8
السلام عليكم ورحمه الله وبركاته
شلونكم ان شاء الله تكونون بخير ابدي من الاول يوم سفري بتاريخ 2_2_09 موعد الطيارة خمسه ونص
الفجر موعد الاقلاع على الخطوط الالمانيه لفت هانزا بمطار القاهرة الجديد الحضور ساعه 2بليل الى المطار
ينتظركم موظف من اي او ام تعرفوة من الاكياس مال اي او ام تاخذها يعبركم الاختام الى موعد الطيارة
كل شخص ينطيه التذاكر والكيس ويكله يبقى بيدك حتى يشوف موظف المانيا يعرفك ويوصلك الى طيارة
امريكا ممنوع تفتح الظرف الي بالكيس المهم صعدنا تقريبا 4 ساعات وصلنا فرانك فورت ترانزيت ساعه وربع
طبعا تنزل تشوف موظف هم واكف يستقبلك يمشي وياكم بخطوة سريعه لان المطار جبير سريع سريع
يعبرك الاختام ويوصلك الى باب الطيارة تخلص مهمته...من المانياالىامريكا 10 نص ساعه مطار
ميامي
طبعا احنا كروب اكو دنفر اكو كاليفورنيا تكساس المهم ستقبلونا باب الطيارة اخونا الى مكتب
ختم بس النا غير المسافرين العاديين المهم بيدة قائمه ينادي اسم اسم تنطيه الكيس يفتحه ياخذ
بصمه اصابع بصمه عين وراها ينطوك باج مكتوب اسمك.. المدينه الي رايح الها واسم الكفيل ورقم المنظمه
الي ماخذة الكيس مالتك المهم نزلنا
وراها اخذونا الى فندق رجنسي المطار وزعونا على الغرف كل شباب اثنين بغرفه والعوائل غرفه او اكثر حسب كبر العائله المهم ورة ساعه جابو وجبه طعام كالو التجميع بالاستعلامات الجميع حاضر 4 الفجر
تروحون الى المطار كل شخص الى ولايته
اجوي بال 4 الفجر قائمه اسمك ينطيك ورقه i_94 هاي ورقه بيها معلوماتك الى ختم دخول امريكا
مهمه الي افتهمته لازم تكون حاضرة عند التقديم على الكرين كارت والجنسه لان جماعه مصر غير
البقيه احنا نسافر بجواز الصليب غير دول ياخذ فيزا على جواز العراقي جي
رحنا للمطار تستلم هناك التذاكر مال مدينتك ياخذك شخص الى طيارتك المهم تفتيش هناك قوي
المهم صعدنا للطيارة تقريبا 9 الصبح 30 دقيقه من ميامي الى تامبا المهم وصلنا بالسلامه عبرت البوابه
(استلم الكارثه )
عبرت باب الطيارة ادور على الموظف ماكو بميامي بالبوابه مال طيارة واكفين النا ينتظرونا اشو هنا ب تامبا
ماكو احد كلي (خايب هوب) المهم اكو كراسي كعدتت والكيس مال اي او ام بالوجه خليته انتظر هسه
يجي ورة نص ساعه كلت دكو الشباب الطيبه استلم اول بوري كلت خلي اروح اشوف الجنط شصار منها
رحت لغير بنايه نزلت واحد اجاني طاير وينك كتله انت وينك المهم الجنط ماخذيها مخليها يم الخطوط الي
جيت عليها اخذناها جاب السيارة اصعد حب كتله صار حياتي ...عاتبته كتله انت مو ابن عرب عبالي ما راح
تجي كال لا اني اعرف بيك من قبل اسبوع من نزل لك موعد طيارة اعرف راح توصل بفلان يوم فلان ساعه و لازم اجيك بس انتظرت يم الجنط لان لازم تجي عليها كتله لا يم بابا الطيارة المهم كافي لا تلح
انطلق كريندايز طلعنا كال اكيد جوعان كتله لا لان بميامي جابو النا فطور كل شخص كال اوكي جيد
خلي انروح للسكن كتله اوكي طبعا حجي و سوالف يا مواليد اسمك من يا منطقه بالعراق شنو شغلك
وصلنا السكن مجمع حلو لطيف دخلنا اهلا وسهلا المهم كال خلي افهمك الفلم انت واخوك كل شخص
425 دولار منحه لمرة واحدة من لحكومه بيها لازم اسكنك وارتب شقتك وانطيك مبلغ الي يبقى منها
كال انتو 850 دولار دفعت منها 150 تامين شقه و 35 دولار استمارة مال سكن المهم اوكي لهنا
المهم العقد سنه اني انصدمت كتله شنو سنه كتله بالدورة التثقيفيه كالو 3 اشهر لو 6 اشهر
كتله وثانيا اني ما اعرف كلش زين شنو وضعيه المدينه يجوز ما ارتاح بيها حتى احول كال لا النظام هنا
سنه طبعا شنو اله طفرت روحي كتله مااوقع كال لا تضوج شتريد كتله اريد المدير شيخ العشيرة كال اوكي
كريندايز انطلق رحنا للشيخ طلعت شيخه مديرة اهلا وسهلا سوالف كالت اي هنا النظام هيجي سنه
حجيت لا بمصر غير حجي كالت دائما الدورة غير الواقع المهم الشيخه ما قصرت خابرت المدير مال مجمع
حجت وياة احنا طلعنا للشقه المهم وصلنا كالت احنا سنه ب 550 دولار وعليك كل شي مي كهرباء
كالت 6 اشهر ب600 دولار سواها لك المدير وانت قرر المهم الموظف كال ترا مو كل صاحب ملك يقبل لاجي
يمه لان انت ما عندي تاريخ مال ايجار هذا موضوع ثاني نرجع اله غير وكت نفس حجي مصر كام يطابق
هيجي كالو النا هم مو كل صاحب بنايه يقبل فكرت كلت ميخالف ادفع فرق 50 دولار بس المهم نص السنه
حر نفسي وهمه كالو ندفع لك 3 اشهر لان الشباب غير العوائل طبعا الي افتهمته هيجي ترا مو شرط
تذبوها براسي بعد ما اعرف كلش هوايه بس اهم شي مدينتي بيها برنامج
match grant هذا عقد ويه الحكومه انو همه يدفعون لك 3 اشهر ايجار وخدمات ويحاولون يوفرون لك شغل
بس تقبل باي شغله تنعرض عليك اول شغله مو ترفضها لان راسا كل شي ينكطع عنك يكلولك
الزم الباب حباب
المهم قبل التوقيع شفت الشقه غرفه نوم صاله حمام مطبخ جديدة حلوة جابو اليه اثاث نظيف من المخزن
مال منظمه ولو كل ولايه تختلف عن الثانيه وهم كل مدينه الي اتوقعه لان الكروب الي جان ويايه يختلفون
عني بشغلات
تقسيم ال 425 احنا اثنين 850 دفعوا منها تامين 150 و 35 استمارة و 300 دولار خلو النا رصيد بسوبر ماركت نستري منه مواعين يعني مستلزمات الشقه وانطونا الباقي كل شخص 120 دولار مصرف جيب
اسف طولت عليكم وان شاء الله اكمل الباقي بغير وقت لا تنسوني بالدعاء وتحياتي لكم
وحياكم الله
عرض المشاركات