عرض المشاركات

هنا يمكنك مشاهدة جميع المشاركات التى كتبها هذا العضو . لاحظ انه يمكنك فقط مشاهدة المشاركات التى كتبها فى الاقسام التى يسمح لك بدخولها فقط .


مواضيع - ok_ok755

صفحات: [1]
1

السلام عليكم


صدر قانون جديد في ولاية تكساس وما اعرف اذا بغير ولايه اتطبق هذا القانون اللي يعرف يا ريت يساعدنه بهاي المعلومه ؟

القانون صدر في شهر 3 2010
قانون جديد للمتقدمين من 18 سنه الى 24 سنه للحصول على رخصة قياده يجب عليهم الحصول على كورسات لتعليم مهارات القياده لكي يستطيعوا الحصول على رخصة القياده في تكساس.

وعند التقدم بطلب للحصول على رخصة القياده يجب على المتقدم اظهار شهادة والتي يحصل عليها من كورسات تعليم القياده (يجب الحصول على على 80% للحصول على الشهاده) والرابط ادناه المدارس المعتمده في تكساس في كل المدن تقريبا :

http://ritter.tea.state.tx.us/drive/activede.html


ويمكن على المتقدمين اكمال الكورس اونلاين وسعر الكورس يتراوح من 39 دولار الى 49 دولار


وهذا مصدر الخبر

http://www.txdps.state.tx.us/DriverLicense/


اي احد عنده سؤال اني حاضر تقبلوا تحياتي



2
السلام عليكم اخواني واخواتي الاعزاء


اول شي احب ابشركم بوصولي لمدينة اوستن في تكساس بعد عناء طويل ورحله طويله جدا, وراح احجيلكم بالتفصيل شنو صار ويايه

طبعا اتصلوا بيه من عمان حددولي موعد للفحص الطبي قبل السفر ورحت لمستشفى ابن البيطار الساعه 2 الظهر وجان الكي اسمي ما موجود بالاسماء كالوا ما يصير تدخل لانه اسمك ما موجود اتصلت بعمان واتصلت بالمسؤول عليه بغداد كالوا هسه راح يضيفوك وره نص ساعه صاحوني كالوا اتفضل للفحص المهم كملت الفحص بعد 4 ساعات طبعا ويايه بحدود 30 نفر بالغرفه من عوائل وشباب اخذتلي الدكتوره نبض وضغط وبعدين ودونه شربونه من هاي الحبابي ام الدود وراها رجعت للبيت وطبعا الكل جانوا ينتظروني عبالهم صار بيه شي لانه من الساعه 2 الى الساعه 6 يله رجعت وتلفوني جان يم الامانات.

ودعت الاهل والاصدقاء والاقارب واتوكلت وطلعت للمطار الساعه 6 ونص الصبح وهناك بساحة الوفود استملت التكت مال الطياره وبعدين كملنه الطريق للمطار وجان موعد الرحله مالتنه ب 12 ونص ضلينه كاعدين بالمطار بحدود ال 3 ساعات او اكثر صعدنه بالطياره وانطلقنه الى عمان واني الصراحه ما ردت انزل من الطياره مال عمان لاسباب فنيه هههههههه

وصلنه الى عمان وهناك اجه موظف الاي او ام استقبلنه طبعا رحنه لعمان ترانزيت ومن عمان الى مطار جورج كيندي بنيو يورك ورحت استلم التكت مال الطياره الثانيه ولكيت وقت الرحله الساعه 4 ونص العصر ثاني يوم لذلك خلونه نبات بالفندق مال المطار وجان هم اسمي ماكو ويه الاسماء وجان الموظف مال اي او ام يكلي انت متاكد اجيت ويه الاي او ام كتله لا اني اجيت من القمر وبعدين خابر على المنظمه طلعوا ناسين يخلون اسمي مثل شغلة الفحص الطبي مال قبل السفر, رحنه للفندق وضلينه ليله والفندق يعني زين اكلهم طيب والغرفه هم زينه, الساعه 3 ونص رحنه للمطار وصعدنه بالطياره اللي رايحه لامريكا  وبعد رحله 13 ساعه بالطياره نزلت من الطياره نسيت اسمي هههههه

