عرض المشاركات

هنا يمكنك مشاهدة جميع المشاركات التى كتبها هذا العضو . لاحظ انه يمكنك فقط مشاهدة المشاركات التى كتبها فى الاقسام التى يسمح لك بدخولها فقط .


مواضيع - سبع صنايع

صفحات: [1]
1
طبعا عدكم اليوم وباجر وحاولوا تستعجلون شوية

الشغل حصرا بهذه المناطق المذكورة لان متسوة تجي من غير ولاية علمود شهر

http://newiraqradio.com/news-68.html

2
اخوان مثل متعرفون اني صارلي اسبوع بدالاس ارفنغ وعرفت هواية شغلات بامريكا وهواية انذكرت بالمنتدى ولا ضير من ان نذكرهه للفائدة

1-هنا متحتاج اتشيل وياك لاهوية ولا كلشي ولا اكو مكان ممنوع تروحله ولا حتى الجواز تشيلة ولا شفت شرطي او سيارة شرطة

2-هنا كلشي علية ضرائب يعني من تشوف سعر الحاجة فتكون بدون الضريبة ورح من تدفع تلكة الضريبة انضافت

3- سعر الاكل ارخص من العراق بغض النظر عن الحلال والحرام بس حتى الحلال ارخص من العراق والسمك لتسولفون على الرخص والانواع اله تدوخ حتى يكطعوة ويكلوة ابلاش

4-اذا عدكم اطفال اكو مطاعم بيهه العاب بس لازم تشتري اكل حتى تكدر اتطب لان الشرب ابلاش

5-معظم المجمعات كل 10 شقق بيهه غسالة ومجفف (دراير) تدخل دولار اربع قطع معدنية تغسل ومثلهن للتجفيف لان ممنوع تشر هدوم بالبالكون

6-امريكا اهم شي فيها الاطفال يعني اذا طفل بجة او عاندك بالسوك لتضوج لان محد ضايج يعني مو مثل بالعراق اذا ابنك يوكع فد شي او يكسر فد شي بمحل اتجيبة ابعجل لان اذا مجبتة بعجل رح يكولون متعرف تربي وابنك ناقص تربية هنا اذا الطفل اتعاقبة فتحرمة من فد شي يحبة لمدة ساعتين وهذا اقسى شي عدهم واي شخص بالشارع من حقة يوكفك ويحاسبك اذا ضربت ابنك هاي اذا مبلغ الشرطة عليك ومن رح يجون رح يفحصون الطفل ويشوفون اثار الضرب واذا يحجي يسألوه

7- التليفونات اشكال والتليفون اللي اشتريتة مفتوح شكد متريد تحجي داخل امريكا وانترنت ومسج وبريد صوتي ب 100$ وتدفع 50 $ بالشهر وتكدر تدفعهه اون لاين
واذا تريد تخابر العراق اكو كاردات تنزلهه وتخابر بس هاي الكاردات مال مكالمة وحدة يعني ابو ال5$ ينطيك 51 دقيقة للعراق جرة وحدة  بس اذا خابرت مرتين رح ينطيك 35 دقيقة واذا 3 مكالمات 25 دقيقة وهكذا كلما تخابر اكثر تقل الاستفادة من الكارد لذل يسموه كارد مكالمة واحدة للاستفادة القصوى منه واكو ابو الدولارين وابو ال3 وابو ال5 واذا تريد تخابر من امريكا للعراق تتدك الرقم التالي كمفتاح  011964770 او780او790 وهكذا واذا بالعكس من العراق لامريكا تدك 001 ومن ثم رقمك

8-ارقى شي هنا هو النظام المروري وبنفس الوقت صعب لذلك لازم تعرف النظام زين قبل لتسوق او اتطلع اجازة وهنا اكو هواية كتب اسئلة واجوبة حول امتحان السياقة كل حسب ولايتة

9- السوشيال سيكيورتي سهل  تروح للدائرة وتكطع تكت من الحاسبة الالكترونية ويصيحون رقمك  وينطوك وصل  ومن يخلص ايدزوة على العنوان اللي اتريدة يخلص من اسبوع وفوك

