عرض المشاركات

هنا يمكنك مشاهدة جميع المشاركات التى كتبها هذا العضو . لاحظ انه يمكنك فقط مشاهدة المشاركات التى كتبها فى الاقسام التى يسمح لك بدخولها فقط .


مواضيع - دبس و راشي

صفحات: [1]
1
مساء الخير اخوتي واخواتي.

كلنا يعلم مدى المعلومات التي يقدمها هذا المنتدى( البيت ) الرائع لكل  الذين لديهم سفر بصورة عامة ولطالبي اللجوء بصورة خاصة .
من خلال النصائح والتجارب التي يرويها اعضاءه الكرام امثال (  النعيمي وجار الانتضار و حسين الجبوري و تيولب ( الله يذكرها بالخير) وابو مريومه وصفاء الكرخي وستيفن اس اي في ( ابو ليونا الورد) ونور الدين وعراقي نبيل ( ابو علي الرائع) وسنكل مان ( صاحب احلى وارقى التحليلات )و ألن في بلاد العجائب ( والله الك وحشة يا ألن ).واعضاء كثيرون( أقدم اعتذاري الشديد الهم لان ما تحضر اسمائهم في بالي) وصلوا الى امريكا ولا زالوا يرفدوننا بكل ماهو جديد ومفيد للمهاجر الجديد.

وكما تعلمون في فترة من الفترات كنت مواضب على كتابة اعداد المسافرين وبشكل يومي . ولكن لظروف خاصة بي توقفت عن الكتابة في هذا الموضوع.
الان وانا اشعر بواجبي كواحد استفاد من هذا المنتدى ( البيت) وكرد للدين الذي في رقبتي قررت ان اكتب لكم بعض النصائح والتعليمات حول السفر ( خاصة وكثير منا لم يسبق له ان سافر خارج العراق عن طريق المطار) وفي نفس الوقت اجيب على كل اسئلتكم حول السفر من امور الجوازات وامور الحقائب والمستمسكات التي قد تحتاجونها عند السفر . وموضوع اخواتي المسافرات في حال كان هناك ( حمل) والترانزيتات و اجور النقل من والى المطار .

ارجو من الله ان يوفقني بنقل اوضح الصور لجنابكم الكريم .
,,,,,,,,,,,,,,,,,,,,,,,,,,,,,,,,,,,,,,,



السفر بوجود ترانزيت او بعدم وجود ترانزيت:
1- السفر بدون ترانزيت.

في هذه الحالة يكون خط الرحلة ( بغداد-عمان-امريكا). من حق كل مسافر تجاوز السنتين من عمره ان ياخذ معاه جنطتين وزن كل واحده 23كغم+ هاند باك بوزن 5-7 كغم+ لابتوب.ومن حق المراءة ان تاخذ معها جنطتها النسائية.

2- السفر بوجود ترانزيت في خط الرحلة .

الترانزيت يكون بين بغداد-عمان( ترانزيت ) امريكا ( يعني ينزل المسافر باحدى هذه الدول) . اما المانيا(فرانكفورت)او فرنسا(باريس) او تركيا (اسطنبول) او مصر(القاهرة). يعني خط الرحلة ( بغداد-عمان-ترانزيت-امريكا.وفي هذه الحالة من حق كل مسافر تجاوز السنتين من عمره ان ياخذ معاه جنطة واحدة بوزن  23كغم+ هاند باك بوزن 5-7 كغم+ لابتوب.ومن حق المراءة ان تاخذ معها جنطتها النسائية.

____________________________________________________________

السفر بوجود اطفال دون السنتين:
كثير من الاخوة والاخوات يراسلوني ( على الخاص) هل صحيح من لديه طفل عمره اقل من سنتين المنظمة لاتسمح له بالسفر؟؟؟؟
الجواب : كلا . يسافر الطفل ويه اهله ويشبع نوم بالطيارة .
 ونصيحتي للام ان تاخذ وياها عربة الطفل ( العربانه) وتطلب من موظف الخطوط الجوية ان مااا يشحن ( العربانة) وية الجنط الكبار . لان راح تساعد هااي العربانة الام بالمطارات الي راح ينزولون بيها . يعني تكدر الام تاخذ راحتها في فترات الانتظار بحيث تضع الطفل بالعربانة حتى ينام  احسن من ماتبقى شايلته على صدرها وتتعب بشيلته .وتكدر بنفس الوقت ان تاخذ هيه قسط من الراحة من تخلي الطفل بالعربانه.
( وسويتها وية كثير من الاعضاء الي سافروا وجانوا عدهم اطفال ) .