وصلنه الحمد لله مطار نيويورك وهناك استقبلونه الاي او ام ورحنه لفد غرفه انطونه بيها الاوراق المهمه الوايت كارد وباج مكتوب عليه الرحلات مالتنه وارقام المنظمه وبي بعد تفاصيل وجان يجوون شرطيين مثل هذوله اللي يطلعون بالافلام حتى يختمون دخول على الوايت كارد واحنه تعبانين كلش ونريد نام جان ابو الاي او ام يكول ماكو نوم اليوم الكل لازم تسافر وتروح على المكان المحدد الها, طلعنه من المطار اخذونه بسيارات الاي او ام وطبعا ما احجيلكم الطريق كله طسات هههههه هاي نيو يورك كلها طسات ههههههه المهم ودونه لمطار يونايتد اميريكا وهذا خاص بالرحلات الداخليه بامريكا طبعا ذبونه الاي او ام باب المطار وراحوا كالوا هسه نجي والجو جان بارد واكو ناس كبار بالعمر بالاضافه للعوائل اللي وياهم اطفال, واني صرت عصبي وحاولت اتصل بالمنظمه بس محد يرد المهم بعد تقريبا نص ساعه او اكثر بالبرد اجه ابو المنظمه وكال تعالوا فوتوا جوه المهم دخلنه وانطانه التكتات مال الرحله واني لازم اروح لشيكاغو وبعدين لتكساس لمدينة اوستن وطبعا اني ما نايم صارلي اسبوع مخبوص بالتحضيرات للسفر انتظرت تقريبا بحدود 3 ساعات حتى تجي الطياره طبعا كضيتها كله فر بالمطار افتريته شبر شبر وبعدين وصلنه لمطار شيكاجو وهذا المطار عباره عن فد شي يخبل وهنا بهذا المطار هم ضلينه بحدود الساعتين او اكثر واخر شي بعد عناء طويل وتعب مو طبيعي وصلت لمطار مدينة اوستن تكساس وهناك استلمت الجنطه مالتي والحلو بالموضوع ماكو ولا واحد يستقبلنه من الاي او ام بالمطار وهم حاولت اخابرهم وماكو نتيجه المهم حجيت ويه واحد امريكي يخابر عليهم من موبايله لانه ما اكدر اخابرهم اشو هذا جان يكول ما اكدر وجان يتركني هههههه اخر شي كلت لازم اروح للشرطه وهمه يلكون حل لهاي المشكله اني دا اروح للشرطه جان وحده تصيحيني الحمد لله طلعت بالمنظمه واخذتنه بسيارتها وودتنه للشقه مالتنه وطبعا مكان الشقه حلو اني وولد عراقي كعدنه بيها الشقه عباره عن غرفه وصاله ومطبخ وحمام ومخزن يعني كلش عجبتني.

راح اكمل الكم بعدين شنو صار ويانه بس خلاصة الموضوع المنظمه مال الاي او ام موظفين ناس مو خوش اوادم واني راح ادز ايميل الهم بخصوص هذا الشي وتعاملهم جان مو حلو وشايفيين نفسهم وحتى ما يعرفون يحجون عربي.



3

السلام عليكم اخواني واخواتي

طبعا اني قبل كم يوم  الحمد لله تم تحديد موعد سفر لي من بغداد 15-3 الى ولاية تكساس مدينة اوستن فهل يوجد شخص يستطيع استقبالي في هذه المدينه ؟

وشكرا الى الجميع

4


السلام عليكم اخواني واخواتي الاعزاء

اليوم تم الاتصال بي لتحديد موعد السفر من بغداد يوم 15-3 الى تكساس مدينة اوستن اللي راح يسافر ويايه بهذا التاريخ يا ريت يراسلني, وطبعا احب اشكر الجميع اللي قدموا معلومات اكثر من رائعه الي وللجميع وادعي بالموفقيه والنجاح للجميع وخصوصا المشرفين الموقع والاخت انجي وشبح بغداد وريم عبد وعكك وابو عبد الله وانشاء الله ربي يهدي النفوس وبعد ما تصير مشاكل واتمنى ترجع انجي والاعضاء اللي انسحبوا والله يسهل على الجميع وتقبلوا تحياتي.