10- اكو فد شي كلش مهم ومتكدر تستغني عنة بالسيارة اسمة النافيكيتر يعني هذا تخلي بية العنوان وتمشة ورة السهم لحد ميوصلك للمكان اللي تريدة

11-بالنسبة للطبخ لتدوخون هنا اذا زوجتك طباخة ماهرة متحس باي فرق لان كلشي موجود هنا حتى الركي هنا مو بالوزن  كل الركي ب4 $ وزنهه تقريبا حكة ونص واني رحت اطبطب عليهن خالي كلي شدسوي كله احمر وحلو ومبيه حب

12- اذا تشتري من الوالمارت شغلات وبعدين تلكة شغلات ارخص تكدر تعوف الشغلات الغالية وين متريد وتاخذ الجديد  لان الوالمارت جبير ويتيه وصعبة ترجع القديم واذا دفعت فلو س ومن رجعت للبيت  لكيت فد  لبس زغير تكدر ترجعة شوكت متريد بس تحتفظ بالرسيت

13- البانزين العادي ب2.35 والمحسن 2.59  للغالون يعني تقريبا اربع لترات


14- الغراض الغالي هو الاثاث والتحفيات والمفروشات
15- الانترنت جدا سريع  يعني تتفرج بيه قنوات تلفزيونية وافلام حديثة

16 نجي على اهم نقطة وهي الشغل اني اللي داير مدايري كلهم عراقيين قدماء يعني 15 سنة وفوك وذولة كلهم مرتاحين بس ماكو واحد كاعد واراحة يعني مو ميشتغلون لا الراحة يعني يشتغل واكو بيهم شغلتين وكالوا بس ترتاح رح يشغلوني يعني اهنا الشغل يعتمد على العلاقات وبالفعل انعرض علية اشتغل مترجم بقاعدة بس لازم ابات وحاليا صعبة لان ما عندي سيارة وبعدني مكاعد بشقة والاهل بعدهم مضابطين اللغة والراتب 3000 دولار

17-تكدر تفتح حساب على الجواز وماكو داعي تنتظر السوشيال

واذا اكو جديد مرح اقصر وتتدللون

3
اخوتي احبتي

اليوم موضوعنا عن كيفية تاجير شقة بالنسبة للوافدين الجدد

وبما انه اني وافد جديد يعني معندي اي تاريخ ولا كريدت يعني الشغلة شوية صعبة

اول شي الشقق هنا مو مثل بغداد فوق محلات وتروح للدلال وتنطي القاسمة الله وتسكن بنفس اليوم لا الشقق كلها بمجمعات كبيرة وبيها وسائل راحة وخدمات متكاملة من باركات وساحات العاب ومسابح وجم ولوندري ومحلات واسواق وهواية شغلات لامجال لذكرها
وكل مجمع بي مدير ومجلس ادارة تروح للمنجر اوفس وينطيك ورقتين تمليها وبعدين تدفع مبلغ على شكل مني اوردر (المني اوردر فد شي مثل الصك مال الجوازات بس ابدال متروح للمصرف تروح لاي اسواق بس كون عدهم مني اوردر ويسويلك المني اوردر وياخذ هو دولار)

المهم شروط  التقديم

1-اما عندك جنسية
2-كرين كارد
3-سوشيال
4-i-94
وفورمات بعد بس مفتهمتهة لان ارقام مسامع بيهه

5-ورقة ثانية بيهه معلومات الضامن او الكارنتور اللي راح يكفلك واللي لازم يكون ساكن بنفس المجمع
6-اخر صك استلمه الضامن لاثبات انه مستمر على العمل وراتبه جيد

المشكلة انه بحالتي لازم اكون ساكن على الاقل شهر حتى ااجر وهذا الشرط مينطبق عليه بس تقريبا باقي الشغلات كاملة لان الفيزة بيهه رقم الكرين كارد والاي 94 الكل يستلمه بالمطار
اذا وافق مجلس الادارة على طلبي  فراح يكون شي جيد لان رح ابدي تاريخ وريكورد منذ اول اسبوع
لكن اذا رفض اكو درب لاخ انه كفيلي ياجر الشقة باسمه بس اني اسكن وهنا هو يدفع الايجار وتكون عليه ضرائب

