السلام عليكم جميعا
اولا اعتذاري الشديد لجميع الاعضاء الكرام بسبب انقطاعي في الشهور الست السابقه وذلك لضروف قاهر جدا مررت بها في سوريا هذا بالاضافه الى كابوس انتظار الموافقه الامنيه وكما تعرفون انني من مستلمي الظرف بالموافقه منذ منتصف سنة 2008 !!! هذا السبب مع الضروف الصعبه جدا التي حصلت لي في سوريا في الاشهر الماضيه مما دفعني الى ان افقد اي امل بالفيزه والسفر حتى انني لم ادخل المنتدى لشهور طويله من شدة اليأس من موضوع الهجره وكل ما يتعلق به .. بل اكثر من هذا انني طوال ما يقارب الخمسة شهور لم اكن اتابع حتى حالة ملفي على موقع عمان ولم اكن حتى اتصل بالهجره الدوليه لشهور طويله لانني بصراحه كنت محبطا وكنت اقنع نفسي بانني مرفوض وانني بانتظار سراب اسمه الموافقه الامنيه طوال ما يقارب الخمسة سنوات !
يعني بصراحه اني جنت غاسل ايدي من الشغله وبس كاعد انتظر الرفض حتى ارجع للعراق وكنت مستعد نفسيا لاتصال التبليغ بالرفض ووصلت مرحله صرت اتمنى الرفض هلكد ما بزعت من كلشي خصوصا من الوضع الرهيب الي كنت اعيشه بسوريا طيلة هذه الشهور.
المهم ماطولها عليكم قبل ما يقارب اربع اسابيع دك تلفوني برقم ماعرفه .. الو حظرتك استاز سيف كتلها نعم كالت احنا الهجره الدوليه .. هنا اني كلت خلص راح تسلمني بوري الرفض المسلفن واخلص من هالعذاب .. جان تكولي احنا بس حبينا نتاكد من وجودك في سوريا لان ملفك خالص وباقي بس اجرائات السفر ... هنا اني بقيت كم ثانيه بس اريد استوعب شكالت ! كتلها والموافقه الامنيه ؟ كالت خالصه ! كتلها وموافقة ماقبل السفر كالت كمان خالصه ! اويلي هنا اني دخت بصراحه لان عن جد كنت شبه متأكد من الرفض واذا بيه اسمع منها هالكلام بحيث بقيت ماعرف شكولها !! بعدين هي كالتلي حظرتك جاهز للسفر ؟ النوبه كتلها شنو ؟؟ اني هنا صدك كمت ماستوعب وبقيت على هالحاله يمكن اكثر من نص ساعه بعد المكالمه بس احاول استوعب الموقف لان حتى ملفي عالموقع اني مجنت متابعه لهذا الشغله جتي بدون مقدمات وكلش مفاجئه وعكس ماكنت اتوقع منهم بصراحه !!!
هنا بدة الاجرائات تركض ركض بحيث ورا اسبوع تقريبا خابروني يريدون اربع صور شخصيه ونسخة الجواز فوديتلهمياه وبعدها تقريبا بعشرة ايام هم خابروني تعال استلم الفيزه وخط الرحله ورحت ووقعت قرض الطياره واستلمت فيزة امريكا جانت مختومه جديد مصارلها سبوعين وصلاحيتها اربع شهور ونطوني كارتين للجنط وتعليمات الاوزان وشوفوني نماذج للجنطه الكبيره وللهاندباك ووراها وديت الفيزه لساحة المرجه ختمولي مغادره خلال سبوعين طلبت يسووها شهر مقبل الشرطي وكالي عمي انته مسافر لامريكا صدك تحجي اشلع يمعود
وطلبت منه ان يبقيلي الاقامه السنويه اشو وافق ماعرف ليش وفوكاها نطيته 500 ليره مقبل ياخذها !
ختم المغادره يكون بظهر ورقة الفيزه وكذلك عالجواز .. وراها رجعت الفيزه هي وظرفها للهجره الدوليه وبقيت يمي ورقة خط الرحله وورقة قرض الطياره وكارتين الجنط.
قبل السفر بيوم خابروني الهجره الدوليه كالو تجيب الجواز وتجي باجر لكفرسوسه البنايه الثانيه حتى تستلم اجور الرحله وهي خمسين دولار ورحت ثاني يوم الصبح نطوني استماره ترستها وانتظرت ساعتين جوي صاحو اسماء الحاضرين وجيكو الجواز ونطوني الخمسين دولار, بس شفت ناس جايين من كيفهم محد متصل بيهم وموعد سفرهم جان بعدي بيوم فمقبلو ينطوهم لان كالولهم احنا تجينا قوائم مو بكيفنا نتصرف.
وبالمناسبه ماشفت اي عائله سحبو منهم كارت الغذائيه, يعني الي مستحق والمبلغ يسوه وسفره قبل موعد نزول الفلوس بالكارت يكدر ياخذ المبلغ من شخص عرف وينطيه الكارت ويسافر وهذا الشخص بعدين يستلم من الصراف الالي من ينزل المبلغ بس على شرط ابو الكارت قبل سفره ياخذ الجوازات واوراق الحمايه ويروح لكفر سوسه حتى يفعل الكارت, اني شفت عائله جانت ويايه بالرحله هيج سوو لان عددهم كبير والمبلغ يسوه, بس انتو هم تأكدو من هالنقطه.
طبعا اني خلال هالفتره بديت اصفي شغلاتي واحضر امور السفر واشتريت حقيبتين كبار من نوع الي بيها يده تنسحب سلايد وتايرات بالجانب سعر الحقيبه تقريبا 2000 ليره, واخذت نفس الموديل بس حجم هاندباك يعني هم بيها تايرات جانبيه ويده سلايد سعرها 1200 ليره بصراحه اني شفت هذي انسب شي لان قويه وتنسحب وما تتعب ووزنها مو ثكيل لان صناعه وطنيه مو صيني يكون لونها اسود وبيها كبسه حمره بالمسكه وبيها 3 حجوم وانصحكم بيها لان جدا مريحه بالسفر وسعرها مقبول نسبيا وتكون شويه صلبه ومحاطه بقالب خشبي يحميها لان راح تشوفون شلون الجنط راح تشبع دفرات بالشحن والي من قماش غالبا تتشكك وتضطرون تغلفوها بالمطار بعشر دولارات او تجيبون وياكم رولة سيلوفين طعام الشفاف ووياه شريط شفاف العريض وانتو تغلفون الجنط بيدكم قبل ان يوزنوها ببيروت لان بعد الوزن تروح بالحزام للشحن ومراح تكدرون تغلفوها, وبالمناسبه همه ميفتحون الجنط الا بحالتين اما يطلع بالاشعه بيها شي ممنوع او يكون وزنها زايد ويكولولكم فرغو منها
الجنط الي بس من قماش صحيح خفيفه بس تره بسرعه تتمزق, لكن الحقائب الي مقوايه وبيها تايرات ويده سلايد للسحب صحيح ممكن شوي اغلى وشوي اثكل فد كيلوين من ام القماش بس اكيد تتحمل دفرات اكثر
وهذا واحد فقط من عشرات الفديوات عاليوتيوب الي تبين شلون الجنط تشبع ضربات بالمطارات:
http://www.youtube.com/watch?v=QLOHtHve_u8الرحله من دمشق الى دالاس استغرقت اكثر من ستين ساعه فعليه و كانت متعبه لكن حلوه ركبت خلالها 3 طائرات ونزلت في اربع مطارات, اني قبل يوم من السفر ولان سكني بعيد شوي رحت بتت ليله بفندق الجلاء الغرفه ب 4000 ليره مع وجبة فطور للي عنده اقامه سنويه اما للي عنده وصل اقامه الغرفه ب 138 دولار اني الحمد لله لان الشرطي من ختملي مغادره بقالي الاقامه السنويه فخدمتني بهذا الموقف وهذا رقم الارضي لفندق الجلاء 6622147
الي ساكن بعيد وماعنده اقامه سنويه اكو فنادق كثيره بالبحصه ويم جسر فكتوريا الليله بالف ليره وتبعد عن نادي الجلاء 5 دقائق بالسياره فقط.