نجي لرضاعة الطفل يعني ( الممه) . انصح كل ام اذا جانت محضره ( ممه ) لطفلها ان تبقى هااي الممه باديها . لان  اذا دخلت هااي الممه وبيها الحليب باجهزة الـــ X RAY  الموجودة بالمطارات لاح يتلف البروتين الموجود بالحليب( اني هيج سامع ) فدائما اوصي الامهات ان بيقون الممية باديهم . أما بالنسبة لباقي السوائل والاكل فمابي اي ضرر من يدخل بهذه الاجهزة.

المراءة الحامل. ابد لاتدخل من خلال اجهزة السونار . لما فيه مضرة على الجنين . ودائما خلي دكول للمفتشين او المفتشات او هي في فترة حمل ( مهما كانت فترة الحمل سواء بالاشهر الاولى او الاخيرة) .
اما بالنسبة لاخواتي اللواتي لديهن حمل بالاشهر ( السادس او السابع او الثامن ) يعني الحمل مبين عليهن .. موظف الخطوط الجوية الملكية الاردنية راح يطلب منهن ان يجيبون تقرير طبي من الدكتورة او الدكتورالموجودة بالمطار   يكتب بهذا التقرير ان المسافرة لديها القدرة على السفر . ( هااي الدكتورة او الدكتور متواجد بالمركز الصحي بالمطار)


الاطفال الي طلعوا جوازات من جانت اعمارهم صغيرة وصار وكت السفر وهمه كبار بالعمر ( يعني صورته بالجواز صارت ماتشبه صورته الحقيقية)

عادي جدااااااااا. يسافر وماعنده اي مشكلة .لان حاسبات المطار بيها نسخ المستمسكات الي قدمها اهل الطفل للحصول على جواز.
وللاطمئنان اكثر .. يكدر اهل الطفل ان يجيبون وياهم هوية الاحوال المدنية او شهادة الجنسية ( بصورة حديثة) ويقدموها لظابط الجوازات ( اذا ) طلبها منهم.. وخلي اطمئنكم  الى هسه ما شفت مسافر رجعوه من المطار لان صورته بالجواز ماخذها من جان صغير وهسه شكله صار يختلف لان ( أكل هوااية وصار جبير ) هههههههههههههه.

________________________________________________

الحقائب:

نصيحتي لكل مسافر ان يشتري حقائب ذات عجلات ( يعني ام الجروخ وبيها يدة سلايد) .  مثل ما موجوده بالصورة
http://www.supplierlist.com/prod_img/modsluggage/2854_Travel_Luggage_Set.jpg
لان سهلة بالنقل وشكد ماتخلي بيها وزن  من تسحبها ما تشعر بتعب .  وبالوان زاهية ( يعني حمراء او زرقاء فاتحة او صفراء او برتقالي ....) الخ. حتى تتعرف عليها راسا من توصل الى امريكا .اما حقائب الهاند باك فنصيحتي الكم ان تاخذون هاند باك الي تنشال على الظهر ( مثل جنط طلاب المدارس) لان حملها سهل + وزنها راح يتوزع على كل جسمك من تخليها على ظهرك . وتبقى ايديك فارغة وماشايل بيها شيء او تكدر تستخدم ايديك وتسحب بيها جنطة او جنطتين كبار( ام الجروخ) والهاند باك مخليها على ظهرك.
مثل الي بالصورة ادناه
http://www.aliexpress.com/item-img/Hot-selling-fashion-Shoulder-bags-men-sports-bags-black-travel-bags-laptop-bags-for-14/484584911.html
ونصيحة ان تكتبون على الجنط عنوان وتلفون وايميل الكفيل . حتى لاسامح الله اذا ضاعت او اتاخرت الجنطة بالوصول يتصلون على كفيلكم .
والي ماعنده كفيل خلي يكتب عنوان وتلفون وايميل المنظمة الي راح تكفله .او ياخذ عنوان احد الاعضاء الموجودين بالمنتدى والي طالب اللجوء راح يوصل لنفس ولايته ويكتبه على حقابئه( واني متاكد الاخوة والاخوات الموجودين بامريكا مراح يقصرون).
ونصيحة ان تخلون بالهاند باك شحاطة خفيفة ( او تكرمون نعال اسفنجي + زوج جواريب) لان ضروري جدا تريحون اقدامكم اثناء السفر ( لان مدة السفرة بين العراق وامريكا يومين تقريبا ) وانتوا طلعوا حاسباتكم واحسبوا اقدامكم شراح يصير بيها !!!!!!!!!!!
اخواني ,, دائما اكوول السفر راحة مو كشخة .. يعني البسوا ملابس تريحكم بالسفر مو تشلع قلبكم .. مرات يجي المسافر وهو لابس قاط ورباط وكاوي شعره او شعرها .. والله وكيلكم اول نقطة تفتيش للجنط ( يعني شيل وحط) تلكة الرباط افتر ونزل يم الحزام .. والحزام افتر وصعد للرقبة !!!!! وراحت الكشخة وضاع كوي الشعر ههههههههههههههه.