طبعا ما انسى اكول المنظمة تنطيني صك الايجار واني اكمل عليه بحدود 80$ كل شهر
هسه اني صارلي يومين انتظر جواب مجلس ادارة المجمع والله كريم

فائدة الضامن انه اذا انت مدفعت الضامن يدفع واذا الضامن مدفع رح تسجل باد كريدت عليه وهذا اصعب شي بامريكا

شغلة لخ للعزاب يكدرون اثنين او ثلاثة ياجرون سوة ولازم تنطبق عليهم نفس الشروط اعلاه

بس بقت شغلة اني الكلام الي تكلمته عن مجمع محترم ونظيف وكلهم يشتغلون واطفالهم ينحطون بالكلب وماكو لا عصابات ولا دعارة ولا مخدرات فما ادري اذا هاي الشروط تطبق بكل الاماكن واني حاضر لاي سؤال

4
اخوتي احبتي

البارحة بعد مرتاحيت يوم عد خالي رحت للشقة واويلي يابة على اللي شفتة واللي عرفتة من اللي اقدم  مني
المهم اول مطبيت للمجمع البعيد عن سكن خالي حوالي ساعة عرفت انه هاي المنطقة ينتشرون بيهه الكانكستر يعني العصابجية (هاي شكد قديمة مال عصابجي ههههههههه) شباب مدكدكين مصاليخ والبناطير خارطة ويباوعولك بحقد مو مثل باقي الامريكان بس يضحكون بوجهك وكلهم لو من بورتريكو لو من المكسيك لو من اصول افريقية زين هاي شلون اطلع اسد يلعب لو امه محجبة المهم خالي كال متبقى ولا دقيقة بالبيت ورحنة للمنظمة والمنظمة طلعت كلش تعبانة ولكينة ناس مسحوكين من تايلند واثيوبيا وحتى العراق

المهم شفنة ولد ابن حلال عراقي يشتغل بالمنظمة وكلنالة نريد نحول كال ماطول مموقع تكدر تحول وانت تدفع الفرق وكال اني من وصلت هم سويت نفس الشي
كعدنة وي المديرة وخلت خالي يوقع على تعهد ادارة اعمالنا لحد متخلص اوراقنا وشرحولي البرامج وانطوني 75 دولار باكت مني وكالوا احنة صرفنة 430 $ على الشقة هاي تنكطع من منحة الدولة البالغة 1350$ لثلاثة اشخاص وكالو تكدر تروح للشقة وتاخذ الغراض اللي اشتريناهه

رحنة للشقة واخذنة الشغلات البيهة خير الخفيفة وعفنالهم معظم الاكل والاثاث ومرتي خافت اتطب لان فتحت الكاونتر لكت الصراصر نايمة بالكلاص والمواعين وبنص الاكل هههههههه وهية عدهه عقدة من الصراصر

ايجار الشقة 480$  وايجار الشقة الكاعد بيهه خالي 560$ يعني لازم ادفع 80$ بس بالي مرتاح بس هية الشغلة مو بهاي السهولة رحنة لادارة المجمع وانطانة ابلكيشن مليناهة ولازم ننتظر موافقة الادارة لان اني مصار لي بارفنغ بس يومين  وخالي كفلني بضمان راتبة يعني اني اذا مدفعت هو يدفع واذا هو مدفع يأثر على الكريدت مالتة وهنا اهم شي الكردت
بالمناسبة العقد 6 اشهر اول شهر بي خصم 200$

بالمناسبة سألت الولد حيدر ابو المنظمة وكال شكد متريد تخلي حساب خلي لان منظمتنة متسال واذا سألتك وتكول ما عندي حساب خلص  محد يدور وراك

هسة اني محمض على خالي وخطية ديبات عد اصدقائة اللي حايرين بينة وحتى عرضوا علية شقة ابلاش اكعد بيهة لان همه صارلهم هواية بامريكا

