܹܗ ܡ݂ܢ ܙܸܡܪܹ̈ܐ ܝܵܪ̈ܬܘ݂ܬ݂ܵܢܵܝܹܐ ܥܲܡܵܝܹ̈ܐ ܥܲܬܝ݂ܩܹ̈ܐ ܦܪܝ݂ܫܵܐ ܒܚܲܕ݇ܟܡܵܐ ܫܲܪ̈ܒܵܬ݂ܵܐ ܕܐܘ݂ܡܬܲܢ ܐܵܬܘ݁ܪܵܝ݂ܬܵܐ: ܘܲܒܥܸܠܬ݂ܵܐ ܕܝ݂ܠܹܗ ܚܲܕ ܐܲܡܢܵܐ ܣܸܦܘܵܬ݂ܵܢܵܝܵܐ ܥܲܬܝ݂ܩܵܐ ܪܵܒܵܐ ܟܲܕ ܠܵܐ ܦܝ݂ܫܠܵܗ݁ ܝ݂ܕܝ݂ܥܬܵܐ ܐܝ݂ܡܲܢ ܘܕܵܐܟ݂ܝ݂ ܫܘ݂ܪܹܐܠܹܗ: ܘܡ݂ܢ ܫܲܪ̈ܒܵܬ݂ܵܐ ܡܫܲܡܗܹ̈ܐ ܒܐܵܗܵܐ ܙܸܡܪܵܐ ܝ݂ܠܲܝܗܝ ܛܝܵܪܹܐ ܥܠܵܝܬܵܐ ܘܲܛܝܵܪܹܐ ܬܲܚܬܵܝܬܵܐ ܘܲܬܚܘ݂ܡܵܐ ܘܒܲܪܘܲܪ: ܘܚܵܠܹܦ ܣܘ݂ܠܔܵܣܵܐ ܘܪܸܟ݂ܢܵܐ ܡ݂ܢ ܦܢܝ݂ܬ݂ܵܐ ܠܐ݇ܚܪܹܬܵܐ ܘܐܵܦ ܓܲܘ ܛܝܵܪܹܐ ܒܓܵܢܵܐ ܐܝ݂ܬ݂ ܫܘ݂ܚܠܵܦܵܐ ܟܲܕ ܐܝ݂ܬ݂ ܪܵܘܹܐ ܕܲܒܢܲܝ̈ ܠܓܸܦܵܐ ܚܲܠܦܵܗ݁ ܡ݂ܢ ܪܵܘܹܐ ܕܲܒܢܲܝ̈ ܡܵܬ݂ܵܐ ܘܐܵܦ ܐܲܫܝ݂ܬ݂ܵܐ ̇̇̇̇ ̇ ̇ ̇ ܘܲܫܲܪܟܵܐ ̇
ܣܘ̇ܓܼܐܵܐ ܕܲܡܘ݂ܫ̈ܚܵܬ݂ܵܐ ܕܪܵܘܹܐ ܝ݂ܠܲܝܗܝ ܓܲܘ ܚܲܕܘ݂ܬܵܐ ܘܲܓܙܝ݂ܪܘ݂ܬ݂ܵܐ ܘܲܚܘ݂ܒܵܐ ܘܫܲܡܲܗܬܵܐ ܘܲܦܠܵܫܵܐ ܘܲܠܒ݂ܝ݂ܒ݂ܘ݂ܬ݂ܵܐ ܘܨܲܝܕܵܐ ܘܐܵܦ ܐܝ݂ܬ݂ ܓܲܘ ܚܲܫܵܐ ܘܐܵܘܵܪܘ݂ܬܼܵܐ ܘܦܵܝܫܝ݂ ܝ݂ܕܝ݂ܥܹ̈ܐ ܡܘ݂ܫ̈ܚܵܬ݂ܵܐ ܕܪܵܘܹܐ ܕܝ݂ܠܲܝܗܝ ܬܪ̈ܝ݂ܨܹܐ ܡ݂ܢ ܬܠܵܬ݂ܵܐ ܣܸܪ̈ܛܹܐ ܘܲܠܚܝ݂ܡܹ̈ܐ ܒܟܲܝܠܵܐ ܘܩܵܦܝ݂ܬܵܐ:
