ܐܵܫܝܼܬ̣ܵܐ
ܒܹܝܢ ܡܵܬ̣ܵܐ ܕܓ̰ܹܐܪܵܡܘܼܢ ܘܡܵܬ̣ܵܐ ܕܙܵܘܝܼܬ̣ܵܐ
ܓܵܘ ܛܝܵܪܹܐ ܠܬܲܝܡܢܵܐ ܕܗܲܟܵܖܹ̈ܐ ܦܢܝܼܬ̣ܵܐ
ܒܹܝܢ ܛܘܼܖܹ̈ܐ ܕܟܵܫܵܐ ܘܩܲܕܼܘܿܡܵܐ ܛܫܝܼܬ̣ܵܐ
ܬܲܡܵܢ̄ ܝܠܵܗ̇ ܝܬܝܼܒ̣ܬܵܐ ܡܵܬ̣ܵܐ ܕܐܵܫܝܼܬ̣ܵܐ
ܒܟܹܐܦܹ̈ܐ ܕܒܲܣ̈ܬܹܐ ܘܟܸܠܫܵܐ ܝܠܵܗ̇ ܒܢܝܼܬ̣ܵܐ
ܡ̣ܢ ܙܲܒ̣ܢܹ̈ܐ ܘܕܵܖܹ̈ܐ ܥܲܬܝܼܩܹ̈ܐ ܕܬܲܫܥܝܼܬ̣ܵܐ
ܐܸܡܵܐ ܕܡܵܬ̣̈ܘܵܬ̣ܵܐ ܦܝܼܫܬܵܐ ܝܠܵܗ̇ ܩܪܝܼܬ̣ܵܐ
ܒܪܵܬܵܐ ܝܠܵܗ̇ ܕܢܝܼܢܘܹܐ ܓܵܘ ܛܘܼܪܵܐ ܒܪܝܼܬ̣ܵܐ
ܡܲܕܪܲܫܬܵܐ ܝܠܵܗ̇ ܕܝܘܼܠܦܵܢܵܐ ܘܕܬܵܘܕܝܼܬ̣ܵܐ
ܒܡܵܪܝ ܓܝܼܘܲܪܓܝܼܣ ܗܲܝܡܵܢܘܼܬ̣ܵܗ̇ ܩܘܝܼܬ̣ܵܐ
ܠܫܒ̣ܲܥ ܫܲܖ̈ܒ̣ܵܬ̣ܵܐ ܦܝܼܫܬܵܐ ܝܠܵܗ̇ ܦܠܝܼܓ̣̄ܬ̣ܵܐ
ܐܝܼܬ̣ ܠܵܗ̇ ܢܲܗܪܵܐ ܘܥܲܝ̈ܢܵـܬ̣ܵܐ ܘܐܵܦ ܫܵܩܝܼܬ̣ܵܐ
ܡ̈ܝܼܵܐ ܕܬܲܠܓܵܐ ܕܕܘܝܼܠܹܐ ܝܠܵܗ̇ ܫܬܝܼܬ̣ܵܐ
ܓܲܢܬ̣ܵܐ ܝܠܵܗ̇ ܘܡ̣ܢ ܛܥܘܼܢܬܵܐ ܡܠܝܼܬ̣ܵܐ
ܚܲܒܘܼܫܹ̈ܐ ܘܖ̈ܘܼܡܵܢܹܐ ܘܥܸܢܒ̣ܹ̈ܐ ܕܣܲܢܝܼܬ̣ܵܐ
ܨܘܼܪܬܵܗ̇ ܫܲܦܝܼܪܬܵܐ ܠܦܲܪܕܲܝܣܵܐ ܕܡܝܼܬ̣ܵܐ
ܓܵܘ ܒܹܝܬ̣ ܢܝܼܣܵܢܹ̈ܐ ܫܡܲܝܵܗ̇ ܨܦܝܼܬ̣ܵܐ
ܘܓܵܘ ܣܸܬܘܵܐ ܬܚܘܿܬ̣ ܬܲܠܓܵܐ ܟܣܝܼܬ̣ܵܐ
ܒܫܲܗܖܹ̈ܐ ܘܕܘܼܟ̣ܖ̈ܵܢܹܐ ܡ̣ܢ ܪܵܘܹܐ ܪܘܝܼܬ̣ܵܐ
ܘܡ̣ܢ ܚܲܡܪܵܐ ܕܥܸܢܒ̣ܹ̈ܐ ܐ̄ܟܘܿܡܹ̈ܐ ܕܕܵܠܝܼܬ̣ܵܐ
ܘܖܸ̈ܩܕܼܹܐ ܥܲܡ ܙܸܡܖܹ̈ܐ ܘܚܲܓܵܐ ܘܒܹܝܪܝܼܬ̣ܵܐ