________________________

أجور النقل عن طريق سيارات المطار ( الشركة العامة لنقل الوفود)
النقل بوسيلتين. الاولى سيارات صغار ( 4 نفرات) وسعرها من ساحة عباس الى باب الصالة 35 الف دينار ( رايحة للدولة) وتبقى يم المسافر اذا يريد ينطي اكرامية  للسايق او لا ( وهااي السيارة ماتفيد كل مسافر عنده اكثر من 4 جنط كبار ) لان هااي السيارات ما بيهن سيبايات . يعني جنطة السيارة تاخذ بالزايد 4 حقائب كبيرة فقط.
والوسيلة الثانية سيارات ال GMC 2012  وسعر النفر بهااي السيارة عشرة الاف دينار من ساحة عباس  ابن فرناس الى الصالة. وهااي السيارة تتسع لسبعة مسافرين مع حقائبهم يعني ال GMC  تقبط بسبعين الف دينار من ساحة عباس ابن فرناس الى الصالة . اما اذا عائلة( مهما كان عددها ) رادت تحجز الــ GMC  كلها فلازم تدفع اجرة السيارة كلها . وايضاتكدرون تجون يم ساحة عباس قبل سفركم بيومين او اكثر تتفقون وية سايق( طبعا لازم تنطوه بخشيش) حتى ياخذكم من باب البيت  ويبقى وياكم الى ان تستلمون تذاكركم من مسؤولين السفر بالمنظمة وراسا تتجهون لداخل المطار .

______________________________________________
عمال الخدمة ( الحماميل)
في كل نقطة تفتيش ( لازم تنزل بيها الحقائب) اكو حماميل جاهزين وية عرباناتهم ( الي تشيل 4 حقائب كبيرة ). اكثر شيء تنطي لكل عامل هو عشرة الاف دينار .

واذا ما تريد تاجر عامل ( حمال ) العرباين موجودة في باب الصالة وبلاش.

__________________
المبالغ المسموح للمسافر باخذها .
عشرة الاف دولار لكل مسافر + مائة الف دينار عراقي . اما بالنسبة للذهب فالوزن المسموح به هو مائة غرام .

ملاحظة مهمة جدا جدا :
اولا ما تدخل للصالة خلي ( حزامك + مفاتيحك + جكايرك+جداحتك+موبيلاتك) بجنطة الهاند باك . لان كل جهاز كشف معادن موجود بالصالة راح يدك عليك من تمر من خلاله وانته شايل هااي الاشياء . وبالتالي لو المفتش راح يطلب منك ان ترجع تخليهن بجهاز السونار  ( وهذا بي تأخر الك )لو راح يقوم بتفتيشك يدويا .

هذه الخطوط العريضة لكل مسافر ( الله راح يفتحها بوجه ) ويسافر عن طريق المنظمة . وأي سوال يخطر ابالكم ان شاء الله تعالى اجاوبكم عليه . وهنا تجدر الاشارة الى اني موجود على الجات كل يوم خميس من الساعه الــ10 مساءا الى الساعة الــ 12 .