ܠܵܐ ܥܒ݂ܸܪܠܵܗ̇ ܡܘ̇ܣܝ݂ܩܵܐ ܓܲܘ ܪܵܘܹܐ ܗܲܠ ܐܕܝܘ̇ܡ ܝܵܘܡܵܐ ܫܘ݂ܩ ܡ݂ܢ ܚܕ̄ܟܡܵܐ ܢܸܣܝܘ̇ܢܹ̈ܐ ܒܵܨܘ̇ܪܹ̈ܐ : ܐܠܵܐ ܙܸܡܪܵܐ ܐܸܣܵܝܵܐ ܝ݂ܠܹܗ ܕܠܵܐ ܡܘ̇ܣܝ݂ܩܵܐ ̣
ܡ݂ܢ ܙܵܡܵܪܹ̈ܐ ܕܪܵܘܹܐ ܓܲܘ ܐܬ݂ܪܲܢ ܚܲܒܝܒ݂ܵܐ ܒܝ݂ܬ ܢܲܗܪܹ̈ܝܢ ܘܲܦܪܝ݂ܫܵܐܝ݂ܬܼ ܓܲܘ ܦܢܝ݂ܬ݂ܵܐ ܕܢܵܚ݉ܠܵܐ: ܡܵܡܝ݂ ܢܒ݂ܝ݂ܵܐ ܝܲܥܩܘ̇ܒ݂ ( ܢܒ݂ܝ݂ܵܐ ܓܸܪܹܐ ) ܡ݂ܢ ܡܵܬ݂ܵܐ ܕܚܲܠܝ݂ܠܵܢܹܐ: ܘܡܵܡܝ݂ ܙܲܝܥܵܐ ܝܲܠܕܵܐ ( ܟ̰ܲܝ݂ܘ̇) ܡ݂ܢ ܡܵܬ݂ܵܐ ܕܗܹܙܵܢܹܐ ܬܲܚܬܵܝܬܵܐ ܘܡܵܡܝ݂ ܢܒ݂ܝ݂ܵܐ ܫܸܡܥܘ̇ܢ ܡ݂ܢ ܡܵܬ݂ܵܐ ܕܫܘ݂ܠܹܐ ܘܲܡܢܵܚܵܐ ܕܕܸܢܚܵܐ ܛܲܠܝܵܐ ܡ݂ܢ ܡܵܬܵܐ ܕܟܲܫܟܵܘܵܐ: ܘܗܲܪ ܗܵܕܲܟ݂ ܡܢܵܚܵܐ ܕܨܠܝ݂ܒܘ̇ ܡ݂ܢ ܡܵܬܵܐ ܕܒܸܠܡܲܢ݉ܕ ̇ ̇ ̇ ܘܲܫܲܪܟܵܐ ܕܙܵܡܵܪܹ̈ܐ ܐ݉ܚܪܹ̈ܢܹܐ ܔܵܘ ܦܸܢܝܵܬ݂ܵܐ ܡܫܲܚܠܦܹ̈ܐ ܓܲܘ ܐܲܬ݂ܪܵܐ ܘܓܲܘ ܓܵܠܘ݂ܬ݂ܵܐ ̇
ܘܩܵܐ ܛܘ݂ܦܣܵܐ ܐܵܗܵܐ ܒܲܝܬܵܐ ( ܒܲܢܕܵܐ ) ܕܪܵܘܹܐ ܥܲܠ
ܐܵܒ݂ܵܪܘ݂ܬܵܐ ܘܡܲܚܢܲܝܬܵܐ ܡ݂ܢ ܐܲܬ݂ܪܵܐ :
ܫܠܵܡܝ݂ ܠܐܲܬ݂ܪܵܐ ܕܟܸܣܠܲܝܢܝ݂
ܟܡܵܐ ܕܪܲܚܩܸܢ ܩܘ݂ܪܒܵܐ ܡܒܲܝܢܝ݂
ܓܵܘܹܗ ܫܒ݂ܝ݂ܩܹ̈ܐ ܬܟ݂ܵܪܵܝܢܝ݂