ܘܩܸܒ̈ܠܹܐ ܘܕܸܒ̣ܚܹ̈ܐ ܘܡܹܐܟ̣ܘܼܠܬܵܐ ܦܪܝܼܬ̣ܵܐ
ܡ̣ܢ ܕܘܼܚܘܵܐ ܕܨܲܥܖܹ̈ܐ ܒܨܲܬ̣ܪܵܐ ܘܐܹܠܝܼܬ̣ܵܐ
ܘܒܘܼܫܵܠܵܐ ܕܪܘܼܙܵܐ ܘܡܲܝܦܘܿܚܬܵܐ ܚܠܝܼܬ̣ܵܐ
ܡܸܫܚܵܐ ܘܟܲܪܵܥ̄ܐ ܥܲܡ ܕܸܒ̣ܫܵܐ ܘܟܲܟܵܪܝܼܬ̣ܵܐ
ܥܲܡ ܡܲܣܬܵܐ ܕܥܸܖ̈ܒܹܐ ܡܸܫܚܵܢܬܵܐ ܘܩܫܝܼܬ̣ܵܐ
ܘܓܘܼܒܬܵܐ ܡܛܘܿܡܸܪܬܵܐ ܕܓܵܘ ܓ̰ܘܼܒ̣ܝܼܬ̣ܵܐ
ܩܲܠܥܵܐ ܪܵܡܬܵܐ ܝܠܵܗ̇ ܓܵܘ ܫܡܲܝܵܐ ܬܠܝܼܬ̣ܵܐ
ܚܸܣܢܵܐ ܝܠܵܗ̇ ܕܐܵܫܘܿܪ ܐܲܝܟ̣ ܦܲܪܙܠܵܐ ܨܘܝܼܬ̣ܵܐ
ܒܦܲܐܬ̣ܵܐ ܕܣܲܢ̈ܝܵـܢܵܗ̇ ܒܠܒ̣ܝܼܒ̣ܘܼܬ̣ܵܐ ܟܠܝܼܬ̣ܵܐ
ܒܥܸܕܵܢܵܐ ܕܲܫܠܵܡܵܐ ܐܲܝܟ̣ ܝܵܘܢܵܐ ܘܣܢܘܿܢܝܼܬ̣ܵܐ
ܓܵܘ ܥܕܵܢܵܐ ܕܲܦܠܵܫܵܐ ܐܲܝܟ̣ ܕܸܒܵܐ ܘܐܲܪܝܼܘ̄ܬ̣ܵܐ
ܩܵܐ ܣܢܝܼܩܹ̈ܐ ܘܥܖ̈ܝܼܩܹܐ ܒܲܝܬܵܐ ܝܠܵܗ̇ ܘܓܸܦܝܼܬ̣ܵܐ
ܩܵܐ ܢܸܫܖܹ̈ܐ ܘܐܲܖ̈ܝܹܐ ܩܸܢܵܐ ܝܠܵܗ̇ ܘܡܲܪܒܘܼܥܝܼܬ̣ܵܐ
ܕܣܵܗ̈ܕܹܐ ܘܥܲܢ̈ܝܼܕܼܹܐ ܝܼܠܵܗ̇ ܡܸܢܝܘܿܚܵܐ ܘܬ̄ܫܘܝܼܬ̣ܵܐ
ܡ̣ܢ ܦܠܵܫܹ̈ܐ ܕܸܡܵܢܹ̈ܐ ܪܲܒܵܐ ܝܠܵܗ̇ ܫܗܝܼܬ̣ܵܐ
ܡ̣ܢ ܨܸܠܦܹ̈ܐ ܕܣܲܝܦܹ̈ܐ ܒܕܸܡܵܗ̇ ܝܠܵܗ̇ ܬܪܝܼܬ̣ܵܐ
ܩܵܐ ܚܙܵܝܬܵܐ ܕܒܢ̈ܘܿܢܵܗ̇ ܪܲܒܵܐ ܝܠܵܗ̇ ܨܗܝܼܬ̣ܵܐ
ܐܵܦ ܐܸܢ ܕܟܵܘܟ̣ܲܒ̣ܬ̣ܵܗ̇ ܝܼܠܵܗ̇ ܣܛܝܼܬ̣ܵܐ
ܐܝܼܢܵܐ ܫܸܡܫܵܗ̇ ܒܲܗܪܵܢܬܵܐ ܠܵܐ ܝܠܵܗ̇ ܓܢܝܼܬ̣ܵܐ
ܡ̣ܢ ܩܵܘ̈ܕܹܐ ܘܢܝܼܖܹ̈ܐ ܒܸܕ ܦܵܝܫܵܐ ܫܪܝܼܬ̣ܵܐ
ܟ̣ܵܡܝܼܣ ܓܝܼܘܲܪܓܝܼܣ
ܐܝܼܠܘܿܠ 2020
