كرهباء،،،،،،،،،فرهدونا ياجبار
ثنائية العلاقة بين ( ن.ض جبار) ..والجندي المكلف (ج. م قاسم )..
مطلع الثماننيات من القرن (المنصرم) في لسان العرب ( المنصرم ) تعني (الاستصرام) . كنا جنود في احد مراكز التدريب في الموصل قبل ان يخلق الله النجيفي وطاقمه الوطني وقبل ان ينتج لنا الاسلام السياسي شراذم عفنه من قبيل داعش .. جان ويانه جندي اسمه (قاسم) يمتلك كف ذهبية بمعنى (نكري) وجان عنده امكانية جبيرة بان (يبلف) اي واحد مهما كانت رتبته العسكرية باستثناء (ن. ض جبار) .. كان قاسم يملك امكانية كبيرة في كيفية خلق الاكاذيب وصناعة المواقف الملفقة لا لشيء سوى حصوله على اجازة من معسكر التدريب. حيث كان يتفنن بهذا الموضوع . في احدى المرات دخل الى غرفة الآمر وجان برتبة (مقدم ) اصلي مو ابو النعلجة ..وبيده عريضة يطلب بيها اجازة يذكر فيها ان شقيقه برتبة (ملازم اول) هو الان جريح في مستشفى البصرة العسكري ويحتاج دم والحقيقة ان قاسم كان عنده اخ واحد فرار من الجيش ويسكن في احد بساتين مدينة الكوت ). وافق المقدم على الطلب وقال : تروح (ن. ض جبار) يكتب لك النموذج حتى اوقعه لك .. كانه الطير وصل لغرفة (ن. ض جبار) تلك الغرفة عبارة عن كارتونات (فايبر) مبنية تحت احد السلاسم ومحتواياتها الرئيسية سرير عليه (كليم) وفوق السرير 3 بطانيات مخططه باللون الاخضر طوخ والبيجي والذي كان بالاساس ابيض اللون ومخده فوقها خاولي اصفر كانه مغسول بمادة (الكاري) وعلى الخاولي باكيت جكاير سومر ابو الجيس نفذ نصفه مكتوب عليه رقم تلفون وبجانبه شخاطة ثلاثة نجوم وطفاية جكاير كانت بالاصل علبة مرك من مصانع تعليب كربلاء (الله يرحمها) وكان تحت السرير زوج بسطال احمر زنجاري طالع بوزه مثل جرذين كبيرين ينتظران الهجوم على ما يقع من فتات صمون الجيش . وعلى الجانب لوكر حديد اذا صادف ان فتحته كانك داخل بعلوة مخضر مغلقة منذ شهر . في وسط الغرفة ميز حديد ارجله عبارة عن اربع بلوكات كانت في السابق موضعة على صدر بلال الحبشي ودخلت العراق بعد الفتح الاسلامي . وبدليتين وحده مال نزول تشبه بدلات اصدقائنا الرفاق والثانية مال عرضات وتدريب وعلى نفس الميز وباحد اطرافه طابوكة جمهوري جبيرة محفورة بعناية من الوجه وبداخل هذا الحفر سيم حديدي (هيتر) مربوطة بالكهرباء (ايام كانت الكهرباء كهرباء مو كرهباء) في لسان العرب (كر) بمعنى (يهجم) و(الهباء) بمعنى(ماكو) . وجان صاحبنا (ن. ض جبار) كاتب على باب غرفته وبخط زنجباري ( التدريب .. التدريب .. ثم التدريب ).. ياويلي اذا راى بيد جندي (موبايل) العفو اقصد راديو نوع القيثارة ستحل به اقسى العقوبات بعد مصادرة الراديو . دخل ( ج.