بنهاية الموضوع احب انوه النقطة انه المجمع التعبان بي هواية عراقيين وكدروا يتأقلمون وي الوضع وهذا يرجعنة الى موضوع تناقشنة بي هواية وهو ظروف الشخص نفسة والمقومات اللي يمتلكهه يعني محد يجبرك تسكن بمكان انت متريدة اذا انت عندك مؤهلات تسكن بمكان احسن وكل انسان وظرفة

اتمنى اكون فدتكم وبعد شوية اروح اسوي السوشيال سيكيورتي وهم راح اسولفلكم على الجديد حتى تكون الصورة واضحة وتدللون

اخوكم ابو اسد

5
اخوتي احبتي

قبل قليل وصلنا الى دالاس تكساس والحمد لله
استقبلني خالي بالمطار والمنظمة اتاخروا وخالي اخذني وكان مجضرلي حفلة بسيطة وعشة وعافني وراح وهسة اني دا اكتبلكم مقتطفات من الرحلة الصعبة جدا

الرحلة طولت عندي 48 ساعة من البيت للبيت وكانت شاقة جدا جدا
البوري الي انظربناه في عمان كان ممتوقع اذ كان الترانزيت 14 ساعة وكان لازم  نبقى بالمطار وليس الذهاب الى فندق عالية وتخيلوا الحالة ولغوة الاطفال والنومة على الكراسي واخونة بلاك ووتر مشكور اتكفل بترتيب امور الطعام مع المنظمة

بعدين طرنة الى فرانكفورت وبقينة 4 ساعات وتفاجئنا باسعار الطعام والماء الغالية
طرنة الى شيكاغو وطولت الرحلة 8 ساعات ومناك توزعنة الكل على الولايات المقصودة

اني جدا تعبان وراح انام لأن اسد كسر ظهري من الركض وراه بس رغم ذلك هم لكة ناس تحبه ههههههههههههههه

تحياتي الى كل اخوتي وخواتي اللي سافروا وياية واكلهم حمد الله على السلامة والله يسهل امركم


اخوكم ابو اسد




6
الأخوة جماعة الSIV

كثر الحديث عن التي اهواها......هاي شنو رح اغني
كثر الحديث عن الأجرائات الأدارية وشوكت تخلص واليوم رح اكلكم شلون عرفت اجرائاتي خلصت قبل يومين من تحديد المقابلة
طبعا اكو اخوة يعرفون الطريقة بس متأكد هواية ميعرفون
عندي صديق وهو عضو بالمنتدى بأسم John85 شاكه لحلك الجماعة كلسع يخابرهم ويعرف الموظفات وحدة وحدة كالي يا سبع ليش متخابرهم وبالفعل خابرت على الأنسر مشين وتكدر تخابرهم على هذا الرقم 24 ساعة لمدة 7 ايام راح تطلعلك وحدة تحجي انكليزي واخرى اسباني تضغط واحد لأختيار الأنكليزي وتعليمات تتبعهه بالضبط مثل متخابر الشركة مال التليفون علمود توصل للخدمة اللي انت تريدهه وبالمناسبة هذا الرقم ينطيك موقفك وية ال NVC و USCIS يعني القضية من اول متروح لأمريكا لحد مترجع للسفارة ولازم تنتبهون من يكلك دخل الحروف الثلاثة لقضيتك يعني اذا بغداد اتدوس 244 واذا عمان تدوس 266 حسب تواجد الحروف بالتليفون
نرجع لسالفتي اني كنت دائما اسمع الكليشة الأدارية ولكن قبل ميتحدد الموعد بيومين تغيرت الى القضية اكتملت بالتاريخ الفلاني واذا متصلنه بيك خلال شهرين دوس صفر بس بخلال اقل من 48 دزوا الأيميل
ارجو ان يكون الموضوع بيه فايدة الكم وشكرا



















































هاي وين رايحين دقيقة متريدون التليفون  0016033340700

وشكر خاص لأخوية ابو داليا

7
الأخوة المعذبين في الأرض

اليوم اجاني كيس نمبر جديد يبدأ ب BGH بدلا من القديم اللي كان يبدا ب AMM ووياية PDF بيه موعد مقابلتي منتصف الشهر الثالث وشروحات هواية
سبب تغيير رقم الكيس هو في شهر العاشر طلبت يتغيير مكان المقابلة من عمان الى بغداد  وكالوا اوكي بس لازم اول مرة يخلص الغضب وبالفعل قبل يومين اتصلت بيهم وكالوا الغضب خلص ورح اندزلك ايميل بالتفاصيل ودزوه اليوم
اني جاهز لأي سؤال.........ردا لدين المنتدى علينا مو مثل بعض الناس اللي يشتغلون كله سكتاوي تكول عبالك راح يفرشوله الدرب ورد بأمريكا......

