نص غنائي
سـطر..اوسـطر
ميسون نعيم الرومي
غـنيت الك غـنوة فـرح
عينك بحـر حار الشِعـِر
حـبك سكن بين الرمش
ويه العمر شـَـب اوكبر
***
وديـت الك نجـمه اوگـمر
تضوي على ليل الشـَـعـَـر
چـِـنـْت الأمل ورده زهر
وسـط الگلب وشـم انحفر
***
وابمشـيتك لحـن اوطرب
ناي اوعزف يغوي اويمر
حچيك عسل برحي الرطب
-(بســـمة) غزل طش انتشر
***
فـَـزَّة طفـل فـَـز الگلب
نسـمة صبح طيفـك عـبر
خيط الشمس شعرك لمع
مـَـر ابعجـَـل چـَـنـَّه نـِفـَـر
***
حلم اوخطـَـف ليلة أمس
كت الدمع مـزنـَة مـطر
بچفوفي الم باقـي البقـَه
جمله اوحرف ! سطر اوسطر
سطر او .. سطر
سطر
--------------------------------
9/اكتوبر/2020
ســـــــــــــتوكهولم
