ankawa

المنتدى الثقافي => زاوية الشعر الشعبي => الموضوع حرر بواسطة: ميسون نعيم الرومي في 20:43 03/04/2021

العنوان: شيسوي الفقير
أرسل بواسطة: ميسون نعيم الرومي في 20:43 03/04/2021
شيسوي الفقير
ميسون نعيم الرومي
شيسوي الفقير اشلون ويـّه كورونه؟
ملتهيه كلهه اتبوگ واحنه نســونـَه
***
اتـرجـيـنـَه ألله كـون يـنقذنـَه منهـم
وده كورونا اليوم..ما وصل حدهم
***
عَ البطن شـِدّ احجار.. خل يسكت الجوع
بالگـطن ســد الذان .. من ولدك اتـلوع
***
خلهه الحكومه اتبوگ واتسفط افلوس
من تعترض ممنوع ! تتگطع الروس
***
هذا الفـقـير اشــلون ياهو اليعـيـنـَه
لا دوله عدهه احساس لعمامه زينه
***
انسيتو الفگر والجوع من صرتوا هيبه؟
بس قـتـِل وي تـرهيب جتكم مصيبه
***
ننتظر چنـَّه كـون .. سـَـلـَّة تـوزعـون
ابطلقه اوسجن للناس .. صرتوا تسكتون
***
لاسـلطه لا احـزاب لا حتى نـوّاب
مَ اتـبـَـرَّع ابدينار (جوعية الباب)-
***
ممنوع التجول گال ! هيله اليطلع راس!
شيسوي الفقير اشلون.. واشتاكل الناس؟
***
ابكل العراق اليوم عشعشت (ايران)-
الها النفط والخير واحنه الهضم واحزان
***
صعبت علينه اهواي حد النفس ضاگ
صرنه سـجيـن الدار نـتحســر الراگ
***
وحشه اوكورونا اتدور والعيشه صعبه
كلمن الوحده ايلوب واينادي ربعه
***
طشوا ضعنه اشرار وليه ولونه
كلمن ابديره صار جتنه كرونه
***
عزله اوتـَـرَقـْب، خوف .. روحي حزينه
-(كورونه) عَ الأبـواب .. تـتسـَـله بـيـنـَه
------------------------------------------------
1 / نيسان / 2021
ســــــــــــــــــتوكهولم