اخواني جماعه تركيا
اليوم اكتب عن موضوع الهوم كير او الكير كيفر او العنايه المنزليه للمريض
بعد ان شفت قله المواضيع المكتوبه بهذا الخصوص او عدم كفايتهه
طبعا الشخص الي يعاني من الامراض او الاعاقه او ذوي الاحتياجات الخاصه
او الشخص الكبير بالعمر ويستحق العنايه المنزليه مشمول بهاي الخدمه
طبعا من حق الاهل ان يعتنون بالمريض او الشخص الكبير بدون اللاستعانه ب موظفي الشركات الي ترسل من عدها
الأشخاص الي يقومون بالعنايه المنزليه
ف اذا عدكم شخص يحتاج للعنايه او كنتوو انتو من يحتاج لهذا الشي
ف من حق الأبناء او الاخوه ان يقدمون بهاي الوظيفه
و بإمكان شخصين من العائله ان يقومون بيها مثلا أبناء اثنين ويقسمون بينهم الساعات
وطريقه التقديم
بعد إتمام شهر من الاقامه بالولايه يتم التقديم وبإمكان المنظمه ان تساعدكم أتصور هيج شي
المهم راح تنطون اسم الشخص الي يحتاج للعنايه وأسماء الأشخاص الي حيتولون رعايته
وبعد فتره ينطوكم موعد ويجي شخص من هاي الدائره الي نسيت اسمهه
لتقييم حاله المريض طبعا راح يشووف وضعه وحركته ويتم سؤاله عده اسئله لمعرفه القدرات العقليه اله
مثلا يعرف اسم الولايه الي ساكن بيها والبيت الي ساكنه ايجار او ملك ويتم سؤاله عن الساعه واليوم
ومن هااي الاسئله
ويتم تحديد عدد الساعات الي يحتاجهه للعنايه
نجي هسه ع كيفيه احتساب ساعات الخدمه
طبعا هم عدهم جداول تحدد عدد الدقائق مثلا
الشخص الي راح يتوله هااي الخدمه ويكون كير كيفر شكد يحتاج وقت لطبخ طعام للمريض
مثلا يحددون 10 دقائق وكم مره او كم وجبه راح تتهيأ للمريض
مثلا اربع او خمس وجبات باليوم وكل منهه تستغرق 10 دقائق
غسل الملابس يحدد ع الاغلب ب 5 دقايق لان الملابس راح تترك بالغساله وتاخذ وقتهه وكم مره بالاسبوع
عدد مرات الاستحمام بالاسبوع مثلا 4 او 3 مرات بالاسبوع وشكد تستغرق بالمره مثلا 15 دقيقه
أوقات مرافقه المريض خارج المنزل للترفيه او لاجراء مواعيد الأطباء والادويه او شراء الطعام
تنظيف غرفه المريض وكم دقيقه تستغرق
وهكذا كل عمل ويحددون اله دقايق ومن ثم يتم احتساب هااي الدقايق وتنطي الساعات العمل
طبعا عند تقييم الحاله وإعطاء عدد الساعات ع الاغلب يبدون بساعات قليله مثلا 10 ساعات بالاسبوع او 14 ساعه
سابقا كانوو يعطون 40 ساعه وتعتبر فل تايم وبيها بعض الامتيازات مثلا التامين الصحي للشخص
العامل اقصد الكير كيفر
ويطلع مبلغ محترم وتعيش العوائل من عنده
يعني عدد الساعات يكون اسبوعيا مثلا ١٥ ساعه بالاسبوع او ٢٠ ساعه بالاسبوع
لكن لكثره العراقيين وقصصهم الخياليه وأساليب التحاليل تغيرت هااي السياسه بالسنوات الاخيره
وأصبحت الدوائر تنطي اقل عدد من ساعات الخدمه
طبعا يتم تحويل الأشخاص العاملين ك كير كيفر الى شركات خاصه هي الي راح تنطيهم رواتب ع ساعات الخدمه الي يقدموهه للمريض
وع الاغلب تكون حسب المنطقه التابعه الهم وكل شركه تدفع شكل مثل 8 $ او 9$ بالساعه
وهكذا ومن حق الشخص العامل ان يقدم ع التاكس لان هذا يعتبر عمل ودخل اله
نجي هسه ع الكير كيفر
طبعا مو مباشره تنطي الشركات الرواتب لازم يدخل العامل دورات وامتحانات وبيهه نسب نجاح ومن ثم يكون موظف بهاي الشركه ويقدم خدماته ( ما اعرف ان كان هذا الشي معتمد بكافه الولايات )
وحيكون لكل شخص عامل طبعا مسؤول مباشر اله كيس ووركر من هاي الشركه التابع الهه ويقوم كل فتره بزياره المريض وسؤاله عن الأشخاص الي يقدمون اله الرعايه ( الكير كيفر )
اضافه الى الكيس ووركر من الدائره الرئيسيه الي تكون مسؤوله عن الشخص المريض
كل فتره 3 اشهر تقريبا تكون زياره دوريه للبيت وسؤال المريض عن حالته او ان كان دخل مستشفى
او التغيير بالادويه ان وجد بمعني يسوون أب ديت لملف المريض
يعني ( زيارات من دائرتين )
ويتم ادراج ساعات العمل مع تواريخ الأيام ب فورمه والي هي التايم شيت يقدم أسبوعيا للشركه
من قبل العامل ليتم احتساب الرواتب
وقبل فتره رديت عن موضوع بهذا الخصوص لاحدى الخوات بالمنتدى لو حابين تتطلعون عليه
http://www.ankawa.com/forum/index.php/topic,761745.0.html وبعض الأحيان يجي رفض للشخص المريض الي مقدم ف لازم يقدم اكثر من مره لغايه القبول
والموافقه عليه
طبعا حتى قرض للطياره للكبار بالعمر او الاشخاص اصحاب الاعاقه ايضا مو بسهوله يتم اعفائهم
لازم اثباتات مثل ( الرواتب او المساعدات الي تصرف الهم وين يصرفوهه او تقرير من طبيب العائله يوضح عدم قدره
الشخص ع العمل بسبب الاعاقه او المرض ومن هااي الامور )
حسب ما فهمت هناا انوو يكدرون الابناء ان يدفعون مبلغ القرض عن الاهل
هواايه امور دتتغير للاسف مو مثل السنوات السابقه لذلك لازم استمرار التقديم ع كل شغله
لكن هذا ما يمنع ان تكون الامور او الاجراءات اسهل بالولايات المختلفه ما عدنا صوره واضحه لان محد ديوضح هااي الامور
او ماكو مواضيع تبين سهوله اطفاء القرض ع الاقل بهاي السنتين الاخيره
بعض الاحيان اكوو امور او اجراءات تحتاج من الشخص الى شويه انتباه مثلا
ان كان الشخص مريض وغير قادر ع العمل وبالتالي غير قادر ع دفع القرض وعنده اطفال دون سن ١٨ وحيكونون بنفس
الكيس باعتباره هو صاحب العائله بهااي الحاله بالامكان ان ينشال القرض عن الشخص واطفاله كولشي ما يدفعون
لكن يحتاج الى متابعه واصرار لان ع الاغلب يجي رفض ويصرون ع الدفع لكن باستمرار التقديم وتقديم الحجج المنطقيه
يضوجون من الشخص وينطوو اعفاء
اني احجي لان اشووف هاي الامور كدامي وهذا ما حصل مع عائله صديقه
ف حبيت افديكم بكم معلومه في حاله وصولكم ان شاء الله جميعا
تحياتي للحميع
اختكم راي
US
عرض المشاركات
