ankawa

المنوعات => استراحة المنتديات => ابداعات اعضاء استراحة المنتديات => الموضوع حرر بواسطة: majid في 22:33 19/12/2010

العنوان: ملّينة . شعر شعبي (ماجد عزيزة)
أرسل بواسطة: majid في 22:33 19/12/2010
ملّينة . شعر شعبي (ماجد عزيزة) 


ملينه منكم حمد .. انتو اللي جبتو الموت

البلاد صارت مقبرة .. كل يوم الف تابوت



ملينه منكم حمد .. لو انتو تتذكرون

من جنه جيران واهل .. فد بيت وتحسبون

وبيناتنا زاد وملح .. وما بينا ليحسدون

بهنام وعلاوي سوه بفد مدرسة يدرسون

وبالعيد نتغدى بفرح ناكل بفد ماعون

ومريمنا من تمتحن تصعد ركض تدرون

وي فاطمة العصر فوك السطح يقرون

ليش هسة فاطمة وحمد ال مريم يذبحون !

متكلي يابه حمد ، منين اجا هالطاعون ؟

آنا ارد اذكرك حمد والذكرى للينسون

تذكر الصيف من يلتهب للدير اتصيفون

والعصر من تغفى الشمس جنتوا سوه تصلون

انت على مذهبك

وهو على مذهبه وفد الله لتعبدون

متكلي منهو الغيرك وسواك كالمجنون

وخلاك تنسى صحبتك فهمني اي ملعون ؟

ويا الله هذا اليامرك بقتل الذي يصلون

ربك وربي مو سوه

ربك شيطان الاسم ، وربي اله الكون



بغداد جانت شمس تضوي على اليمشون

وكت البرد بالشتا بفد صوبه تدفون

شو صارت جهنم حمد ، وحركت اللي يحبون

**
لك يا حمد شفت بعينك شصار

شفت ما جرى بنص الكنيسه

الف نعله عل ْ اليدعي الدين
بكد مافعلته جانت خسيسه

ذبح كاهن يصلي بوسط هالناس

ونحر طفله عالمذبح مثل الفريسه

شسمي هيج بشر الا حيوان

راضع من صدر مسموم ديسه

غرز انيابه النذل بالابرياء
عباله البشر مثله فطيسه

وملينة منكم حمد ..

**

لك يا حمد ..

طبوا كنيستنا غفل .. اشرار مهووسين

كالوا تره الله امر .. بقتل المسيحيين

الدين عدهم قتل ..او ذبح بالسجين

ما دروا فادينا حمل صليبه امن سنين

وكال النا من قام وصعد .. تبقون مضطهدين

ولاتخافون موت الجسد .. الروح تبقى لحين

وبالآخر تصفه المسالة .. وانتو اللي منتصرين

وملينة منكم حمد

 

**
ولك يا حمد ..

احنا البنيناه للبلد واحنا الوضعنا اساسه

واحنا العلم واهل الادب او للوطن حراسه

واحنا الحضارة والعقل وبالوطن اشرف ناسه

تاليها تنسون الزمن ، تسمونا احنا الكفار

ونصير حزمة من حطب وترمونا ابنص النار

اعتب على اسوا زمن .. الجار يغدر بالجار

بس يا حمد ابقى افتكر ، تره الزمان دوار

قلب تواريخ الوطن واقراها ذيج الاسفار

احنا المسيحيين العَلََم ، واحنا البنيناها الدار

نحمل صليب الجلجلة ، ونغادر لاي مشوار

ونعيش في اي منطقة ، ونصلي للرب البار

بس ما نذل او ننظلم .. واسمع لصوتي الهدار :

(ملينة منكم حمد ..)


مع تحيات اخوكم ما



العنوان: رد: ملّينة . شعر شعبي (ماجد عزيزة)
أرسل بواسطة: bsmaa_bghdad في 02:23 20/12/2010
روعة سلمت اناملك الذهبية في ما خطته ويا رب يعم السلام ببلادنا


يا رب استجب امين


تحيتي

العنوان: رد: ملّينة . شعر شعبي (ماجد عزيزة)
أرسل بواسطة: nasir yako في 15:58 20/12/2010
عاش قلمك اخي العزيز ماجد عزيزه .....اللي دينقط عسل   
العنوان: رد: ملّينة . شعر شعبي (ماجد عزيزة)
أرسل بواسطة: churchlife في 16:35 20/12/2010
taslm klmat kolsh 7loa aw 7azeena
العنوان: رد: ملّينة . شعر شعبي (ماجد عزيزة)
أرسل بواسطة: ديراني في 04:35 17/01/2011

ابداع جميلا نحتته اناملك

كلمات ذات معاني رائعة نسجه قلمك

دمت للتميز عنوان
العنوان: رد: ملّينة . شعر شعبي (ماجد عزيزة)
أرسل بواسطة: نادر البغـــدادي في 18:38 17/01/2011


         تسلم الأيادي اخونا العزيز ،، ماجد ،، على هل الخاطرة البديعة !

                   خالص تقديرنــــا ...
العنوان: رد: ملّينة . شعر شعبي (ماجد عزيزة)
أرسل بواسطة: majid في 22:18 25/02/2011
اخوان اسف على التاخير بالرد والشكر على مروركم مشكورين هواية على ردودكم الجميلة .
المفارقة انه اسم المستخدم طلع مثل اسم كاتب الشعر انه فقط منقول مني لانه اعجبني يعني منقوووووووووووووول. ;) :) ;) مواني الكاتب ومشكورين مرة ثانية.

اخوكم ماجد مو ماجد عزيزة
العنوان: رد: ملّينة . شعر شعبي (ماجد عزيزة)
أرسل بواسطة: وردة الربيع في 22:42 25/02/2011
عاشت الايادي على الخاطرة الرائعه
تحياتي