ذب طركاعه شلندخ
سالفه وبيها ربّاط
(خوال شلندخ)
كان اكو شاب اسمه شلندخ فقير عايش هوه وامه في بيت طين بقرية وعدهم نبكه (سدره) بالبيت من يجي شلندخ من الشغل تعبان ينام بفيها الظهرية ..يوم من الايام وكبل لايطلع للشغل صبحت عليه امه ..كالتله يمه انه امك أصلي وأستحرم وهاي السدره عليها عصافير يتكافشن ومرات أدنك من أكنس البيت وخاف يشوفن رجليه ..وانه بعد أمك مااتحمل حرام ...جاوبها المسكين
صار يمه تدللين اليوم السدرة تصير حطب ...
راح للشغل ورجع ..لزم فاسه وكبل على السدره ..طيحها وهو يسولف بداخله هنيال أمي على هذا الدين والالتزام ويمكن اذا يعصيلها أمر تشور بيه !!!!!
كول طاحت السدره .ورجع شلندخ لشغله اليومي يطلع الصبح ويرجع الظهر ...يم أمه المومنه ..ذاك اليوم طلع الصبح وماحصل شغل قرر يرجع للبيت من وصل ماراد يزعج أمه ويدك باب البيت لان كان يعتقد أمه خطيه تعبانه من صلاة الليل
قرر يتشلبه على الحايط ويفوت للبيت ..
المهم صعد على الحايط ونزل بالبيت وهو يمشي على أطراف أصابعه خايف لا يفزز أمه وصل للغرفه وتفاجأ بأمه واذا هي بين احضان عشيقها ووووو...
فانصدم شلندخ
ولكم هاي امي الي تستحرم من الزرازير هيج تسوي ..
فقرر شلندخ يهج ويعوف أمه لان مايكدر يحاسبها...
لف هدومه بوصله وطلع يمشي على خانك يادهر ..الى ان وصل الظهر الى منطقه بيها جامع كال خلي أصلي وارتاح بالجامع ...
شاف شيخ لحيته كلش طويله لازمها ويكنس بيها الجامع .
تعجب فساله شيخنا مو هاي المكانيس شكدها ليش تكنس بلحيتك كاله وليدي أدور ثواب ..
كاله مأجور شيخنا..
وره شويه وكبل وكت الصلاة إجه إمام الجامع يصلي بالناس جماعه بس كدامه 20 يكنسون ووراه 20 يكنسون .
شلندخ جرله واحد من جماعة الإمام كاله بروح ابوك هذا شنو
كاله هذا شيخ فلان إمام الجامع
كاله وذوله شنو الكدامه كاله ذوله يكنسون كدامه يوخرون الدود النمل خاف يسحكله وحده وتموت وتصير بذمته ...
شلندخ غص وكال هاخوش الله يبارك بيه شويه وتصيح الصايحه بالمدينه والشرطه تفتر يابه شكو
كالو خزنة الحاكم انباكت..
داخت العالم والحاكم يريد يعرفون البايك ماكو .....
شلندخ راح للقصر وطلب يشوف الحاكم كاللهم كلوله هذا رجال يعرف الحرامي ..
طبو الحرس للحاكم كالوله هيج ..
الحاكم كاللهم الحكولي بيه بساع اجو الحرس يركضون فوتو شلندخ معزز مكرم .
وصل للحاكم سلم
رد عليه السلام
كاله انته تعرف الباكني كاله اي أعرفه وما أدليك عليه الا بشرط ....
وشنو شرطك ....
كاله شرطي شكلك سوي تسوي لو أكلك إسجن إبنك كاله ميخالف ...!!!شلندخ كال للحاكم جيب الرجال اليكنس بالجامع بلحيته وذبه بالسجن ...
الحاكم كاله عمي هذا عايف المكانيس ويكنس بلحيته على مود الثواب شتحجي انته ..
كاله انا شرطت عليك
الحاكم رضخ وده الشرطه على الرجال
جابه ذبه بلسجن ...
رجع كاله جيب إمام الجامع ذبه بالسجن ..
هنا الحاكم كاله أوكف تريد تكلبها بينا عمي
هذا يخاف يسحكله دوده وتصير بذمته ...
كاله سوي مثل ماكتلك احنا متشارطين .
شيسوي الحاكم وده على إمام الجامع ذبه بالسجن
وكال لشلندخ وبعد ترا اذا ماطلعت الحرامي اكص راسك ..
شلندخ كال صار هسا ذبلك واحد من الناس الي تثق بيهم وياهم بالسجن...ذ
وده واحد من الشرطه يثق بيه ذبه وياهم بالسجن
هذا كعد قريب عليهم فات عليهم وكت همه متكابلين بالسجن إمام الجامع وصاحبه
صفن الامام وحاجه صاحبه كاله أكلك عجيب شلون عرفونه إحنه البايكين ....
الشرطي سمعهم ..
كال لجماعته أريد أشوف الحاكم طلعوه إجه للحاكم كاله همه ذوله البايكين الخزنه سمعتهم يحجون .....
الحاكم ضحك ووده على شلندخ كاله إلك التريده بس تعلمني شلون عرفتهم همه الحراميه ...
جاوبه كاله سيادة الحاكم اعفيني انه موطلعتلك البوكه ما أكدر اجاوبك ...
كاله لوتكلي شلون عرفتهم لو اذبك وياهم و اتهمك بايك وياهم ...
انحصر شلندخ وهو غريب وما إله أحد ..
كاله سيادة الحاكم ذوله خوالي .....كاله شلون خوالك ..سولفله سالفة امه و السدره والعصافير ...
ضحك القاضي وكرم شلندخ وانطاه القاسمه الله ......
هسه الي يسال على فلوس العراق نكله عمي فلوسنه عد خوال شلندخ ومااكثرهم اذا حجو بالدين يبجون من الخشوع والورع وإذا طاحوا بفلوس الفقره ماتسمعلهم صوت لمن يخلصونهن والعاقل يفتهم
إشربو چايكم لا يبرد