واكو شركة تكسي ممتازه اسمها فون تكسي سياراتهم لونها ابيض واحمر هذوله ياخذون فتح عداد عشرين ليره وميقبلون ياخذون بالمشوار اقل من 200 ليره وممكن تخابروهم قبل نص ساعه يأمنولكم سيارات نقل داخل دمشق, دوامهم من السبعه الصبح للعشره بالليل وهذا رقمهم 5088
نجي هسه للسفره .. التجمع امام الباب الرئيسي لمدينة الجلاء الرياضيه ساعه بثمانيه والانطلاق بالتسعه احنا كنا 3 باصات 2 بيها مسافرين والثالثه يمكن صعدو بيها بس عائلتين وباقي مقاعد الباص الثالث للحقائب لان الحقائب ضعف عدد المسافرين لهذا الحقائب بالسياره الثالثه خلوها حتى على المقاعد لان صناديق الباصات مكفت.
المسافرين يبقون واقفين على رصيف اوتستراد المزه الى ان يسمحون بتصعيد الحقائب الكبيره بصناديق الباصات ثم يصيحون كل كيس باسمه ويجيكون الجوازات وينطوكم ظرف الفيزه الي ختمتوه مغادره ورجعتولهمياه ووياه ينطوكم ورقه مالرحله بالانكليزي كلمن حسب طيارته بس مو تكتات هذي بس ورقه عاديه مطبوعه.
الباصات تشوفوها من الخارج فخمه وعبالك طياره بس بالحقيقه كعدتها ابدا مو مريحه وطبعا مابيها حمام, طبعا كدامنا جانت تمشي سياره دفع رباعي وسياره فان اعتقد هذي يرجعون بيها موظفي الهجره السوريه لان حدهم للحدود ويعوفونا. وبالسياره يصعد وياكم موظف من الهجره الدوليه, واكو واحد من الموظفين هو يكون مسؤول الموفمنت يصعد بسيارة الدفع الرباعي ويمشون كدامكم.
الطريق الى الحدود البنانيه جدا رائع وطبيعه خلابه واستغرق تقريبا 35 دقيقه وماكو لا حواجز ولا تفتيش ولا اي توقف والحمد لله. الى ان توصلون جديدة يابوس هذي تمثل الجانب السوري من الحدود وهنا موظف الهجره ياخذ جوازاتكم ويروح يختمها شغلة ساعه ونص وممكن تنزلون للحمام طبعا بفلوس يمكن 15 او 25 ليره واكو محلات صغيره تبيع مأكولات ومشروبات بسيطه طبعا الخطوط السوريه لهنا شغاله والشبكه فوول بدون ان تفعلون خدمة التجوال وتستمر الشبكه وياكم الى ان توصلون الجانب اللبناني من الحدود والمسمى بمنطقة المصنع.
بين الحدين اكو منطقه كلش حلوه ونظيفه ومرتبه بيها مسجد وبيها السوق الحره ومطعم وبارك سيارات هذي تابعه للجانب السوري وهنا هم تكدرون تنزلون من الباصات لان راح يشتلوكم الى ساعه 3 العصر يعني الي يريد حمام او اكل او شرب كلشي موجود, واذا جايبين اكلكم وياكم هم اكو كعدات حلوه بالحدائق. بس هنا سؤال يطرح نفسه .. ليش يشتلونا 3 الى 4 ساعات بهالمنطقه الحره ؟ رغم انو ورانا شتله اطول عالجانب اللبناني ! ورغم انو لبنان تختملنا فيزه 48 ساعه عالجواز ؟ شنو سبب هالتاخير ؟ الله اعلم !
طبعا السوق الحره حلوه وكلشي بيها والبيع بالدولار وهسه يجوكم ذوله دلالين الجكاير واكفين بره السوق وممكن يطلبون منكم تشترولهم كم كلوص جكاير بدربكم طبعا انتو غلسو
واكو بالسوق الحره مخدات مالرقبه على شكل حرف يو ممكن تفيدكم تلبسوها بالطياره سعر الوحده اضن دعش دولار اني شفت بالطياره كثيرين لابسين منها خصوصا اثناء النوم.
المهم صار العصر وخلصت الاستراحه وصاحونا للباصات وانطلقنا في طريق جبلي باتجاه منطقة المصنع وهي اول الحدود اللبنانيه, طبعا ليحد الان لا تفتيش ولا حتى شرطي حجه ويانه, وليحد الان الخطوط سيرياتيل واريبا شغاله.
وصلنا منطقة المصنع بعد تقريبا عشر دقائق وهنا اختفت الشبكه بس الي عدهم خدمة الرومنك او التجوال بقت شغاله لكن طبعا يخصم منك كثير حتى لو الناس تخابر عليك.
بالحدود اللبنانيه راح تشوفون فرق كلش جبير بينها وبين الحدود السوريه يعني ماعرف ليش هيج منفذ حدودي مهم للبنان هيج مخربط وهوسه بصراحه لا يقارن بالجانب السوري !
والمشكله يخلوكم بالحدود من العصر للمغرب او الليل كاعدين بالباصات بس ممكن تنزلون للحمامات او تشترون شي عادي وهنا ينسحبون موظفي الهجره السوري ويجي بدالهم الموظفين اللبنايين ويجيبولكم كل واحد لفتين دجاج وكباب بالمايونيز وتفاحه وعصير ونستلايه زغيره من مطعم الشمس الي راح تشوفوه بطريقكم من تدخلون لبنان .. وهم ياخذون جوازاتكم واخر شي يجيبوها الكم جنود ويوزع الجوازات وبيها ختم فيزة لبنان 48 ساعه.
اثناء هالانتظار يجيكم ولد يصرف سوري ودولار يصعد للباص, طبعا الدولار 1500 ليره لبناني ويصعد واحد يبيع كرزات الكيس ب 250 ليره سوري.
كملونا الجوازات وانطلقنا بعد المغرب باتجاه مطار بيروت الطريق ساعه وشوي طريق جبلي والدنيه ليل لهذا السواق يمشون على كيفهم طبعا تمشي كدامنا سياره جيب بيها جنود لبنايين طول الطريق الى المطار وحتى همه نفسهم الجنود الي وزعولنا الجوازات نفسهم الي بالسياره وهمه نفسهم تلكوهم باول تفتيش بالمطار .
بالطريق للمطار مرينا بمنطقة المصنع المدينه ومنطقة شتورا ومصيف بحمدون ومنطقة عه لي وبعد شكم منطقه يالله وصلنه بيروت طبعا طريق حلزوني وبيه ارتفاع الف متر ثم هبوط الف متر يعني يصير بعض التخلخل بالضغط الجوي وممكن تنسد الاذن مثل الطياره.