5


السلام عليكم اخواني واخواتي

اعتقد اكو مشكله بمواعيد السفر لانه سالت هوايه اصدقاء ومعارف والكل جايهم ايميل يكول انت مجدول لموعد السفر عن قريب موظف الاي او ام راح يتصل بيك اكو ناس صارلهم فوك ال 6 اشهر واكو ناس صارلهم 3 اشهر وماكو اي شي محد اتصل بيهم علما الاشخاص الي اتصلت بيهم بمصر وعمان وتركيا ولبنان وبالاضافه الى بغداد فهل يوجد احد اخذ موعد سفر خلال مده قصيره ؟

6

السلام عليكم اخواني واخواتي الاعزاء

طبعا حبيت اشاركم هذا الموقع الاكثر من رائع الي هوه عباره عن جميع قوانين الولايات المتحده الامريكيه ويحجي عن كل الاشياء في امريكا مثل حقوق الموظفين, وحقوق المهاجرين والكثير الكثير, ما عليك سوى ان تكتب اي كلمه في السيرج Search وبعدين راح تشوف القوانين لكل ولايه من الولايات المتحده الامريكيه وكل ولايه قوانينها تختلف عن الثانيه, اتمنى هذا الموقع يخدم الجميع ويطلع على القوانين قبل ما يسافر حتى لا ينصدم بأي قانون, لانه الصراحه اكو قوانين العرب يحسوها غريبه جدا (تعبانه  ;D) وتقبلوا تحياتي وهذا الموقع دخلوا عليه جوه:


http://www.lectlaw.com

7

 السلام عليكم اخواني واخواتي الاعزاء

طبعا اليوم حددولي ولايه Austin , TX وكالوا راح نتصل بيك عن قريب حتى نحدد موعد السفر  ;D

منو بهاي الولايه خلي يسولفنه شويه ؟ تقبلوا تحياتي وشكرا للجميع.

8
السلام عليكم اخواني

طبعا بعد ان شفت تجارب هوايه للاخوه والاخوات الموجودين بالمنتدى لكيت بانه الاي او ام بعد الحصول على الموافقه الامنيه ما يتصلون بيك وانما فقط يرسلون ايميل بتحديد موعد السفر وفي تلك اللحظه يحصل نوع من الاحراج اذا كان موعد السفر قريب, اني حصلت جواب من المحلفين بشهر 12 ونزلت موضوع بالمنتدى بخصوص هذا الموضوع واجه على الاختيار الاخير مع كتابه بالانكليزي وارسلت ايميل الهم قبل اسبوع واجاني الجواب كالاتي :

Dear Sir,
Thank you for your-email, kindly note that we have checked your case and found that you are scheduled for travel.
Please be informed that soon IOM staff will contact you for travel details.



يعني راح يحددولي موعد سفر قريبا من بغداد يعني الموافقه الامنيه واصله وكلشي خلصان ؟
زين ليش ما بلغوني همه بهذا الشي ؟ ليش اله اندز ايميلات يله يحجون ؟


ارجو من الاخوان الي مر بهيجي شي ان يكتب تجربته لانه اني ما اجاني ايميل يكول وصلت الموافقه الامنيه بس اجاني الايميل اعلاه بانه سيتم تحديد موعد سفر ؟



9
السلام عليكم اخواني الاعزاء

طبعا اول شي اتمنى الكل بخير وصحه وسلامه.

عندي صديقي والده طلعله لجوء بهولندا وهسه راح يسحب اهله يعني يسوي لم شمل ولكن طلبوا منهم شهادة ميلاد (بيان ولاده لكل فرد بالعائله عدا الاب والام) ولكن المشكله لا يعرف اجراءات الحصول على بيان الولاده, فارجو من اخواننا الاعزاء ممن لديه معلومات عن هذا الموضوع ان يساعدنا في كيفية الحصول على شهادة الميلاد (بيان الولاده ) علما ان الشخص موجود في بغداد.

بارك الله بيكم ونشكر جهودكم.

10

السلام عليكم اخواني واخواتي الاعزاء

طبعا بعد انتظار دام 29 يوم اجاني قرار المحلفين على الايميل ولكن النتيجه شويه غريبه وهي:

The Baghdad Info Center writes to inform you that a final decision about your case has not yet been made. Your case has been deferred by U.S. Citizenship and Immigration Services (USCIS) for the reason indicated in the attached letter.
 
Please understand that this deferral does not mean that your case has been denied. Decision deferrals indicate that further review of your eligibility for refugee resettlement in the United States is necessary.

Your case will continue to be processed.  When there are updates on your case, and a final decision is made, you will be notified. It is not possible to estimate how long this will take.

You will find a scanned copy of your decision deferral letter attached to this email.
 