8
الأخوة الأعزاء المنتظرين

بعد 5 اشهر من الأنتظار الممل جماعة ال NVC ذكروني بس بطلب جديد
الأفندية يكولون لازم الصورة تكون تنطبق عليهه الشروط نفسهه مال الجواز الأمريكي وتلزكهه او تكبسهه بفورمه اسمهه DS-156

اللي احد عندة علم بلكت يفحمنة
وهاية الشروط
http://travel.state.gov/visa/immigrants/types/types_1320.html

9
الاخوة الاعضاء الكرام........

هذا الموضوع مقفل امام الردود من قبل المشرف....... اذا كان لديكم اي سوأل او استفسار....... يرجى ارساله برسالة شخصية الى المشرف او السيد كاتب المقال كي يتم نشرها.......

مع التحيات......

ستافروس



الاخوة الاعزاء..........


كثرت الأستفسارات في الأونة الأخيرة عن برنامج NVC ورأيت ان معظم الأعضاء لا يملكون المعلومات الكافية او يسيرون بأتجاه خاطئ.

بالبداية البرنامج كان محصور بالمترجمين (الطاكين) الذين يمتلكون التوقيع سئ الصيت (توقيع الجنرال) بدأ البرنامج ب50 مترجم عام 2006 ثم توسع الى500 عامي 2007 و2008 وانتهى الى 50 في العام القادم
وبتأريخ 11 اكتوبر انتهى العمل ببرنامج الجنرال (يعني بعد لحد يركض ورة توقيع الجنرال)
بـتأريخ 1 اكتوبر تم العمل بتزكية السفير التي تسمح ل5000 مترجم عدا عوائلهم بالهجرة الى امريكا سنويا الى عام 2013 (يعني العوائل هم يروحون بس لايحسبون ضمن ال5000 مقعد السنوي)

طبعا انا سوف اشرح المستمسكات المطلوبة منك بالتفصيل من لحظة وصول الايميل من NVC ....

المستمسكات المطلوبة:

1-صورة قيد مترجمة
2-صورة قيد ولادة مترجمة والغير مترجمة
3-عقد زواج مترجم والغير مترجم
4-نسخة من DS-230
5-نسخة من DS-234
6-BIOGRAPHICAL
7-نسخة من Refugee benefits
8-صورتين لكل شخص للفيزا بحجم 5*5 سم
9-تعهد خطي ان لا يوجد بالعراق تقرير شرطة
10-نسخ من أي باجات امريكية


اولا:صورة قيد مترجمة(ايضا تسمى 57  او   Family book )

1-   الذهاب الى دائرة جنسيتك وتطلب صورة قيد لغرض التصديق والترجمة و(شكلهه مستطيل مخطط خطوط حمر او زرق).
ملاحظة مهمة (يجب ان تؤكد على موظفة الجنسية ان تكتب لك رقم اخر بطاقة جنسية قبل جنسيتك الحالية يعني انت اذا جنسيتك الحالية رقمهه 50000 وقبل الزواج او الضايعة كان رقمهه 10000 فيجب كتابة الحالية بالوجه والقديمة بالخلف طبعا هذا يشمل جميع افراد العائلة.

2-الخطوة الثانية هي الذهاب الى دائرة جنسية السنك الواقعة في شارع الرشيد بين شارع الخيام وجسر السنك على الشط

ملاحظة مهمة: يجب احضار العائلة بالكامل لغرض البصم وتستطيع بعد ذلك ان ترجعهم بعد ان يراهم الضابط ويجب جلب المستمسكات الاصلية (سكن تموينية هوية احوال شهادة جنسية وجواز السفر لكل افراد العائلة وستة صور ملونة ويفضل بخلفية بيضاء واخذوا فلوس وياكم)

بعد اصعد وانزل واكثر من ضابط يدقق يدزوكم للترجمة الموجودة في نفس البناية الطابق الارضي
سوف يدقق الشخص معك ويطبع الكتاب وانتبهوا  مطابقة الاسماء وحسب جواز الجي.