دخلنا بيروت من جهة الضاحيه الجنوبيه ووصلنا المطار ساعه تسعه وربع تقريبا وبالمطار اكو عربانات مجانيه للحقائب تلكوها بره وبيها كبسه حتى تفتح القفل وتمشيها.
نزلت جنطي واخذتلي عربانه ودخلنا المطار وشفنا نفس الجنود وفتشونا ودخلو الجنط عالاشعه واللي لابس حزام ينزعه واللي لابس قمصله ينزعها واللي شايل موبايل هم يخليه بحاويه ويه فحص الجنط لهذا نصيحه سوو مثلي لبسو تراكسوت ولا حزام ولا شي ولا تلبسون شغلات بيها معادن لان تره كل تفتيش تعطلكم هالسوالف.
كملنا التفتيش دخلنا للصاله واكو حمامات بس تره مابيها ماي مو تتورطون
وتشوفلك العراقيين كلمن شايل بطل ماي من يدخل ههههه
طبعا الانترنت متوفر مجاني بمطار بيروت اكو حاسبات عالحايط او ممكن انته بالموبايل او الابتوب تشبك وايرلس فري.
المهم بقينا ننتظر بالصاله الى ان جانه موظف الهجره اللبناني وجابلنا اكياس ال اي او ام وبيها الاشعات وظروف الفحوصات وباقي الاوراق و كال يالله تعالو عالوزن .. طبعا كلمن عربانته وياه لان الممر طويل ومتعب . دخلنا عالوزن اني مسموحلي جنطتين كبار كل وحده 23 كيلو بس اني سويتها 21 احتياط والهاندباك ماوزنوها بس شافتها الموظفه وكالتلي انته عالخطوط التركيه يعني يسمحولك بالهاندباك 8 كيلو, طبعا هذي ما عدا جنطة الابتوب.
يعني مجموع الحقائب المسموحه .. جنطتين كبار كل وحده 23 كيلو وهاندباك مو اكثر من 8 كيلو بالاضافه لجنطة لابتوب او جنطه نسائيه او جنطة معاملات المهم اي شي يدخل بالمكان الي تحت كرسي الطياره.
الجنط الكبار مو مهمه الابعاد لكن الوزن مهم اما الهاندباك فمومهم الوزن لكن الابعاد مهمه حتى تكفي بالاوفرهيد بن
مجموع ابعاد الجنط الكبار يعني طول زائد عرض زائد ارتفاع لازم ميزيد عن 158 سم والوزن خمسين باون يعني 23 كيلو
مجموع ابعاد الهاندباك سواء باكباك عالظهر او سحب مع التايرات طول وعرض وارتفاع لازم ميزيد عن 115 سم وهنا الابعاد مهمه الطول ميزيد عن 56 سم والعرض ميزيد عن 36 سم والارتفاع ميزيد عن 23 سم حتى تدخل بالكابينه بسهوله
اما ابعاد اي جنطه اخرى اضافيه مثل جنطة لابتوب او حقيبه نسائيه او حقيبة معاملات طول وعرض وارتفاع مجموعهم لازم ميزيد عن 91 سم
طبعا بالاضافه لهذا ممكن تشيلون بيدكم كتاب واحد مع كوت او قمصله او شال واحد
هذي المعلومات من موظفة الوزن بمطار بيروت والي يريد يتاكد اكثر يدخل على موقع شركة الخطوط الي عليها رحلته الدوليه والداخليه وراح يشوف نفس الكلام وموثق بالصور والرسوم التوضيحيه للابعاد والاوزان.
هذا موقع الخطوط التركيه بيها مكتوب عدد الجنط والوزن المسموح والابعاد, وطبعا نفس الشي كلمن حسب رحلته يكدر يجيك المواقع مالشركات الطيران قبل لا يسافر:
http://www.turkishairlines.com/en-int/travel-information/baggage/domestic-international-flights-free-baggage-allowancehttp://www.turkishairlines.com/en-int/travel-information/baggage/free-cabin-baggage-allowanceوهذا موقع الخطوط الداخليه واغلبها اضن على شركة اميركان ايرلاينز وراح تلاحظون مشروح بيها بكل وضوح الابعاد والاوزان المسموحه للجنط الكبار المسماة جيكد باكز وكذلك للهاندباكات سواء عالظهر او سحب والمسماة كيري اون باكز وكذلك تفاصيل عن الفقره الاضافيه المسموح حملهابالاضافه للحقيبتين الكبار والهاند باك وكاتبين مسموح ب بيرسونال ايتم وحده كاتبيلكم امثله عنها ومنها جنطة الابتوب والحقائب النسائيه الخ:
http://www.aa.com/i18n/travelInformation/baggage/baggageAllowance.jsphttp://www.aa.com/i18n/travelInformation/baggage/carryOnAllowance.jspوازيدكم من الشعر بيت طلعت الخطوط الجويه الداخليه بامريكا ومنها شركة اميركين ايرلاينز تسمح باربعين باون للهاندباك يعني 18 كيلو بس الخطوط الدوليه ماتسمح اكثر من 8 كيلوات هذي التركيه اما الجنط الكبار فكل الشركات تسمح بخمسين باون يعني 23 كيلو لكن للاحتياط انتو سووها 21 او 22 الا اذا ميزانكم الكتروني وحيل مضبوط.
الخطوط التركيه من شهر ديسمبر 2012 سمحت باخذ حقيبتين كل وحده 23 كيلو للرحلات البعيده مثل امريكا وكندا, اما قبل هذا كانت تسمح بحقيبه وحده 30 كيلو فقط.
اما شنطة الابتوب فتكدرون تخلون بيها مع الابتوب تخلون الشاحن والهيدفون واذا عدكم وصلات او شاحن وكيبل الموبايل او هارد دسك اوفلاشات او لزكات الكيبورد العربي الخ عادي محد حجه ويايه بس السيديات خلوها بالجنط الكبار. طبعا كل الاجهزه الالكترونيه لازم تنغلق بكل اقلاع وهبوط ومن يكولولكم فكو الاحزمه تكدرون تشغلوها وهي اصلا الانترنت بالطياراه مراح تشتغل الا بعد فتح الاحزمه.
وراح تلكون بمواقع شركات الطيران معلومات حلوه وبالصور عن الاشياء المسموحه والممنوعه بالطيارات مثلا بالهاندباك ممنوع السكاكين والشفرات والولاعات والسيديات والمقصات وممنوع السوائل الا اذا حجمها اقل من 100 مل وبشرط تكون مغلفه بكيس من نوع ريسيلد الي ينغلق من الاعلى ومن هالسوالف
اني بالرحله الداخليه من نيويورك لدالاس كنت شايل بيدي قوطية كوكاكولا مسدوده نطونياها بالفندق وكلت اشربها بالطريق, بس بالتفتيش اخذتها مني ام عيون الزرق يمكن لان حجمها 330 مل او يمكن هي جانت عطشانه وخمطتها
الاكل ميفضل تاخذون وياكم بالطياره بس اذا تريدون اخذو شغلات مغلفه يعني نساتل بساكت شغلات مسلفنه ولو اني شفت بالرحله الداخليه الامريكان جايبين لفات وكيك وكلاصات ملكشيك كبيره وقهوه بس للاحتياط حاولو متاخذون مأكولات غير مغلفه احسنلكم. لان تره اكو شي اسمه البروفايل بالتفتيش يعني هسه تشوفون كل ناس يفتشوهم شكل ناس يشربتوهم وناس يلحون وياهم حسب قناعة المفتش, لهذا الشغله مو قياس اذا شفتو غيركم سمحولهم بشغلات مسمحولكم بيها عادي تره تصير.