ܐܲܝܟ݂ ܒܚܙܵܝܵܐ ܝܘܸܚ ܟܲܕ ܡܵܪܵܐ ܕܐܵܗܵܐ ܒܲܢܕܵܐ ܝ݂ܠܹܗ ܪܚܝ݂ܩܵܐ ܡ݂ܢ ܐܲܬ݂ܪܹܗ ܘܲܫܒ݂ܝ݂ܩܹܗ ܐܝ݂ܢܵܐ ܠܵܐ ܝܠܹܗ ܡܨܵܝܵܐ ܕܡܲܢܫܹܐ ܠܹܗ ܘܐ݉ܡܵܪܵܐ ܝ݂ܠܹܗ: ܟܡܵܐ ܕܪܵܚܩܸܢ ܡ݂ܢ ܐܲܬ݂ܪܝ݂ ܗܲܪ ܒܸܕ ܦܵܐܹܫ ܓܲܘ ܬܲܚܡܲܢ̈ܝܵܬܝ݂ ܘܠܸܒܝ݂ ܡܛܠ ܬܵܡܵܐ ܫܒ݂ܸܩܠܝ݂ ܟܠ ܕܟ݂ܵܪ̈ܝ݂ ܘܚܸܠܡܵܢ̈ܝ݂ ܘܲܚܘ݂ܒܝ݂ ̇
ܐܵܗܵܐ ܒܲܢܕܵܐ ܝ݂ܠܹܗ ܥܲܠ ܚܘ݂ܒܵܐ ܘܡܵܚܘ̇ܙܘ݂ܬܵܐ ( ܥܵܫܝ݂ܩܘ݂ܬܵܐ ) :
ܕܹܐ ܪܚܘ̇ܡܠܹܗ ܘܡܵܠܝ݂ ܡܸܢܹܗ
ܠܗ̇ܘ ܝܵܘܡܵܐ ܕܡܲܕܟ݂ܪܲܢܹܗ
ܕܐܵܬ݂ܹܐ ܒܪܵܝܵܐ ܕܐܲܡܪܲܢܹܗ
ܒܲܢܕܵܐ ܐ݉ܚܪܹܢܵܐ ܥܲܠ ܚܘ݂ܒܵܐ :
ܒܓܲܘ ܛܘ݂ܪܵܐ ܫܡܝ݂ܥܠܝ݂ ܩܵܠܹܗ
ܐܝ݂ܕ݂ܹܗ ܥܲܠܝ݂ ܫܥܝ݂ܫܵܠܹܗ
ܟܠܝ݂ ܦܵܘܚܵܐ ܕܚܲܙܝܲܢܝ ܡܵܠܹܗ
ܡܲܚܘܘ̇ܝܹܠܹܗ ܡܵܪܵܐ ܕܐܵܗܵܐ ܒܲܝܬܵܐ ܕܸܟ݂ܪܵܐ ܐܵܘ ܢܹܩܒ݂ܵܐ ܠܲܟܡܵܝܘ݂ܬ݂ܵܐ ܕܚܲܝܠܵܐ ܕܚܘ݂ܒܵܐ ܕܐܝ݂ܬ݂ ܒܲܝܢ ܬܪܹܝܢ ܡܵܚܘ̇ܙܹ̈ܐ (ܥܲܫܝ݂ܩܹ̈ܐ) ܐܲܝܟܵܐ ܕܡܘ̇ܚܸܒܵܐ ܝܠܹܗ ܒܚܲܕ ܫܘ݂ܓܼܠܵܐ ܓܲܘ ܛܘ݂ܪܵܐ ܘܗܵܝ ܓܲܘ ܡܵܬܼܵܐ: ܐܵܘ ܐܵܦ ܗܵܝ ܩܲܪܝ݂ܒ݂ܬܵܐ ܡܸܢܹܗ: ܘܲܒܵܥܹܗ ܕܐܵܡܹܪܠܵܗ̇ ܡܸܢܕܝ݂ ܐܝ݂ܢܵܐ ܩܵܠܵܐ ܕܦܵܘܚܵܐ ܠܵܐ ܝܠܹܗ ܫܒ݂ܵܩܵܐ ܡܲܡܛܹܐ ܠܲܝܗܝ ܚܲܒܪ̈ܵܢܹܗ ܘܗܵܘ ܡܲܪܘ̇ܡܹܐ ܠܹܗ ܐܝ݂ܕ݂ܹܗ ܘܲܩܪܵܝܵܐ: ܩܵܐ ܒܘ݂ܕ ܗܵܕܲܟ݂ ܡܘ̇ܚܸܒܬܹܗ ܦܩܵܕ݂ܵܐ ܝܠܵܗ̇ ܦܵܘܚܵܐ ܩܵܐ ܕܟܵܠܹܐ ܕܫܲܡܥܵܐ ܠܗܲܡܙܲܡܬܹܗ ܘܥܵܒ݂ܕܵܗ̇ ܡܵܐ ܕܐ݉ܡܵܪܵܐ ܝܠܹܗ ܡܘ̇ܚܸܒܵܗ̇ ̇
ܘܐܵܗܵܐ ܒܲܢܕܵܐ ܓܲܘ ܚܲܫܵܐ ܘܲܦܪܲܫܬܵܐ :
ܥܵܨܸܪܬܵܐ ܘܝܵܘܡܵܐ ܚܝ݂ܫܵܐ
ܙܲܗܪܝ݂ܪܹ̈ܐ ܕܓܲܘ ܨܘ̇ܦܝ݂ܫܵܐ
ܢܫܝ݂ܩܵܐ ܠܹܗ ܒܠܸܒܵܐ ܦܝ݂ܫܵܐ
ܝܕܝ݂ܥܬܵܐ ܝܠܵܗ̇ ܟܠ ܐܘ݂ܡܬܵܐ ܒܲܥ̈ܝܵܕ݂ܵܗ̇ ܘܡܲܪܕܘ݂ܬ݂ܵܗ̇ ܘܐܲܡܢܵܗ̇ ܐܵܢܝ݂̈ ܕܟܹܐ ܡܲܪܡܝ݂ ܠܪܹܫܵܗ̇ ܓܲܘ ܐܸܡ̈ܘܵܬ݂ܵܐ: ܘܙܸܡܪܵܐ ܕܪܵܘܹܐ ܝ݂ܠܹܗ ܚܲܕ ܡ݂ܢ ܕܘ݂ܡܣܹ̈ܐ ܐܵܢܸܢܩܵܝܹ̈ܐ ܓܲܘ ܡܲܪܕܘ݂ܬܲܢ ܘܐܲܡܢܲܢ ܥܲܡܵܝܵܐ ܥܲܬܝ݂ܩܵܐ: ܘܚܲܕ ܡ݂ܢ ܐܲܣܘ݂ܪܹ̈ܐ ܐܵܢܸܢܩܵܝܹ̈ܐ ܕܐܵܣܹܪ ܠܲܢ ܒܐܲܬ݂ܪܲܢ: ܘܦܵܫܲܡܬܵܐ ܪܲܒܬܵܐ ܝܠܵܗ̇ ܡܛܠ ܥܠܲܝܡܹ̈ܐ ܕܲܒܢܲܝ̈ ܐܘ݂ܡܬܲܢ ܫܒ݂ܸܩܠܲܝܗܝ ܠܐܵܗܵܐ ܙܸܡܪܵܐ ܘܠܲܝܬ ܦܝܵܫܵܐ ܥܠܲܝܡܹ̈ܐ ܕܝܵܕܥܝ݂ ܕܙܵܡܪܝ݂ ܐܸܠܵܐ ܡܸܢܝܵܢܵܐ ܙܥܘ̇ܪܵܐ ̇ ܩܵܐ ܒܘ݂ܕ ܗܵܕܲܟ݂ ܘܵܠܹܐ ܥܲܠ ܒܢܲܝ̈ ܐܘ݂ܡܬܲܢ ܘܲܦܪܝ݂ܫܵܐܝ݂ܬ݂ ܥܠܲܝܡܹ̈ܐ ܢܛܵܪܬܵܐ ܕܙܸܡܪܹ̈ܐ ܘܲܥܝܵܕ݂ܹ̈ܐ ܕܐܲܒ݂ܵܗܵܬ݂̈ܵܐ ܩܵܐ ܕܠܵܐ ܦܵܝܫܝܼ ܡܘ݂ܢܫܝ݂ܹ̈ܐ ̇