3-الخطوة الثالثة هي الذهاب الى دائرة تصديقات الداخلية الواقعة في ملجأ في زيونة  شارع الربيعي قرب جامع اليقين ومن الافضل ان تروحون من وكت وتاخذون الجوازات والجناسي وبعد شتلة ساعتين ينطوكم الكتاب اللي يكون نسختين لكل شخص.

4- الخطوة الاخيرة هي الذهاب الى تصديقات الخارجية في العلاوي تاخذلهه فد 3 ساعات

هنا احنة كملنة صورة القيد وتكون نسختين لكل شخص

الوقت التقديري (4-5) ايام



ثانيا: صورة قيد الولادة

1-تذهب الى المستشفى التي ولدت فيها اوالى مركز الزوية في الكرادة قبل جامعة بغداد بالنسبة للرصافة ومركز الكرخ لتسجيل الولادات قرب مستشفى الكسور في العطيفية او اذا ولدت من قبل قابلة تذهب الى القابلة وتسألهه في أي مركز صحي تسجل الولادات واذا القابلة ميتة تروح لأقرب مركز صحي على بيتهه
طبعا اسهل شي للي يعرف بيا مستشفى انولد ويزودوا بصورة قيد ولادة للترجمة والتصديق  شكله يكون شوية اكبر من كف اليد

2-الذهاب الى دائرة صحة بغداد في ساحة عدن حصرا وتستنسخ الكتاب قبل متطب وراح اتقفص عليك ام الاستعلامات وتبيعلك طوابع المهم شغلتكم بين الطابق الرابع والخامس طبعا كل شخص بالعائلة اله صورة قيد منفصلة يعني اذا زوجتك ولادتهه بصرة او سليمانية لازم تروح وتجيب صورة قيد ولادة قبل متروح لصحة بغداد هااااي شلون شغلة تعبانة.

2-   الذهاب الى مكتب نادر للترجمة قبل المسرح الوطني واخذوا فلوس وياكم
3-   ثاني يوم تأخذ صورة القيد المترجمة والاصلية الى تصديقات الخارجية واخذوا فلوس وياكم

وهنا نكون خلصنة صورة قيد الولادة الوقت التقديري(4-6) ايام


ثالثا: عقد الزواج

1-   تاخذ نسخة من عقد الزواج وتذهب الى المحكمة التي عقدت فيها وتطلب اربع نسخ للترجمة والتصديق الارشيف راح يدزوك الى عرضحالجي في الباب وسوف يطبعلك اربع نسخ على جهتي الورقة
        تنطي 5 الاف وتدخل للمحكمة وهنا يجب التأكيد ان يتم الختم على جهتي الاوراق يعني وجه وكفة وهذا الشي جدا مهم طبعا اول شي القاضي يوقع على جميع الصفحات وبعدين المحقق القضائي يختم على جميع الاوراق لذا يرجى الانتباه.

2-تأخذ جميع الاوراق وتروح الى محكمة استئناف الرصافة في عمارة شذى في الوزيرية اذا كنت عاقد بمحكمة بالرصافة  او الذهاب الى محكمة استئناف الكرخ في حي العدل اذا كنت عاقد بالكرخ واذا بالمحافظات فكل شخص حسب محافظته.رح يشتلوكم 5 الى7 ايام

3-تاخذ الاوراق الى مكتب نادر للترجمة لغرض الترجمة
 
4-من تستلم النسخ الاربعة تعمل نسختين ملونة وتاخذ الاوراق كلهن الى كاتب عدل الصالحية في شارع حيفا ضمن بناية وزارة العدل وراح يملوهن اختام وتواقيع وراح يحتفظون بالنسختين المستنسخة.