بالمناسبه اكو شركه يمكن اسمها شركة اطلس صايره اعتقد يم جسر فكتوريا هذي شركة شحن دولي ياخذون هسه عال 100 كيلو 500 دولار قبل كانت 400 دولار. والغراض تودولهمياه وهمه يغلفوها ويشحنوها لامريكا او كندا او اي مكان اخر بالعالم . هذي تفيد العوائل الي عدهم وزن زايد كثير وشغلات معتزين بيها وتسوه فلوسها.
هذي عناوينهم بس هم انتو تاكدو :
شركة الأطلس للشحن
الحريقة، شارع أبو عبيدة بن الجراح، بناء جمعة، دمشق، سوريا
Tel1. +963 11 2213221
Fax. +963 11 2216041
Email: ea.ten.setarime@gwfsalta
وتكدرون من ينطوكم خط الرحله انشالله تدخلون هذا الموقع وتكتبون مطار الاقلاع والهبوط وتاريخ الرحله راح تطلعلكم ادق التفاصيل عن رحلتكم قبل متسافرون:
http://www.cheapoair.com/وهذا الموقع ممكن تنطوه لاهلكم باي مكان بالعالم يتابعون بيه خط رحلتكم ويشوفون طيارتكم تمشي على الخريطه لحظه بلحظه وبيه كذلك تطبيق للسمارت فونز ايفون واندرويد وغيره:
http://www.flightradar24.com/ها شلوني وياكم ؟
نرجع نكمل الرحله .. الموظفه بمطار بيروت خلصت الوزن وشحنت الجنط الكبار وانطتني التكتات وحده بيروت-اسطنبول والثانيه اسطنبول-نيويورك طبعا هذي التكتات هي اهم شي بالمطارات ويسالوكم عنها كثير من تستفسرون عن البوابه او التيرمنال او اي شي يخص رحلتكم ويسموها بوردنك باس ومن تريدون تسوون بوردنك وتصعدون بالطياره يطلبون هذي البوردنك باس ويقطعوها ويرجعولكمياها فديروبالكم لتوكع منكم او تختلط وحده ويه الثانيه لان كلش تتشابه بس بيها كم حرف يختلف.
ورا مشحنو الجنط الكبار ونطونا التكتات ودونا تفتيش ثاني للاشخاص وللهاندباكات طبعا ماكو جنطه تنفتح الا اذا يأشر بالاشعه بيها شي ممنوع, من خلصنه التفتيش ودونه لقاعة التيرمنال وهنا انتظرنا اقل من ساعه وصاحونا للطياره ساعه 4 الفجر.
الطياره متوسطه نوع بوينك 737 بس مريحه والمظيفات التركيات رائعات بصراحه وكذلك كادر المطار والحدود والهجره البناني جدا متعاونين والاكثر من هذا موظفي الهجره الدوليه السوريين والشهاده لله ادو مهمتهم بكل امانه وكانو جدا متعاونين ورائعين ربي يحفظهم ويجازيهم كل خير على هالحرص الشديد علينا من اول مغادرنا المزه الى غاية باب الطياره الله ينطيهم العافيه
رقم المقعد مكتوب على التكت وهذا تحدده موظفة الوزن االلبنانيه, الرحله من بيروت الى تركيا استغرقت قريب الساعتين يوزعون اثنائها وجبة فطور مرتبه ومشروبات مختلفه, وصلنا اسطنبول كان الفجر بادي يعني من الجو شفنا مظيق البسفور والمطار وهو بالجانب الاوربي من اسطنبول والمنظر جدا رائع بصراحه.
دخلنا المطار وشفنا موظف الهجره بانتظارنا وهو يتكلم عربي بطلاقه وودانه للسكيورتي شيك وخلولنا فسفورة التشييك الامني على اكياس ال اي او ام بدل الجواز لان الجواز مانختم بتركيا لا دخول ولا مغادره لان ترانزيت مطار. وراها ودونا للتفتيش ومثل تفتيش مطار بيروت لكن اكثر دقه يعني تكرمون حتى الاحذيه ينزعوها بالاضافه الى الحزام والقماصل الخ اني حتى سترة التراكسوت نزعونيها وبقوني بالتيشيرت وحتى الابتوب طلعوه من حقيبته ودخلوه وحده بحزام الفحص.
الموظفين الاتراك بالمطار انكليزيتهم مو كلش اغلبهم هيج بس همه حبابين ويحاولون يساعدون قدر الامكان. خلصنا التفتيش صعدنه لقاعة الانتظار بالطابق الثاني فد عالم ثاني مطار كبير جدا وحلو جدا بحيث ساعه كامله تفتره ميخلص, بيه مطاعم ومحلات تصريف بس ميتعاملون بالسوري وكذلك حمامات ومقاعد مريحه لان الانتظار بحدود السبع ساعات. وممكن تصعدون للطابق الثالث اكو قاعه للمدخنين.
اذا تحبون تشترون شي من المطار تره سعر الليره التركيه اعتقد الدولار يعادل ليره ونص تقريبا بس همه ياخذون دولار عادي لكن الاسعار مكتوبه بالليره التركيه مثلا سعر بطل ماء صغير يعادل دولارين وهكذا.
شفنا بمطار اسطنبول عراقيين جايين من بغداد قسم منهم فيزة زياره على حسابهم لامريكا وقسم ايفادات.
قبل الطيران بساعه تقريبا دخلنا للتيرمنال وهو قاعة كبيره ومن ندخل نتفتش من جديد احنا والهاندباكات لهذا من ندخل بعد ميصير نطلع من القاعه والقاعه مابيها حمام تره, بقينا بالتيرمنال اقل من ساعه وصاحونا للطياره بس هالمره طياره كبيره بوينك 777 وكعدتها غيرشكل بحيث كل واحد كدامه شاشه وينطوك مخدات صغار وشرشف مسلفن وسماعات مسلفنه طبعا هذي يسلفنوها للتعقيم مو يعني هذي هديه النا لكن ينطونا علبه بيها مستلزمات للرحلات الطويله مثل فرشة اسنان ومعجون وغطاء للعين وللاذن مع جوارب وكريم مرطب للشفاه هذي بس الي من حقنا ناخذها اما الباقي تبقى حتى يعيدون تغليفها.
كذلك رقم المقعد مكتوب على التكت وممكن نخلي حقيبة الابتوب تحت الكرسي والمقاعد مريحه وهذا جدا مهم لان الرحله تقريبا 11 ساعه متواصله, وهنا نقطه مهمه لكل المسافرين البالغين الافضل اخذ حباية اسبرين ام ال 81 ملغ كل يوم وحده مع الغداء نبدي بيها فد يومين قبل ويومين بعد الرحله وكذلك اثناء الرحله على شرط الشخص ماعنده ربو قصبي او قرحة معده, ومع الاسبرين الافضل ان نتحرك بالطياره ونسوي تمارين للساقين كل ساعه واحنا كاعدين ونشرب سوائل هوايه هذي الاجرائات للوقايه من الجلطات بسبب الركود عافاكم الله.
اقلعت الطائره ساعه وحده ونص الظهر تقريبا بتوقيت تركيا وهذي الطائره فيها انترنت وايرلس مجاني تصفح فقط ومره وحده فقط يعني مثل دعايه تجريبيه بعدها لازم بفلوس, واثناء الرحله ينطون وجبتين طعام ومشروبات مختلفه عدة مرات مع مكسرات وبعض الحلويات, وحتى يجيبولكم قبل الاكل خاوليات صغيره ساخنه ومعقمه لغسل اليدين المضيفه تشيلها بالملقط
وممكن متابعة معلومات الرحله بالشاشه وممكن تشوف كامره مباشر تصوير من الطائره بالاضافه الى باقي الاوبشنات بالشاشه مثل الافلام والالعاب والخ. والشغله الحلوه انو بالشاشه اكو مدخل يو اس بي تكدر تربط بيه الموبايل او التابلت ويبدي يشحن طول الرحله بس لازم يكون كيبل اليو اس بي وياك.
المظيفات بالطياره وموظفات المطار بتركيا وحده احلى من الثانيه وجدا خدومات ومتعاونات واغلبهن يتكلمون انكليزي .. اني مكاني جان مو يم الشباك فانعقجت لان عبالي اتفرج واشوف الدنيا من الطياره
بس اكو واحد تركي شواربه مترين كاعد يم الشباك شفته يحوص ويتلفت وفهمت منه انو هو يخاف يكعد يم الشبابيك بالطيارات كتله خالي لو هيج الزلم لو متنراد
وسالته اذا يقبلون نبدل مكاناتنا اشو هذا كيف وكال اي اي عادي مسموح فكعدت بمكانه على يساري الشباك وعلى يميني كاعده بنت تركيه تخبل عمرها بالعشرين وعدها كرين كارد
بس اشو هذي اول مكعدت تكرمون نزعت حذائها ! اني كلت عادي نص الموجودين حفاي
.. بعدين اشو كامت نزعت التيشيرت
بس غير لو لابسه شي جواه
ههههه لا اتشاقه طلعة لابسه جواه فانيله بدي ام التعلاكه لكن تعلاكاتها خيطين بس ! ردت اكولها سالمين خوماكوشي بس معرفت اصيغها بالانكليزي للاسف
بعدين اشو البنيه كامت تلعب رياضه عالكرسي وتسوي حركات سترتجنك
واني كاعد يمها دعش ساعه بحيث شكد جنت نعسان حتى النوم طار من عيني
بس للامانه البنيه كلش حبابه وهي الي علمتني شلون افتح النت وايرلس لان جنت مامنتبه لهالشغله وعلمتني شلون اشحن الموبايل باليو اس بي ودلتني شلون اشغل كامرة الطياره بالشاشه, طبعا هي عدها ايفون 5 مبين ماخذته جديد كعدت تمدحلي بفيكاته ساعتين بحيث من وصلت لامريكا كبل رحت ادور عالايفون هلكد ماحبيتها
اووو العفو اقصد هلكد ماحبيت الايفون
واني طبعا عندي ثارات قديمه ويه الايفون وعلاقته بموافقتي الامنيه الي اني كنت انتظرها من ايام الايفون 1
http://www.ankawa.com/forum/index.php/topic,611675.0.htmlبعدين جتني المظيفه, سالتني انته عندك جنسيه امريكيه لو كرين كارد لو جاي فيزة سياحه لو شنو ؟ كلت هذي اكيد معجبه وتريد تتعرف
جاوبتها كتلها عزيزتي اني هجرة لجوء وشوفتها الكيس مال اي او ام .. فنطتني ورقه زرقاء وكارت ابيض بعدين اني عرفت انو هذا هو ال اي 94 او ما يسمى بالوايت كارد وكالتلي هذني عبيهن لان امريكا تطلبها من كل واحد يدخلها.
اني بقيت صافن بالورقتين وسالت الحاته الكاعده يمي فطلعتلي مجله من المقعد الكدامنه وفتحتها على صفحه بيها شلون نملي هالاستمارتين. الورقه الزركه مكتوب بيها من ضمن الشغلات هل تحمل اكثر من عشرة الاف دولار وسبب الزياره والخ اني عبيتها وبقيتها يمي علساس ياخذوها مني من نوصل لامريكا. بس اشو من وصلنا محد سالني عنها لكن موظفي ال اي او ام كالولنا معليكم بهالاستمارتين لا تملوها لان احنا محظرين لكل واحد استمارتين مثلهم ونمليها بدالكم ونقدمها انتو لا تدوخون نفسكم.
وجان نوصل امريكاااااا ... واشوفلك نيويورك من الجو ... وبدينا نهبط بمطار جي اف كي ساعه سته المغرب تقريبا بتوقيت نيويورك وهنا شعور غريب لان هذي اول لحظات الوصول الى الولايات المتحده .. طبعا الرحله كانت متأخره شويه عن موعدها بالاقلاع فالطيار بجلها بحيث جان يمشي قريب ال 1000 كيلومتر بالساعه سرعته
فوصلنا عالموعد وهبطنا بسلام والحمد لله ودخلنا مطار نيويورك ولكينا موظفين ال اي او ام بانتظارنا, واخذونا على قاعه شرحولنا شويه تعليمات واخذو قسم من الشغلات الموجوده بكيس ال اي او ام وسالونا الي شايل اكثر من عشرتالاف دولار يكول .. طبعا الكل غلس
ونطونا ال اي 94 الوايت كارد مكبوسه وياه فيزة الدخول ويلبسوكم باجات بيها الاسم وتفاصيل الرحله الداخليه ووقعنا على اوراق وبصمنا وكملو ملفاتنا واحنا كاعدين وودوها للامن ووراها اخذولنا بصمة العين والبصمات الالكترونيه
وراها اخذونا نستلم الجنط الكبار وقسمونا قسمين الي ولاياتهم قريبه ودوهم مباشرة, والي ولاياتهم بعيده مثلي ودونا فندق لاكوارديا ايربورت هوتيل تابع لمطار ثاني اسمه لاكوارديا بعيد عن مطار جي اف كي شي نص ساعه بالباص طبعا احنا شلنا الجنط حملناها بالباص ونزلناها للفندق والصبح رجعناها للباص طبعا الفندق مقابيل المطار شي خمس دقايق وكل كيس ينطوهم غرفه بالفندق مع وجبة عشاء ووجبة افطار بس الاكل جدا مو خوش بصراحه ما عجبني ولا اكلته لان جنت كلش نعسان وجنت ماكل بالطياره لكن الفندق لاباس ومريح ودافي وبيه تلفزيون وحمام مرتب وحتى مناشف وشامبو و شسوار خاليلكم
اكو انترنت وايرلس فري بالفندق لهذا جيبو وياكم ادابتر يعني نئاصه بالسوري تحول من البلك الاوربي المدور الى الامريكي المستطيل تلكوها بسوق ساروجه الوحده سعرها بين 50 الى 100 ليره هذي كلش تفيدكم بالفندق لشحن الابتوب والموبايلات وكذلك اول ايام بامريكا. وهذا موقع وصور فندق المطار الي بيتونا بيه :
http://www.hotellaguardiaairport.com/نمنا بالفندق والفجر جانا موظف من ال اي او ام كلش حباب اخذنا لمطار لاكوارديا وهنا بدت الامور تختلف عن الي شفناه بمطار بيروت واسطنبول, كلشي بفلوس ! يعني مثلا العربانات مالجنط لازم بفلوس اربع دولارات الاجار لكن ابو الاي او ام جابلنا عربانه كلنا نكلنا جنطنا بيها من الباص للمطار سويناها عشرين درب
وحتى الانترنت الوايرلس بالمطار اعتقد هم بفلوس !