م قاسم) تلك الغرفة واخذ تحية معدله اتهزت لها اركان الغرفة وسلم العريضة لمن لم يرد عليه التحية .. رفع (ن . ض جبار ) واحده من عينه وتاكد من خلقة قاسم (المحبوب ابو الدروب) وهذه التسمية اطلقها عليه جبار منذ الايام الاولى في المعسكر.. وقال له : شوف غيري لان آني هسه راح اطلع عندي نزول اليوم .. قال قاسم : مروتك سيدي انت ابو الكلفات وماعندي غيرك واخوية محتاج دم ولازم اروح هسه للبصرة .. أمرنا الله هكذا قال جبار واخرح من الميز ابو رجلين البلوك نموذج اجازة وصار يكتب .. وهو يكتب وعيناه على النموذج قام قاسم بحركة خاطفة وسريعة وبكفه الذهبية المعرفه دس الباكيت السومر ابو الجيس وحطه بجيبه وترك الشخاطة ام 3نجوم .. وكما تعرفون بان الانسان من يبدا بالكتابة يحتاج يدخن وباعتبار الحبيب ن ض جبار جاي يكتب قصة الحضارة ..مد ايده على الباكيت لم يجده فقط الشخاطة نظر بحيرة الى كل الموجودات وتحت المخده والخاولي فتح علوة المخضر تحت السرير ماكو بس البسطال الاحمر زنجاري صار يبحث بجيوبه ماكو ..
قاسم : ها خيرا سيدي ادور على القلم هذا كدامك .. لا والله قاسم ادور على جكايري وين صارن ماادري . جاوبه قاسم :ولا يهمك انت شدخن سيدي . كاله سومر .
قاسم : الماني ابو العلبه لو ابو الجيس لو ابو سبعة ارقام
جبار: لا والله ابو الجيس .. مد ايده الذهبية الى جيبه واخرح باكيت سومر ابو الجيس وحطه على الميز وقال بثقة كبيرة : هذا ما ترجعه والله ازعل اذا رجعته اعتبره الك سيدي . جبار فحص الباكيت من حيث وزنه والعدد وقلبه يمنه يسره وسال قاسم : هذا باكيتك .. قاسم بدون تردد نعم سيدي وهسه اعتبره مالتك . ساله ن ض جبار بقوله: قاسم هذا الباكيت انت كاتب علي رقم تلفون. - لا والله سيدي.. نظر جبار للحبيب قاسم من فوك لجوه وقام بطوله صبغ البسطال الاحمر الزنجاري وارتدى بدلة العرضات والبرية والنطاق وحط المسدس بصفحته والنموذج المكتوب على النص اعاده للميز العتيد وقال له ( تعال وياي) وعدل وكبل للمقدم وحجاله للمقدم الواقعة بما انزلت مع بعض الاضافات المطلوبة .. المقدم ضحك وكاله : جبار سويله ساعة تدريب اضافي وبعدين جيب النموذج حتى اوقعه علمود يروح يشوف اخوه .. جبار : نعم سيدي واخذ قاسم وطلع .. وجانت الساعة 12 الظهر وتموز والحمار يبول نفط بدل الدم .. الساعة 12 ليلا المقدم طلع يفتش المعسكر سمع صوت ن ج جبار وهو يعد يحسب 77894 .. .. 77895 .. اقترب شاف قاسم مسوي شناو هندي وجبار واكف بكل قيافته العسكرية فوك راسه ويحسبله لقاسم 77896 .. هاي شنو جبار كافي عاد قابل سرق منك (تريله) هو نص باكيت سومر ابو الجيس ..
اخوية ن ض جبار نحن الان لسنا بالقرن المستصرم نحن بالالفية الثالة وبزمن الديمقراطية وما بعد حداثة .. اذا نص باكيت سومر ابو الجيس نكره قاسم بلحظة غفلة منك وصلت العدد مال الشناو 77897 اذا تجي الان شكد راح يصر عدد الشناو الهندي بالنسبه للحرامية في الزمن الراهن.. ظلت بكيف الله وبكيفك وانت ابو المروه .. فرهدونا يا جبار .