It is very important that your reply to this email (do not send a new, separate email) to confirm that you have received this email and the attached letter.
 
We can not proceed with your case until we have received a reply from you. When you reply please write the following:
 
“I confirm that I have received this email and the attached decision letter for my refugee case with the United States Refugee Admissions Program.”

Please write your name at the end of your reply.
 
After we receive your reply, we can proceed with your case.
 
Please note that if your case is approved you do not have an option about when you can depart or delaying your case for any reason.
 
Once you receive a date for departure, you must make plans to depart Iraq for the United States on the assigned date.






وايضا ارسلوا لي ورقه موقعه من دائرة الهجره وتوجد علامة صح على مربع (other) وتوجد كلمه مقابل ال(other) الى حد الان لم افهم معناها لقد وضعتها في المرفقات عسى ولعل احد يستطيع قراءتها ?

هل تعتبر هذه الرساله بمثابة موافقه اوليه على اللجوء في الولايات المتحده الامريكيه ؟ وهل انا الان بانتظار الموافقه الامنيه ؟

شكرا على ردودكم مقدما

تحياتي للجميع

11
السلام عليكم اخواني واخواتي الاعزاء

طبعا احب ابشر الجميع بانه اني بعد ما قابلت المحلفين قبل كم يوم , خلال المقابله المحلفه الامريكيه طلبت مني التوقيع على ورقه وهيه اعادة التوطين في دوله اخرى في حال تم رفضي من قبل امريكا  ;D وخلال الايام الماضيه اتصلت ببعض الاصدقاء في دول الجوار وسالتهم عن هذا الموضوع فكانت كالصدمه لهم لانهم لا يعرفون شيئا عن هذا الموضوع ولم يعطهم احد اي ورقه خلال المقابلات تنص على اعادة التوطين في دوله اخرى في حال امريكا رفضت صاحب مقدم الطلب.

اخواني واخواتي هل يوجد احد تم توقيعه على اعادة التوطين في دوله اخرى في حال تم رفضه من امريكا في دول الجوار او في اي او ام بغداد ؟

12

السلام عليكم اخواني الاعزاء


طبعا اليوم احب ابشركم بانه قابلت المحلفين في بغداد والمقابله كانت سهله الحمد لله بس موعد الوصول كان الساعه 11 واني رحت ساعه عشره ونص صباحا وطلعت الساعه 4 العصر التاخير صار بانه اكو هوايه ناس واكثرها عوائل تقريبا بحدود 10 عوائل و4 شباب واكو بحدود 3 محلفيين كل واحد يقابل عائله او شاب ولازم كل واحد ياخذ طول ووزن وبصمات الاصابع فهنا صار التاخير بينما طولت المقابله مالتي بحدود ثلث ساعه او اكثر وبعد ما خلصت كل الاجراءات وقعت على اقوالي وانطوني كتاب عن الحياة في امريكا اسمه دليل اللاجئون في الولايات المتحده الامريكيه وكال النه موظف الاي او ام بان نتيجة المحلف ستكون بعد 15 الى 45 يوم.

اي واحد يخاف من مقابلة المحلفين اكله لا تخاف ابد لانه المقابله سهله والمحلفين متعاونيين كلش واقدم الشكر الجزيل الى الاخ عكك على موضوعه الاكثر من رائع الي هوه المقابلات في الاي او ام من الالف الى الياء  واتمناله الموفقيه والله يسهل امر.

طبعا اكو شغله وحده خفت منها بالمقابله وهيه انطوني ورقه تكول اخطار بواجب تسجيل مع نظام الخدمه الانتقائيه الامريكيه لانه عمري 24 سنه فكلي موظف الاي او ام انت مشمول بهايه الخدمه والتسجيل بيها اجباري خلال شهر من دخولك للولايات المتحده الامريكيه واذا ما سجلت خلال شهر اسمعوا المصيبه السجن لمدة 5 سنوات بالاضافه الى دفع مبلغ 250 الف دولار غرامه  ;D فرجاءا الي عنده معلومات عنها يكدر يكلي شنو معناها يعني الواحد ينجبر يروح للجيش الامريكي ؟

اخوان اي احد عنده سوال خلي يسالني عادي وتحياتي للجميع


13

السلام عليكم

تحيه طيبه الى جميع الاخوه والاخوات واتمنى اني يكون الجميع بالف خير وسلامه.