5-في اليوم التالي الذهاب الى تصديقات الخارجية في العلاوي

الوقت التقديري (7-10) ايام

رابعا:
 DS-230

طبعا تتكون من 35 فقرة واربع صفحات رح اشرحهن وحدة وحدة
اولا يجب ان تحول البي دي اف الى وورد ثم  تطبع وتوقع  وتسوي سكنر وترجعة بي دي اف

1- الفقرة الاولى هية الاسم الكامل وحسب ما مكتوب بالجواز الجي وبدون غلط رجاء
2-الاسماء الاخرى تطبع           
N/A

3-الاسم حسب مامكتوب بالجواز ولكن بالعربي

4-تأريخ الولادة

  5- العمر
6- مكان الولادة (المدينة,المحافظة والبلد)

7-الجنسية طبعا عراقي

8-الجنس

9-الحالة الزوجية

10-اسم وعنوان وهاتف الصديق او القريب في امريكا واذا لايوجد تكتب
N/A

11-هنا يترك فارغ يكلك اذا تريد الكرين كارد يوصلك الى مكان يختلف عن العنوان اللي انطيتة في الحقل العاشر يعني عوفوه فارغ.

12-شنو شغلك يعني اذا مترجم تكتب
   ثم رقم تليفونك.Linguist

13-عنوانك الكامل محلة وزقاق ودار ومحافظة والبلد

14-اسم الزوجة وحسب ما مكتوب بالجواز ثم الحقل الذي يليه تاريخ ومكان الولادة والحقل الذي يليه عمل الزوجة واخيرا تاريخ الزواج يعني مو الحفلة عقد المحكمة.

15-اسم الاب الكامل

16-تاريخ ومكان ولادة الوالد وعنوانه الحالي واذا متوفي تكتب
في حقل العنوانDeceased
والحقل الاخير سنة وفاة الوالد اذا متوفي.واذا غير متوفي تكتب
N/A

17-اسم الام الكامل

18-تاريخ ولادة الام ومكان الولادة والعنوان الحالي ومتوفية لو لا يعني نفس شرح الفقرة 16

19-تكتب اسماء الابناء وتاريخ الولادة ومكان الولادة

20-تكتب جميع العناوين والاوقات  التي سكنتها لمدة ستة اشهر واكثر منذ ان اصبح عمرك 16 سنة

21- القسم الاول هنا تكتب الاسماء التي كتبتها بالفقرة 14 و19 يعني الزوجة والابناء
 والقسم الثاني
-هنا محد رح يلحكك لامريكا يعني تكتب
N/A

22-عملك في العشر سنوات الاخيرة الشركة,الموقع,عملك يعني طالب او مترجم او معلم وهكذا,اوقات العمل من والى.

23-المعاهد والكليات التي دخلتها مع الاوقات ثم اللغات التي تتحدثها ثم لاي نقابة انت تابع يعني المهندسين المحامين الاطباء واذا متابع لاي نقابة بس اكتب
N/A


24-الخدمة العسكرية اذا خادم تكتب الفرع يعني جيش نظامي حرس جمهوري حرس خاص والرتبة وتواريخ الخدمة واخيرا صنفك يعني مشاة مدفعية وهكذا واذا مخادم بعد احسن خلي اكس بمربع النو

25-هنا تطبع كلمة
Never
يعني انت بحياتك مرايح لامريكا على فرض انه كلكم مشايفين امريكا
ثم توقع وتكتب تاريخ تنظيم الاستمارة.

26-ترجع تكتب اسمك مثل الجواز

27-تكتب
N/A

28-اسمك الكامل بالعربي

29-اسمك وعنوانك ورقم تليفونك بالانكليزي

30- مربعات تزركهن كلهن
NO
يعني انت مو حشاش ولا مخبل ولا مجرم وهكذا

31-
NO

32-
NO

33-طبعا انت ما عندك سوشيال سيكيورتي فتخلي اكس بمربع الاول
تريد واحد طبعا تخلي اكس بمربع الاول يعني يس
الحقل الذي يليه نضع اكس في حقل الاول يعني انت توكل المنظمة باصدار سوشيال سيكيورتي