المهم دخلنا المطار ورحنا عالوزن, الي يكمل وزن تكوله ودي الجنط للاشعه واتركها هناك ونطونا تكت الرحله وودونا قاعة التفتيش وهنا تفتيش جدا دقيق لا يقارن بتفتيش بيروت ولا حتى تركيا بحيث فلسوني تفلس حتى جيوبي فرغوها اني بصراحه جنت شايل 4 الاف دولار محد فتشني من طلعت من المزه بسوريا الى ان وصلت الفندق بنيويورك بس من دخلنا للتفتيش قبل منطير بالرحله الداخليه ابو التفتيش كالي تعال حباب فرغ جيوبك بهذي الطاسه وخلي عينك عليها لتنباك كتله استفااااد شنو وين كاعدين بالدولعي
طبعا اني هنا من كلي فرغ جيوبك استغربت وكلت انلاصت
بس وراها اشو شافها بس فلوس محجه كلشي كلي اخذها وكالي ولكم تو اميركا كتله بعديش وكعت كلبي انعل حظك
طبعا هو شلونه يشبه مايك تايسون ! يعني اني الي معتبر نفسي ضخم ضعت يمه وفوكاها الافندي ميلزم الفلوس بيده لابس جفوف وشايل مثل الملقط كتله اويي شنو هالنزاكه عيني تره فلوسي حلال يابه
بعدين اشو هذا جاب وصله زغيره وكالي افتح ايدك لك
كتله انا اخوووك انوخذنااا
اشو مسح ايدي بالوصله وكال انتظر شويه وراها شاف ايدي وكلي اشطح
وجان تجيني زميلته ام عيون الزرق الي خمطت قوطية الكوكاكولا مني
كالتلي لازم الابتوب يطلع من الجنطه ويدخل بالحزام وحده, ردت افتح الجنطه مخلتني كالت ميصير بعد شيبي احنا نتصرف انته ارتاح تاج راسي
المهم نتفو ريشي بالتفتيش وصرت طرزان بس يمكن مو الكل هيج بس الشباب اعتقد. لكن الحق يقال الموظفين جدا محترمين وتعاملهم راقي بعكس بعض النماذج العراقيين للاسف جماعة ال اي او ام بنيويورك يجيبون ويرزلون بينا
بالمناسبه من توصلون امريكا بالسلامه اذا عدكم وراها رحله داخليه من تستلمون الجنط الكبار لا تنسون تشيلون ليبلات الرحله السابقه الي على يدات الحقائب لان راح يخلولها ليبلات الرحله الداخليه.
وراها رحنه لقاعه كعدنه شويه وصاحونه عالطياره , واحلى شي انو الموظفه الامريكيه كالت جماعة ال اي او ام يجون للطياره قبل كل الناس حتى دخلونا قبل الامريكان نفسهم ! وحتى اتذكر بمطار بيروت دخلونا من باب مكتوب عليه للدبلماسيين وطاقم المطار واليو ان فقط ! طلعنا طكوك واحنه مندري
ركبنا طيارة الاميركان ايرلاينز واقلعت ساعه ثمانيه ونص صباحا تقريبا وكان المنظر جدا جميل لان طرنا فوق الغيم وانعكاس الشمس عالغيوم نطاها لون ذهبي منظره جدا حلو واخذتله شكم صوره بوقتها, بالمناسبه بمطار نيويورك ممنوع التصوير ديروبالكم واعتقد باقي المطارات هم نفس الشي !
الطياره مو جبيره نوع بوينك 717 والانترنت بالطياره بفلوس الساعه بسبع دولارات وكلشي مقدمولنا اكل خلال الرحله رغم انو الرحله كانت اكثر من 3 ساعات ونص من نيويورك الى مطار دالاس-فورت ورث, بس قدمو مشروبات مرتين وخالين مجله بيها بعض السناكس الخفيفه الي يريد يطلب وكلها بفلوس طبعا ! وتصورو حتى سماعات الاذن بفلوس يبيعوها بالطياره ! المظيفه الامريكيه شايله السماعات وتفتر بالطياره تصيح هيدسيت هيدسيت منو يريد هيدسيت ! عبالك دتبيع علج بالعلاوي
طبعا بالرحله الداخليه بعد متشوفون موظفين ال اي او ام وانما كلمن يحير بنفسه, بس هي الشغله مو صعبه تره باي مطار بالعالم سواء دولي او داخلي انتو بس شوفو التكت الي بيدكم والمسمى بوردنك باس هذا بس تشوفوه لاي موظف بالمطار خصوصا اذا موظف استعلامات او انفورميشن مباشرة من التكت راح يكدر يكوللكم يا تيرمنل تروحون وبيش ساعه طيارتكم هذي الطريقه اسهل واسرع من متابعة الشاشات الكبيره بالمطارات وحتى لو متحجون انكليزي بس شوفوهم التكتات وهمه يدلوكم.
المهم هنا اني وصلت لان هذي مدينتي لكن اكو عوائل جانو ويايه بالفندق غادرونا من نيويورك الى غير ولايات واكو جوي ويايه لدالاس ومنها يكملون رحله رابعه لغير ولايات.
مطار دالاس فورت ورث رائع جدا وحديث, نزلت رحت استلم الجنط الكبار من مكان اسمه الباكاج وهم لكيت نفس البوري العربانات بفلوس واني ماشايل خرده دولار, وهنا فادتني التايرات بالجنط الكبار وبالهاندباك , وبالمناسبه الجنط الكبار من وصلت وفتحتها شفتها على نفس الترتيب الي اني خالها عليه يعني ممفتوحه ابد من دمشق الى دالاس !
اني فري كيس يعني ماعندي كفيل بس الي عنده كفيل او عنوان ثابت بامريكا ورقم تلفون الافضل كتبو العنوان والرقم عالجنطه بقلم ابيض مالقماش يبيعوه بدمشق بالحلبوني لان اكو عائله خطيه ضاعتلهم جنطه بالرحله الداخليه يعني لا تعتمدون على الكارتات لان اغلبها تنكطع بالشحن وتضيع.