طبعا احب ابشر الجميع بوصول المحلفين الى بغداد واليوم اتصلوا بيه اي او ام بغداد وحددولي موعد لمقابلة المحلفين بشهر 12 علما اني قابلت بشهر 7 2009 المقابله الاولى تحياتي للجميع.

14

السلام عليكم اخواني الاعزاء واسف جدا على الانقطاع وذلك بسبب ظروف العمل.

طبعا اني مقدم على اي او ام من شهر 11 2008 وقابلت مقابله اولى يوم 26-7-2009 ولكن الغريب بالموضوع حددولي موعد فحص طبي بنهاية الاسبوع واني بعدني ما مقابل محلفين !!!! ممكن احد عنده فكره تحديد الفحص الطبي تعني الموافقه ؟ ام لا ؟

شكرا الى الجميع

15
السلام عليكم اخواني الاعزاء

اني مقدم على اي او ام بغداد واني حاليا بانتظار مقابلة المحلفين يعني صارلي بحدود شهر وعشر ايام بعد المقابله الاولى بس دزيتلهم ايميل قبل فتره وجاوبوني بانه القضيه مالتي بالتجييك الامني بس اكو شغله ما افتهمتها وهيه AAN شنو يقصدون بيها يعني ؟ زين التجييك الامني مو بعد موافقة المحلفين ؟

تحياتي للجميع

16

السلام عليكم اخواني الاعزاء


هسه اتصل بيه صديق محدديلهم موعد محلفين بشهر التاسع في بغداد وهمه مقابلين مقابلتين بيوم واحد وهذا الحجي قبل شهرين يعني الفرج قريب الى جماعة بغداد اي او ام (يعني المحلفين راح يجون لبغداد) والي عنده معلومه ثانيه او موعد محلفين قريب خلي يفيدنه وتحياتي للجميع.

17
السلام عليكم اخواني الاعزاء

الي عنده معلومات عن الاقامه بالاردن ممكن يحجيلي عنها شويه لانه اذا طلعت فيزا للاردن ودخلت للاردن ونقلت ملفي من بغداد IOM الى الاردن IOM حتى اسرع العمليه راح اكدر احصل اقامه من الاردنيين لو صعبه ما تصير ؟

وتحياتي الى الجميع

18

السلام عليكم يا احلى منتدى

طبعا بالبدايه اني قريت هوايه مواضيع بالمنتدى وكدرت استنتج فد استنتاج بسيط بانه الي راح لامريكا ولكه شغل واستقر ينقلنه الصوره بامريكا بشكل حلو ويسوي واهس للناس تروح لامريكا وتبدي حياتها من جديد في مجتمع منفتح ومتحضر وتعيش حياتك كانسان, ولكن بعض الناس الي ما لكه شغل او ما يقبل يشتغل اي شغله لانه تعرفون هوه جان مدير عام بغداد ومن راح هناك هم يريد يشتغل مدير عام وهذا الشي اكبر غلط ؟؟

اخوان انت اذا جنت تشتغل وزير بالعراق تره لا تفكر بانه راح تشتغل نفس شغلتك هناك بامريكا ولازم تكون حاسب حسابك قبل ما تروح (ركز على هاي النقطه تحسب حسابك تشتغل اي شغله) بانه تشتغل اي شي لحد ما الله يفرجها عليك وتشتغل ضمن اختصاصك احسن من ما تنزل المواضيع الي تسد نفس الناس وتخليهم يكرهون امريكا (اذا هذا الواقع هناك لعد ليش رحت لامريكا اذا تعرف هذا الشي لا تروح احسن).

اني اجي وياكم اخوان بعد الازمه الاقتصاديه الشغل بامريكا كلش صار قليل او معدوم في بعض الولايات وهذا الحجي عن طريق بعض الاصدقاء الامريكان يعني اني هسه اعرف الشغل قليل هناك ومع ذلك مقدم على امريكا ودا انتظر الفرج, ليش لانه اني حاط بالي كلشي اشتغل اذا وصلت هناك لحد ما الكي الشغل المناسب اليه او ضمن اختصاصي(واني رايح وعايف شغلي الطاك الي بغداد براتب بالاحلام في سبيل اعيش حياتي كانسان وكشاب يريد يعيش حياته مثل بقية الناس) وهذا ما يجي بالساهل يحتاجله وقت وبالدرجه الاولى العلاقات اذا ما عندك علاقات فصعب تلكه الشغل الي من ضمن اختصاصك.فالي ما عنده علاقات او احد يعرفه هناك فلازم تشتغل اي شغله بالبدايه لحد ما توصل للهدف الي انت تريده وشويه وشويه تسوي علاقات والعافيه درجات.

