ankawa

المنتدى الثقافي => زاوية الشعر الشعبي => الموضوع حرر بواسطة: ميسون نعيم الرومي في 20:40 03/02/2021

العنوان: استحليت كرسي الحكم
أرسل بواسطة: ميسون نعيم الرومي في 20:40 03/02/2021
استحليت كرسي الحكم
ميسون نعيم الرومي
 
اهنا يمن جيت ابغفل - والچذب صاير كارك
استحليت كرسي الحكم - لعبه اوصرت للجابك
حسبالك اوتفلت تره - كلهه تصير ابـراسك
اصحه ولك ماينفعك - باچر يصير احسابك
بس بالحچي ماكو فعل - اهنا يمن جيت ابغفل
***
اهنا يـمن كلك دغـَـش - تستغبي گلي اشمالك
تضحك على كل الشعب - وامصدّگ انت ابحالك
قـَـشـْـمـَـر صرت ما تستحي - واضح تره اصرارك
جـَـوَّه العـَـبايه تـتـفـق - معروفه كلهه اسـرارك
ذيـل العـَـوَج ماينعـدل - اهنا يـمن جيت ابغفل
***
اهنا يمن ما تستحي - راسك امنـَـكـْـسَه الجارك
-(دينار) صار (ابفلس) - بس هذا خو انجازك
تتغابه مدري غـَـبي - اشكال انواع الوانك
رواتبكم اتغطي العجز - او عَ النفطـْ صار امعارك
بوگ اونهب الكم عـَمـَـل - اهنا يمن جيت ابغفل
***
لا تعتـقد ما تـِـنسأل - والله غريبه اطوارك
لتصدگ الدنيه الك - تتخله كلهه انصارك
هذا العراقي لو غضب - مو بس تره يتعارك!
تاريـخ اقره وافتهم - ما تنفعك اعـذارك
اسمعهه مني واحتمل - اهنا يمن جيت ابغفل
-----------------------------------------
2/ شباط/2021
ســــــــــــــــــــتوكهولم