تحياتي
أخوكم \ دبس و راشي

2
صباح الخير اخوتي واخواتي.
اليوم سافرت اختنه الغنية عن التعريف ( أم أديان) مع زوجها الي كان مشارك ويانه بالمنتدى تحت اسم ( الحلم الوردي) .
حقيقة عائلة زادتني شرف ان اساعدهم بيوم سفرهم.
عائلة طيبة واصيلة وراقية بمعنى الكلمة.
وحملتني ( ام اديان) و زوجها ( الحلم الوردي) امانة . وهي السلام لكل الاخوة والاخوات في عينكاوا. وشكرها وشكر زوجها الجزيل للكل.
وتمنياتهم للجميع بالسفر العاجل .

تحياتي
أخوكم \ دبس و راشي

4
مساء الخيـــــــر والامن والامان على كل العراقين.
  اخوتي وأخواتي
بالنظر لكثرة الرسائل الي استلمها على الخاص . والي تطلب مني ان انزل اعداد المسافرين الى امريكا ( عن طريق الــ أي أو أم )  تحت  عنوان خاص بهذا الموضوع.اضطريت ان البي طلبكم . وهااي اول الاعداد الي اكتبها تحت هذا العنوان الجديد.

اليوم هو الاربعاء والمصادف 20\3\2013 .  الرحلة كانت بالـــ( 10:00 ليلا )وكان عدد الي سافروا ( 42 شخص ) اكثرهم عوائل  ارقام كيساتهم 102-109-111-113-115-117-121-127.. وبيهم كيسين  أس أي في  مقابلين سنة 2011 .
ان شاء الله يوصلون بالسلامة.
تحياتي

5
صباح الخير  والامن والامان ( ان شاء الله ) على عراقنا الجريح . وعلى كل العراقين .

بصراحه شفت بعض الصور عن التفجيرات الي صارت البارحة ..... ضليت ساكت ما اعرف شأكوول وشأحجي !!!!!!!!!!!!
بس لكيت هااي الصورة .. الي اعتقد اختصرت كل الكلام الي من الممكن اكولة .
وبالاخير . حبيت اكوول
حسبي الله ونعم الوكيل
والجنه للشهداء الي سقطوا البارحة ( وما الهم اي ذنب ) . والصبر والسلوان لذويهم . والشفاء العاجل لكل الجرحى.
وسلامتـــــــــــــــــك يـــــــــــا وطـــــــــــــــــــــن.
اخوكم دبس وراشي

6
اخوتي واخواتي ..
اكثر الي يعرفوني بالمنتدى يعرفون حالة الملف مالتي والتي هي :
تقديم 10\2010
استلام كيس نمبر -121- بعد شهر من التقديم ... طبعا عائلتي ويايه بالكيس (4اشخاص)
مقابلة اولى 6\2012
فحص طبي 7\2012
مقابلة محلفين 8\2012
استلام موفقة مرتبطة بالتجيك ( دفلرلتر ) 11\2012 وتحول الملف الى هولد .
اتصال بالكفيل 2\2013 واضافة المدينه والمطار .

سوألي هل الاتصال بالكفيل يعني اكو تقدم بالتجيك الامني ؟؟ والى اي مرحلة ؟؟لان اسمع من بعض الاخوة اكو مرحلة اولى وثانية ...الخ.

ممنون من كل الردود والاجوبة والاستنتاجات .