واتمنى من الاخوان الي وصلوا امريكا ان يساعدون اخوانهم العراقيين عن طريق هذا المنتدى في البحث عن شغل طبعا هذا الحجي موجه للاخوان الي مستقرين لامريكا وصارلهم فتره وتعرفوا على الناس وعلى الاجواء واتمنى هذا الشي, لانه الصراحه بقية الجنسيات وراح اضربلكم مثل الهنود من يروح لامريكا لو تعرفون جماعته الهنود القدماء شنو يقدموله خدمات ليش احنه ما نصير مثلهم ؟؟؟ وليش العراقيين محد اله شغله بالثاني وقليل تلاكي ناس عراقيين تساعد ناس بالغربه شنو السبب ؟؟ وين العراقيين اصحاب الغيره ؟؟ انتو طالعين من بلدكم ليش ما تصيرون ايد وحده وواحد يساعد الثاني ؟؟؟

اتمنى كل شخص ساكن بامريكا بولايه معينه ينزل موضوع بالشغل الي موجود بهاي الولايه في سبيل يستفاد منها الاخوان الي ما لاكين شغل لحد هسه (هسه واحد يكول واني شعليه بالبقيه اني لكيت شغل اليه كل واحد عليه بنفسه)  والله محد دمرنه غير هايه الحجايه على العموم الله كريم وانشاء الله الكل تلكه شغل وتستقر وتعيش حياتها مثل بقية العالم, وبعد ما اريد احد ينزل موضوع يكسر النفس  ;D يمعودين فوك الوضع الي احنه بي بالعراق او باي دوله كانت وكاعدين ننتظر السفر على نار لامريكا ونسمع هذا الحجي صدك حجي يضوج ويطلع الروح !!!

وتحياتي لكل اعضاء هذا المنتدى والله يفرجها عليكم جميعا وتسافرون ....

19
السلام عليكم اخواني

الي عنده اي معلومات بخصوص شراء بيت او شقه بامريكا وهوه لاجىء هل يسرع بحصوله على الاقامه والكرين كارد والجنسيه ؟؟؟ هسه يكولون هذا غير لاجىء طاك هههههه

20
السلام عليكم اخواني

اني مقدم على اي او ام بغداد من شهر العاشر 2008 واستلمت BGD بشهر ال11 2008 وضليت انتظر فتره طويله لحد ما ضجت ودزيت ايميل بشهر الثالث الهم اسالهم شنو صار بقضيتي وجان بشهر السابع وحده تخابرني من ساعه 8 الصبح عبالك حلمانه بيه تكلي حددنالك موعد للمقابله الاولى والثانيه شوكت تريد كتلها بكيفج كالت يوم 26-7-2009 ورحت وقابلت وطولت تقريبا 3 ساعات ونص والاسئله كلها جتي نفسها الي بموضوع اخويه عككك اسم الموضوع مقابلات الاي او ام من الالف الى الياء موجود باهم مواضيع الهجره والاجئين وكالوا احنه نتصل بيك انكلك شوكت مقابلة المحلفين, ارجو من الاخوان الي قدموا بهذا الموعد يدخلون ويكتبون التواريخ حتى اي واحد يحصل شي يبلغ الكل ومع تحياتي للجميع وانشاء الله كلنه انسافر سوه بنفس الطياره :))

21

السلام عليكم اخواني

اليوم قابلت ب IOM في بغداد في قصر الازدهار وطبعا اني مقدم من شهر العاشر 2008 وهسه يله اتصلوا بيه والي قابلني شخص مصري وقابلني مقابلتين الاولى مقابله تعريفيه والثانيه مقابله قصتي واستغرقت مدة المقابلتين اكثر من 3 ساعات ووقعت على اقوالي وبعض الاوراق الثانيه وكلي احنه نتصل بيك حتى نحدد موعد المقابله الثانيه الي هيه مقابلة المحلفين ارجو من الاخوان اذا احد يعرف الوقت بين المقابلات ان ينورني بهذا الشي مع تحياتي للجميع والله يوفق الجميع.

صفحات: [1]