بالمناسبه اكو نقطه مهمه وهي فرق التوقيت بين الولايات الامريكيه, لان جان ويايه ولد طار من نيويورك لدالاس وبعدها علساس يطير لكاليفورنيا هذا خبصنا بدالاس على اركضو بسرعه طيارتي بعدلها ربع ساعه وتقلع, بعدين انتبهنه انو دالاس تفرق ساعه بالتوقيت اقل من نيويورك وهو العينتين ساعته ضبطها بالفندق على توقيت نيويورك الى ان اقتنع انو بعدله ساعه وربع يالله سكت
طبعا الاستاذ موظف المنظمه تاخر عليه اكثر من ساعه فبقيت بس اني وجنطي وحدي انتظر بالقاعه لان كل الواصلين ويايه راحو لاهلهم
بس بعدين لمحت موظفه حلوه بالمطار فعادي رحتلها كبل وبجيتلها
كالتلي هي عدها وقت هسه فودتني على حاسبه عامه بيها انترنت فري وسالتها عالعربانات شلون ماعندي خرده
كالت لا تاخذ بفلوس وانما تلكه عربانات متروكه بالبارك هذي اصحابها من يأجروها يتعاجزون يرجعوها لداخل المطار فيتركوها بالبارك وكالتلي من ترجع العربانه لمكانها يرجعلك يمكن نص دولار من اربع دولارات الاجار. بس اني استحيت منها وهم سالتها على صرافة ورقه كالت شتسوي بيها كتلها اريد اخابر ولد صاحبي بمدينة سان انتونيو بتكساس, جان تحلف بالطلاك لازم اخابره من تلفونها الشخصي وبالفعل كعدت اسولف بتلفونها فوك العشر دقايق
وبلغته يطمن اهلي بالعراق انو وصلت لمدينتي لان النت بالمطار ميفتح مسنجرات بس متصفح. وهذي كانت اول امريكيه اسولف وياها, بس صاحبي الناقص نسه يسيف رقمها حرامات جان خابرتها اشكرها
اما عن امريكا فشحجيلكم ؟ ماشاء الله لا قوة الا بالله, بصراحه الي شفته بيها خلال هالكم يوم شي جدا مبهر من شوارع الى بنايات الى ناس الى تعامل الى تقدم ! يعني شي يصيب الانسان بالدهشه بكل ساعه وبكل شي يمر عليه خصوصا من يقارنه باللي شافه بالعراق وبسوريا !
اني مشفت هوايه شغلات للان بس طلعت مرتين زرت محلات الولمارت هذا كلشي بيبيع ورحت لمحل بيست باي هذا للاكترونيات وشفت محلات روس هذا اكثر شي ملابس ومحلات فييستا هذي للخضروات والفواكه طبعا نص الخضروات ماعرفتها عبالك داخل عالم البحار مو محل مخضر
واكو بعد سيرز وكروكر و فرايز وسيف واي وهوم ديبو وتاركت بعدني مشفتهم انشالله عالايام الجايه اخوطها
طبعا كلشي متوفر هنا ولو الاسعار مو كلش ارخص من دولنا ومرات النوعيات هم مو كلش احسن بس بصوره عامه اذا انتو ما مشترين شغلات فلا تشترون بس اذا عدكم وتسوه جيبوها تفيدكم وتفرقلكم شكم فلس بالبدايه اقصد ملابس وباقي الامور الشخصيه, ادويه اذا تكدرون جيبو الامور المهمه الي متعودين تستعملوها بسوريا او بالعراق لان التامين الصحي هنا يتاخر من شهر الى شهرين ومرات اكثر بس من يطلع كارت المدكيد يحسبولكمياه باثر رجعي من تاريخ دخولكم لامريكا. الادويه طبعا بالجنط الكبار وكل دوه بعلبته وبداخله النشره الدوائيه بالانكليزي. اما اذا عدكم ادويه تستعملوها بالطياره فخلوها بالهاندباك بس ارفقو وياها تقرير طبي بالانكليزي مختوم من طبيب احسنلكم.
بالنسبه للتلفونات اي جهاز رباعي الشبكه يشتغل هنا ان شاء الله, يعني ايفون اندرويد نوكيا الحديث كلشي شغال بس المهم يكون ممقفول على شركه معينه, وعموما الاجهزه الحديثه اغلبها رباعية الشبكه يعني كوادباند وبيها تردد 850 ميكاهيرتز, وتكدرون تجيكون ترددات اجهزتكم من هذا الموقع :
http://www.gsmarena.com/طبعا هذا الكلام عن اجهزتنا العاديه ام السيمكارد المسماة نظام جي اس ام وهي هنا على شركة اي تي اند تي وشركة تي موبل وشركة سمبل موبل التابعه الها, اما الاجهزه الي تشتغل بدون سيمكارد فهذي تلكوها هنا على شركات فرايزون وسبرنت ومتروبيسيس وكركت واضن كذلك شركة ستريت تولك الي شفتلهم اعلان بالولمارت عرض على ايفون 5 سعره 649 دولار عدا الضريبه بس يحسبولكمياها اقساط تدفع 25 دولار بالشهر بدون فوائد هذا سعر الجهاز اما الخدمه فهي كلشي مفتوح مكالمات ورسائل وانترنت ثريجي واتصال دولي ببعض الدول هذي كلها ب 45 دولار شهريا بدون عقد اذا الجهاز من عندك اعتقد او ممكن عقد سنه اذا اخذت الايفون ممتائكد بس عموما العرض بادي من شهر الواحد ويخلص بنهاية الرابع لكن اني شفته ميفيدني لان الجهاز ماياخذ سيمكارد ومقفول على شركة ستريت تولك وهذا اعلانهم:
http://iphone.straighttalk.com/وهذي خدماتهم:
http://www.straighttalk.com/وهذي مواقع باقي شركات الاتصالات وعروضها المختلفه بيها خطوط مسبقة الدفع وبيها لاحقة الدفع بعقد سنتين مع او بدون جهاز:
http://www.wireless.att.com/http://www.t-mobile.com/http://www.mycricket.com/http://www.metropcs.com/وهذا موقع وبرنامج يطلعلك تغطية كل شبكة موبايل بمدينتك عالكوكل مابس, البرنامج للابتوب والايفون والاندرويد:
http://www.rootmetrics.com/check-coverage/طبعا هنا الي يخابرك هم يخصم من رصيدك لهذا كثير ناس يفضلون الاشتراك المفتوح الدقائق انلمتد و يكولون افضل شي موجود هسه هو شركة سمبل موبل التابعه لتي موبل وهذي تنطي كلشي مفتوح مكالمات ورسائل دولي وانترنت ثريجي بدون عقد سنوي وباربعين دولار شهريا عدا التاكس, يمكن التاكس بولاية تكساس 8 وربع بالميه.
وهذي عروض شركة سمبل موبل ينطوك بس سيمكارد بعشر دولارات تشتروه وتمشون اموركم باجهزتكم اول ايام الى ان تلكون شغل انشالله :
http://www.mysimplemobile.com/index.aspxوالي ماجايب وياه موبايل هم محلوله انشالله ولو شوي تتاخر الى ان تحصلون الفود ستامبس تكدرون وراها تقدمون على التلفون المجاني جهاز وخط وشاحن يوصلك للبيت وينشحن كل شهر 250 دقيقه محليه واذا خلصت الدقايق قبل الشهر ممكن تشترون 250 دقيقه اضافيه اعتقد بخمس دولارات, وهذي ثنين من المواقع بهالخصوص :
http://www.freegovernmentcellphones4u.com/http://www.freegovernmentcellphones.net/اني بصراحه اجلت شغلة شراء موبايل جديد لان جايب ويايه بس هالاربع الاف واريد اشتريلي سياره انشالله لان يكولون جدا مهمه للحصول على عمل والسيارات هنا الي تلكيها نضافه وسط تتراوح بين 3 الى 5 الاف واني بعدني ممدور لان حتى اجازه ماعندي لازم انتظر يوصلني السويشال حتى اكدر اقدم امتحان النظري
طبعا سياراتهم هنا بدالاس اغلبها دفع رباعي لو بيكبات من هاي العاليه الضخمه وهي هذي تكساس كلشي بيها جبير وهذا معروف عنها وهنا من ينفتح هالموضوع ويه الامريكان يكولولك لعد شعبالك ولكم تو تكساس
سياراتهم تشوفها اغلبها سته لو ثمانيه سلندر فور ويل درايف رغم ماعدهم لا ثلوج ولا رمال .. علويش هالدفع الرباعي متدري
وهذي السيارات بلوعه مالبانزين رغم البانزين عدهم مو كلش رخيص هنا اضن ارخص نوع سعره شوي اقل من 3 ونص دولار للكالون !