تحياتي

7
مساء الخير اصدقائي
اليوم صارت حاله ( مع شديد الاسف ) بمطار بغداد  الدولي والله مردت قلبي وكلللللللللللللللش انقهرت ..الي صار كلاتي :-
اجتي العائله وجانت عباره  عن ( اب + زوجته + 3 من بناته ) وجانت العائلة مسيحية ...وره ما خلصوا كل اجراء التفتيش ( من عباس ابن فرناس ولغاية الكاونتر الخاص بالخطوط الجوية الملكية الاردنيه )  وجانوا اي او ام مقدمين من سنه 2009 وسلموا الجنط واستلموا التذاكر ( طبعا دا اختصر كثيييييييييير من اجراءات التفتيش بكتابتي  حتى اختصرلكم الموضوع ) . واتجهوا الى ضابط الجوازات حتى يختمون جوازاتهم ( ختم الاكزت  او ختم الخروج ) الضابط كال للاب انته ما تكدر تسافر لان  شوووووووووووووووووووووووفوا المصيبة ــــــ جوازك بي اوراق مفقودة ـــــــــــــــــــــــ يعني اكو صفحات من الجواز مفقودة  واعتقد جانت 3 صفحات !!!!!!!!!!!!!!!!! .. يعني اكو 3 صفحات من  جواز الاب مشيوله  وهو نفسه الاب ما يعرف وين وشلون وشوكت انفقدت ,,والمصيبة جوازه هذا مسافر بي من قبل الى سوريا !!!!!!!!!!!!!... وهنا بدت الاقاويل والقال والقلت( وأحنه عمة عيني ما نشتهي نثرد بدم الميت )  ,, هذا الي يكوول هو ( الاب ) شاكهن وشايلهن من الجواز لان بيهن اختام وداخل الى دول وميريد احد يعرف هو مسافر لهااي الدول  ,,, والثاني يكول يمكن عدهم زعاطيط بالبيت شاكيهن  وخافو الاب يعرف فكامت الزعاطيط وشالت هااي الصفحات المشكوكه حتى الاب ما ينتبه  ,,,وثالث يصنف ويكول لالالالالالالالالالالا الاب لف بيهن تتن وساوهن جكاره ...ومن هل الكلام الفارغ !!!!!!!!!!!!! المهم اخوتي ثقوا بالله اباوع على الاب وجها صار اصفر وعرك ومه يعرف شيسوي وشيكول ( وجان كللللللللللللش خايف ) ليذبوا بالسجن ( هاااي فوكاها ) بس للامانه ضابط الجوازات طلع ابن اوادم وكله تروح للشعبة القانونية بمديرية الجوازات في بغداد وهمه هناك راح يدلوك ويفهموك شتسوي ,, يعني رحلة ماجلان راح تبدي للاب  ( صاعد نازل بدوائر الدوله العراقية  وجيب ليل واخذ عتابة ) بدل رحلته الى امريكا بعد انتظار اكثر 3 سنوات ( يعني وره ما يكمل اجراءات حصوله على جواز جديد غير الي عنده هسه  راح تبدي معاناة انتظار جديده للسفر الى أمريكا عن طريق الأي أ, أم ) ,,,, المهم عفت الاب وعائلته وية موظف الاي او ام ومعاهم موظف من الخطوط الجوية الملكية الاردنية  ينتظرون جنط الاب ( وجان عددهن 8 ) ينزلوهن من الطياره ,,,( ده تتصورون الحاله  اخواااااااااااني ؟؟؟؟؟؟؟؟؟؟؟؟) اخواني واخواتي .. اقسم بالله وبكل المقدسات ماكدرت اباوع على زوجته او على بناته لان جنت متأكد اول ما اشوف وجوهن راح اطك من البجي .. لان بس من خلال تعابير وجه الاب تكدر تقره المعاناة الي جانت ده تعانيها هااي العائلة  وشلون جانوا متلهفين وما مصدكين راح يسافرون ( وكتلكم بالبداية هي عائله مسيحيه) ... المهم  نصيحتي الى كل من على سفر او من يقراء هذا الموضوع او الى اي زائر لهذا المنتدى الرائع ان يجيك جوازة  وان يحفظه بمكان أمين ..ومن يسلم جوازه الى اي شخص  خلي يتأكد من يستلم جوازه مره ثانية خلي يتفحص جوازه وعدد صفحاته  واختامه ,,,الخ
اخواني واخواتي ,,,, حادثة صارت اليوم امامي  ردت انقلها الكم حتى تنتبهون وتنبهون اصدقائكم وناسكم لان الحياة عبر ودروس
والدي ( الله يرحمة ) جان يكول ألي دائما ( ابني ...محد يتعلم ابلاش) .

وبالمناسبة عدد الكيسات اليوم جانت اكثر من 37 كيس متفرقة بين أس أي في وبين أي أو أم
قسم منها يبدي 113*** وقسم يبدي برقم 133***  يعني ماكو اي مقياس او معيار لتقدم او تاخر الكيسات
كل الي اترجاه  منكم اصدقائي شيء واحد بس .. اندعوا لهااي العائلة ان الرب يسهل امرها وتمشي معاملتهم بيسر وسلاسة حتى يكدرون يسافرون من جديد
 واندعولي ان الرب يسهل امري واموركم حتى نسافر
تحياتي وتمنياتي  ألي والكم بالسفر بدون منغصات او عراقيل .. واسف على الاطاله

دبـــــس و  راشـــــي

صفحات: [1]