34-هل ساعدك احد بكتابة الفورمة تكتب لا لان اذا كتبت أي يعني تكتب اسمة وعنوانة ولغوة لذلك اكتب لا واخلص

35-لتلعب لان هذا الحقل مو الك
ملاحظة: يجب ملئ هذة الفورمة لكل شخص يعني للزوجة والاطفال يعني كل نفر فورمة وفي حالة ان لايوجد جواب مثل طفل عمرة سنتين ماهو عمله او اسم الزوجة وهكذا فقط تكتب
N/A





خامسا:
DS-234

تتكون من صفحتين و29 فقرة وايضا تكتب حسب عدد افراد العائلة

1-عدد الافراد في القضية يعني اذا 2 تكتب 2 واذا اربعة تكتب 4

2-اذا انت مفدم الطلب الرئيسي تكتب نعم والزوجة والاطفال تختار كلا

3-
N/A

4-الاسم الكامل وحسب الجواز وبالانكليزي

5-الجنس

6-الحالة الزوجية

7-تاريخ الولادة

8-مكان الولادة محافظة وبلد

9- الجنسية

10-القومية

11-الديانة

12-العنوان الكامل

13-رقم الهاتف

14-العنوان البريدي

15-اخر عمل

16- اعلى مستوى دراسي يعني بكلوريوس دبلوم ماجستير وهكذا

17-اللغة الام

18-اللغات الاخرى

19-درجة اتقان اللغة

20-مشاكل صحية تكتب
None

21-عندك احد من كرايبك مقدم على نفس البرنامج

22-اذا عندك كرايب مقدم وتريد تروح وياة بنفس الولاية اكتب اسم الولاية ورقم الكيس مال كرايبك

23-عندك كرايب بامريكا

24-اسم كرايبك

25-تاريخ ميلاد كرايبك

26-عنوان كرايبك بامريكا

27-رقم تليفون كرايبك بامريكا

28- صلة القرابة يعني عمك خالك

29-عنوانه البريدي


 



   سادسا:
Biographical

لحد يدوخ ترة جدا سهلة تسوي سكنر للجوازات وتحت كل جواز تكتب
1-رقم الكيس
2-العمل الحالي
3-الشهادة الدراسية

سابعا:
Refugee benefits

بيهه مربعين تخلي اكس على الاول يعني انتة تريد فوائد والثاني متريد
تكتب رقم الكيس والاسم وتاريخ الولادة توقع وتاريخ التوقيع

ثامنا:

صورتين لكل شخص للفيزا بقياس 5*5 سم  وماكو داعي تخافون المصور بس كلله صور للفيزا وهو يعرف.

تاسعا:

هنا شوية انتبهوا مطلوب تقرير من الشرطة يؤيد انك ماعندك جرائم وبالعراق ماكو هيجي شي لذلك تكتب تعهد بالانكليزي وتوقع وصارت ويايه وقبلو بي ومشة

عاشرا:

سوي سكنر لاي باج امريكي عندك مثل باج تايتن او جي ال اس او أي زي باج وطبعا لتنسون الباج وجه وكفة


الان ماذا ترسل؟

1-ببداية الايميل تنسخ اسمك ورقم الكيس نمبر كما موجود في الايميل المرسل من قبلهم وعنوان الموضوع هو رقم الكيس نمبر
2-تقسم البي دي اف الى ايميلين لان الحجم كبير
3-تعمل اتاجمينت للملفات وترسل التالي:

1-عقد الزواج العربي والمترجم طبعا المصدق
2-صورة قيد الولادة العربي والمترجم لجميع الافراد
3-صورة قيد 57 لجميع الافراد
4-صورتين خلفية بيضاء والنظر مباشر على الكاميرا قياس 5*5 سم للفيزا
5-الباجات
6-
Biographic
7-التعهد الخطي حول تقرير الشرطة
8-
 DS-230

9-
DS-234

10-
Refugee benefits


ويجب ان لا تنسون تقسيم الملفات الى قسمين لان ايميل واحد ميوصل

ارجو ان الشرح وافي  ويجيب جميع الاستفسارات ولا تنسون ان  الكلام اعلاه مجرب وناجح بشكل كامل.



 






صفحات: [1]