بالنسبه لاجازة السياقه يكولون الامتحان النظري اسأله اختيارات ويمكن لازم نجاوب على اغلبها صح حتى ننجح بس يكولون الامتحان مو صعب, وراها نقدم عالعملي ويطلع وياك ممتحن يشوف سياقتك ويقيمك, تفاصيل موضوع اجازة السياقه والكتيب موجوده بهالمواقع وكلمن وولايته:
http://www.dmv.org/http://www.driverlicenseservices.org/بالنسبه لاشتراك خط الانترنت بعدني معرفت شنو الافضل هنا بس شفت عروض خرافيه .. مثلا شركة اي تي اند تي مسوين عرض سرعة الخط 18 ميكا بسعر 28 دولار شهريا عقد لمدة سنه !
اما التلفون الارضي فاله بدائل كثيره اصرف منه مثل جهاز الماجك جاك وجهاز نت تولك وجهاز فوناج وجهاز اوما وغيرها, هذني يكولون ارخص وبيها اتصال دولي وميزات كثيره جدا واحسن بكثير من الاشتراك بخط هاتف ارضي, وهالاجهزه متحتاج وجود حاسبه بس تحتاج خط انترنت, وهذي مواقعهم:
http://www.magicjack.com/http://www.nettalk.com/http://www.vonage.com/http://www.ooma.com/طبعا بالولمارت وبيست باي وباقي المحلات كلهم خالين اعلانات ينطون كردت كارد خاص بيهم ولو ميشملني هسه لان بعدني جديد هنا بس شفت عروض واغرائات كثيره لعمل كردت كارد يعني من تشترون منهم كلشي متدفعون كاش بس يقسطون الشغلات على ست شهور او سنه او سنتين وبدون فوائد حسب مبلغ الفاتوره مع بعض الخصم البسيط على اول فاتوره
بس بصراحه اشو من سالت الناس هنا كل واحد يكولي شكل, ناس تكول سوي كردتات واشتري بالدين وسدد حتى يقوى الكردت هستري, وناس تكول تره كلما جنت مشتري بالدين حتى لو دتسدد بمواعيدك تره كله يعتبروه دين ويعتبروك مطلوب وبالتالي كثرة الكردت كاردات تضعف الكردت هستري ! اصلا واحد هنا كالي لا تسوي حتى كردت بالبنك واكتفي بحساب الاي جيك ان اكاونت نوع دبت ولا تدخل بمعمعة الكردت كاردز
يعني اختلف العلماء على هالسالفه !
اما شغلة الكردت كارد اذا نحتاجه للنت فموجود يبيعون فيزا كارد مكتوب عليها كفت كارد هذي اكو بيها مشحونه بمبلغ معين وانته تشتري الكارد مثلا بمية دولار ومن تخلص الميه ينذب, بس اكو ريجارجبل يعني تشتري الكارد فارغ مابيه فلوس يمكن ب 3 دولارات وانته تعبيه من ابو المحل براحتك كل فتره يعني هذا مو دسبوزابل.
طبعا شفت اختلاف بالاراء بين العراقيين هنا مو بس على شغلة الكردت كاردز وانما في كثير امور, مثلا مسئلة شراء السياره .. واحد يكولي اخذلك ياباني احسن شي وواحد يكول اخذلك كوري مواصفات وسعر اصرفلك وواحد يكول لاتتعب نفسك اخذلك امريكي وريح بالك غراضها ارخص وسعرها مناسب
وبالنسبه لشركات الموبايل هم شفت نفس الاختلاف بالاراء واحد يكول شركة سمبل شبكتها مو خوش والثاني يكول اي تي اند تي احسنهم والثالث يكول اخذلك خط مسبق الدفع من تي موبل
فاني كتلهم اكولكم
اني بعد ماسال عراقي اروح اسالي امريكي احسنلي ويا حبذا لو كانت امريكيه بعد احسن
الكيس وركر مالتي هم عراقي وداني قدمت عالسوشيال نمبر, طبعا بنيويورك موظفين ال اي او ام كالو الجواز ضموه بعد متحتاجوه وكل اعتمادكم عالوايت كارد ! اشو موظف السوشيال كالي نطوكم معلومات خاطئه لان لازم اشوف جوازك ! وراها رحت دافتح حساب بالبنك هم رادو الجواز واصلا ماعترفو بالوايت كارد وكالو انتظر يطلعلك هوية العمل او اجازة السوق او هوية الولايه وجيبها ويه الجواز حتى نفتحلك حساب لان لازم هويتين بيها صوره هذا بانك اوف اميركا بس بانك جيس وبانك ويلس فاركو ماسالتهم بعدني. بالمناسبه بانك جيس مسوي اعلانات الي يفتح حساب يمهم ينطوه 150 دولار هديه ماعرف بعد كم شهر من فتح الحساب.
المنظمه اطوني صك ب 80 دولار هذي اول دفعه من مبلغ الرسبشن اند بليسمنت المسماة بمبلغ الويلكم وولاية تكساس يكولون تنطي بس 925 للشخص مو مثل كاليفورنيا تنطي 1125 دولار. طبعا بعد ان يخصمون منها شكو شغلات يجهزوك بيها وماعرف شكد راح يصفالي من المبلغ. وكالي الكيس وركر منكدر ننطيك كل المبلغ دفعه وحده حتى لا تاثر عالكاش والفودستامبس, بالمناسبه الي فهمته انو لازم الشخص ميزيد دخله الشهري عن الف دولار ولازم السياره اليشتريها ماتزيد عن خمسة الاف دولار والا يقطعون عنه المساعدات. وهي اصلا مساعدات بسيطه للسنكل وانشالله ربنا يغنيني عنها بشغل حتى واحد يبدي يندل دربه شويه. ولو اني اصلا بعدني ممقرر ابقى بدالاس لو اغير الولايه لان اني كانت ولايتي اول مستلمت الموافقه قبل خمس سنوات كانت فلوريدا بس بعدين همه حولوني على دالاس ! يجوز اروح لفلوريدا عندي صديق هناك او يجوز ابقى بدالاس اذا لكيت شغل بصراحه بعدني حتى حقائبي ممفرغها وداسال العراقيين هنا واشوف والله كريم.
واني لان سنكل خلوني على برنامج الرفيوجي كاش اسيستانس مختصرها ار سي اي وحسب الي فهمته بهالبرنامج ينطون للسنكل بحدود ال 200 دولار كاش شهريا مع 250 دولار اخرى للاجار يعني المجموع بحدود 450 دولار شهريا للشخص السنكل هذني اول اربع شهور, اما ثاني اربع شهور يعتبرون الشخص علساس لكاله شغل فيتوقف مبلغ الاجار وينطون بس مبلغ الكاش لكن
عرض المشاركات
